1, 2. (a) Ebigambo bya Yesu ebirukusangwa omu Matayo 24:12 bikabanza kuhikirra mu bantu ki? (b) Ekitabu ky’Engeso Ezabakwenda nikyoleka kita ngu Abakristaayo abarukukira obwingi ab’omu kyasa ky’okubanza bataikirize okugonza kwabo kuceka? (Rora ekisisani ekiri ha kutandika kw’isomo linu.)

YESU obwakaba ali omu nsi, akasoborra omulingo abantu bakaba nibagenda kumanya ngu ensi enu eri haihi kuhwaho. Omu bintu bingi ebi yabagambiire, akagamba: “Okugonza okwabaingi nukwo kulifuka.” (Matayo 24:3, 12) Abayudaaya omu kyasa ky’okubanza bayeforaga kuba bantu ba Ruhanga baitu bakaleka okugonza kwabo hali Ruhanga kwafuka.

² Baitu Abakristaayo abarukukira obwingi omu kasumi ako bakaba baine entekereza erukwahukana. Bakaba nibekamba kutebeza ngu “Yesu nuwe Kristo” kandi bakoleka okugonza kwabu hali Ruhanga, abaheereza bagenzi babo, na hali abo abakaba batakegere amananu. Abakristaayo banu bakaikara nibagumya okugonza kwabu hali Ruhanga. (Engeso Ezabakwenda 2:44-47; 5:42) Baitu eky’enaku, abamu hali bo bakaleka okugonza kwabo kwahora. Kinu tukimanyire tuta?

3. Kiki ekisobora kuba kyaletiire okugonza kw’Abakristaayo abamu kufuka?

 ³ Yesu akagambira Abakristaayo ab’omu Efeso ati: ‘Mukaleka okugonza kwanyu okw’okubanza.’ (Okusuku’rwa 2:4) Nikisobora kuba ngu Abakrsitaayo ab’omu Efeso bakahondera ekyokurorraho ekibi eky’abantu abagonzaga kwesemeza bonka. (Abefeso 2:2, 3) Efeso rukaba rubuga nambere abantu bakaba nibagonza muno obwomeezi obw’okwejarabya. Kandi abaingi omu Efeso bakaba basihani muno batarukutamu ebiragiro bya Ruhanga ekitiinisa. Eki bafahoga nukwo kwegonza bonka hatali kwoleka Ruhanga n’abandi okugonza kwonyini.

4. (a) Okugonza kweyongire kufuka kuta omu kasumi kanu? (b) Bintu ki bisatu nambere tusemeriire kwikaza okugonza kwaitu kugumire?

⁴ Ebigambo bya Yesu binu naitwe nibitukwataho omu kasumi kanu. Biro binu okugonza kw’abantu hali Ruhanga nikweyongera kukeeha. Omu kiikaro ky’okwesiga Ruhanga kumaraho ebizibu ebiri omu nsi, obukaikuru n’obukaikuru bw’abantu nibesiga ebitongole ebitairweho abantu. Okugonza kwabo nikweyongera kufuka. Okugonza kw’abaheereza ba Yahwe nakwo nikusobora kufuka nk’oku kyahikire hali ekitebe kya Efeso. Nahabweki leka tubazeho emiringo esatu nambere tusemeriire kwikaza okugonza kwaitu kugumire: (1) okugonza kwaitu hali Yahwe, (2) okugonza amananu g’omu Baibuli, hamu (3) n’okugonza kw’ab’oruganda bagenzi baitu.

5. Habwaki tusemeriire kugonza Ruhanga?

⁵ Noha ou tusemeriire kugonza kukira abandi boona? Yesu akagamba: “Gonza Mukama Ruhanga wawe nomutima gwawe gwona, nobwomezi bwawe bwona, namagezi gawe gona. Kinu nikyo kiragiro ekikuru ekirukubanza.” (Matayo 22:37, 38) Kugonza Ruhanga kitukonyera kworobera ebiragiro bye, kugumisiriza, n’okunoba ebibi. (Soma Zabuli 97:10.) Baitu Setani n’ensi ye balengaho kucekya n’okuhwerekereza okugonza kwaitu hali Ruhanga.

