BUSAHO mpinduka y’amaani eyabaireho obwire obunkaba ninkyasoma. Abeegi watandikaga nabo omu mwaka ogw’okubanza nubo wasomaga nabo kuhikya omu mwaka ogw’okumalirra. Wasangaga omanyire amabara ag’abantu abarukukira obwingi omu kikaro kyowanyu, kandi nabo bamanyaga amabara gawe.

Etawuni ya Liberty ekaba eyehingulirizibwe emisiri, kandi bakiraga kulima ebicooli. Omu bwire obunazaliirwemu, ise nyowe akaba nakorra omu kiikaro eki. Nk’omusigazi, nkeega kuvuga turakita n’okukora emirimo endi yoona ey’omulimi.

Ise nyowe akaba akuzire. Nambere nazaliirwe akaba aine emyaka 56, kandi nyina nyowe akaba aine emyaka 35. Baitu ise nyowe akaba aine amaani kandi mwomeezi kurungi. Yagonzaga kukora n’amaani kandi akegesa abaana be boona kugonza emirimo. Tiyatungaga sente nyingi, baitu akatuha ah’okwikara, yatugurraga engoye ez’okujwara, hamu n’ebyokulya ebirukutumara. Kandi yatutungiraga n’obwire oburukumara. Ise nyowe akafa ahikize emyaka 93. Nyina nyowe akafa ahikize emyaka 86. Boona bakaba batarukuheereza Yahwe. Omu ha bagenzi bange omwojo aikaire naheereza nk’omugurusi omu kitebe kuruga omu mwaka 1972.

Nyina nyowe yagonzaga muno ediini. Buli sande yatutwaraga omu kanisa eya Baptist. Obu nkaba nyine emyaka 12, nubwo natandikire kuhurra ha nyegesa ey’obusatu. Nahabweki nkakaguza nyina nyowe: “Nisoboka kita Yesu  kuba Mwana kandi ha murundi nugwo gumu akongera akaba Isitwe?” Ninyijuka nangarukamu ngu: “Mwana wange, ekintu kinu tikisobora kwetegerezebwa. Tikiri kyaitu kwetegereza.” Kandi mali kikaba kitarukwetegerezebwa hali nyowe. Baitu obu nahikize emyaka 14, nkabatirizibwa omu kisaaru ekikaba kituli haihi. Bakanyibika omu maizi emirundi esatu, ogw’okubanza omu ibara lya Isitwe, ogw’akabiri omu ibara ly’Omwana, kandi ogw’akasatu omu ibara ely’omwoyo ogurukwera.

Obu nkaba ninkyasoma, nkaba nyine omunywani ayali muzaani w’entomi kandi akansonasona nanyowe kutandika kuteera entomi. Nahabweki nkatandika kutendekebwa, kandi nafooka omu ha b’ekitebe ekyabateezi b’entomi ekyayetwaga, the Golden Gloves. Nkaba ntali murwani murungi nahabweki hanyuma y’okurwanaho kumara obwire buke nkabirugaho. Hanyuma y’obwire, nkataaha amahe ga Amerika kandi nasindikwa omu ihanga lya Bugirimani. Obunkaba ndi omu ihanga eri, bakama bange bakansindika kwongera ha kutendekwa kwange habwokuba bakarora ngu ninsobora kufooka mwebembezi murungi. Bakaba nibagonza amahe ngafoole omulimo gwange. Baitu nkaba ntarukugonza kwikara omu mahe, nahabweki hanyuma y’emyaka ebiri, amahe nkagarugamu omu mwaka 1956. Hanyuma y’obwire buke, nkataaha amahe agandi.

Obu nkaba ntakegere amananu, nkaba nyine entekereza enyakugwire obukirukuhika ha kuba omusaija wenyini. Nkaba nsisirwe filimu n’abantu abanaikaraga nabo. Nkaba nintekereza ngu abasaija ababaza ha Baibuli bakaba batali basaija bonyini. Baitu nkatandika kwegaho ebintu bike ebyahindwire obwomeezi bwange. Kiro kimu, obunkaba ninvuga akamotoka kange ak’erangi erukutukura nindaba omu tawuni, abaisiki babiri bakanyimukiza emikono nibagonza ngende nambere bakaba bali. Bakaba bali bato b’omusaija ayali aswire munyaanya nyowe omukuru. Abaisiki babiri abo bakaba bali Bakaiso ba Yahwe. Nkaba ntungireho obutabu bubiri, Watchtower na Awake! kuruga halubo, baitu kikansisanira ngu Watchtower ekaba egumire muno kugyetegereza. Baitu ha murundi gunu bakandaliza kugenda omu rusorrokano orwayetwaga Book Study, orwabaga omu ka yabo. Nkabagambira ngu ninyija kukitekerezaaho. Bakamwenya bankaguza, “waturaganiza?” nkabagarukamu ngu, “mbaraganiize.”

