Ensi Empyaka Enyakuli Orugonjo Orurungi Iriire Haihi!
Ruhanga akahanga ensi nukwo abantu abahikiriire bagiikalemuga ebiro n’ebiro. (Zabuli 37:29) Akateeka abantu ab’okubanza Adamu na Hawa omu rugonjo orurungi orukwetwa Adeni kandi ubo n’abaijukuru baabo yabaha obujunanizibwa obw’okugalihya ensi n’okugirolerra.—Okubanza 1:28; 2:15.
Kasumi kanu, ensi tekyali Rugonjo Orurungi nk’oku Ruhanga akaba n’agonza. Baitu, ekigendererwa kya Ruhanga tikikahindukaga. Naija kufoora ata ensi Orugonjo Orurungi? Nk’oku ebicweka eby’enyuma byolekere, Ruhanga talihwerekereza ensi eiturukwikaramu. Oihireho, naija kulekamu abantu abesigwa nubo bagiikalemu. Obwomeezi omu nsi nibwija kusisana buta Ruhanga obw’arahikiiriza emirago ye?
Gavumenti emu yonka niyo erirema ensi yoona
Omu kasumi akatali ka hara, gavumenti ya Ruhanga ey’omu iguru obweraaba etandikire kulema, ensi niija kufooka kiikaro ekirungi nambere abantu basobora kwikara hamu omu bumu, nibakora emirimo enungi, kandi ey’erukubaleetera okusemererwa. Ruhanga akomere Yesu Kristo kulema ensi yoona. Kwahukanaho n’abalemi abaingi kasumi kanu, Yesu naija kwebembeza ebyetaago by’abantu abaarukulema. Obulemi bwe nibwija kusigikirra ha kugonza, kandi aliba Mukama ow’embabazi, ow’arukusaalirirwa abandi kandi ow’obwinganiza.—Isaya 11:4.
Obumu omu nsi yoona
Abantu abaliikara omu nsi tibalyebaganizaamu nibasigikirra h’amahanga rundi enganda. Boona baliikara hamu omu bumu. (Okusuku’rwa 7:9, 10) Abantu boona abaliikara omu nsi baligonza Ruhanga n’abataahi baabo kandi balikorra hamu omu businge kuhikiiriza ekigendererwa kya Ruhanga eky’okurolerra ensi ey’eriba eka yabo.—Zabuli 115:16.
Okutekaana kw’enyikara y’obwire n’ebitwetoroire
Obukama bwa Ruhanga obuburatandika kulema ensi, Omuhangi naija kuba n’obusobozi ha nyikara zoona ez’obwire kandi aziikaze zitekaine. (Zabuli 24:1, 2) Yesu obw’akaba ali omu nsi, akatuha endozo ey’amaani ga Ruhanga agaamusobozeseze kuculeeza ihunga ery’amaani. (Marako 4:39, 41) Hansi y’obulemi bwa Kristo, busaho n’omu alitiina ebigwererezi. Ekindi, Obukama bwa Ruhanga nibwija kugarraho obusinge hagati y’abantu n’ebisoro kandi tuliba tutakyasiisa eby’obuhangwa.—Hoseya 2:18.
Obwomeezi oburungi n’ebyokulya bingi
Buli omu alyegondeza omu bwomeezi oburungi. Busaho n’omu alirwara, aligurusa kandi alifa. (Isaya 35:5, 6) Abantu nibaija kwegondeza omu nsi enungi kandi enyecumi nk’ey’abantu ab’okubanza bayegondizeemu omu rugonjo rwa Adeni. Nk’oku kikaba kiri omu Adeni, omu nsi empyaka, itaka liryana ebyokulya omu bwingi kandi abantu balibyegondezaamu. (Okubanza 2:9) Kusisanaho n’ihanga lya Ruhanga erya Isaleri eya kara, omu Rugonjo Orurungi buli omu ‘alirya ebyokulya aigute.’—Ebyabalevi 26:4, 5.
