DIANA ahingwize emyaka 80 ey’obukuru kandi omu myaka nke ey’enyuma arabire omu bizibu bingi. Musaija we akarwara oburwaire obw’omu bwongo kandi akaba naikara omu irwarro nambere barolerra abakuzire omu myaka kandi hanyuma akafa. Batabani be babiri nabo bakafa kandi nauwe aine oburwaire bwa kokoro y’omu mabeere. Baitu ab’oruganda na banyaanya itwe obubarora Diana omu nso’rokano rundi omu buheereza, aba ali muntu asemeriirwe.

John akaba naheereza nk’omuroleerezi w’ekicweka kumara emyaka 43. Akaba nagonza omulimo gunu kandi akaba atarukunihira ngu nasobora kukora omulimo ogundi. Baitu akaba aine kulekeraho kuheereza nk’omuroleerezi w’ekicweka nukwo agende arolerre omunyabuzaale ow’akaba arwaire. Ab’oruganda n’abanyaanya itwe obubamurora ha nsorrokano enkooto, barora ngu takahindukaga. Nahati akyaine okusemererwa.

Kiki ekikonyiire Diana na John kwikara baine okusemererwa? Omuntu arukubonabona nasobora ata kuba n’okusemererwa? Omuntu nasobora ata kuba n’okusemererwa n’obwaraaba aine kuleka obujunanizibwa obwakaba nagonza? Baibuli n’etuha eky’okugarukama. Egamba eti: “Anyakuhikiriire alisemere’rwa [Yahwe].” (Zabuli 64:10) Nitusobora kwetegereza ebigambo binu kakuba tumanya biki ebisobora kutuletera okusemererwa okutahwaho n’ebyo ebitasobora kukuleeta.

Haroho ebintu ebireta okusemererwa. Ekyokurorraho, tekerezaaho omusaija n’omukazi abaakataaha omu buswere. Rundi tekerezaaho omuntu ayakazaara omwana rundi omuntu ayakatunga obujunanizibwa obuhyaka omu kuheeeza Yahwe. Ebintu binu bireeta okusemererwa habw’okuba byona bisembo kuruga hali Yahwe. Nuwe yatandikisize obuswere, yatuha obusobozi bw’okuzaara abaana, hamu n’emirimo ey’okukora omu kitebe kye.​—Okubanza 2:18, 22; Zabuli 127:3; 1 Timoseo 3:1.

Baitu ebintu ebimu ebireeta okusemererwa tibiikaraho. Eky’enaku, omu habali omu buswere nasobora kutaba mwesigwa rundi nasobora kufa. (Ezekyeri 24:18; Hoseya 3:1) Abaana nibasobora kujeemera abazaire babo na Ruhanga, kandi obundi nibasobora n’okubingwa omu kitebe. Ekyokurorraho, batabani ba Samuiri bataheereze  Ruhanga omu mulingo ogw’arukusiima, kandi na Daudi akatunga ebizibu bingi omu maka ge habw’okusihana na Basiseba. (1 Samuiri 8:1-3; 2 Samuiri 12:11) Ebintu nka binu obubibaho, tibireeta kusemererwa baitu bireeta enaku n’obusaasi bwingi.

Obwire obumu nitusobora kutaikara omu buheereza bwaitu hab’oburwaire, habw’okuba twine kurolerra amaka gaitu, rundi kakuba habaho empindahinduka omu kitebe kya Yahwe. Baingi abaalekereho obujunanizibwa obubakaba baine bagamba ngu baikara nibaijuka nk’oku emirimo eyibakoraga yabasemezaaga.

Hati nitukirora ngu ebintu nka binu bireeta okusemererwa baitu obwire obumu tibiikaraho. Nahabweki, haroho ekintu ekisobora kutuletera okusemererwa okutahwaho n’obuturukuba twine ebizibu bingi? Kisemeriire kuba kiroho, habwokuba Samuiri, Daudi hamu n’abandi bakaikara baine okusemererwa n’obukiraaba ngu bakatunga ebizibu.

Yesu akaba namanya okusemererwa nikimanyisa ki. Obw’akaba atakaizire omu nsi, Baibuli n’etugambira ngu ‘yakyanganukiraga omu maiso ga Yahwe obutoosa.’ (Enfumo 8:30) Baitu obuyaizire omu nsi, haroho obuyahikwahoga obuleemezi obw’amaani. Baitu nabwo, Yesu akatunga okusemererwa habw’okukora Ise eby’agonza. (Yohana 4:34) Kandi obukyahikire ha saaha ye ey’okumalirra kandi ey’obusaasi bwingi? Baibuli n’etugambira eti: “Obwokusemererwa okwatairweho omu maisoge [akagumisiriza] omuti.” (Abaheburaniya 12:2) Nahabweki haroho bingi ebitusobora kwegera ha bintu bibiri Yesu ebiyabalizeeho okusemererwa.

Kiro kimu, abegeswa 70 bakagaruka hali Yesu nibaruga kukora omulimo gw’okutebeza. Bakaba basemeriirwe habw’ebintu byona ebibaali bakozere, otwaliremu n’okubinga emyoyo emibi. Baitu Yesu akabagambira ati: “Baitu eki mutalikisemere’rwe emizimu okubahurra; baitu nikyo musemere’rwege, amabara ganyu okuhandikwa omu iguru.” (Luka 10:1-9, 17, 20) Nikyeyolekera kimu ngu, kusiimibwa Yahwe nikyo kintu ekirukukirayo obukuru kandi kireeta okusemererwa kwingi kukira kuba n’obujunanizibwa obw’embaganiza.