Nkeyijukya habwaki mbaraganiize, baitu ntagonze kucwa okuraganiza okunkozere. Kiro eki omu kairirizi nkagenda omu rusorrokano oru. Abaana nubo bakizireyo kunsemeza. Nkikampuniriza kurora omulingo bakaba bamanyiremu Baibuli! N’obukiraaba ngu nagendaga omu kanisa buli sande na nyina nyowe, nkaba manyire kake muno ha Baibuli. Hati nkaba ningonza kwega ebirukukiraho, nahabweki nkaikiriza kwegesebwa Baibuli. Kimu ha bintu ebinabandize kwega kikaba ngu ibara lya Ruhanga nuwe Yahwe. Emyaka ey’enyuma nkaba nkagwizeho maama wange ebirukukwata ha Bakaiso ba Yahwe, baitu akangarukamu ngu, “Abo, nibaramya omusaija omugurusi owarukwetwa Yahwe.” Baitu hati nkaba nindora ngu amaiso gange gakaba galiyo nigaiguka!

Nkakurakurana bwangu, habwokuba nkamanya ngu nzoire amananu. Hakarabaho emyezi mwenda yonka hanyuma y’okuba omu rusorrokano rwange orw’okubanza, nkabatizibwa omu kwezi kwa Maaci 1957. Entekereza yange ekaba ehindukire. Nyine okusemererwa habwokwega Baibuli ekyeyegesa ha kuba musaija wonyini. Yesu akaba musaija ahikiriire. Akaba aine amaani kukira omuntu ondi wena. Baitu atetabe omu kurwana kwona. Kwihaho, ‘akebundaaza,’ nkoku kikaba kimuragwirweho. (Isaya 53:2, 7) Nkega ngu omuhondezi wa Yesu ow’amananu asemeriire “okuba omuculezi hali bona.”​—2 Timoseo 2:24.

Omwaka ogwa yongiireho, omu 1958 nkatandika kuheereza nka payoniya. Baitu nkabanza nayemerezaamu habw’akasumi kake. Habwaki? Nkaba ncwiremu kuswera  Gloria, omu ha baisiki babiri abaali bandaliize omu ruso’rokano! Tinkeyijukyaga encwamu enu. Gloria akaba muntu w’omuhendo, kandi nahati akyali. Hali nyowe w’omuhendo muno kukira omudaali ogurukwetwa Hope Diamond, kandi nyine okusemererwa kwingi ngu nkamuswera! Leka nauwe abagambireho ebirukumukwataho:

“Nkaba nyine abagenzi bange aboojo n’abaisiki kandi boona hamu bakaba 16. Nyina nyowe akaba muheereza wa Yahwe omwesigwa. Akafa mpikize emyaka 14. Hanyuma, ise nyowe akatandika kwega Baibuli. Habwokuba nyina itwe akaba amazire kufa, ise nyowe akakora entekaniza na mukuru w’isomero. Munyaanya nyowe omukuru akaba ali omu mwaka ogw’okumalirra ha isomero, kandi ise nyowe akasaba abakuru bisomero kutwikiriza kusoma nitwosa ebiro ebimu. Omu mulingo ogu, omu hali itwe naba ali omu ka narolerra abato baitu. Twaroraga ngu ekyarwebagyo kitekanizibwe isitwe atakagarukire omu ka. Mukuru w’isomero akaikiriza, kandi tukaikara nitukora tuti kuhikya munyaanya nyowe omukuru obuyamazire kusoma. Hakaba haroho eka ibiri ez’abakaiso ba Yahwe abasomaga naitwe, kandi 11 hali itwe tukafooka Bakaiso ba Yahwe. Nkegondeza omu buheereza, n’obu kiraba ngu nkaba nyine ensoni. Iba nyowe, Sam, ankonyiire muno omu kizibu eki kumara emyaka.”

