EKISEMBO ekibarukukwasa Jordan nikizooka nk’ekitaine omugaso. Baitu haluwe, kisembo ky’omehendo mwingi. Jordan nagamba ngu ‘Omugurusi Russell munywani w’eka yabo nuwe y’amuhaire ekisembo kinu.’ Hanyuma y’okufa kwa Russell, Jordan akakyetegereza ngu Russell akaba akonyiire isenkuru hamu n’abazaire be omu busumi obwali bugumangaine. Jordan nagamba ngu, “hati nk’oku nyetegeriize ebirukukwata hali Russell, ekisembo kinu n’obukiraaba kiri kitaito, kyeyongiire kuba ky’omuhendo hali nyowe.”

Nk’oku kyolekerwe omu kyokurorraho kya Jordan, ekisembo nikisobora kuzooka nk’ekitaine omugaso omu maiso g’abantu abandi. Baitu hali ogu ou barukuba bakihaire akitwara kuba ky’omugaso kandi ky’omuhendo mwingi. Baibuli ebazaaho ekisembo ekikyakizereyo kuba ky’omuhendo mwingi muno omu bigambo binu: “Ruhanga nukwo yagondeze ati Ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.”​—Yohana 3:16.

Tekerezaaho ekisembo ekisobora kuletera omuntu obwomeezi obutahwaho! Haroho ekisembo ekindi ekisobora kukikira? Abantu abandi nibasobora kutakitwara kuba ky’omugaso, baitu hali Abakristaayo ‘ky’omuhendo’ mwingi muno (Zabuli 49:8; 1 Petero 1:18, 19) Habwaki Ruhanga y’ahaireyo obwomeezi bw’Omwana we nk’ekisembo hali ensi?

Omukwenda Paulo akakozesa ebigambo binu kusoborra ensonga habwaki: “Nukwo, nkekibi okukyatahire omu nsi obwomuntu omu, kandi nokufa obwekibi; nukwo nokufa kwahikire kuti ha bantu bona, baitu bona bakasisa.” (Abarumi 5:12) Adamu akakigenderra kujemera Ruhanga kandi akacwerwa ogw’okufa. Kurabira omuli Adamu, okufa kukahika ha baijukuru be boona​—otwaliiremu naitwe.

 “Empera yekibi kufa; baitu ekisembo kyembabazi ekya Ruhanga bwomezi obutahwaho omu Kristo Yesu Mukama waitu.” (Abarumi 6:23) Kusobora kukonyera abantu kuruga omu kufa, Ruhanga akatuma Omwana we Yesu Kristo kwija munsi kuhayo obwomeezi obuhikiriire kucungura abantu. Boona abarukwikiririza omu kicunguro kya Yesu nibaija kutunga obwomeezi obutahwaho.​—Abarumi 3:24.

Habw’emigisa yoona abaheereza ba Ruhanga barukutunga kuraba omuli Yesu Kristo, omukwenda Paulo akagamba ati: “Ruhanga asimwe obwekisembokye ekitarukugambwa.” (2 Abakolinso 9:15) Mali, ekicunguro kisembo ky’omuhendo mwingi ekitutasobora kusoborra oburungi bwakyo tukabumarayo. Baitu, habwaki ekicunguro nikyo kisembo ekirukukirayo omu bisembo byona Ruhanga eby’atuhaire? Ekicunguro nikyahukana kita ha bisembo ebindi kuruga hali Ruhanga? * Kandi turayoleka tuta ngu nitusiima ekicunguro? Nitukusaba osome eby’okugarukamu kuruga omu Baibuli omu bicweka bibiri ebirukuhonderaho.