1, 2. (a) Erifazi na Biridadi bakagamba ki ha mulingo Ruhanga aroramu obuheereza bwaitu? (b) Yahwe akabazaaho ata ensonga enu?

EMYAKA nyingi muno enyuma, abasaija basatu bakagenda kugarramu amaani omuheereza wa Ruhanga arukwetwa Yobu. Omu ha basaija banu arukwetwa Erifazi Omutemani akakaguza Yobu ebikaguzo binu: “Omuntu nasobora okugasira Ruhanga? Mazimakwo anyakuli wamagezi ayegasira wenka? Nikisemeza Owobusobozi bwona iwe okuhiki’ra? Rundi nikimuletera amagoba, iwe okuhikiriza emihanda yawe?” (Yobu 22:1-3) Erifazi uwe akaba n’atekereza ngu eky’okugarukamu eky’ebikaguzo binu byona nikyo nangwa. Omusaija owakabiri arukwetwa Biridadi Omusuha nauwe akagamba ngu Ruhanga tasobora kurora abantu nk’abahikiriire.—Soma Yobu 25:4.

² Erifazi na Biridad bakalengaho kwoleka Yobu ngu akaba n’asiisa obwire kuheereza Yahwe. Bakaba nibagonza Yobu atekereze ngu abantu bali nk’enyenje rundi enzito ezitaine omugaso gw’amaani hali Ruhanga. (Yobu 4:19; 25:6) Nitusobora kugamba ngu abasaija banu bakaba nibabaza bati  habw’obuculezi? (Yobu 22:29) Ky’amananu ngu tuli bataito muno kakuba otulengesaniza na Yahwe habwokuba uwe w’amaani muno. Kakuba twemerra haiguru y’orusozi rundi kakuba tuba tuli haiguru omu nyonyi tukalinguza hansi, nitusobora kurora omulingo tuli bataito muno kandi abataine omugaso. Baitu nukwo Yahwe arora ati amaani agatutamu okumuheereza n’okukorra Obukama? Nangwa! Yahwe akagambira Erifazi, Biridadi, hamu na Zofa ngu bakaba nibabaza ebisuba, baitu yasemerererwa Yobu kandi yamweta ‘omwiru wange.’ (Yobu 42:7, 8) Nahabweki leka tukimanye ngu abantu abatahikiriire nibasobora ‘kugasira Ruhanga.’

3. Erihu akagamba ki ha maani agatutamu kuheereza Yahwe? Akaba n’amanyisa ki?

³ Baitu omusigazi omu arukwetwa Erihu akaba nahuliriza obu Yobu n’abasaija basatu obu bakaba nibahingisa ebitekerezo. Obu bamazire kubaza, Erihu akakaguza Yobu ebikaguzo ebirukukwata hali Yahwe: “Obworaba ohikiriire, buli omuhaire ki? Rundi ahairwe ki omu mukono gwawe?” (Yobu 35:7) Erihu akaba n’amanyisa ngu tusiisa obwire kuheereza Yahwe? Nangwa. Yahwe atahabule Erihu nk’oku yahabwire abasaija abandi. Erihu uwe akaba aine ensonga endi ei akaba naihayo. Akaba namanyisa ngu okuramya kwaitu tikuli nukwo okwikazaaho Yahwe. Yahwe nayemalirra. Titusobora kumwongeraho obuguda rundi kumwongera amaani. Kandi n’emiringo enungi yona ei twine ekaruga haluwe, kandi arora omulingo tugikozesamu.

4. Yahwe ayehurra ata obu tugirra abandi embabazi?

⁴ Obutwoleka abaheereza bagenzi baitu okugonza okutalekerra, Yahwe aturora nkabagiriire uwe okugonza kunu. Enfumo 19:17 rugamba: “Aganyira owamasege buli ayohora Mukama, kandi ekirungi ekiyakozire alimusasura.” Buli murundi tugirra abandi embabazi Yahwe akirora. Nobwaraaba ali Muhangi w’iguru n’ensi, ebikorwa ebirungi ebi tukora acwamu kubirora nk’ibanja eri turukumutonga, kandi acwamu kuritusasura natuha ebisembo bingi ebirungi muno. Yesu Omwana wa Ruhanga nauwe nukwo yagambire.—Soma Luka 14:13, 14.

