Ensinganto—“Muhikirizege Okujunwa Kyanyu Inywenka”
“Nkokumwahuliire ebiro byona, . . . muhikirizege okujunwa kwanyu inywenka omu kutina nokutukumira.”—ABAFIRIPI 2:12.
EBIZINA: 133, 135
1. Habwaki idaara ly’okubatizibwa liri likuru muno? (Rora ekisisani ekiri ha rupapura 21)
BULI mwaka, enkumi n’enkumi z’abegi ba Baibuli babatizibwa. Baingi omuli bo habamu ensingaanto n’abato. Abamu baba bakuliire omu mananu. Naiwe oli omu hali abo abakuliire omu mananu? Obu kiraaba nukwo kiri, okakora ekintu kirungi muno kurora wayehayo kandi wabatizibwa. Ekintu kinu kikuru habwokuba buli Mukristaayo asemeriire kubatizibwa kusobora kujunwa n’okwomera ebiro n’ebiro.—Matayo 28:19, 20; 1 Petero 3:21.
2. Habwaki otasemeriire kutiina kwehayo hali Yahwe?
2 Obu wabatiziibwe, Yahwe akatandika kukuha emigisa omu miringo nyingi baitu kinu kikakwongera obujunanizibwa obundi. Omu mulingo ki? Ekiro eki wabatirizibweho, ow’oruganda ayahaire orubazo akakukaguza: “Kusigikirra ha kicunguro kya Yesu Kristo, oyegarukiremu ebibi byawe kandi wahayo obwomeezi bwawe kukora Yahwe eby’agonza?” Okagarukamu
nogamba ego. Okaraganiza Yahwe ngu noija kumugonza kandi ngu kumuheereza nikiija kuba kintu ekirukukirayo obukuru omu bwomeezi bwawe. Baitu osemeriire kweyijukya habw’encwamu enu ei wakozere? Nangwa! Tiharoho ekiro kyona eky’olyeijukya habw’okwehayo hali Yahwe. Abantu abatarukuheereza Yahwe bali kicweka kyensi ya Setani. Setani tabafaaho kandi naiwe tarukukufaaho. Kandi, nasemererwa kakuba oruga hali Yahwe okagaruka ha rubaju rwe habwokuba okunihira kwawe okw’okwomeera ebiro n’ebiro nikuba kufiire.3. Yahwe akuhaire migisa ki habw’okwehayo kumuheereza?
3 Tekerezaho emigisa ei Yahwe akuhaire habw’okwehayo hali uwe n’okubatizibwa. Habw’okuba okahayo obwomeezi bwawe hali Yahwe, torukutiina kugamba: “Mukama ali habwange; tintine: Abantu barasobora okunkora ki?” (Zabuli 118:6) Busaho kintu kindi kyona ekirukwingana n’okuba ha rubaju rwa Ruhanga n’okumanya ngu nakwenyumiririzamu.
OBUJUNANIZIBWA BWAWE NK’OMUNTU
4, 5. (a) Habwaki nitugamba ngu okwehayo buli bujunanizibwa bwawe nk’omuntu? (b) Abakristaayo ab’emyaka yoona baba n’okukulengesebwa kwa mulingo ki?
4 Otarora enkoragana yawe na Yahwe kuba nk’esimu ei abazaire bawe baguzire kukozesebwa omu ka kandi nubo barukujunanizibwa kutekaho sente. Nobworaaba nokyaikara n’abazaire baawe, enkoragana yawe na Yahwe buli bujunanizibwa bwawe nk’omuntu. Habwaki kikuru kwikara noijuka ekintu kinu? Tiharoho omuntu asobora kumanya okulengwa oku turatangana omu biro eby’omu maiso. Ekyokurorraho, nosobora kuba wabatiziibwe okyali muto. Baitu obw’omara kuhika omu myaka ey’obusigazi, otunga enyehurra n’ebizibu ebirukwahukana hali ebi eby’oikaire notunga. Haroho omwisiki omu ensingaanto ayagambire ngu: “Omwana omuto tarukwija kwanga kuba omu ha Bakaiso ba Yahwe habwokuba ngu tibamuhaire keeki y’okumutabarukya amazarwa ge. Baitu obwahikya emyaka nambere ekihika ky’okuterana kiba ky’amaani, kimwetagisa kukigumiza kimu ngu okw’orobera ebiragiro bya Yahwe obwire bwona nikyo ekirukukira oburungi.”
5 Abato tibali nubo bonka abatunga okulengesebwa. N’abantu ababatizibwa bakuzire, nabo okwikiriza kwabo kulengesebwa omu miringo ei babaire batarukunihira. Okulengesebwa nikusobora kuruga omu buswere bwabo, nikusobora kuletwa oburwaire, rundi emirimo ei bakora. Tube bato rundi bakuru, itwena tusemeriire kwikara tuli besigwa hali Yahwe omu birengeso byona ebi turatunga.—Yakobo 1:12-14.
