1, 2. (a) Yesu obwakaba atakafiire, akabazaho nsonga ki n’abegeswa be? (Rora ekisisani ekiri ha rupapura 9) (b) Habwaki kiri kikuru kwikara nitwijuka ensonga habwaki tutebeza? (c) Nitwija kubazaho ki?

OBWIRE bwekiro Yesu obwakaba atakafiire, akamara obwire bwingi nabazaho n’abakwenda be. Akabagumya ngu yabagonzaga muno. Akongera yabagambira oruganikyo orw’omuzabibu orutwabalizeho omu kicweka ekihoire. Yesu akaba nagonza kwekambisa abegeswa be kwikara ‘nibaana ebyana,’ ekirukumanyisa ngu, bakaba baine kugumisiriza omu kutebeza amakuru amarungi ag’Obukama.​—Yohana 15:8.

² Baitu Yesu atagarukire ha kugambira abegeswa be ekibakaba basemeriire kukora, akabagambira n’ensonga habwaki bakaba basemeriire kukikora. Akabaha ensonga habwaki bakaba basemeriire kweyongera kutebeza. Kikuru twikale nitwijuka habwaki naitwe tusemeriire kwikara nitutebeza. Kutekerezaho ekintu kinu nikiija kutwekambisa kugumisiriza obuturaaba ‘nituha obwakaiso hali amahanga gona.’ (Matayo 24:13, 14) Omu kicweka kinu nitwija kurora ensonga ina kuruga omu Baibuli habwaki tusemeriire kwikara nitutebeza. Kandi nitwija kubazaho ebisembo bbina ebi  Yahwe atuha ebitusobozesa kwikara nitwana ebyana.

3. (a) Kusigikirra ha Yohana 15:8, nsonga ki erukukirayo obukuru ey’etuletera tutebeza? (b) Ebyana ebirukwanwa omuti omuzabibu nibimanyisa ki, kandi habwaki kisemeriire kulengesanizibwa omu mulingo gunu?

³ Ensonga erukukirayo obukuru habwaki tutebeza eri ngu nitugonza kuhaisa Yahwe ekitiinisa n’okweza ibara lye. (Soma Yohana 15:1, 8.) Yesu obuyabalizeho oruganikyo orw’omuzabibu, akalengesaniza Yahwe n’omulimi ow’abyara emizabibu. Yesu akagamba ngu uwe wenyini nuwe akaba ali muzabibu, kandi abahondezi be nubo mataagi. (Yohana 15:5) Nahabweki omu ruganikyo runu, ebyana eby’emizabibu nibimanyisa ebyana eby’abegeswa ba Yesu bakaba nibagenda kwana, rundi omulimo gw’okutebeza ogubakaba nibagenda kukora. Yesu akagambira abakwenda be ati: “Omu kinu Isenyowe anyumizibwa, inywe mwane ebyana biingi.” Emiti emizabibu obweyana ebyana ebirungi, kiretera omulimi kutunga ekitiinisa. Nikyo kimu naitwe, obututamu amaani gaitu goona omu kutebeza amakuru amarungi ag’Obukama bwa Ruhanga, tuletera Yahwe kuhabwa ekitiinisa.​—Matayo 25:20-23.

4. (a) Tweza tuta ibara lya Ruhanga? (b) Noyehurra ota habw’okuba n’omugisa ogw’okweza ibara lya Ruhanga?

