1, 2. Obworaaba n’ocwamu omulingo orakozesa obwomeezi bwawe, habwaki ky’amagezi kuhuliiriza Omuhangi waawe? (Rora ekisisani ekiri ha rupapura 15.)

OBWORAABA oli nsingaanto, nosobora kuba n’oheebwa amageezi maingi obukirukuhika ha biro byawe eby’omu maiso. Abegesa, abahabuzi ha isomero, hamu n’abantu abandi nibasobora kuba nibakugambira ngu, nikyetagisa kutunga obwegese obwahaiguru rundi omulimo omurungi ogurakukonyera kutunga sente nyingi. Baitu kandi, Yahwe nakuha amagezi agarukwahukana hali ganu. Amananu gali ngu, Yahwe nagonza okole n’amaani ha isomero nukwo osobole kwerolerra omu biro eby’omu maiso. (Abakolosai 3:23) Baitu nabwo namanya ngu obworukuba okyali muto, kikwetagisa kukora encwamu ez’amaani kandi ezirakwataho obwomeezi bwawe obw’omu maiso. Nahabweki, omu biro binu ebya hampero ataireho emisingi eyerakuhabura kandi ekakukonyera kwetwaza omu mulingo oguramusemeza.​—Matayo 24:14.

² Ijuka ngu Yahwe amanyire buli kimu. Namanya ekiraabaho omu  busumi obw’omu maiso, kandi namanya obwire bwonyine obusigaireyo empero y’ensi enu ekahika. (Isaya 46:10; Matayo 24:3, 36) Kandi Yahwe nakumanya. Namanya ekirakuletera okusemererwa n’ekirakuletera okuburwa okusemererwa. Amagezi g’abantu baha nigasobora kuzooka nk’amarungi, baitu kakuba gaba gatarukusigikirra ha Kigambo kya Ruhanga, amagezi ga mulingo ogu gaba gatali marungi.​—Enfumo 19:21.

3, 4. Kuhuliiriza amagezi amabi kikarugirramu ki Adamu, Hawa hamu n’abaana babo?

³ Amagezi amabi gabaireho kumara emyaka nyingi. Setani nuwe yabandize kuha abantu amagezi amabi. Akagambira Hawa ngu uwe na Adamu bakaba nibaija kuba n’okusemererwa kakuba becweramu omulingo barakozesamu obwomeezi bwabo. (Okubanza 3:1-6) Baitu Setani akaba aine ebigendererwa bye bindi! Akaba n’agonza Adamu na Hawa, otwaliremu n’abaana baabo, kworobera n’okuramya uwe omu kiikaro kya Ruhanga. Baitu Setani akaba atakakorraga abantu ekintu kyona. Yahwe nuwe akaba abahaire buli kimu ekibakaba baine. Akaba abataireho kukonyerangana, yabaha orugonjo orurungi, kandi yabaha n’emibiri ehikiriire ey’ekaba n’esobora kwomeera ebiro n’ebiro.

⁴ Eky’enaku, Adamu na Hawe bakajeemera Ruhanga. Obubakozere kinu, bakecwaho Ogu ow’akaba abahaire obwomeezi. Ebyarugiremu bikaba bibi muno. Nk’ebyakyo ebicwirwe ha miti yabyo, mporampora Adamu na Hawa bakatandika kukaikura kandi bafa. Abaana babo nabo bakahikwaho okubonabona, kandi naitwe itwena otutwaliremu. (Abarumi 5:12) Abantu baingi omu kasumi kanu tibataho mutima Ruhanga eby’arukugamba, oihireho bakora ebibarukugonza. (Abefeso 2:1-3) Biki ebirugiremu? Baibuli negamba ngu “busaho magezi” abantu obujeemera Ruhanga.​—Enfumo 21:30.