5. Bikaguzo ki ebirukugenda kugarukwamu?

⁵ Omu busumi bwa kara, Yahwe akasaba nabbi okumuheereza omu mulingo ogw’embaganiza. (Isaya 6:8-10) Isaya akaikiriza obujunanizibwa bunu kandi yagamba: “Nyowe ndi hanu; tuma nyowe.” N’omu kasumi kanu, Yahwe naheereza abantu abesigwa omugisa gw’okukorra hamu nauwe. Enkumi n’enkumi z’abaheereza ba Yahwe niboleka ngu nabo baine entekereza nk’eya Isaya. Betegekere kwikiriza kuheereza Yahwe omu miringo nyingi n’ebiikaro bingi ebirukwahukana kandi betegekere kukora emirimo ye n’obu kyakwetagisa kuraba omu mitalibaine nyingi. Baitu omuntu n’asobora  kugamba: ‘Ninsiima habw’omugisa ogumpairwe kugira eki nakorra Yahwe. Baitu mali akake akandukumukorra kaine omugaso? Yahwe n’asobora kuhikiriza emirimo ye mbe nkozere rundi ntakozere.’ Naiwe orayehulireho oti? Leka tubazeho abaheereza ba Yahwe babiri aba kara, turole ebintu ebyababaireho omulingo bisobora kutukonyera kugarukamu ebikaguzo binu. Abaheereza banu nubo, Deborah na Baraka.

6. Ihe lya Yabini rikaba niryahukanaho lita hali Abaisareri?

⁶ Baraka akaba murwani w’ihe lya Isareri, kandi Debora akaba nabbi omukazi. Abaisareri bakaba bamazire emyaka 20 nibabonabonesebwa omukama wa Kanani arukwetwa Yabini. Ihe lya Yabini likaba niritiinisa muno kandi ritali ry’okuzanisa ekyaletiire Abaisareri omu byaro ebiheraine kwikara nibatiina okuruga omu maka gabo. Ihe lya Yabini likaba liine egaali ez’ebyoma 900 ezirukusara, baitu Abaisareri bakaba bataine eby’okurwanisa ebirungi kandi bakaba bataine engabo n’eby’okwerindisa.—Ekyabacwi 4:1-3, 13; 5:6-8. * (Rora obugambo obuli hansi.)

7, 8. (a) Buhabuzi ki obu Yahwe yabandize kuha Baraka? (b) Abaisareri bakasingura bata ihe lya Yabini? (Rora ekisisani ekiri ha kutandika kw’isomo linu.)

⁷ Habw’omulingo ihe lya Yabini lyasisanaga, kikaba kyanguhire kutekereza ngu Isareli ekaba etarukusobora kulirwanisa. Baitu Yahwe akatuma Debora kuragira Baraka ati ‘Genda, mwesoroleze orusozi Tabora, otwale naiwe abasaija mutwaro gumu ha baana ba Nafutali nabaana ba Zeburuni. Nanyowe ndicundira namberoli ha kyambu Kisoni Sisera engabwa yihe lya Yabini, hamu negalize nekitebekye; nanyowe ndimuhayo omu mukono gwawe.’—Ekyabacwi 4:4-7.

⁸ Baketa abantu kukonyera kandi abasaija 10,000 nubo bayesoroliize ha Rusozi Tabora. Baraka n’abasaija be bakagenda Taanaki kurwanisa abanyanzigwa babo. (Soma Ekyabacwi 4:14-16.) Yahwe akakonyera Abaisareri? Ego. Aho naho enjura y’amaani ekatandika kugwa kandi ebisabu byaijura nambere bakaba nibarwanira. Kinu kikakonyera muno Abaisareri. Baraka akahambya ihe lya Sisera habwa mairo 15, kuhikira kimu ekiikaro ekirukwetwa Harosesi. Haroho nambere Sisera yahikire, ekigali kye kyakwamira omu bisaabu. Akarugamu yairuka nagenda Zaananimu, ekisobora kuba kyali haihi na Kedesi. Obu yahikireyo akesereka omu hema y’omukazi arukwetwa Yayeri. Sisera akagwijagira habwokuba akaba ajwahire muno. Obwakaba ali omu turo twamaani, Yayeri akamucumita yamwita. (Ekyabacwi 4:17-21) Yahwe akakonyera Abaisareri kusingura obulemu! * (Rora obugambo obuli hansi.)

9. Ekyabacwi 5:20, 21 nikitwegesa ki ha bulemu bw’Abaisareri na Sisera?

⁹ Kakuba tusoma Ekyabacwi esura 5, nitusobora kwetegereza kurungi ebintu ebirukubazibwaho omu suura eya 4. Ekyabacwi 5:20, 21 nikitugambira: “aba haiguru bakarwana, enyunyuzi omu ngendo zazo zikarwana na Sisera. Ekyambu Kisoni  kikabatwarra kimu.” Kinu nikimanyisa ngu Abamaraika bakakonyera Abaisareri omu bulemu bunu, rundi ebibale bikaruga haiguru byatera abanyanzigwa? Baibuli tetusoborra. Baitu nitusobora kugamba ngu Yahwe akajuna abantu be n’akozesa enjura ey’amaani eyagwire omu kiikaro nambere abanyanzigwa bakaba bali na ha bwire bwonyini, nukwo egali 900 zisobole kukwama. Ekyabacwi 4:14, 15, nikyoleka ngu Abaisareri bakasiima Yahwe emirundi esatu habw’obusinguzi. Busaho muntu n’omu omu basaija 10,000 aba Isareri akaba nasobora kugamba ngu bakaba basingwire habw’amaani gabo.