6. Kiki ekibaho okugonza kw’abantu hali Ruhanga obu kufuka?

⁶ Ensi ine entekereza egwire obu kirukuhika ha mulingo baroramu okugonza. Omu kiikaro ky’okugonza Ruhanga, abantu baingi bali “abegonza bonka.” (2 Timoseo 3:2) Omutima gwabo baguta ha “kwegomba okwomubiri, nokwegomba okwamaiso, nokwenyumiza okwobwomezi okutarumu.” (1 Yohana 2:16) Omukwenda Paulo akoleka akabi akaruga omu kwesemeza itwenka. Akagamba: “Baitu okutekereza okwomubiri nukwo kufa.” Habwaki? Habwokuba abantu aba mulingo gunu bafoka banyanzigwa ba Ruhanga. (Abarumi 8:6, 7) Abantu abamara obwire bwabo bwona nibaserra sente rundi nibaterana nibatekereza ngu baratunga okusemererwa bamalirra bagwire omu kabi.—1 Abakolinso 6:18; 1 Timoseo 6:9, 10.

7. Ntekereza ki embi erukusobora kukwata Abakristaayo omu kasumi kanu?

⁷ Abaikiriza ngu Ruhanga taroho, abo abagurukyagurukya Ruhanga obwaraaba aroho, hamu n’abo abatekereza ngu ebintu bikafoka bufoka bitahangwe, balengaho kusonasona abantu okutagonza Ruhanga rundi n’okubagamba ngu Ruhanga taroho. Balengaho kwoleka ngu abantu abarukumwikiririzamu badoma rundi tibasomere. Okwongerezaho, abantu abarukukira obwingi batamu abasayansi ekitiinisa kukira Omuhangi waitu. (Abarumi 1:25) Omukristaayo nauwe n’asobora kutwalirizibwa entekereza ya mulingo gunu. Enkoragana yaitu na Yahwe n’esobora  kuceka kandi n’okugonza kwaitu nikusobora kufuka.—Abaheburaniya 3:12.

8. (a) Bintu ki ebisobora kumaramu omuheereza wa Yahwe amaani? (b) Zabuli 136 n’etuhumuza eta?

⁸ Kusigikirra nk’oku tuli omu nsi enu eya Setani, haroho ebintu bingi ebisobora kutumaramu amaani. (1 Yohana 5:19) Baitu kakuba twikiriza kuhwamu amaani, okwikiriza kwaitu nikusobora kuceka kandi okugonza kwaitu haluwe nikusobora kufuka. Ekyokurorraho, nitusobora kutunga ebizibu habw’okukura omu myaka, obwomeezi bwaitu kuceka, rundi habw’okuburwa sente. Rundi nitusobora kukwatwa enaku habwokuba titukyasobora kukora ebintu ebimu nk’oku turukugonza. Nitusobora kuhwamu amaani habw’okurora ebintu ebimu bitarukugenda nk’oku tukaba nitunihira. Baitu n’obu turatunga ekizibu kya buli mulingo, tutanihira ngu Yahwe atweberwe. Tekereza ha bigambo ebirukuhumuza ebirukusangwa omu Zabuli 136:23: “Ayatuijukire obutwagayiibwe muno: baitu okuganyirakwe kwebiro nebiro.” Hataroho okugurukyagurukya kwona, Yahwe ahuliiriza obu tumwesengereza kutukonyera.—Zabuli 116:1; 136:24-26.

9. Kiki ekyakonyire Paulo kwikaza okugonza kwe hali Ruhanga kugumire?

⁹ Omukwenda Paulo yaikaraga n’ayecumitiriza muno omulingo Yahwe yamusagikire, kandi kinu kikamukonyera okutahwamu amaani. Akagamba ati: “Mukama nuwe mukonyezi wange; tinditina: Abantu balisobora okunkora ki?” (Abaheburaniya 13:6) Obwesige Paulo akaba aine omuli Yahwe bukamukonyera kuraba omu bizibu. Paulo obu yatungaga emitalibaine, tiyalekahoga kwesiga Yahwe. N’obwakaba ali omu nkomo, akakonyera Abakristaayo bagenzi be obu yahandikiraga ebitebe amabbaruha. (Abefeso 4:1; Abafiripi 1:7; Firemoni 1) Buli kizibu kyona Paulo yatungire, okugonza kwe hali Yahwe kutakeehe. Akesiga “Ruhanga owokuhumuza kwona; arukutuhumuza omu muhito gwaitu gwona.” (2 Abakolinso 1:3, 4) Kiki eki tusobora kwegera hali Paulo?

