Ekihikire n’Ekitahikire: Encwamu ey’Osemeriire Kukora
Endengo ezirukukwata ha ngeso ezitucwamu kuhondera nizisobora kutuleetera okusemererwa rundi nangwa. Kandi Yahwe Ruhanga akimanyire. Egi niyo ensonga habwaki nagonza tuhondere endengo ze.
Yahwe nagonza tube n’obwomeezi oburumu obusinge n’okusemererwa.
“Ninyowe [Yahwe] Ruhanga wawe, Arukukwegesa okugasa, arukukuterekereza omu muhanda ogwoliba nogendamu. Ai bambi, kakuba ohulire ebiragiro byange! obusinge bwawe bwakubaire nkekyambu, nokuhikirra kwawe kwakubaire nkebigonzi byenyanja.”—Isaya 48:17, 18.
Nk’Omuhangi waitu, Ruhanga namanya omulingo ogurukukirrayo kimu oburungi ogu tusemeriire kutwazaamu obwomeezi bwaitu. Nagonza tuhondere obuhabuzi bwe habwokuba nibwija kuturugirramu ebirungi. Obutuhondera ebiragiro bya Yahwe, tuba tutarukugurukyagurukya encwamu zaitu obuziraaba niziija kurugamu ebirungi. Nitwija kwikara nitukora encwamu enungi eziratuleetera obusinge n’okusemererwa.
Yahwe tatusaba kukora ekintu ekitutarukusobora.
“Baitu ebiragiro binu ebinkuragiire hati tibirukulemera okukujwahya, kunu tibiri hara muno.”—Ekyebiragiro 30:11.
Kuhondera endego za Yahwe ezirukukwata ha ngeso nikisobora kutwetaagisa kuhinduramu enteekereza yaitu n’ebikorwa byaitu. Baitu, Yahwe tatusaba kukora ekitutarukusobora. Habwokuba nuwe Muhangi waitu namanya ebitusobora kukora. Obuturayeyongera kumanya Yahwe, nitwija kukyetegereza ngu “ebiragirobye tibirukulemera.”—1 Yohana 5:3.
Yahwe naraganiza kukonyera abo abacwamu kuhondera endengo ze.
“Baitu nyowe [Yahwe] Ruhanga wawe ndikwata omukono gwawe ogwobulyo, ninkugambira nti Otatina ndakukonyera.”—Isaya 41:13.
Nitusobora kutwaza obwomeezi bwaitu omu omulingo Yahwe arukugonza habwokuba naija kutukonyera. Nasobora kutukonyera kuraba omu kigambo kye Baibuli, ekituha amaani n’okunihira.
Obukaikuru bw’abantu kwetoroora ensi bakyetegeriize ngu kuhondera endengo za Baibuli kibakonyiire omu bwomeezi bwabo. Nahabweki weyongere kwega ha buhabuzi oburungi oburukusangwa omu Baibuli. Nosobora kutandika nokozesa burocuwa Wegondeze omu Bwomeezi Ebiro n’Ebiro enyakuli ha jw.org. Erumu amasomo ganu:
-
Baibuli n’Esobora Eta Kukukonyera?
-
Baibuli Eha Okunihira
-
Nosobora Kwesiga Baibuli?
Obworaaba noyekebiija ekigambo kya Ruhanga Baibuli, noija kukyetegereza ngu tekahwaga ha mulembe; eikara neyesigwa hati n’ebiro byona. (Zabuli 111:8) Kuhondera endengo ezirukukwata ha ngeso ezirukusangwa omu Baibuli, nugwo omulingo ogurukukirrayo kimu oburungi ogw’okutwazaamu obwomeezi bwaitu. Baitu, Ruhanga tarukwija kutuhambiriza kukikora. (Ekyebiragiro 30:19, 20; Yosuha 24:15) Eri ncwamu buli omu haliitwe ey’asemeriire kukora.
