Rosie ow’emyaka 21 nagamba ati, “Naikaraga nyeralikiriire muno kandi kinu kikyandeteraga kutekereza ebintu ebibi ebisobora kubaho kandi kinu kyantuntuzaaga muno.” Byahandiikirwe ki eby’amukonyiire? Kimu hali byo, nikyo Matayo 6:34: “Mutalituntu’ra bya [nyenkya], baitu ekiro kya [nyenkya] kiritunturra ebyakyo. Ekiro kimu obubi bwakyo bukimara.” Rosie nagamba ngu ebigambo bya Yesu ebyo bikamukonyera kuleka kwetuntura habw’ebintu ebirabaho nyenkya. N’ayongera n’agamba ati, “Nkaba nyine ebizibu ebirukumara, nahabweki, nkaleka kwetunturra ebizibu eby’omu busumi bw’omu maiso hamu n’ebyo ebitarukwija kubaho.”

Yasmine ow’emyaka 18 nagamba ngu nauwe akakyetegereza ngu, okwetuntura kukaba kutandikire kumuhinguranaho. “Narraga muno kumara ebiro bingi, n’ebiro bimu nararaga ntabyamire. Nkehurra oti rundi okwetuntura nikumaraho obwomeezi bwange.” Kyahandiikirwe ki ekyamukonyiire? Nagamba ngu 1 Petero 5:7: “Nimumunagira okutuntura kwanyu kwona haluwe, baitu nabitaho omutima ebigambo byanyu.” Yasmine nagamba ati: “Nkaikara ninsaba Yahwe kandi yagarukamu okusaba kwange. Nkasisana oti rundi bantwire omugugu gw’amaani kuruga ha mutwe gwange. Obwire obumu ebitekerezo byange ebibi biija, baitu hati manyire omulingo gw’okukwatamu ekizibu kinu.”

Omwisiki arukwetwa Isabella nagamba ati: “Nintekereza ngu kutakorra ebintu omu bwire kiri omu sagama yange habwokuba na isenyowe nauwe nukwo ati. Nyikara ninyongezaayo ebintu ebikuru ebi nsemeriire kukora nukwo​—mbyame rundi ndole tivi omu kiikaro ky’okukora. Omuze gunu mubi habwokuba gukuletera kwetuntura n’okutaba mukozi murungi.” Omusingi ogwamukonyire guli omu 2 Timoseo 2:15, ogurukugamba ngu: “Wekambe kweyoleka osimirwe hali Ruhanga, omukozi atarukukwatwa ensoni.” Isabella nagamba ngu: “Nkaba ntarukugonza Yahwe akwatwe ensoni habw’emirimo yange habwokuba tinagikorraga omu bwire.” Isabella akahinduka y’atandika kukorra emirimo ye omu bwire.

Kelsey nauwe nagamba ati: “Obunabagaba nyine omulimo ogw’okukora hanyuma nkagwongerayo nkagukorra ha dakiika ey’okumalirra, kinu kyandeteraga kutandika kurra, kuburwa oturo, hamu n’okwetuntura. Kandi eki tikyansemezaaga.” Kelsey akatunga obukonyeza kuruga omu kitabu kye Enfumo 13:16: “Omuntu wena omwekengi akora emirimo nokumanya: baitu omudomadoma ayanjara obutami.” Obuyacumitiirize ha kyahandiikirwe kinu akeegamu isomo linu: “Ky’amagezi kutekaniza kara nk’oku orakora emirimo yawe. Hati nyine nambere mpandiika emirimo ei nsemeriire kukora kandi kinu kinkonyire kugyetekaniriza kara nukwo taliinda kugikora obwire buhweireyo.”

Omukazi arukwetwa Kirsten nagamba ngu: “Iba nyowe akagenda yandeka n’abaana bbana abato.” Kyahandiikirwe ki ekya mukonyire? Enfumo 17:17 nikigamba ngu: “Enganjani negonza obusumi bwona, mugenziwe ayazairwe habwobujune.” Kirsten akahikirra ab’oruganda omu kitebe abarukuramya Yahwe kumukonyera. Kiki ekyarugiremu? “Banywani bange boona bakankonyera omu miringo nyingi! Abamu bandeteraga eby’okulya hamu n’ebyetaago byange ebindi nibabita ha mulyango gwange. Abandi bakankonyera kunkwatiraho abaana kandi ondi akankonyera kutunga omulimo. Banywani bange boona bakankonyera omu bwire bw’obwetaago.”

Delphine, ou tusangirwe tubalizeeho ha kubanza, nauwe akaba aine ekizibu ky’amasu. Hanyuma y’okufeerwa abantu be n’agamba ati: “Naroraga abantu abandi bali kurungi n’abagonzebwa babo baitu nyowe nkaba ntaine muntu wena, kinu kikandetera kuba n’amasu maingi.” Ekyahandiikirwe ekyamukonyire kiri omu Zabuli 68:6, ekirukugamba ngu: “Ruhanga abaha enju abanyakukwatwa amasu.” N’ayongera n’agamba ngu: “Nkakimanya ngu orukarra runu rukaba rutakumanyisa enju rundi eka yonyini. Baitu nirumanyisa Ruhanga atuha eka ey’eby’omwoyo nambere hali obulinzi, kandi enyakurumu abantu abarukufaayo n’okugonzagana. Kandi nkakyetegereza ngu tinsobora kwirra haihi n’abantu ba Yahwe ntakabandize kumwirra haihi. Zabuli 37:4, NW ekankonyera, erukugamba ngu: ‘Tunga okusemererwa kuruga hali Yahwe, kandi naija kuha omutima gwawe ebigurukwetaaga.’”

Namalirra nagamba ati: “Nkakyetegereza ngu nkaba nsemeriire kugumira hali Yahwe habwokuba nuwe munywani arukukirayo. Hanyuma nkahandiika ebintu eby’omwoyo ebi nkaba ninsobora kukora n’abanywani abarukuheereza Yahwe. Nkeega kurora ebirungi byabo n’okubaganyira ensobi zaabo.”

Amananu gali, abanywani abarukuheereza Yahwe Ruhanga tibahikiriire. Abakaiso ba Yahwe nabo batunga ebizibu nk’abantu abandi. Baitu habw’okwegesebwa Baibuli kibaletera kukonyera abantu abandi nk’oku barukusobora. Kandi kirungi kunywana abantu nkabo. Baitu, emisingi ya Baibuli n’esobora kutukonyera kuraba omu bizibu ebitasobora kuhwaho omu kasumi kanu, nk’endwaire ezitarukukira hamu n’obujune?