Kakuba oba n’ogonza kugenda omu kiikaro eky’otakagendamuga, kiki ekiwakukozere?

1. 1. Kukwata omuhanda ogw’orukutekereza ngu nugwo guhikire.

2. 2. Kuhondera abandi n’otekereza ngu nibamanya omuhanda.

3. 3. Kukozesa endagirro ey’erukwesigwa nka GPS, maapu, rundi omunywani ow’orukwesiga ow’amanyire omuhanda.

Kakuba tukomamu eky’okubanza rundi ekyakabiri, nitwija kugira nambere twahika baitu hatali nambere tubaire nitugonza kugenda. Baitu kakuba tukomamu ekyakasatu, nitwija kuhika nambere turukugonza kugenda.

Obwomeezi bwaitu buli nk’orugendo oruturukunihira ngu nirwija kutuhikya omu kasumi ak’omumaiso akarumu okusemererwa. Kuhika nambere turukugenda rundi kutahikayo nikiija kusigikirra ha ndagirro eitukozeseze kukora encwamu.

N’obukiraaba ngu encwamu ezirukukira obwingi ezitukora ntaito, encwamu ezimu ziba nkuru muno. Encwamu zinu enkuru zooleka kiki ekitutwara kuba kihikire rundi ekitahikire. Encwamu nk’ezi niziija kutukwataho kandi zikwateho n’abo abaturukugonza omu mulingo omurungi rundi omubi. Encwamu zinu nizikwata ha nsonga nka:

• Okuterana n’obuswere

• Obwesigwa, omulimo, hamu na sente

• Omulingo gw’okukuzaamu abaana

• Omulingo tutwazaamu abandi

N’osobora ota kukigumya ngu encwamu ez’orakora omu nsonga zinu niziija kuhikya iwe n’ab’omu ka yaawe omu kasumi ak’omumaiso akarumu okusemererwa?

Ekikaguzo buli omu haliitwe ekyasemeriire kwekaguza nikyo kinu: Kiki ekirankonyera kukora encwamu enungi obukirukuhika ha kihikire n’ekitahikire?

Magaziini enu niija kusoborra habwaki nitusobora kwesiga Baibuli eky’erukugamba obukirukuhika ha kihikire n’ekitahikire, n’omulingo esobora kukukonyeramu.