⁴ Ibara lya Ruhanga nilyera. Tiharoho ekitusobora kukora kwongera ha kwera kwalyo. Hati tweza tuta ibara lya Ruhanga obutuba nitutebeza? Wetegereze ebigambo binu ebi nabbi Isaya yagambire: ‘Yahwe ow’amahe​—nuwe mulitwara kuba arukwera.’ (Isaya 8:13, NW) Tweza ibara lya Ruhanga, eri nilyo Yahwe, obutulitwara kuba niryo erirukukirayo obukuru omu mabara goona kandi obutukonyera abandi kumanya ngu nilyera. (Matayo 6:9.) Ekyokurorraho, obutwegesa abantu amananu agarukukwata ha miringo emirungi eya Yahwe, hamu n’ekigendererwa kye hali abantu eky’okwikara omu Nsi Empyaka, tubakonyera kurora ngu buli kintu kyona ekibi eki Setani yabalizeho Yahwe kisuba. (Okubanza 3:1-5) Omulingo ogundi nk’oku tweza ibara lya Ruhanga nubwo obutukonyera abantu kumanya ngu Yahwe nuwe wenka asemeriire “okuhabwa ekitinisa nokutinwa nobusobozi.” (Okusuku’rwa 4:11) Rune, anyakumazire emyaka 16 nahereza nka payoniya nagamba ati: “Kumanya ngu nyine omugisa gw’okuba kaiso w’Omuhangi ayahangire ebintu byona kindetera kusiima. Kinyekambisa kwikara nintebeza.”

5. (a) Yohana 15:9, 10 neha nsonga ki ey’okutebeza? (b) Yesu akakonyera ata abegeswa be kumanya habwaki bakaba basemeriire kugumisiriza?

⁵ Soma Yohana 15:9, 10. Ensonga yakabiri habwaki tutebeza hali Obukama bwa Ruhanga eri ngu tugonza Yahwe na Yesu. (Marako 12:30; Yohana 14:15) Yesu akagambira abegeswa be ngu basemeriire ‘kwikara omu kugonza kwe.’ Habwaki Yesu yagambire ati? Habwokuba akaba amanyire ngu abahondezi be bakaba basemeriire kugumisiriza kusobora kwikara bali Bakristaayo ab’amananu. Nikyo orukurorra ngu, omu Yohana 15:4-10, Yesu akakozesa ekigambo ‘mwikale’ emirundi nyingi  nukwo akonyere abegeswa be kwetegereza ngu kikaba nikibetagisa kugumisiriza.

6. Twoleka tuta ngu nitugonza kwikara omu kugonza kwa Kristo?

⁶ Twoleka tuta ngu nitugonza kusigara omu kugonza kwa Kristo nukwo tusimibwe? Kinu nitusobora kukikora kakuba tumworobera. Ekintu kimu Yesu ekyarukutusaba nukwo kukora ekiyakozere. Akagamba: ‘Nkakwata ebiragiro bya Ise nyowe ninyikara omu kugonza kwe.’ (Yohana 15:10) Yesu atuteriireho ekyokurorraho kirungi.​—Yohana 13:15.

7. Obuhulizi bwine kakwate ki n’okugonza?

⁷ Yesu obuyagambire ngu “anyakuina ebiragiro byange nabikwata, nuwe angonza” akaba nayoleka ngu obuhulizi bwine akakwate n’okugonza. (Yohana 14:21) Ebiragiro bya Yesu biruga hali Ise, nahabweki obutworobera ekiragiro kye eky’okutebeza, tuba nitwoleka ngu nitugonza Yahwe. (Matayo 17:5; Yohana 8:28) Kandi obutwoleka Yahwe na Yesu ngu nitubagonza, batulindira omu kugonza kwabo.

8, 9. (a) Nsonga ki endi eyitusigikirraho kutebeza amakuru amarungi? (b) Ebigambo bya Ezekyeri ebirukusangwa omu Ezekyeri 3:18, 19 n’omu 18:23 nibitwekambisa bita kwikara nitutebeza?

⁸ Ensonga yakasatu habwaki tutebeza eri habwokuba nitugonza kuhabura abantu hali ekiro kya Yahwe ekirukwija. Baibuli eyeta Nuha “omudumi wokuhikirra.” (Soma 2 Petero 2:5.) Obutumwa Nuha yatebizeho Okusandaara kw’Amaizi obukukaba kutakabaireho, nibusobora kuba bwali burumu okuhabura ha kuhwerekerra okukaba nikugenda kubaho. Habwaki nitugamba tuti? Habwokuba Yesu akagamba: ‘Baitu nk’oku bakaba bali omu biro ebi ebyabandize Okusandara kw’Amaizi kutakabaireho, abantu bakaba nibalya kandi nibanywa, abasaija nibaswera kandi n’abakazi nibagabwa okuswerwa, okuhikya ekiro eki Nuha yatahiiremu omu bwato, kandi batafeyo okuhikya Okusandara kw’Amaizi obukwaizire, kwabahwerekereza boona; nukwo kuliba kuti okwija okw’Omwana w’omuntu.’ (Matayo 24:38, 39, NW) Nobukiraaba ngu abantu abarukukira obwingi bakanuga Nuha, uwe akeyongera kurarangya obutumwa obw’okuhabura Yahwe obuyamuhaire kurarangya.

