Okubonabona obukuraaba kutaletwa Ruhanga, noha ou tusemeriire kujunaana habw’enjara, obunaku oburukweyongera, obulemu obw’amaani, endwaire ez’amaani, hamu n’ebigwererezi? Baibuli, etwoleka ensonga isatu enkuru habwaki abantu babonabona:

1. Abantu Kwegonza Bonka, Omururu, Hamu n’Enobi. “Haroho akasumi omuntu omu obwaba nobusobozi okukora kubi omuntu ondi.” (Omugambizi 8:9) Abantu bakira kubonabona habw’abantu ababi, abarukwegonza bonka rundi ab’enobi enyingi.

2. Obusumi n’Obutandwa. Ensonga endi habwaki abantu babonabona eri ngu “bona bagwerwa kwonka obusumi nobutandu.” (Omugambizi 9:11) Kinu nikimanyisa ngu abantu nibasobora kubonabona habw’okuhikwaho ebintu ebi baba batarukunihira nk’obutandwa hamu n’ebigwererezi rundi habw’obutafaayo obw’abantu abandi hamu n’ensobi ezibakora.

3. Omulemi w’Ensi Omubi. Baibuli n’etwoleka kurungi ensonga enkuru habwaki abantu babonabona. N’egamba ngu: “Ensi yoona eri omu busobozi bw’omubi.” (1 Yohana 5:19, NW) ‘Omubi ogu’ nuwe Setani omunyanzigwa, ekihangirwe eky’omwoyo eky’amaani. Omu kubanza akaba ali maraika wa Ruhanga baitu ‘ataikale omu mananu.’ (Yohana 8:44) Bamaraika abandi bakafooka badaimoni obu bayeteranizeeho Setani omu kujeemera Ruhanga habw’okugonza kuhondera okwegomba kwabo okubi. (Okubanza 6:1-5) Kwiha Setani n’abadaimoni bajeemera Ruhanga, baikaire baine omukono ogw’amaani omu bintu by’ensi. Kinu nikyeyolekera kimu omu kasumi kanu. Habwokuba Setani aine ekiniga kiingi muno kandi ‘nabiihabiiha ensi zoona,’ kirugiremu okubonabona kweyongera. (Okusuku’rwa 12:9, 12) Mali Setani mulemi mubi muno. Kimusemeza muno obwarora abantu nibabonabona. Setani​—nuwe aletera abantu kubonabona—​hatali Ruhanga.

TEKEREZAAHO KINU: Omuntu ow’aine omutima omubi nuwe wenka asobora kuletera abantu abataine musango kubonabona. Baitu Baibuli egamba ngu: “Ruhanga nukwo kugonza.” (1 Yohana 4:8) Habwokuba aine okugonza, “kimuli hara Ruhanga okukora kubi; kandi Owobusobozi bwona okukora okutahiki’ra.”​—Yobu 34:10.

Baitu kandi, nosobora kwekaguza, ‘Ruhanga Ow’obusobozi bwona araikiriza obulemi bwa Setani obubi kwikaraho kumara kasumi ki?’ Tuboine ngu, Ruhanga anobera kimu obubi kandi asalirwa muno obwarora nitubonabona. Ekintu ekindi, Ekigambo kye nikitutererra ‘kumunagira okutuntura kwaitu kwona habwokuba natufaaho.’ (1 Petero 5:7) Ruhanga n’atugonza kandi aine amaani, ag’okumaraho okubonabona kwona hamu n’obutali bwinganiza. Ekicweka ekirukwongeraho nikiija kutusoborra kurungi ensonga enu. *