WAKEHURRAGA kubi muno okagonza n’okweyita? Naiwe obworaaba wakehurraga oti, nikiija kukwanguhira kumanya enyikara ya Adriana. Akaba ayetuntwire muno ataine okusemererwa kwona n’obukwakuba okunihira. Badakitaali bakamusanga aine oburwaire obw’okwenuuba.

Tekerezaaho ekyokurorraho eky’omusaija arukwetwa Kaoru kuruga omu ihanga lya Japan, owakaba narolerra abazaire be abagurusire kandi abarwaire, nagamba ati: “Omu kasumi ako, nkaba nyine puresa nyingi ha mulimo. Akasumi kakahika naleka kugonza kulya, naburwa oturo kandi nkatandika n’okutekereza ngu kakuba nfa ebizibu byange nibiba bihoireho.”

Omusaija arukwetwa Ojebode kuruga Nigeria nagamba ngu: “Naikaraga nyine enaku nyingi eyandeteraga kurra, nahabweki nkaserra omulingo ogw’okweyita.” Ekirungi kiri ngu, Ojebode, Kaoru, hamu na Adriana bateyite. Baitu, enkumi n’enkumi z’abantu beyita buli mwaka.

Abantu abarukukira obwingi abeyita baba basaija, kandi habw’okutiina kuswara baingi halubo tibabanza kuserra obukonyezi. Yesu akagamba ngu abarwaire nibetaaga omufumu rundi dakitaali. (Luka 5:31) Nahabweki, naiwe obworaaba notekerezaaho kweyita, otatiina kuserra obukonyezi nukwo osobole kurwanisa ebitekerezo binu. Abantu abaine oburwaire obw’okwenuuba, bakyetegeriize ngu kutunga obujanjabi kibakonyiire kwehurra kurungi kandi n’okugumiisiriza. Ojebode, Kaoru, hamu na Adriana bakatunga obujanjabi kuruga omu irwarro kandi hati nibehurra kurungi.

Badakitaali nibasobora kukozesa emibazi rundi kukozesa omulingo ogurukwetwa talk therapy kunu nukwo kubaza n’omurwaire kumara akasumi rundi n’okukozesa emiringo yoona ebiri. Abo abenuuba baba nibetaaga obusagiki obw’abanyabuzaale hamu n’enganjani, abarukugumiisiriza kandi abarukubafaaho. Yahwe Ruhanga nuwe omunywani arukukirayo oburungi buli muntu ow’asobora kunywana kandi akozesa Ekigambo kye Baibuli kukukonyera.

Abantu abaine oburwaire obw’okwenuuba bakira kwetaaga obujanjabi habw’akasumi akaraihire kandi kibetaagisa kuhinduramu omulingo batwazaamu obwomeezi bwabo. Baitu obworaaba oine oburwaire obw’okwenuuba, naiwe n’osobora kulindirra akasumi ak’omu maiso akarungi nkaka Ojebode alindiriire. Ojebode nagamba ngu: “Ndindiriire akasumi nambere ebigambo ebiri omu Isaya 33:24 birihikirra, ebirukugamba ngu busaho wena anyakwikarayo aligamba ati ndi murwaire.” Leka naiwe omurago ogwa Ruhanga ogw’okufoora “ensi empyaka” nambere hataliba “okusasa” gukuhumuze. (Okusuku’rwa 21:1, 4) Omurago ogu nigutwarramu kumaraho oburwaire obw’okwenuuba hamu n’obusaasi obw’omu mutima. Obusaasi bwawe obw’omu mutima nibwija kuhweraho kimu, tolyongera ‘kubwijuka kandi tibulyongera kukutaaha omu mutima.’​—Isaya 65:17.