⁹ Omu kasumi kanu, tutebeza abantu amakuru amarungi ag’Obukama nukwo tubahe omugisa gw’okumanya Ruhanga ebyarakorra abantu omu busumi obw’omu maiso. Nka Yahwe, naitwe nitugonza abantu bahuliirize amakuru amarungi nukwo ‘babe bomeezi’ ebiro n’ebiro. (Ezekyeri 18:23) Obututebeza nju ha nju n’omu rwijwire, tuhabura abantu baingi  nituboleka ngu Obukama bwa Ruhanga nibwija kuhwerekereza ensi enu embi.​—Ezekyeri 3:18, 19; Danieri 2:44; Okusuku’rwa 14:6, 7.

10. (a) Matayo 22:39 niruha nsonga ki ey’okutebeza? (b) Paulo na Sira bakakonyera bata omulinzi w’enkomo omu rubuga rwa Firipi?

¹⁰ Ensonga yakana habwaki twikara nitutebeza niyo ngu nitugonza abantu. (Matayo 22:39) Okugonza kunu kutukonyera kwikara nitutebeza habwokuba nitumanya ngu abantu nibasobora kuhindura ha ntekereza yabo kakuba enyikara yabo ehinduka. Ekyokurorraho, abahakani bakanaga Paulo na Sira omu nkomo eyekaba eri omu rubuga rwa Firipi. Baitu omu itumbi, hakaija omusisa ogwatengeseze enju y’enkomo kandi enyigi z’enkomo zakinguka. Omulinzi w’enkomo akatiina muno yahika n’okugonza kweyita habw’okutekereza ngu abanyankomo bakaba batorokere. Baitu Paulo akatokera haiguru yamutanga nagamba: “Otekora kubi.” Omulinzi akakaguza ati: “Kimpikiriire okukora nta okujunwa?” Paulo na Sira bakamugambira ngu: “Ikiriza Mukama waitu Yesu, nukwo orajunwa.”​—Engeso Ezabakwenda 16:25-34.

11, 12. (a) Ebyahikire hali omulinzi w’enkomo nibitwegesa ki ha buheereza bwaitu? (b) Habwaki tusemeriire kwikara nitutebeza?

¹¹ Ebyahikire hali omulinzi w’enkomo nibitwegesa ki hali omulimo gw’okutebeza? Oyetegeriize ngu hanyuma y’omusisa nubwo omulinzi w’enkomo yahindwire ha ntekereza ye yahika n’okusaba obukonyezi? Omu mulingo nugwo gumu, abantu abamu abatagonza kuhuliiriza obutumwa bwaitu nibasobora kuhinduramu entekereza yabo bakahika n’okuserra obukonyezi hanyuma y’okuhikwaho ekizibu ky’amaani omu bwomeezi bwabo. Ekyokurorraho, abantu nibasobora kucweka enkizi habw’okubingwa ha mulimo rundi habw’okugaitururwa. Abandi nibasobora kukwatwa enaku y’amaani hanyuma y’okumanya ngu baine oburwaire bw’amaani rundi habw’okuferwa omugonzebwa wabo. Kakuba ebintu bya mulingo gunu bibaho, abantu nibasobora kwekaguza ebikaguzo ebirukukwata ha bwomeezi ebibakaba batakatekerezahoga. Nibasobora n’okwekaguza, ‘Kimpikiriire kukora ki kusobora kujunwa?’ Nikisobora n’okubaletera kutuhuliiriza omurundi gwabo ogw’okubanza.

