“Ai bambi Mukama, ndihikya nkaha okukunga, iwe otarukuhu’ra? Ninkukunga habwitima, kunu torukujuna.” (Habakuki 1:2, 3) Binu nibyo ebigambo bya Habakuki, omusaija omwesigwa hali Ruhanga. Ebigambo bye ebyo bikooleka ngu akaba ataine kwikiriza? Nangwa. Ruhanga akagumya Habakuki yamugambira ngu akatekaho obwire obwarukwija kumarraho okubonabona.​—Habakuki 2:2, 3.

Obwoba n’obonabona rundi omuntu wawe nabonabona, kyanguhire kugamba Ruhanga akereriirwe kukukonyera. Baitu Baibuli n’etugumya ngu: “Mukama tarukuikara obwomuragogwe nkabandi okubatekereza okuikara; baitu nagumisiriza habwanyu, atarukugonza omuntu wena okubura, baitu bona bahike omu kwegarukamu.”​—2 Petero 3:9.

Omu kasumi akatali kahara! Yesu akoleka ngu hali nihaija kubaho obusinge obwakuboine enyikara ez’embaganiza ezakwolekere ebiro ebya ha mpero. (Matayo 24:3-42) Okuhikirra kw’obunabbi bwa Yesu omu kasumi kanu, nikyoleka ngu Ruhanga ali haihi kumaraho okubonabona. *

Baitu, Ruhanga naija kumaraho ata okubonabona? Yesu obwakaba ali omu nsi, akoleeka ngu Ruhanga aine obusobozi obw’okumaraho okubonabona. Tekerezaaho ebyokurorraho binu.

Ebigwererezi: Yesu n’abakwenda be obu bakaba bali omu ryato ha Nyanja ya Galiraya, hakaija ihunga ly’amaani muno erikaba liri haihi kudikiza eryato. Baitu Yesu akooleka ngu uwe na Ise baine obusobozi ha bigwererezi. (Abakolosai 1:15, 16) Yesu akagamba bugamba ati: “Culera.” Kiki eky’abaireho? ‘Ekiyaga kikahwaho, habaho okuculera kwingi.’​—Marako 4:35-39.

Oburwaire: Yesu akaba amanyirwe habw’obusobozi akaba aine obw’okukiza abalema, abafu ba maiso, abarwaire ebigenge, ensimbo n’endwaire ezindi. ‘Akakiza boona abakaba barwaire.’​—Matayo 4:23, 24; 8:16; 11:2-5.

Ibura ly’eby’okulya: Yesu akakozesa amaani Ise akaba amuhaire kukanyisa eby’okulya ebikaba biri bike. Baibuli n’eyoleka ngu, Yesu akaliisa enkumi n’enkumi z’abantu emirundi ebiri.​—Matayo 14:14-21; 15:32-38.

Okufa: Yahwe aine amaani ag’okuhumbuura abantu abafiire, kinu nikyeyoleka Yesu obuyahumbwire abafu emirundi esatu. Omu hali abo Yesu yahumbwire, akaba amazire ebiro bbina afiire.​—Marako 5:35-42; Luka 7:11-16; Yohana 11:3-44.