Obusinge n’obulinzi bwonyini
Hansi ya gavumenti ya Ruhanga, abantu boona balyegondeza omu businge kandi balitwazangana omu mulingo ogw’embabazi kandi ogw’obwinganiza. Tihalibaho obulemu, kukozesa kubi obusobozi kandi buli omu aliba aine ekyarukwetaaga. Baibuli n’eraganiza eti: “Baliikara omuntu wena hansi yomuzabibugwe, nomuntu wena hansi yomutinigwe; kunu tihalibaho alibatinisa.”—Mika 4:3, 4.
Abantu boona baliba baine amaju amarungi n’emirimo ey’erukusemeza
Buli ka yoona eriba ine ahokwikara hataroho kubingwa omu ka yaawe kandi buli mulimo gwona ogutulikora tuligwegondezaamu. Nk’oku Baibuli egamba ngu abo abaliba omu nsi ya Ruhanga empyaka “tibalitabanira busa,” rundi kukorra busa.—Isaya 65:21-23.
Okwegesebwa okurukukirayo
Baibuli n’eraganiza eti: “Ensi eriijura okumanya Mukama.” (Isaya 11:9) Abantu abaliba nibaikara hansi y’Obukama bwa Ruhanga, balyegera h’amagezi ag’Omuhangi wabo Yahwe agatahwaho, n’ebintu ebirungi ebiyahangire. Tibalikozesa amagezi gaabo kukora eby’okurwanisa eby’okukora kubi abantu abandi. (Isaya 2:4) Oihireho, balyega omulingo basobora kwikara hamu omu businge n’omulingo basobora kurolerra ensi.—Zabuli 37:11.
Obwomeezi obutahwaho
N’obwegendereza, Ruhanga akateekaniza ensi nukwo twegondeze omu bwomeezi buli kiro. N’agonza abantu baikale omu nsi ebiro n’ebiro. (Zabuli 37:29; Isaya 45:18) Kusobora kuhikiriza ekigendererwa kye eky’okubanza, Ruhanga ‘alimirra kimu okufa ebiro byona.’ (Isaya 25:8) Baibuli n’eraganiza eti: ‘Tihalibaho okufa; n’obukwakuba okuteera empamo, n’obukwakuba okurra, n’obukwakuba okusaasa tibikiroho.’ (Okusuku’rwa 21:4) Ruhanga naija kuha abantu boona—abaalijuna hamu n’obukaikuru bw’abantu abaalihumbuura, omugisa ogw’okwomeera ebiro n’ebiro obw’alihwerekereza ensi enu embi.—Yohana 5:28, 29; Engeso Ezabakwenda 24:15.
N’omu kasumi kanu, obukaikuru bw’abantu omu nsi yoona baliyo nibetekaniriza obwomeezi hansi y’Obukama bwa Ruhanga obuli haihi kwija. N’obukiraaba ngu tibahikiriire, baliyo nibalengaho kuba bantu abarungi Ruhanga abaarukugonza kuba omu nsi ye empyaka. Omu mulingo ki? Kuraba omu kwegaho Yahwe Ruhanga hamu n’ouyatumire, Yesu Kristo.—Yohana 17:3.
Manya ebirukukiraho ebirukukwata ha mulingo osobora kukiraho empero ey’ensi enu kandi okaikara omu nsi enungi ey’eri haihi kwija. Ikiriza kwegesebwa Baibuli okw’okuleeta hamu ebitekerezo hataroho kusasura sente kuruga hali omu h’Abakaiso ba Yahwe, nimukozesa ekitabu Wegondeze omu Bwomeezi Ebiro nEbiro!
Nosobora Kugonza na Binu;
OMUNAARA GW'OMULINZI
Obukama bwa Ruhanga Bulikora Ki?
Yesu akaba akimanyire ngu Obukama bwa Ruhanga niyo gavumenti yonka eyesobora kumaraho ebizibu ebiri omu nsi. Obukama bukozere bintu ki ebisobora kutugumya?