¹² Nahabweki kakuba tutebeza tutahoirwemu amaani, nitwija kwikara twetegekere kubaza n’abarukugonza kuhumuzibwa. (Isaya 61:1) Charlotte, anyakumazire emyaka 38 naheereza nka payoniya nagamba ati: “Abantu bahabire. Nibetaga kuhabwa omugisa gw’okuhurra amakuru amarungi.” Ejvor, anyakumazire emyaka 34 naheereza nka payoniya nagamba ngu: “Tiharoho akasumi nambere abantu baali baine enaku kukira ab’omu kasumi kanu. Ningonza kubakonyera. Ekintu kinu nikyo kindetera kutebeza.” Hataroho okugurukyagurukya, okugonza abantu eri nsonga nungi muno eyitusemeriire kusigikirraho kwikara nitutebeza!

13, 14. (a) Kisembo ki ekirukubazibwaho omu Yohana 15:11? (b) Nitusobora kutunga tuta okusemererwa nk’okwa Yesu? (c) Okusemererwa kutukonyera kuta omu buheereza bwaitu?

¹³ Obwire bw’ekiro Yesu obwakaba atakafiire, akongera yabazaho ebisembo ebikaba nibigenda kukonyera abakwenda be kweyongera kwana ebyana. Ebisembo binu nibyo biha, kandi nibisobora kutukonyera bita omu kasumi kanu?

¹⁴ Okusemererwa. Omulimo gw’okutebeza tugutwara kuba nk’omugugu? Nangwa. Yesu  obuyamazire kubazaho oruganikyo rw’omuzabibu, akagamba ngu obuturatebeza nitwija kutunga okusemererwa kwe. (Soma Yohana 15:11.) Ekintu kinu nikisoboka kita? Ijuka ngu omu ruganikyo rwe, Yesu akerengesaniza n’omuzabibu kandi abegeswa be nubo yalengesaniize n’amataagi. Omulingo gumu gwonka amataagi gasobora kutunga amaizi n’ekiriisa nukwo kwikara ha muti omuzabibu. Omu mulingo nugwo gumu, naitwe obuturaaba nitugonza kutunga okusemererwa nk’okwa Yesu, leka twikale hamu nauwe omu bumu kandi tuhondere ebigere bye. Obu nubwo turatunga okusemererwa kwe, okunyakuruga omu kukora Ruhanga eby’agonza. (Yohana 4:34; 17:13; 1 Petero 2:21) Hanne, anyakumazire emyaka erukuhingura omu 40 naheereza nka payoniya nagamba ati: “Okusemererwa okuntunga buli murundi obumba ndugire omu buheereza kunyekambisa kweyongerayo kuheereza Yahwe.” Okusemererwa nikwija kutuha amaani nukwo tweyongereyo kutebeza n’obukiraaba ngu abantu abarukukira obwingi nibasobora kutatuhuliiriza.​—Matayo 5:10-12.

15. (a) Kisembo ki ekirukubazibwaho omu Yohana 14:27? (b) Obusinge butukonyera buta kweyongera kwana ebyana?

¹⁵ Obusinge. (Soma Yohana 14:27.) Orwebagyo oru rwonyini Yesu atakafiire, akagambira abegeswa be ati: ‘Obusinge bwange nimbubasigira.’ Obusinge bwa Yesu nibusobora kutukonyera buta kwikara nitutebeza? Obutwikara nitutebeza, tuhurra obusinge habwokuba tumanyire ngu tuba nitusemeza Yahwe na Yesu. (Zabuli 149:4; Abarumi 5:3, 4; Abakolosai 3:15) Ulf, anyakumazire emyaka 45 naheereza nka payoniya nagamba ati: “Omulimo gw’okutebeza gunjwahya, baitu gundetera okusemererwa kwonyini hamu n’obwomeezi bw’ekigendererwa.” Nikitusemeza kumanya ngu hati tutungire obusinge obututaaha nituserra.

16. (a) Kisembo ki ekirukubazibwaho omu Yohana 15:15? (b) Abakwenda ba Yesu bakusoboire bata kwikara bali banywani be?