10. Nitusobora kukora ki kwikaza okugonza kwaitu hali Yahwe kugumire?

 ¹⁰ Paulo akoleka ogumu ha miringo tusobora kwikaza okugonza kwaitu kugumire obu yagambire: “Musabege obutosa.” Akongera yagamba: “Mwekambe omu kusaba.” (1 Abasesalonika 5:17; Abarumi 12:12) Habwaki nitugamba ngu okusaba kutwiriza haihi na Ruhanga? Obu tusaba, tuba nitubaza na Yahwe. Kinu kitusobozesa kuba n’enkoragana enungi na Yahwe. (Zabuli 86:3) Obu tugambira Isiitwe ow’omu iguru ekiri ha mitima yaitu, tweyongera kwirra haihi nauwe. (Zabuli 65:2) Kandi, okugonza kwaitu haluwe kweyongera kukura obu turora omulingo agarukiremu esaara zaitu. Nitukigumya ngu Yahwe “ali haihi na bona abamukunga.” (Zabuli 145:18) Kugumya ngu Yahwe n’atugonza kandi ngu n’aija kutusagika nikiija kutukonyera kuraba omu bizibu ebi tutunga hati n’ebi turatunga omu busumi obw’omu maiso.

11, 12. Kiki eki tusobora kukora kweyongera kugonza amananu ag’omu Baibuli?

¹¹ Tuli Bakristaayo abagonza amananu. Amananu ganu tugasanga omu Kigambo kya Ruhanga. Yesu akagambira Ise ati: “Ekigambo kyawe nigo mananu.” (Yohana 17:17) Kusobora kugonza amananu ag’omu Baibuli, tusemeriire kumanya Baibuli eby’ebazaaho. (Abakolosai 1:10) Baitu haliyo n’ebindi ebi tusemeriire kukora. Wetegereze omulingo omuhandiiki wa Zabuli 119 arukutukonyera kumanya eki tusemeriire kukora. (Soma Zabuli 119:97-100.) Tusemeriire kumara ekiro kyona nitwecumitiriza ha bintu ebi tusoma omu Baibuli. Obu turaikara nitwecumitiriza ha miringo tugasirwa obu tuhondera amananu omu bwomeezi bwaitu, nitwija kweyongera kugagonza.

¹² Omuhandiiki wa Zabuli akongera yagamba: “Ebigambo byawe ka birungi, binuli’ra muno! Ego, nibinura okukira obwoki omu kanwa kange.” (Zabuli 119:103) Ebitabu ebirukwegesa Baibuli ebiterwa ekitebe kya Yahwe nibisisana n’eby’okulya ebirukunura. Eby’okulya obu biba nibinura, tubirya tutekaine tutarukurahukiriza. Nikyo kimu n’obu turaaba nitusoma Baibuli, titurukugonza kurahukiriza kumara. Obu nubwo turanulirwa “ebigambo ebiikirizibwa” eby’amananu, kandi nikiija kutwanguhira kwijuka ebi turaaba tusomere kandi tubikozese kukonyera abandi.—Omugambizi 12:10.

13. Kiki ekyakonyire Yeremiya kugonza ebigambo bya Ruhanga? Kinu kikamukwataho kita?

¹³ Nabbi Yeremiya akagonza ebigambo bya Ruhanga. Akagamba: “Ebigambo byawe bikazoka, nabirya; ebigambo byawe namberendi bikaba byokusemererwa, kandi okukyanganuka kwomutima: baitu nyeserwe ibara lyawe ai Mukama wamahe.” (Yeremiya 15:16) Yeremiya akecumitiriza muno ha bigambo bya Yahwe kandi yabigonza. Akagonza okwetwa muheereza wa Yahwe n’okurarangya obutumwa bwe. Obu tugonza amananu, turora guli mugisa gw’amaani kuba Bakaiso ba Yahwe n’okutebeza amakuru ag’Obukama omu biro binu ebya ha mpero.