6. (a) Kiki eki osemeriire kwikara noijuka obu kirukuhika ha kwehayo kwawe hali Yahwe? (b) Ekyahandiikirwe eky’omu Abafiripi 4:11-13 nikitwegesa ki?
6 Obworaaba nogonza kwikara oli mwesigwa, oikalege noijuka nk’oku waraganize Yahwe ngu noija kumuheereza omu buli nyikara yoona ey’oratangana, n’obu abanywani baawe rundi abazaire baawe baraleka kumuheereza. (Zabuli 27:10) Obworahikwaho ekintu kyona ekisobora kukulemesa kuhikiriza omurago gwawe, saba Yahwe akukonyere.—Soma Abafiripi 4:11-13.
7. Kuhikiriza okwikiriza kwawe “omu kutina nokutukumira” nikimanyisa ki?
7 Yahwe n’agonza obe munywani we. Baitu nikyetagisa kutekamu amaani kurora walinda obunywani obu bugumire kandi wahikiriza okujunwa kwawe. Abafiripi 2:12 rugamba: “Muhikirizege okujunwa kwanyu inywenka omu kutina nokutukumira.” Kinu nikimanyisa ngu tusemeriire kwecumitiriza ha bintu ebi tusobora kukora kurora twaikara tuli haihi na Yahwe kandi tuli besigwa haluwe n’obuturatangana okulengesebwa kwona. Tuteyesiga muno tukatekereza ngu titusobora kulemwa. Ijuka ngu haroho n’abantu baingi abaikaire nibaheereza Yahwe kumara emyaka nyingi baitu bamalirra bahugukire. Bintu ki eby’osobora kukora kurora wahikiriza okujunwa kwawe?
KIKURU KWESOMESA BAIBULI
8. Okwesomesa nikutwarramu ki? Habwaki kiri kikuru?
8 Kusobora kufooka banywani ba Ruhanga, tusemeriire kumuhuliiriza n’okubaza nauwe. Omulingo omukuru ogu tuhulirizamu Yahwe nukwo kusoma Baibuli. Kinu nikimanyisa ngu twine kusoma n’okwecumitiriza ha Kigambo kya Ruhanga hamu n’ebitabu by’omwiru omwesigwa. Baitu obw’orukuba n’osoma Baibuli, otagisoma nk’omuntu arukwetekaniriza kwikarra ebirengeso. Baitu gisome n’ekigendererwa ky’okwega ebintu bihyaka ebirukukwata hali Yahwe. Obu nubwo orairra haihi na Yahwe kandi nauwe akairra haihi naiwe.—Yakobo 4:8.
Oyemeriire ota obu kirukuhika ha kuhuliiriza n’okubaza na Yahwe? (Rora akacweka 8-11)
9. Bintu ki ebikukonyire omu kwesomesa?
9 Ekitebe kya Yahwe kituhaire ebintu bingi ebirukusobora kutukonyera omu kwesomesa. Ekyokurorraho, haroho ebicweka ha mukura gwaitu ogwa jw.org ebiine omutwe “Bible Study Activities” ebirukusangwa omu kicweka ekirukubazaho ensingaanto. Ekicweka kinu kitekanizibwe kukukonyera kuta omu nkora eby’orukwega kuruga omu Baibuli. Kandi ha mukura gunu ogwa jw.org, noija kusangaho ebicweka by’okukozesa omu kwesomesa hansi y’omutwe “What Does the Bible Really Teach?” Ebicweka binu nibisobora kukukonyera kwombeka okwikiriza kwawe n’okumanya omulingo gw’okusoborra abantu abandi enyikiriza zaawe. Amagezi agandi ag’osobora kukozesa omu kwesomesa nosobora kugasanga omu Awake! eya Apuli 2009 nambere hali omutwe “Young People Ask . . . How Can I Make Bible Reading Enjoyable?” Okwesomesa n’okwecumitiriza bikuru muno habwokuba nibisobora kukukonyera omu kuhikiriza okujunwa kwawe.—Soma Zabuli 119:105.
KUSABA KINTU KIKURU MUNO
10. Habwaki kikuru Omukristaayo anyakubatiziibwe kusaba?
Kakuba habaho ensonga yona erukukweralikiriza, iwe “nagira Mukama enketo yawe”
10 Obu tusoma Baibuli, tuba nituhuliiriza Yahwe, kandi obu tumusaba, tuba nitubaza nauwe. Titusemeriire kutwara kusaba nk’ekintu ky’okuhikya omukoro kwonka rundi nk’ekintu ekitukora kutuletera emigisa eratuhikya ha businguzi. Okusaba guli mulingo ogu tubalizamu n’Omuhangi waitu. Banza okitekerezeho: Yahwe nagonza kukuhurra n’omubaliza! (Soma Abafiripi 4:6.) Nahabweki kakuba habaho ekintu kyona ekirukukutuntuza, Baibuli n’egamba “nagira Mukama enketo yawe.” (Zabuli 55:22) Abaheereza ba Yahwe baingi nibaija kukugambira ngu kuhondera obuhabuzi bunu kibakonyire. Naiwe nibusobora kukukonyera!
