Haihi buli omu naikiriza ngu ebikorwa ebimu bihikire rundi tibihikire. Ekyokurorraho, omu nsi yoona, ebikorwa nk’okwita, kuhamba, kusobyaho abaana abato bijumirirwa, baitu ebikorwa eby’obwinganiza, eby’embabazi, hamu n’okusaalirirwa abandi bisiimwa baingi. Baitu kandi obukirukuhika ha ncwamu ezindi nka nooha ow’oraterana nauwe, kubaza amananu rundi nangwa, rundi omulingo ogw’okukuzaamu abaana? Abantu baingi bateekereza ngu busaho ncwamu ey’ehikire rundi etahikire. Nibatekereza ngu haihi encwamu zoona niziikirizibwa. Abantu bakira kukora encwamu zaabo nibasigikirra ha nyehurra zaabo n’omulingo abantu ababetoroire barukwehurra ha nsonga egi. Entekereza ya mulingo ogu nungi?

Tukira kukora encwamu nitusigikirra ha mulingo turukwehurra obukirukuhika ha kihikire n’ekitahikire, ekintu ekimanyirwe nk’omuntu ow’omunda rundi isenkati mutima. (Abarumi 2:​14, 15) N’abaana abato nibasobora kubaganizaamu hagati y’engeso ey’ehikire n’ey’etahikire kandi nibasobora kwehurra kubi obubakora ekintu ekitahikire. Hanyuma y’obwire kurabaho, omuntu waitu ow’omunda atendekwa engeso ezitwega kuruga omu ka, omu banywani, abantu ab’ekiikaro, ediini, hamu n’obuhangwa. Obutukora encwamu, omuntu waitu ow’omunda atugambira encwamu eitukozere obweraaba nehikaana n’engeso ezitwayegere rundi nangwa.

Omulingo turoramu ekihikire n’ekitahikire nikisobora kutuleetera kwoleka embabazi, okusiima, obwinganiza, n’okusaalirirwa abantu abandi. Ekindi, nikisobora kutuleetera kwetanga kukora ebintu ebirasaaliza abantu abaturukugonza rundi kwetanga kukora ebintu ebiratuleetera kuswara n’okwecwera omusango.

Kirungi kuhondera enyehurra zaitu? Garrick obw’akaba akyali muto, aine omulingo yacwiremu kutwaza obwomeezi bwe. Nagamba ati, “nakoraga kyona ekinagonzaaga kukora.” Baitu akakyetegereza ngu, kukora uwe ekyakaba natekereza ngu kihikire tikyarugamuga ebirungi. Nagamba ngu obwomeezi bwe bukaba butarumu kusemererwa kwona habw’okuba yayejumbiraga omu bikorwa eby’obusiihani, yakozesaaga ebitokooza bwongo, yatamiiraga kandi ayejumbira omu bikorwa by’okurwana.

Kwongerra ha nyehurra zaitu, emirundi erukukira obwingi tukora encwamu nitusigikirra ha mulingo abantu abandi baraaroramu encwamu ezitukora. Eki nikisobora kutukonyera kugasirwa omu byokurorraho byabo n’amagezi gaabo. Tuteekwamu ekitiinisa ab’omu maka gaitu, abanywani, hamu n’abantu ab’ekiikaro obutukora ebintu ebibarukutekereza ngu bihikire.

Kirungi kuhondera enyehurra z’abantu abandi? Priscila obw’akaba akyali muto, akakora ebintu abanywani ab’emyaka ye baakoraga, kandi yayejumbiraga omu kuterana atakataahire obuswere. Baitu akakyetegereza ngu kukora abandi ekibarukuteekereza ngu nikyo kihikire, tikyamuleeteraga kusemererwa kwona. Nagamba ati: “Kukora buli omu eky’akaba n’akora kitandetere kwehurra kurungi. Kikandetera kukora ebintu eby’obudoma kandi ebyatekaga obwomeezi bwange omu kabi.”

Enyehurra zaitu hamu n’ez’abandi bikuru muno obukirukuhika ha kukora encwamu hagati y’ekihikire n’ekitahikire. Baitu eki kyonka tikirugamu ebirungi obwire bwona. Obwire obumu nitusobora kwehikyaho akabi rundi abandi habwokuba titurora ebiraaruga omu ncwamu zaitu. (Enfumo 14:12) Kandi titusobora kukigumya ngu engeso zaitu rundi ez’abo abatwetoroire nungi hali itwe kandi ngu tikirukutwetaagisa kuhinduramu. Kasumi kanu engeso ez’arorwaga nk’embi niziikirizibwa kandi ez’arorwaga nk’enungi hati nizirorwa nk’ezitasemiire.

Haroho ekintu ekirungi ekisobora kutukonyera kumanya ekihikire n’ekitahikire? Haroho endengo ezirukukwata ha ngeso ezitusobora kuhondera kasumi kanu kandi tuteyijukize omu kasumi ak’omumaiso?

Ekirungi kiri ngu, haroho ekintu ekirumu amagezi agatahinduka kandi agarukwesigwa agasobora kukozesebwa omuntu wena, hoona nambere arukwikara. Ekicweka ekirukuhonderaho nikiija kubazaaho nambere tusobora kusanga obuhabuzi oburukukirayo kwesigwa obukirukuhika ha kucwamu ekihikire n’ekitahikire.