10, 11. “Merozi” kikaba kiki? Habwaki kyakyenerwe?

¹⁰ Hati katubazeho ekintu kindi ekirukuhuniriza. Hanyuma y’obusinguzi, Debora na Baraka bakazina nibakugiza Yahwe. Bakazina bati: “Mukyene Merozi,’ agambire maraika wa Mukama, mukyene muno abarara omu; baitu batairukirre okujumura Mukama, okujumura Mukama ahali abamani.”—Ekyabacwi 5:23.

¹¹ Merozi kikaba kiki? Titurukusobora kumanya. Baitu omukyeno hali Morezi gukakora nikyo hatasigaliireho ekintu kyona ekirukutusoborra ebirukukiraho. Nirusobora kuba rwali rubuga orw’abantu abayangire kukonyera Baraka omu bulemu. Kusigikirra nk’oku abantu 10,000 beyehaireyo kurwanisa Abakanani, nikisobora kuba ngu n’abantu ba Merozi bakasabwa kukonyera. Rundi nirusobora kuba rwali rubuga nambere Sisera yarabire obw’akaba nairuka Baraka. Rundi abantu omu rubuga runu basobora kuba batungire omugisa gw’okukwata Sisera baitu tibakikora. Banza otekereze omulingo abantu banu baroleriire kwonka omurwani onu ow’amaani n’araba omu mbuga zabo bataine eki barukukoraho! Nabo bakubaire basagikire ekigendererwa kya Yahwe. Kakuba bakikozere, Yahwe akubaire abahaire empeera. Baitu obu batungire omugisa gw’okugira eki bakorra Yahwe, batagukozese. Bakahukanaho na Yayeri ayayolekere obumanzi.—Ekyabacwi 5:24-27.

12. Ekyabacwi 5:9, 10 nirwoleka mbaganiza ki ey’ekaba eri hagati y’abantu abayehaireyo n’abatayehaireyo? Kandi itwe kisemeriire kutukwataho kita?

¹² Ekyabacwi 5:9, 10, niholeka ngu abantu 10,000 abayehaireyo bakaba nibahukanaho n’abantu abatayehaireyo. Debora na Baraka bakahaisaniza “[abadumizi] baisareri abayehaireyo bonka omu bantu.” Bakaba nibahukanaho hali abo ‘abakaba batembere ‘enkaina ezirukwera’ abayetwaraga kuba bahaiguru muno batarukusobora kusagika. Kandi, orukarra rubalengesaniize n’abantu “abaika’ra ha godoli ezedalizi” rundi kapeti enungi, kandi “abagenda omu muhanda” habwokuba bakaba nibagonza bwomeezi obwanguhire. Baitu abayehaireyo, bakagenda na Baraka kurwanira omu nsozi eza Tabora ezikaba ziijwire emyandara n’omu kyambu Kisoni. Abagonzaga obwomeezi obwanguhire bakaterererwa ‘okukibazaho’ rundi kukitekerezaho.  Bakaba basemeriire kutekereza ha migisa ei baferiirwe habw’okwanga kwehayo kukorra Yahwe. Omu kasumi kanu naitwe nikitwetagisa kwekebera turole twine ntekereza ki obu kirukuhika ha kuhereza Yahwe.

13. Enganda za Reubeni, Dani, hamu na Asere ziketwaza omu mulingo ki ogwayahukaineho n’enganda za Zeburuni na Nafutali?

¹³ Abasaija 10,000 abayehaireyo bakatunga omugisa gw’okurora omulingo Yahwe akozesa obusobozi bwe nk’Omulemi. Bakatunga eby’okugambira abandi hanyuma y’okurora “engeso ez[i]hikiriire eza Mukama.” (Ekyabacwi 5:11) Baitu ab’oruganda rwa Reubeni, Dani hamu na Asera bakafaho muno itunga lyabo nk’ekyokurorraho, amagana, ebyombo hamu n’emyaro yabo okukira omulimo gwa Yahwe. (Ekyabacwi 5:15-17) Baitu enganda ezimu zitetwaze ziti. Oruganda rwa Zeburuni na Nafutali bakahayo “obwomezi bwabu okuhikya okufa” okusagika Debora na Baraka. (Ekyabacwi 5:18) Nitusobora kwega isomo erikuru kuruga omu omulingo mbaju zinu ibiri zayetwaize obu kyahikire ha kwehayo.