11. Habwaki osemeriire kwikara nosiima Yahwe?
11 Baitu tuleke kusaba obu turukuba nitugonza obukonyezi bwa Yahwe kwonka. Baibuli n’etugambira ngu: “musimege.” (Abakolosai 3:15) Obwire obumu tweralikirra muno habw’ebizibu ebi twine nitulemwa n’okurora ebintu ebirungi ebi tutungire. Lengaho kukora kinu: Buli kiro, hakire lengaho kutekerezaho bintu bisatu ebirungi ebi Yahwe akukoliire kandi omusiime. Abigail anyakuli ensingaanto kandi ayabatiziibwe aine emyaka 12 akagamba: “Nindora Yahwe nuwe tusemeriire kusiima kukira omuntu ondi weena omu iguru n’omu nsi. Tusiimege Yahwe buli murundi turatunga omugisa habw’ebisembo eby’atuhaire.” Obwire obumu Abigail ayekaguza ekikaguzo kinu eki yahulireho kiro kimu: “Kakuba nyenkya nyimuka nyine ebintu ebinsimiire Yahwe byonka kiro kinu, bintu ki byonyini ebi nakubaire nabyo?” * (Rora obugambo obuli hansi.)
OBUKURU BW’OKWECUMITIRIZAHO EBYORABIREMU
12, 13. Biki eby’orabiremu ebikwolekere ngu Yahwe murungi, kandi habwaki kiri kikuru kutekerezaho omulingo Yahwe akukonyiiremu?
12 Yahwe akakonyera Omukama Daudi kugumisiriza ebizibu bingi. Nahabweki Daudi akaba nasigikirra ha bintu ebi yarabiremu obu yagambire ngu: “Muroze, mumanye Mukama okwali murungi: Ahebwa omugisa anyakumwesiga.” (Zabuli 34:8) Orukarra runu nirutwoleka ngu nikitwetagisa kwerorra oburungi bwa Yahwe. Obw’osoma Baibuli hamu n’ebitabu eby’omwiru omwesigwa kandi okabaho ha nso’rokano, oyega omulingo Yahwe akonyiire abandi kwikara bali besigwa. Baitu enkoragana yawe na Yahwe obweyeyongera kuguma, kiba kikuru kurora omulingo Yahwe akukonyeramu. Biki eby’orabiremu ebirukugumya ngu Yahwe murungi?
Buli kiro siima ekiikaro ekyoine omu kitebe kya Yahwe
13 Buli Mukristaayo aine eby’arabiremu ebi mwolekere oburungi bwa Yahwe omu mulingo ogw’embaganiza. Yahwe naraliza buli omu haliitwe kwirra haihi nauwe hamu n’Omwana we. Yesu akagamba: “Busaho muntu asobora okuija namberendi, Isenyowe ayantumire obwatamucunda.” (Yohana 6:44) Noyehurra ngu Yahwe akacunda iwe nk’omuntu kwija hali uwe? Rundi n’otekereza ngu, ‘Yahwe akacunda abazaire bange kandi nyowe ndiyo nimbahondera kwonka’? Baitu oijuke ngu obu wayehaireyo hali Yahwe kandi wabatizibwa, oketandikiraho enkoragana ey’embaganiza na Yahwe. Baibuli n’etugambira ngu: “Baitu [omuntu] wena obwaba nagonza Ruhanga, nuwe amanyirwe ogu.” (1 Abakolinso 8:3) Buli kiro siimaga ekiikaro ekyoine omu kitebe kya Yahwe.
14, 15. Obuheereza nibusobora buta kukukonyera kugumya okwikiriza kwawe?
14 Oburungi bwa Yahwe n’osobora kuburorra ha mulingo akuhamu obumanzi kubaliza abantu abandi enyikiriza zawe obu orukuba oli omu buheereza rundi ha isomero. Nikisobora kukugumira kutebeza bagenzi bawe ha isomero. N’osobora kweralikirra habw’omulingo barakugarukamu. Nikisobora kuba nikitinisa kusoborra enyikiriza zawe omu maiso g’ekitebe ky’abaana bagenzi bawe. Kiki ekisobora kukukonyera?