Nyowe na Gloria tukataaha obuswere Febwali 1959. Tukegondeza omu kuheereza hamu nka bapayoniya. Omu kwezi kwa Julaayi okw’omwaka ogu, tukasaba kuhereza ha Beseri. Twagonzaga muno kuhereza ha kitebe ekikuru ek’Abakaiso ba Yahwe. Ow’oruganda arukwetwa Simon Kraker, ayali naheereza ha Beseeri omu kasumi ako nuwe yabazalizeeho naitwe hanyuma y’okurora okusaba kwaitu. Akatugambira ngu abaswerangaine bakaba batarukwikirizibwa kuhereza ha Beseeri omu kasumi ako. Tukaba nitugonza kuheereza ha Beseri, baitu kikatutwarra emyaka nyingi kurora batweta.

Tukahandika ebbaruha twagisindika ha kitebe kyaitu ekikuru nitusaba kusindikwa omu kiikaro ekikaba kiine obwetaago bw’abatebezi. Bakatuha ekiikaro kimu kyonka, ekirukwetwa Pine Bluff, Arkansas. Omu kasumi ako, Pine Bluff ekaba erumu ebitebe bibiri byonka. Ekitebe ekimu kikaba kirumu abatebezi aberangi erukwera, kandi ekindi kirumu abatebezi aberangi erukwiragura. Tukasindikwa kuheereza omu kitebe eky’aberangi erukwiragura, ekikaba kiine abatebezi 14 bonka.

Nosobora kuba noyekaguza habwaki Abakaiso ba Yahwe bayahukanizaga abeerangi erukwiragura ha berangi erukwera. Ekyokugarukamu kiri ngu tukaba tutaine ekyokukikorra. Kikaba nikicwa ebiragiro abantu ab’erangi ezitarukusisana kweteraniza hamu, kandi kyaletahoga n’akatabanguko. Omu biikaro bingi, ab’oruganda batinaga ngu kakuba beteraniza hamu, abantu abandi bakaba nibasobora kwija nibasisa Ekyombeko ky’Obukama. Ekintu nk’eki kikabaho. Abakaiso ba Yahwe ab’erangi erukwiragura obu batebezaga ha nju z’abantu ab’erangi erukwera, bakaba nibasobora kubohwa omu nkomo rundi kuterwa. Nahabweki kurora ngu omulimo gw’okutebeza gwakorwa, tukorobera ebiragiro kandi twaikara nitunihira ngu akasumi nikaija kuhika ebintu bihinduke.

Kikaba kitanguhire kutebeza. Obu twatebezaaga omu kiikaro ekirumu ab’erangi erukwiragura, haroho obutwateraga kodi ha mulyango gw’omuntu ow’erangi erukwera. Eki obu kyabahoga, kyatwetagisaga kucwamu bwangu ekyokukora: tubanze tubazeeho nauwe ebirukukwata ha Baibuli omu bugufu rundi tusabe kuganyirwa tweyongereyo ha nju endi? Omu biro ebi ebintu nukwo bikaba biri biti.

Kandi itwe nkaba payoniya, tukaba tusemeriire kuserra sente ez’okweyemerezaho. Emirimo erukukira obwingi yasasuraga obusente butaito muno. Gloria akaba aine obulimo bwokuyonja enju z’abantu. Nkaikirizibwa kumukonyera omu ka emu eyiyakoramuga nukwo amaleyoga esaaha ntaito. Bakatuha ekyamusana, kandi nkabibagana na Gloria tutakarugireyo. Buli wiiki, Gloria yagendaga omu ka emu nagorra engoye zabo. Nakoraga omu musiri, nayogyaga amadirisa, kandi nakoraga n’emirimo endi eya haka. Tukogya amadirisa g’eka emu ey’abantu ab’erangi erukwera. Gloria akaba nayogya orubaju rw’omunda kandi nyowe ninyogya orw’aheru. Kikatutwarra ekiro kyona, kandi eka enu ekatuha kyamusana. Gloria akaliira omu nju baitu atalye hamu n’eka enu. Nyowe nkaliira omu garagi ey’ekaba eri aheru, baitu nyowe eki ntakifeho. Bikaba by’okulya ebinuzire muno. Ab’omu ka enu bakaba bantu barungi baitu bakaba basisirwe abantu abaali babetoroire. Ninyijuka kiro kimu tukagenda kuteka amafuta omu motoka. Obunamazire kutamu amafuta, nkasaba omuntu ow’erangi erukwera ow’akaba nakoraho anyoleke nambere Gloria akaba nasobora kugenda kwekonyera. Akandoza ekiiso kibi yangambira ngu, “Hasibirwe.”