5. Kiki Yahwe eky’akaba nagumya ngu abantu abamu balikora, kandi akaba ahikire?

⁵ Yahwe akaba nakigumya ngu hakaba nihagenda kubaho abantu, otwaliremu n’ensingaanto baingi, abakugondeze kumumanya n’okumuheereza. (Zabuli 103:17, 18; 110:3) Abato banu b’omuhendo hali Yahwe! Obworaaba oli omu halubo busaho kugurukyagurukya, oliyo noyegondeza omu bintu “ebirungi” ebiruga hali Ruhanga, kandi kinu nikyongera ha kusemererwa kwawe omu bwomeezi. (Soma Zabuli 103:5; Enfumo 10:22) Nitwija kubazaaho ebintu bbina hali byo. Binu nibyo eby’okulya eby’omwoyo, abanywani abarungi, ebigendeerwa ebirungi, hamu n’obugabe bwonyini.

6. Habwaki osemeriire kufaaho ebyetaago byawe eby’omwoyo, kandi bintu ki Yahwe ebyakuhaire kukukonyera?

⁶ Ebisoro tibigira bwetaago bw’eby’omwoyo, ekirukumanyisa ngu tibihurra ngu bisemeriire kumanya Omuhangi wabyo. Baitu itwe twine ekyetaago kinu. (Matayo 4:4) Obutuhuiiriza Ruhanga tutunga okwetegereza, amagezi, hamu n’okusemererwa. Yesu akagamba: “Baine okusemererwa abamanyire obwetaago bwabo obw’eby’omwoyo.” (Matayo 5:3, NW) Ruhanga atuhaire Baibuli kandi nakozesa ‘omwiru omwesigwa kandi ow’amagezi’ kutuha ebintu ebitukonyera kugumya okwikiriza kwaitu. (Matayo 24:45) Ebintu binu tubyeta eby’okulya eby’omwoyo habwokuba bigumya okwikiriza kwaitu kandi birinda enkoragana yaitu na Yahwe egumire. Tutunga eby’okulya eby’omwoyo ebirungi omu miringo erukwahukana.​—Isaya 65:13, 14.

7. Eby’okulya eby’omwoyo kuruga hali Ruhanga nibiija kukukonyera bita?

 ⁷ Eby’okulya eby’omwoyo nibisobora kukukonyera kutunga amagezi n’obusobozi bw’okutekereza kurungi, kandi kinu nikisobora kukulinda omu miringo nyingi. (Soma Enfumo 2:10-14.) Emiringo enu niija kukukonyera kumanyirra ebisuba, nk’ekyokurorraho, ekisuba ekirukugamba ngu busaho Muhangi rundi ngu sente hamu n’itungo nibiija kukuletera kusemererwa. Emiringo enu niija kukukonyera kwetantara kuba n’okwengomba okubi rundi engeso ezisobora kukurugiramu akabi. Nahabweki kora kyona ekirukusoboka kuba w’amagezi kandi otekereze kurungi. Obu nubwo orukwija kwerorra ngu Yahwe nakugonza kandi nakugondeza ebirungi.​—Zabuli 34:8; Isaya 48:17, 18.

8. Habwaki osemeriire kwirra haihi na Yahwe hati, kandi nikiija kukugasira kita omu busumi obw’omu maiso?

⁸ Obwire obutali bwahara, ensi ya Setani niija kuhwerekerezebwa. Yahwe nuwe wenka arukwija kutulinda kandi atuhe ebyetaago byaitu, kinu nikisobora kutwarramu n’ebyokulya ebituraalya. (Habakuki 3:2, 12-19) Nahabweki, bunu nubwo obwire obwokwirra haihi na Ruhanga kandi okagumya obwesige bwawe omuluwe. (2 Petero 2:9) Obw’orakora eki, n’obw’orahikwaho enyikara ya mulingo ki, noija kwehurra nka Daudi, ayagambire ati: “Bwona bwona nkata Mukama omu maiso gange. Baitu aikara ha mukono gwange ogwobulyo, tinditabatabana.”​—Zabuli 16:8.

9. (a) Kusigikirra ha bigambo ebiri omu Yohana 6:44, kiki Yahwe ekyakora? (b) Kintu ki eky’embaganiza ekibaho obw’otangaana Abakaiso ba Yahwe abandi omurundi ogw’okubanza?