14. Omu kasumi kanu nitusobora tuta kwoleka ngu nitusagika obusobozi bwa Yahwe obw’okulema?

¹⁴ Biro binu, titurwana obulemu kwoleka ngu nitusagika obulemi bwa Yahwe. Baitu, twoleka obusagiki bwaitu obu tutebeza n’obwekambi kandi tutarukutiina. Abantu abarukwehayo nibetagwa kukira nk’oku kyali kara. Obukaikuru n’obukaikuru bw’ab’oruganda na banyaanya itwe otwaliremu n’ensinganto batahire obuhereza obw’akasumi kona. Ekyokurorraho, abamu nibahereza nka ba payoniya, nibakora ha Beseri, omu kwombeka Ebyombeko by’Obukama, kandi nibakonyera omu nso’rokano enkooto. Abagurusi abandi ab’ebitebe nibakora omu Akatebe Akarukukonyera Abarwaire hamu n’okutekaniza enso’rokano ez’ebiro bisatu. Twikale tukimanyire ngu  Yahwe n’asiima habw’okwehayo omu mulingo gwona kandi tarukwija kwebwa amaani agaturukutekamu.—Abaheburaniya 6:10.

15. Kiki ekirukusobora kutukonyera kurora ngu ekihika kyaitu eky’okuhereza Yahwe tikyafa?

¹⁵ Tusemeriire kwekebera turole entekereza ei twine obu kirukuhika ha kwehayo kukonyera. Nitusobora kwekaguza: ‘Emirimo nkira kugisigira abandi nubo bagikole? Nkira kufayo muno ha kuserra ebintu kukira kuhereza Yahwe? Rundi ninyehayo kukozesa byona ebinyine kuhereza Yahwe nk’oku Baraka, Debora, Yayeri, hamu n’abantu 10,000 bayehaireyo? Nyine entegeka y’okugenda omu kiikaro ekindi nukwo nkole sente nyingi kuba n’obwomezi oburungi? Obu kiraba nukwo kiri, ninsaba Yahwe ha mulingo okugenda kwange kurakwataho eka yange hamu n’ekitebe?’ * (Rora obugambo obuli hansi.)

16. Yahwe n’obwaraba aine buli kimu, kiki eki tusobora kumuhereza?

¹⁶ Yahwe atuhaire ekitinisa ky’amaani eky’okusagika obulemi bwe. Kuruga omu busumi bwa Adamu na Hawa, Setani aikaire n’agonza abantu baruge ha rubaju rwa Yahwe bagaruke ha rubaju rwe. Baitu obu tusagika Yahwe tuba nitwolekera kimu Setani ngu tuli ha rubaju rwa Yahwe. Kwikiriza kwaitu n’obwesigwa bwaitu bitwekambisa kwehayo kuhereza Yahwe ekimuletera okusemererwa kwingi. (Enfumo 23:15, 16) Yahwe asigikirra ha bwesigwa hamu n’obuhulizi bwaitu kugarukamu Setani anyakumusekereza. (Enfumo 27:11) Obuhulizi nikyo kintu ky’omuhendo eki tusobora kuhereza Yahwe kikamuletera okusemererwa.

17. Ekyabacwi 5:31 nirutwegesa ki ha bintu ebirabaho omu busumi obw’omu maiso?

¹⁷ Omu kasumi akatali ka hara buli muntu n’aija kwegondeza omu bulemi bwa Yahwe kukira obundi bwona. Ako ka nuko kasumi akatulindiriire! Nitwehurra nka Debora na Baraka, abazinire nibagamba: “Nukwo abanyanzigwa bawe bona bahwerekerre bati, ai Mukama, baitu abo abamugonza babe nkizoba obulirugayo omu mani galyo.” (Ekyabacwi 5:31) Eki nikyo kiribaho Yahwe abwalihwerekereza ensi enu eya Setani. Obulemu bwa Hara-megedoni obu bulitandika Yahwe talyetagisa abantu kumukonyera kusobora kuhwerekereza abanyanzigwa. Baitu, ‘tulyemerra kwonka turole okujuna kwa Mukama.’ (2 Ekyebyomubusinge 20:17) Omu kasumi kanu twine omugisa gw’okusagika n’obwekambi obulemi bwa Yahwe.

18. Abandi nibasobora kugasirwa bata habw’omutima gwawe ogw’okwehayo?

¹⁸ Debora na Baraka bakatandika ekizina kyabo eky’obusinguzi nibahaisaniza Yahwe hatali abantu. Bakazina nibagamba ngu: “Baitu [habwokuba] abantu bakehayo bonka nibagonza, musime Mukama.” (Ekyabacwi 5:1, 2) Nikyo kimu naitwe, obu tuhereza Yahwe nk’oku kirukwetagisa, kiretera abandi “kusima Mukama.”