Harubaju orundi, tukegonza muno habw’okuba n’ab’oruganda hamu n’okutebeza! Obutwahikire omurundi gwaitu ogw’okubanza omu Pine Bluff, tukaikara hamu n’ow’oruganda ow’akaba naheereza nka congregation  servant omu kasumi ako (Banu nubo tumanyire nk’abateraniza b’abagurusi omu kasumi kanu). Mukazi we akaba atakegere amananu, nahabweki Gloria akatandika kumwegesa Baibuli. Ow’oruganda onu na mukazi we bakaba baine muhara wabo owakaba aswirwe kandi nkatandika kwegesa muhara wabo na musaija we. Muhara wabo na nyina bakeyo babatizibwa.

Tukaba twine abanywani abagonzebwa omu kitebe eky’ab’erangi erukwera. Baaturalizaga kugenda omu maka gabo kulya nabo ekyarwebagyo, baitu twagendayoga obwire bumazire kusweka nukwo abantu bataturora tuli hamu. Omu kasumi ako, ekitebe ekyayetwaga Ku Klux Klan (omu bugufu nikyo KKK) ekyasagikaga kusororangana omu rangi n’okurwana kikaba kitairemu amaani omu kusagika okusororangana. Ninyijuka kiro kimu obwire bw’ekiro, nkarora omusaija aikaliire ha rubbalaza rw’enju ye, wena akaba nayegonza habwokuba akaba ajwaire nk’oku abantu b’ekitebe kya KKK bajwaraga. Baitu ebintu ebibi bitatulemese kuba bantu ab’embabazi. Kiro kimu tukaba nitugonza kugenda ha rusorrokano orukooto baitu tukaba tutaine sente ezirukumara, nahabweki haroho ow’oruganda ayaikiriize kugura motoka yaitu. Kiro kimu hanyuma y’okwezi kumu kurabaho, tukaruga omu buheereza tujwahire muno hanyuma y’okutebeza nju ha nju n’okwegesa abeegi baitu aba Baibuli baingi kandi tukaba tusiibire ha musana. Obutwahikire omu ka, haroho ekintu ekitwasangire ekyatuhuniriize. Tukasanga motoka yaitu bagyemeriize omu maiso g’enju yaitu! Bakaba bataireho akapapura kahandikirweho ngu: “Mbagaruliire motoka enu mugitwale nk’ekisembo kuruga hali nyowe. Ow’oruganda mugenzi wanyu.”

Haroho ekikorwa kindi eky’embabazi ekyankwasireho muno. Omu mwaka 1962, nkaralizibwa kugenda omu isomero erirukwetwa Kingdom Ministry School omu South Lansing, New York eya Amerika. Likaba isomero elyamazire okwezi kumu nambere abaroleerezi b’ebitebe, ab’ebicweka, n’aba disiturikiti batendekiirwe. Omu kasumi ako nkaba ntaine omulimo kandi tukaba twine sente ntaito muno. Baitu haroho ekitongole ky’amasimu ekikaba kinkagwizeho ebikaguzo kurora obukiraaba nikisobora kumpa omulimo. Kakuba bampaire omulimo ogu, ninyowe nkaba ningenda kuba muntu w’okubanza omu bantu ab’erangi erukwiragura kukorra ekitongole eki. Obwire bukahika bangambira ngu bakaba nibagenda kumpa omulimo. Nkekaguza, nkole ki? Nkaba ntaine sente z’okuntwara omu New York omu Amerika. Nkatekerezaho muno ha nsonga y’okutwara omulimo nukwo ndeke kugenda omu isomero. Haroho ekintu ekintalyebwa ekyambaireho obunkaba ninyetekaniza kuhandikira Beseri.

Haroho munyaanya itwe kuruga omu kitebe kyaitu ow’akaba aswirwe omusaija atali omu mananu, akaija kara muno yatera kodi ha rwigi rwaitu, obu twamukingulireho yankwasa ebbahasa. Ekaba ijwire sente. Uwe n’abaana be baimukaga kara muno kugenda kwombera pamba. Kinu baakikoraga nukwo batungire sente ezirukumara nukwo nsobole kugenda omu rubuga New York. Akangambira ngu, “Genda omu isomero osome ebintu bingi kandi ogaruke obitwegese!” Hanyuma, nkasaba ekitongole eky’amasimu kunyongerayo wiiki itaano. Eky’okugarukamu ekibampaire kikaba “Nangwa!” Baitu ntakifeho. Nkaba mazire ira kukora encwamu yange. Nikinsemeza kumanya ngu omulimo ogu nkagwanga.