15 Tekerezaaho ensonga habwaki noikiriza eki orukwikiriza. Kakuba ebiri ha mukura gwaitu ogwa jw.org biba biri omu rulimi rwawe, lengaho kubikozesa. Nibisobora kukukonyera muno kutekereza ha by’orukwikiriza, habwaki nobikiriza kandi n’omulingo osobora kubisoborra abandi. Obw’oba n’ogumya eby’orukwikiriza kandi otekaniize kurungi, nikiija kukuletera kuhurra noyenda kuha obwakaiso hali Yahwe.—Yeremiya 20:8, 9.
16. Kiki ekisobora kukuha obumanzi kubaza ha nyikiriza zawe?
16 Nobw’orukuba otekanize kurungi, nabwo nosobora kuhurra otiinire kusoborra abantu bandi enyikiriza zawe. Munyaanya itwe anyakwine emyaka 18, akabatizibwa obw’akaba aine emyaka 13, nagamba ngu: “Nimanya ekindukwikiririzamu, baitu haroho obu kingumira kubaza ekintu kyonyine ekiri omu bitekerezo byange.” Nahabweki alengaho kubaza omu mulingo gwabulikiro. Nagamba ngu: “Abaana abandukusoma nabo tibatiina kubazaaho ebintu ebi bakora. Nanyowe tinsemeriire kutiina kubazaaho ebi nkora. Ntandika ningamba ebigambo nka, ‘ijo mbairege ninyegesa Baibuli, kandi . . .’ Hanyuma ngumizaamu n’ekimbaire ninyenda kubaza. N’obu kiraba ngu ekindukubaza kiba kitarukukwata ha Baibuli, abantu batandika kunkaguza omulingo nyegesamu Baibuli. Obwire obumu bankaguza
ebikaguzo ebirukukwata ha Baibuli. Kinyanguhira obu nkozesa omulingo gunu. Kandi hanyuma nyehurra kurungi muno.”17. Kiki ekindi ekisobora kukukonyera kubaza n’abantu abandi?
17 Abantu abandi obu barora ngu mali nobafaaho kandi n’obatamu ekitinisa, kibanguhira kukutamu ekitinisa n’enyikiriza zawe. Olivia, ow’emyaka 17 kandi ayabatizibwe obw’akaba akyali muto, nagamba ngu: “Natinaga ngu kakuba ntandika kubazaaho Baibuli obu turukuba nitubaza, abantu nibaija kugamba ngu nimpinguraniza.” Baitu akatandika kurora ebintu omu mulingo gundi. Omu kiikaro kyokutekerezaaho ebintu eby’arukutiina, akekaguza: “Ensinganto baingi tibarukumanya ekintu kyona ekirukukwata ha Bakaiso ba Yahwe. Kandi nitwe itwenka Abakaiso ba Yahwe abarukwikara nabo. Omulingo baratugarukamu nigwija kusigikirra ha mulingo turukwetwaramu. Baitu kakuba tuba n’ensoni rundi n’obutiini bw’okubazaaho enyikiriza zaitu, rundi kakuba barora nitutiina obu turukuba nitubabaliza? Nibaija kuturora nka abantu abatarukugonza ekituli. Nibasobora n’okutatuhuliriza habwokuba titurukugumya ebiturukubaza. Baitu kakuba tubaza tugumire kandi omu mulingo ogwa buli kiro ha bintu ebiturukwikiriza, nibaija kututamu ekitinisa.”
HIKIRIZA OKUJUNWA KWAWE
18. Kiki eky’osemeriire kukora nukwo ohikirize okujunwa kwawe?
18 Turozere ngu bujunanizibwa bw’amaani kuhikiriza okujunwa kwawe. Baitu kukuhikiriza, nikikwetagisa kusoma n’okwecumitiriza ha Kigambo kya Ruhanga, kusaba Yahwe, n’okutekereza muno ha mulingo Yahwe akukonyiiremu nk’omuntu. Obworakora ebintu binu noija kukigumya ngu Yahwe Munywani wawe. Kinu nikija kukuletera kugonza kwikara n’obazaaho enyikiriza zawe n’abantu abandi.—Soma Zabuli 73:28.
19. Habwaki osemeriire kukora kyona ekirukusoboka kuhikiriza okujunwa kwawe?
19 Yesu akagamba ngu: “Omuntu obwayenda okuija enyuma yange, ayeyangise wenka, ayetweke omutigwe, ankuratire.” (Matayo 16:24) Kusobora kuhondera Yesu, buli Mukristaayo asemeriire kwehayo hali Yahwe kandi akabatizibwa. Baitu enu eba ntandikwa ey’obwomeezi oburungi omu kasumi kanu, kandi erukwija kukuhikya omu bwomeezi obutahwaho omu nsi empyaka. Nahabweki kora kyona ekirukusoboka kurora wahikiriza okujunwa kwawe.
^ kac. 11 Obworaaba nogonza kutunga amagezi agarukukiraho, genda ha jw.org orole nambere hali “Young People Ask—Why Should I Pray?” hamu na worksheet enyakuroho.