⁹ Obw’otangaana omuntu owatali omu mananu omurundi ogw’okubanza, bintu ki ebyoba omumanyireho? Nosobora kumanya ibara lye n’omulingo arukusisana, baitu osanga ebi nibyo omumanyireho byonka. Eki nikyahukanaho, obwotangaana omurundi ogw’okubanza omuntu anyakuli omu manananu. Oba okimanyire ngu nagonza Yahwe. Kandi oba okimanyire ngu haroho ekintu ekirungi Yahwe ekiyamurozeremu kandi yamweta kuba omu ha bantu abarukumuramya. (Soma Yohana 6: 44.) Omuntu ogu kabe naruga mu kiikaro ki rundi kabe yakuziibwe omu mulingo ki, oba omanyire bingi ebirukumukwataho kandi nauwe aba amanyire bingi ebirukukwataho!

10, 11. Bintu ki ebirukusisana abantu ba Yahwe ebibaine, kandi kinu nikikukwataho kita?

¹⁰ Ahonaho obwotangaana omuntu ondi anyakuli omu ha Bakaiso ba Yahwe, oba okimanyire ngu haroho ebintu ebikuru ebyaine ebirukusisanaho n’ebyawe. Oba okimanyire ngu n’obwaraaba nabaza orulimi orundi, inywena nimubaza “orulimi orusemiire” orw’amananu. (Zefaniya 3:9) Eki nikimanyisa ngu inywena nimwikiririza omuli Ruhanga, nimuhondera orulengo rumu orw’engeso, kandi mwine okunihira kumu okw’obusumi obw’omu maiso. Ebintu binu bibakonyera kwesigangana n’okuba n’obunywani obulikaraho ebiro n’ebiro.

¹¹ Nahabweki obworukuba n’oramya Yahwe, nubwo osobora kugamba ngu oine abanywani abarukukirayo oburungi. Oine abanywani omu nsi yoona, n’obukiraaba ngu abandi tokabarozere! Oihireho abaheereza ba Ruhanga, haroho abantu abandi ab’omanyire abaine ekisembo kinu eky’omuheendo?

12. Nosobora kweteraho bigendererwa ki eby’omwoyo?

¹² Soma Omugambizi 11:9–12:1. Oine ebigendererwa byona eby’oliyo n’olengaho kuhikiriza? Obundi oketeraho ekigendererwa ky’okusoma Baibuli buli kiro, rundi kuha ebicweka rundi eby’okugarukamu ebirungi omu nsorrokano. Nosobora kuba n’olengaho kukozesa kurungi Baibuli omu buheereza. Oyehurra ota obworora ngu oliyo noyeyongera kukora kurungi rundi abandi obubakugambira ngu n’okara kurungi? Busaho kugurukyagurukya osemererwa kandi ohikire kusemererwa! Habwaki? Habwokuba nokora Yahwe ekyarukugonza okole, nk’oku Yesu yakozere.​—Zabuli 40:8; Enfumo 27:11.

13. Habwaki kuheereza Ruhanga nikikira kuta omutima ha bigendererwa eby’ensi?

¹³ Obwoteka omutima gwawe ha kuheereza Yahwe, oba nokora omulimo ogurakuletera okusemererwa kandi oguraletera obwomeezi bwawe kuba n’ekigendererwa. Omukwenda Paulo akagamba ati: ‘Mugume okutatabaana, mwekambege obutoosa omu mirimo ya Mukama, baitu mumanyire ngu omulimo gwanyu tiguli gwa busa omu Mukama waitu.’ (1 Abakolinso 15:58) Baitu abantu obubata omutima ha bigendererwa eby’ensi, ekyokurorraho, kukora sente nyingi rundi kuba baruranganwa, tibaba n’okusemererwa kwonyini. N’obubatunga ebibaba nibaserra, basigara bataine okumarwa. (Luka 9:25) Ekyokurorraho ky’Omukama Sulemani nikitukonyera kwetegereza kurungi ensonga enu.​—Abarumi 15:4.