Gloria nauwe kabagambireho ebirungi ebyarukwijuka omu Pine Bluff: “Nkagonza muno ekiikaro kyaitu kinu eky’okutebezamu! Nkaba nyine abeegi ba Baibuli abaali  hagati ya 15 na 20. Twagendaga kutebeza nju ha nju obwire bwa nyenkyakara, hanyuma nitugenda kwegesa abeegi ba Baibuli kuhikira kimu saaha itaano ez’ekiro. Obuheereza twabwegondezamuga! Kakuba kyali kitwetagisize kwikarayo, nakubaire nyikiriize. Amananu gali ngu nkaba ntarukugonza kuruga omu buheereza obu kugaruka omu mulimo gw’okubungira ebitebe, baitu Yahwe akaba aine kintu kindi ekyatutekaniriize.” Tiharoho okugurukyagurukya.

Obutukaba nituhereza nk’abapayoniya omu Pine Bluff, tukasaba kuhereza nk’abapayoniya ab’embaganiza. Twali nitukigumya ngu nibaija kutwikiriza. Habwaki? Habwokuba tukaba tumanyire ngu omuroleerezi waitu owa disturikiti akaba nagonza tukonyere ekitebe ekiri omu Texas, kandi akaba nagonza tuheereze nk’abapayoniya ab’embaganiza omu kitebe eki. Ekitekerezo kye tukakigonza. Nahabweki tukalinda, twalinda nitunihira ngu nitwija kugarukwamu okusaba kwaitu baitu twasangaga akabokisi kaitu ak’ebbaruha katarumu kantu. Hakumalirra, ebbaruha yaitu ekaija. Bakaba nibatutuma kukora nk’omuroleerezi w’ekicweka! Okwezi kwali kwa Janwali omu mwaka 1965. Ow’oruganda Leon Weaver, arukuhereza nk’Omuteraniza w’Akatebe Kitaagi lya Amerika nauwe akatumwa kukora nk’omuroleerezi w’ekicweka omu kasumi ako konyini.

Ekintu ky’okutandika kubungira ebitebe b’ekicweka kikantiinisa muno. Hanyuma y’omwaka n’obusumi kurabaho, omuroleerezi wa disiturikiti, ow’oruganda James A. Thompson, Jr., akaija kurora omulingo nkaba nyemeriiremu omu by’omwoyo. Akansoborra omu mulingo ogw’embabazi nambere nkaba nsemeriire kwongeramu amaani, obu nanyoleka obukugu omuroleerezi w’ekicweka asemeriire kuba nabwo. Obuharabireho obwire buke ntandikire kubungira ebitebe, nkarora oburungi bw’obuhabuzi bwe. Ow’oruganda Thompson nuwe muroleerezi wa disiturikiti ow’okubanza ou naheerize nauwe. Nkamwegeraho ebintu bingi.

Omu busumi obu, omuroleezi w’ekicweka yatungaga okutendekwa kuke. Nkamara wiiki emu nindora omulingo omuroleezi w’ekicweka yakoraga ebintu obwakaba abungiire ekitebe. Hanyuma nauwe akamara wiiki emu narora omulingo nkaba ninkoramu ebintu obutwabungiire ekitebe kindi. Akampamu amagezi kandi akampa n’oburagirizi oburungi. Hanyuma y’entekaniza enu, buli omu akatandika kukora wenka. Ninyijuka ningambira Gloria nti, “Mali obwire bubaire buhikire obw’okundeka nkole nyenka?” Baitu obwire obubwarabireho, haroho ekintu kikuru ekinayetegeriize. Tihasobora kuburaho ab’oruganda abarungi abasobora kukukonyera, baitu nibasobora kukukonyera kakuba oikiriza bakukonyera. Nahati ninsiima muno obuhabuzi obunahairwe kuruga omu b’oruganda nka J. R. Brown owakaba nahereza nk’omuroleezi w’ekicweka, hamu na Fred Rusk ayali omu ha Babeseri.