¹⁶ Obunywani na Yesu. Yesu obuyamazire kugambira abakwenda be ngu akaba nagonza babe n’okusemererwa, akasoborra ensonga habwaki kyali kikuru nabo kwoleka okugonza okutali kw’obugobya. (Yohana 15:11-13) Hanyuma akagamba ati: “Inywe muli nganjani zange.” Kakisembo ky’amaani kuba banywani ba Yesu! Baitu abakwenda be bakusoboire bata kwikara bali banywani be? Yesu akagamba ati: “Mugende mwane ebyana.” (Soma Yohana 15:14-16.) Ekirukumanyisa, ikara notebeza. Emyaka ebiri enyuma Yesu atakagambire ebigambo binu, akagambira abakwenda  be ati: ‘Obumugenda, mubagambire ngu Obukama obwomu iguru bumalize okuhika.’ (Matayo 10:7) Enu niyo ensonga habwaki obwire bw’ekiro Yesu obwakaba atakafiire yatereriire abegeswa be kugumisiriza omu mulimo gw’okutebeza. (Matayo 24:13; Marako 3:14) Yesu akaba akimanyire ngu tikyakwanguhiire abegeswa be kuhondera ekiragiro kinu. Baitu bakaba nibasobora kukikora kandi bakasigara bali banywani be. Mu mulingo ki? Haroho ekisembo kindi ekikaba nikigenda kubakonyera.

17, 18. (a) Kisembo ki ekirukubazibwaho omu Yohana 15:7? (b) Ekisembo eki kikakonyera kita abegeswa ba Yesu? (c) Bisembo ki ebirukutukonyera omu kasumi kanu?

¹⁷ Ekisembo ky’okuhulirwa obutusaba. Yesu akagamba ati: “Musabege ekimurukwenda kyona, mulikikorwa.” (Yohana 15:7, 16) Mali omurago gwa Yesu gwine kuba gwagarwiremu abakwenda be amaani! * (Rora obugambo obuli hansi.) Abakwenda batetegereze kurungi nk’oku Yesu akaba ali haihi kufa. Baitu uwe kufa kikaba kitarukumanyisa ngu bakaba nibagenda kusigara bataine obukonyezi bwona. Yahwe akaba ayetegekere kugarukamu esaara zabo n’okubakonyera omu mulimo ogw’okutebeza. Kandi mali nukwo yakozere. Hakarabaho obwire buke Yesu afiire, abakwenda bakesengereza Yahwe kubaha obumanzi, kandi Yahwe akagarukamu esaara zabo.​—Engeso Ezabakwenda 4:29, 31.

¹⁸ Nikyo kimu n’omu kasumi kanu. Obutugumisiriza omu mulimo ogw’okutebeza, twikara tuli banywani ba Yesu. Kandi tukigumye ngu obuturatunga obulemeezi omu mulimo gw’okutebeza baitu tukasaba Yahwe, ayetegekere kugarukamu esaara zaitu. (Abafiripi 4:13) Nitusiima muno Yahwe habw’okugarukamu esaara zaitu hamu n’okuba na Yesu nk’omunywani waitu. Ebisembo binu ebi Yahwe arukutuha bitugarramu amaani kandi bitukonyera kwikara nitwana ebyana.​—Yakobo 1:17.

19. (a) Habwaki twikara nitutebeza? (b) Kiki ekitukonyera kumara omulimo ogu Yahwe atuhaire?

¹⁹ Ekicweka kinu kituhaire ensonga ina habwaki tusemeriire kwikara nitutebeza: kuhaisa Yahwe ekitiinisa n’okweza ibara lye, kwoleka okugonza kwaitu hali Yahwe na Yesu, kuhabura abantu, n’okwoleka ngu nitugonza abantu. Kandi turozere ebisembo bbina ebitwine: okusemererwa, obusinge, obunywani na Yesu, n’okugarukwamu esaara zaitu. Ebisembo binu nibitwekambisa kukora n’okumalirra omulimo ogu Yahwe atuhaire kukora. Kisemeza muno Yahwe obwarora nitutamu amaani gaitu goona kwikara nitwana ebyana bingi.