14. Kiki eky’osobora kwegera ha kintu Sulemani yakozere?

¹⁴ Sulemani anyakuli omu ha abantu abakyakizireyo kuba abaguuda kandi ab’amaani omu byafayo, haroho ekintu ekiyacwiremu kukora nukwo arole ekirarugamu. Akatekereza omu mutima gwe ati: “Ndakulenga nebyokwesemeza; nukwo oyesemeze n’ebirungi.” (Omugambizi 2:1-10) Nahabweki Sulemani akombeka amaju amarungi, yayebyarra engonjo n’emisiri y’ebyakyo, kandi yakora buli kimu ekiyali nagonza. Ebintu binu bikamuletera kusemererwa n’okumarwa? Sulemani obuyahindukire yarora byona ebyakaba akozere, akagamba ati: “Dora byona butarumu.” Akongera yagamba ati: ‘Byona bikaba bitaine mugaso.’ (Omugambizi 2:11) Sulemani ekiyakozere kirakwegesa isomo?

15. Habwaki noyetaaga kuba n’okwikiriza, kandi kusigikirra ha Zabuli 32:8, nikwija kukukonyera kuta?

¹⁵ Abantu abamu beega amasomo kurabira  omu kukora ensobi nyingi n’okubonabona habw’ebizibu ebirugamu. Yahwe tarukugonza ekintu nka kinu kikuhikeho. Nagonza ohuliirize eby’arukukugambira kandi omworobere. Kinu nikyetagisa kuba n’okwikiriza, baitu tolyeyijukya nakake encwamu ez’orakora habw’okwikiriza kwawe. Kandi Yahwe talyebwa ‘okugonza okuwayolekere hali ibaralye.’ (Abaheburaniya 6:10) Nahabweki tamu amaani oyombeke okwikiriza okugumire. Obu nubwo orakora encwamu enungi omu bwomeezi kandi okyerorre nk’oku So ow’omwiguru arukukugondeza ebirungi.​—Soma Zabuli 32:8.

16. Habwaki tusemeriire kutwara obugabe nk’ekintu ky’omuhendo kandi nitusobora kubukozesa tuta omu mulingo ogw’amagezi?

¹⁶ Omukwenda Paulo akagamba ati: “Nambere hali [omwoyo] gwa Mukama waitu, nuho hali obugabe.” (2 Abakolinso 3:17) Yahwe agonza obugabe kandi naiwe akakuhanga nogonza obe n’obugabe. Baitu nagonza okozese obugabe bwawe omu mulingo ogw’amagezi kandi ogurakulinda. Obundi ensingaanto bagenzi bawe barora ebisisani eby’orwanju, basiihani, bazaana emizaano ey’esobora kurugiramu obwomeezi bwabo akabi, bakozesa ebibazi ebirukutokooza obwongo rundi amarwa. Ha kubanza, ebintu binu nibisobora kuzooka nk’ebirukusemeza, baitu bikira kurugamu ebizibu nk’okurwara, kubiremeraho, rundi okufa. (Abagaratiya 6:7, 8) Ensingaanto abetaba omu bintu nka binu nibasobora kutekereza ngu baine obugabe, baitu tinukwo kiri.​—Tito 3:3.

17, 18. (a) Kworobera Ruhanga kitufoora kita b’obugabe? (b) Kiki ekirukwoleka ngu Adamu na Hawa bakaba baine obugabe kukira abantu ab’omu kasumi kanu?

¹⁷ Baitu kworobera Yahwe kitugasire. Kigasira obwomeezi bwaitu kandi kitufoora b’obugabe. (Zabuli 19:7-11) Kandi kakuba okozesa obugabe omu mulingo ogw’amagezi, ekirukumanyisa ngu kakuba ocwamu kworobera ebiragiro bya Ruhanga n’emisingi ye, oba noyoleka Ruhanga hamu n’abazaire bawe ngu oli muntu w’obujunanizibwa. Abazaire baawe nibaija kukwesiga kandi bakwongere obugabe. Kandi Yahwe naraganiza ngu akasumi akatali kahara naija kuha abaheereza be abesigwa obugabe bwonyini, Baibuli obweyeta ‘obugabe bw’ekitiinisa eky’abaana ba Ruhanga.’​—Abarumi 8:21.

