Amakuru amarungi ag’Obukama bwa Ruhanga nigatebezebwa omu nsi yoona, nk’oku Yesu yarangire. (Matayo 24:14) Kusigikirra ha kitabu kya Baibuli ekya Danieri, Obukama bwa Ruhanga gavumenti eya Ruhanga. Esuura eya kabiri omu kitabu kya Danieri, n’ebazaaho obunabbi obukukwata ha mulingo amahanga kirimaani rundi amakama gakuhonderaine, kutandika n’obulemi bwa Baburoni kuhika hati. Orukarra orwa 44 nirubazaaho ebirukugenda kubaho omu kasumi ak’omu maiso ruti:

“Kandi omu biro ebyabakama abo Ruhanga owomu iguru aliimukya obukama, obutalihwerekerezebwa ebiro byona, nobukwakuba okulema kwabwo tikulisigirwa ihanga erindi; baitu bulicwacwana nubumaraho obukama obu bwona, kandi buligumaho ebiro nebiro.”

Ekyahandiikirwe kinu n’obunabbi obundi nibwoleka ngu Obukama bwa Ruhanga nibwija kwihaho obulemi bw’abantu kandi nibwija kuletera  abantu obusinge hamu n’eteeka omu nsi. Obwomeezi buliba buta hansi y’Obukama bwa Ruhanga? Enu niyo emu ha mirago erukwija kuhikirra omu kasumi akatali kahara.

• OBULEMU TIBULYONGERA KUBAHO

  Zabuli 46:9: “[Ruhanga] aramaho obulemu okuhika ha mpero zensi; acwa obuta, nasaramu habiri icumu; ayokya amagali omu murro.”

  Teramu akasisani ensi nk’okuyakubaire kakuba sente zoona n’obukugu ebirukukozesebwa kukora eby’okurwanisa omu bulemu byali nibikozesebwa omu kukora ebintu ebirukugasira abantu hatali kubaita! Omurago ogu nigwija kuhikirra omu Bukama bwa Ruhanga.

• TIHALYONGERA KUBAHO OBURWAIRE

  Isaya 33:24: “Kandi anyakuikarayo taligamba ati ndi murwaire.”

  Tekerezaaho ensi etarumu burwaire bw’omutima, ekookoro, omuswija gw’emibu, rundi oburwaire obundi bwona. Amarwarro hamu n’emibazi biija kuba bitakyayetaagwa. Abantu omu nsi baliba n’obwomeezi obuhikiriire obutarumu kurwara.

• TIHALYONGERA KUBAHO IBURA LY’EBY’OKULYA

  Zabuli 72:16: “Halibaho omweru [gw’ebyokulya] omu nsi, ha mutwe gwensozi.”

  Ensi niija kwana eby’okulya ebirukumara habwa buli omu wena. Enjara n’endwaire eziretwa amalya mabi birihwaho.

• TIHALIBAHO OKUSAASA, OKUGANYA, HAMU N’OKUFA

  Okusuku’rwa 21:4: “[Ruhanga] alisusura amaizi gona ha maiso gabu; kandi tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho: ebyokubanza bihoireho.”

  Kinu nikimanyisa ngu nihaija kubaho obwomeezi obutahwaho obuhikiriire omu nsi empyaka! Eki nikyo Yahwe Ruhanga waitu ow’okugonza aturaganiize.

Kyanguhire kwikiriza emirago enu? N’obukiraaba ngu abantu baingi nibaikiriza ngu obwomeezi oburaganiziibwe omu Baibuli burungi, baingi habw’ensonga ezitali zimu na zimu kibagumira kwikiriza ngu nikisoboka kwomeera ebiro n’ebiro. Eki tikirukuhuniriza habwokuba busaho muntu ayakatungaga obwomeezi obutahwaho nukwo atugambire nk’oku burukusisana.

Abantu baikaire omu kibi hamu n’okufa, omu obusaasi bwingi, n’okubonabona, kandi kinu kimazire akasumi kaingi muno ekiretiire baingi kumanyiira obwomeezi bunu oburumu okubonabona nk’eky’obuhangwa. Baitu kinu tikiri kigendererwa kya Yahwe Ruhanga hali abantu.

Kusobora kutukonyera kugumya byona ebyaturaganiize, Ruhanga ataine okugurukyagurukya kwona akagamba ati: “Tikirigarukira busa namberendi, baitu kirikora eki ekindukugonza, kandi kiribona omugisa omweki ekinkitumira.”​—Isaya 55:11.

Baibuli ebazaaho Yahwe nka Ruhanga “atarukusobora okubiha.” (Tito 1:2) Nk’oku aturaganiize ebintu biingi ebirungi omu kasumi ak’omu maiso, kyakubaire ky’amagezi kutekerezaaho binu: Mali nikisoboka abantu kwomeera omu rugonjo orurungi omu nsi habw’ebiro n’ebiro? Kiki ekitusemeriire kukora kugasirwa omu murago gwa Ruhanga? Noija kumanya ebirukukiraho kandi n’okutunga eby’okugarukamu eby’ebikaguzo binu, ha mpapura ezirukuhonderaho eza magaziini enu.