14. Kintu ki ekindi eki tusobora kukora kwongera ha kugonza kwaitu okw’amananu?

¹⁴ Kintu ki ekindi ekirukwija kutukonyera kweyongera kugonza amananu? Tusemeriire kuba omu nso’rokano zaitu butoosa habwokuba Yahwe nuho atwegeseza. Okwega Omunaara gw’Omulinzi buli wiiki guli gumu ha miringo enkuru ey’ekozesebwa kutwegesa Baibuli. Obu turaaba nitugonza kugasirwa omu bwijwire omu ruso’rokano runu, tusemeriire kutekaniza kara rutakahikire. Ekyokurorraho,  nitusobora kusoma buli kyahandiikirwe kyona eki batairemu. Biro binu, abantu baingi kibanguhira kusoma rundi kuhanura Omunaara gw’Omulinzi nibakozesa ebyoma bya kalimagezi habwokuba nigusangwa ha mukura gwaitu ogwa jw.org na ha puroguramu ya simu eya JW Library omu ndimi nyingi. Magaziini ezimu obu ziba ha simu kitwanguhira kurora ekyahandiikirwe ekijuliziibwe. Baitu omu buli mulingo ogu turaaba tugiine, kakuba tusoma buli kicweka kandi tukasoma n’ebyahandiikirwe ebijuliziibwe, tukabyecumitirizaho, nitwija kweyongera kugonza amananu.—Soma Zabuli 1:2.

15, 16. (a) Kusigikirra ha Yohana 13:34, 35, Yesu akatuha kiragiro ki? (b) Okugonza kwaitu hali Ruhanga na Baibuli kwine kakwate ki n’okugonza ab’oruganda?

¹⁵ Ekiro ekyamaliriire Yesu obwakaba ali omu nsi, akagambira abegeswa be ati: “Ekiragiro ekihyaka nimbaha ngu mugonzanganege. Nukwo bona balimanya muli begeswa bange, obumurabaga nokugonzangana inywenka.”—Yohana 13:34, 35.

¹⁶ Okugonza ab’oruganda n’abanyaanya itwe kiine akakwate n’okugonza Yahwe. Obu turaaba tutarukugonza Ruhanga titusobora kugonza abaheereza bagenzi baitu. Kandi obu turaaba tutarukugonza abaheereza bagenzi baitu, titusobora kugonza Ruhanga. Omukwenda Yohana akagamba: “Ogu atarukugonza mugenziwe ouyaboine, tasobora okugonza Ruhanga owataraboine.” (1 Yohana 4:20) Kandi okugonza kwaitu hali Yahwe n’ab’oruganda kwine akakwate n’okugonza Baibuli. Habwaki? Habwokuba obu turaaba nitugonza ebi turukwega kuruga omu Baibuli, nitwija kuhondera ekiragiro eki tusangamu eky’okugonza Ruhanga n’ab’oruganda.—1 Petero 1:22; 1 Yohana 4:21.

17. Emu ha miringo ei tusobora kwoleka mu okugonza kwaitu niyo eya?

¹⁷ Soma 1 Abasesalonika 4:9, 10. Bikorwa ki ebi tusobora kukora kwoleka okugonza kwaitu omu kitebe? Ow’oruganda rundi munyaanya itwe anyakukuzire omu  myaka n’asobora kuba n’agonza obukonyezi omu byendubata kwija omu nso’rokano n’okugarukayo omu ka. Omufakati n’asobora kuba n’agonza kumukonyera kukanika ekintu kye eky’omu ka ekinyakusisikaire. (Yakobo 1:27) Ab’oruganda n’abanyaanya itwe abanyakuhoirwemu amaani, abanyakumigiriziibwe ebizibu nibetaga tubafeho, tubagarremu amaani, kandi tubahumuze. (Enfumo 12:25; Abakolosai 4:11) Ebigambo n’ebikorwa byaitu bisemeriire kwoleka ngu nitugonza “abomunju yokuikiriza.”—Abagaratiya 6:10.

18. Kiki ekirukwija kutukonyera kumaraho obutetegerezangana n’abagenzi baitu?

¹⁸ Baibuli ekagamba ngu omu “biro bya hanyuma,” abantu abarukukira obwingi baliba nibefaho bonka kandi baine omururu. (2 Timoseo 3:1, 2) Baitu itwe nk’Abakristaayo, tusemeriire kwekamba kurora ngu okugonza Yahwe Ruhanga, Ekigambo kye Baibuli, n’abagenzi baitu kwayeyongera. Kusigikirra nk’oku tutahikiriire, obwire obumu nitusobora kutunga obutetegerezangana n’abagenzi baitu. Baitu habw’okugonzangana, tusemeriire kubumaraho omu bwangu kandi omu mulingo ogw’embabazi. (Abefeso 4:32; Abakolosai 3:14) Twegendereze muno kurora okugonza kwaitu tikwafuka! Oihireho, tweyongere kugonza muno Yahwe Ruhanga, Ekigambo kye, hamu n’abaheereza bagenzi baitu.