Omurundi ogundi, Yesu akaba nayegesa ekitebe ky’abantu kandi eby’akaba nayegesa bikasemeza omukazi Omuyudaaya yahika n’okugamba ngu nyina Yesu aine kuba muntu asemeriirwe habw’okuzaara  omwana omwojo nk’ogu. Baitu Yesu akamugarukamu ati: “Okukira, banyina omugisa abarukuhurra ekigambo kya Ruhanga nibakikwata.” (Luka 11:27, 28) Kwesiimisa abaana baitu nikisobora kutusemeza. Baitu okusemererwa kwonyini tukutunga obutworobera Yahwe kandi tukaba n’enkoragana enungi nauwe.

Kituletera okusemererwa obutumanya ngu nitusemeza Yahwe. N’obukiraaba ngu titwegondeza omu bizibu, baitu tibisobora kutumaraho okusemererwa kwaitu. Amananu gali ngu, obutwikara tuli besigwa n’omu bwire bw’okulengwa, okusemererwa kwaitu kweyongera. (Abarumi 5:3-5) N’ekintu ekindi, Yahwe aha omwoyo ogurukwera abo boona abamwesiga, kandi okusemererwa guli gumu ha miringo ey’ereetwa ekyana eky’omwoyo ogurukwera. (Abagaratiya 5:22) Kinu nikitukonyera kumanya habwaki Zabuli 64:10 egamba ngu: “Anyakuhikiriire alisemere’rwa [Yahwe].”

Kandi nikyongera kwoleka ensonga habwaki Diana na John baasoboire kwikara baine okusemererwa n’obubaraaba baatungire ebizibu. Diana Nagamba ati: “Yahwe mufoire bwirukiro bwange, nk’omwana n’omuzaire we.” Nayongera nagamba ati: “Nindora ampaire omugisa ogw’okusobora kwikara nintebebeza butoosa kandi nyine akamwenyu ha maiso” Kiki ekyakonyiire John kwikara aine okusemererwa n’okwekamba kuba omu buheereza hanyuma y’okulekaho obujunanizibwa obwakaba aine? Nagamba ati: “Obu nahairwe obujunanizibwa bw’okutendeka isomero Erirukutendeka Abagurusi n’Abaheereza b’Ekitebe (Ministerial Training School), kikandetera kwongeramu amaani omu kwesomesa kukira nk’oku nayesomesaga kara.” Nasoborra ngu uwe na mukazi we kikabanguhira kukora empindahinduka habwokuba bakaba betegekere kukora buli mulimo gwona kuruga hali Yahwe. Nayongera nagamba ati: “Titukeyijukyaga habw’okukora ekintu kinu.”

N’abandi baingi bakirozere ngu ebigambo ebiri omu Zabuli 64:10 bihikiire kimu. Ekyokurorraho, ow’oruganda na munyaanya itwe abaswerangaine bakaba baheeriize ha Beseeri ey’omu ihanga lya Amerika kumara emyaka erukuhingura omu 30. Baitu hanyuma bakasindikwa kuheereza nka bapayoniya ab’embaganiza. Bakagamba ngu: “Ky’obuhangwa kusaasa kakuba oyihwaho ekintu eky’obaire n’ogonza,” baitu bakongera bagamba ngu: “Tosobora kwikara n’obusasi bunu ebiro n’ebiro.” Obubahikire omu kikaro nambere baali basindikirwe, bakatandikiraho kutebeza n’ekitebe. Bakongera bagamba ngu: “Haroho ebintu ebikuru ebitwayatwire omu kusaba kwaitu. Obutwarozere omulingo esaara zaitu zagarukwamuga, tukagarukwamu amaani kandi kyatuletera n’okusemererwa. Hanyuma y’obwire buke, n’abandi nabo bakatandika kuheereza nk’abapayoniya, kandi tukatunga omugisa abeegi baitu babiri baali nibakurakurana.”

Amananu gali ngu, tikyanguhire kuba n’okusemererwa. Obwire obumu nitwija kwehurraga tubihiirwe. Baitu Yahwe nakozesa ebigambo ebirukusangwa omu Zabuli 64:10. N’obukiraaba ngu tuhoirwemu amaani, tukigumye ngu kakuba twikara tuli besigwa n’obuturaraba omu nyikara erukusisana eti, nitwija ‘kusemere’rwa Yahwe.’ Laka twikale tulindiriire akasumi nambere omurago gwa Yahwe ogw’okuleta “iguru erihyaka nensi empya” guli hikirizibwa. Obu nubwo abantu boona balifooka abahikiriire, ‘balisemererwa, balikyanganuka butoosa’ habw’ebintu byona Yahwe ebyalikora.​—Isaya 65:17, 18.

Teramu akasisani orole obwomeezi nk’oku buliba. Tuliba n’obwomeezi obuhikiriire kandi tuliba nitwimuka buli nyenkyakara twine amaani maingi. N’obuturaaba twarabire omu bintu bya mulingo ki ebyatuleteraga enaku, tibilyongera kutusaasa. Yahwe natunihiza ati “n’ebigambo bya kara tibiriijukwa, kunu tibiritaha omu mutima.” Tulitangirra abagonzebwa baitu abafiire kandi tulihurra nk’abazaire ob’omwisiki ow’emyaka 12 Yesu ouyahumbwiire: “Ahonaho baasemererwa n’okusemererwa okwingi.” (Marako 5:42, NW) Ha kumalirra, buli muntu weena omu nsi aliba muntu ahikiriire kandi “alisemere’rwa [Yahwe]” ebiro n’ebiro.