Omu kasumi ako, okusoroora omu rangi kukaba kuli buli hamu. Kiro kimu, ekitebe kya KKK kikagenda kukumba omu rubuga Tennessee nambere tukaba  tubungire. Ninyijuka omurundi gumu tukaba tuli omu buheereza twagenda ha hoteri emu nukwo tuhumuleho. Obunagenzere kwekonyera, haroho omusaija ayali nazoka aine ekiniga kandi owakaba ayesigire tatu eyekaba nebaza ha kusoroora ayampondiire. Baitu ow’oruganda omu ow’erangi erukwera kandi owakaba natukira itwena obukooto akatahamu. Akankaguza, “Oli kurungi Ow’oruganda Herd?” Omusaija oli ow’ekiniga akaturukamu bwangu atekonyere n’okwekonyera. Habw’emyaka enu enyakurabireho, nkyetegeriize ngu okusoroora omu mahanga n’omurangi tikiretwa kunoba rangi y’omubiri gw’omuntu baitu kiretwa ekibi ekitwagweteriirwe itwena. Kandi nkyetegeriize ngu ow’oruganda asigara ali w’oruganda kabe aine rangi ki, kandi nasobora kukufera obukirukuba kyetagisize.

Tukahereza nk’abaroleerezi b’ebitebe kumara emyaka 12, kandi emyaka 21 tukagimara omu kuhereza nk’abaroleerezi ba disiturikiti. Emyaka enu yona ekaba nungi kandi ekarugamu ebirungi bingi. Baitu hakaba haroho omugisa gundi ogukaba gutulindiriire. Omu Agusto 1997 ekintu ekitukaba tumazire emyaka nituroota kikahikirra. Bakatweta kuhereza ha Beseri ey’omu Amerika. Obu haali harabireho emyaka 38 kuruga tusaba omurundi gwaitu ogw’okubanza kuheereza ha Beseri. Omwezi ogwahondiireho, tukatandika kuheereza ha Beseri. Nkaba nintekereza ngu ab’oruganda ab’obujunanizibwa ha Beseri bakaba nibetagaho obukonyezi habw’akaire kake, baitu tali nukwo kyabaire.

Nkabanza kuheereza omu ofisi erukujunanizibwa n’obuheereza. (Service Department) Nkegerayo ebintu bingi. Ab’oruganda abakoraga omu ofisi enu batungaga ebikaguzo ebigumire kuruga omu bagurusi b’ebitebe n’abaroleerezi b’ebicweka kwetorora ihanga lyona. Ninsiima muno habw’omulingo ab’oruganda bankonyire kandi bantendeka n’obugumisiriza. Kakuba bangarra omu ofisi enu kukorayo, nahati haroho ebintu bingi ebinsobora kwegera ha b’orugana abo.

Nyowe na mukazi wange Gloria tugonza muno Beseri. Kuruga ira tugonza kwimuka kara, kandi ekintu kinu kikuru muno obw’orukuba nokora ha Beseri. Hanyuma y’omwaka gumu n’okuhinguramu kake, nkatandika kuheereza nk’omukonyezi w’Akatebe Akarukujunanizibwa n’Obuheereza Akali hansi y’Akatebe Akalemi ak’Abakaiso ba Yahwe. (Service Committee of the Governing Body of Jehovah’s Witnesses) Hanyuma, omu omwaka 1999 bakankoma kuheereza ha Katebe Akalemi. Bintu bingi ebinyegere omu mulimo gunu. Baitu isomo erirukukirayo obukuru niryo ngu omutwe gw’Ekitebe Ekikristaayo nuwe Yesu Kristo hatali omuntu.

Obwire obumu obuntekereza ha bwomeezi bwange, nyehurra nka nabbi Amosi. Yahwe akarora omulisa onu omuculeezi ow’akaba aine omulimo gw’okusara emiti emisukomoli, eby’okulya ebyalibwaga abantu abanaku bonka. Baitu Yahwe akamufoora nabbi kandi akamuha emigisa nyingi omu buheereza bwe. (Amosi 7:14, 15) Nikyo kimu na nyowe, Yahwe akandora, nyowe mutabani w’omulimi omunaku ayaikaraga omu Liberty, Indiana. Kandi Yahwe ampaire emigisa nyingi ei ntasobora kubaza nkamarayo! (Enfumo 10:22) Ninsobora kuba natandikire ndi munaku, baitu nindora ngu omu kumalirra ndi muguuda omu mulingo nkaba ntakatekerezaga!