¹⁸ Bunu nubwo obugabe Adamu na Hawa baali baine. Omu rugonjo rwa Adeni, Ruhanga akaba abahaire ekiragiro kimu kyonka. Bakaba batarukwikirizibwa kulya ha kijuma eky’omuti gumu gwonka. (Okubanza 2:9, 17) Notekereza Ruhanga akaba atali w’obwinganiza rundi ngu akaba agumangainiize ebintu kubaha ekiragiro eki? Eki tinukwo kiri! Tekerezaaho, biragiro bingaha abantu ebibekoliire kandi bahambiriza abandi kubyorobera. Baitu Yahwe akaha Adamu na Hawa ekiragiro kimu kyonka.

19. Yahwe na Yesu nibatwegesa ki kutukonyera kuba bantu b’obugabe?

¹⁹ Omulingo Yahwe atutwazaamu gwoleka ngu w’amagezi maingi. Omu kiikaro ky’okutuha ebiragiro bingi muno, n’obugumisiriza atwegesa kworobera ekiragiro ky’okugonza. Atwegesa kuhondera emisingi ye n’okunoba ebintu ebibi. (Abarumi 12:9) Omu Kwegesa kwe okwa ha Rusozi, Yesu akatukonyera  kwetegereza habwaki abantu bakora ebintu ebibi. (Matayo 5:27, 28) Kandi omu nsi empyaka, Yesu, nk’Omukama w’Obukama bwa Ruhanga aliikara natwegesa kurora ebihikire n’ebitahikire nk’oku uwe abirora. (Abaheburaniya 1:9) Yesu alitukonyera kuba abahikiriire omu bitekerezo n’omu mubiri. Teramu akasisani obwomeezi nk’oku buliba obutuliba tutakyayohebwa kukora ebintu ebibi kandi okubonabona okuletwa okutahikirra kuhoireho. Ha kumalirra tulyegondeza omu “bugabe bwekitinisa” Yahwe obwaraganiize.

20. (a) Yahwe akozesa ata obugabe bwe? (b) Nosobora ota kumwegeraho?

²⁰ N’omu nsi empyaka, obugabe bwaitu buliba bwine obugarukiro. Omu mulingo ki? Tuliikara nitwekambisibwa okugonza okutwiniire Yahwe na n’abantu abandi. Obutwebemberwa okugonza, tuba nituhondera ekyokurorraho kya Yahwe. N’obukiraaba ngu Yahwe aine obugabe obutaine obugarukiro, buli kimu eky’akora kisigikirra ha kugonza, otwaliremu n’omulingo atutwazamu. (1 Yohana 4:7, 8) Nahabweki kihikire kugamba ngu nitusobora kuba b’obugabe kakuba twegera hali Ruhanga.

21. (a) Daudi akehurra ata hali Yahwe? (b) Nitwija kubazaaho ki omu kicweka ekirahonderaho?

²¹ N’osiima habw’ebintu byona ebirungi Yahwe ebyakuhaire? Akuhaire eby’okulya eby’omwoyo, abanywani abarungi, ebigendererwa ebirungi, okunihira kw’okutunga obugabe bwonyini omu busumi obw’omu maiso, hamu n’ebintu ebindi bingi ebirungi. (Zabuli 103:5) Nosobora kuba n’oyehurra nk’oku Daudi yayehuliire obuyasabire nagamba ebigambo ebiri omu Zabuli 16:11: “Olinyoleka omuhanda ogwobwomezi: Namberoli haroho okuniha okusemererwa; omu mukono gwawe ogwobulyo numwo harumu ebinyakunsemeza ebiro nebiro.” Omu kicweka ekirahonderaho, nitwija kubazaaho amananu agandi ag’omuhendo agali omu Zabuli 16. Noija kurora nk’oku osobora kuba n’obwomeezi obukyakizireyo kuba oburungi!