1, 2. Ntekereza ki ezirukwahukana ez’abantu baine ha rugonjo rwa Ruhanga?

AB’ORUGANDA n’abanyaanya itwe kuruga omu mahanga maingi bakagenda ha rusorrokano orukooto omu rubuga rwa Korea orurukwetwa Seoul. Orusorrokano oburwahoire kandi baatandika kuruga omu kizaniro, Abakaiso ba Yahwe ab’omu ihanga eri bakesoroza hamu kuraga abo abakaba nibagarukayo omu mahanga gandi. Akaire kanu ak’okuragangana kakaba kaire k’obusaasi habwokuba baingi bakagambirangana ngu: “Tulirorangana omu Rugonjo rwa Ruhanga!” Notekereza rugonjo ki orubakaba nibabazaaho?

² Abantu biro binu betegereza ekigambo orugonjo rwa Ruhanga omu miringo erukwahukana. Abamu batekereza ngu eki kirooto burooto. Kandi abandi bagamba ngu kiri kiikaro nambere osobora kutungira okusemererwa. Iwe notekereza orugonjo rwa Ruhanga kintu ki? Nonihira akasumi kalihika rubeho?

3. Niddi Baibuli obuyabalizeho orugonjo omurundi gw’okubanza?

³ Baibuli ebazaaho orugonjo orwabaireho omu busumi bwa kara kandi eyongera egamba ngu nihaija kwongera habeho orugonjo omu busumi obw’omu maiso. Omu kitabu kya  Baibuli eky’okubanza nuho Orugonjo rurukubazibwaho omurundi gw’okubanza. Empindura ya Baibuli erukumanywa nka Catholic Douay Version, eyahindwirwe kuruga omu Rulatin, n’egamba eti omu Okubanza 2:8: “Mukama Ruhanga akabanza kubyara orugonjo orw’okusemererwa: omu nuho yataire omusaija ow’akaba ahangire.” (Ebigambo ebikwasire niitwe tubikozere tuti.) Empindura ey’Oruheburaniya erweta ‘orugonjo rw’omu Adeni.’ Ekigambo “Adeni” nikimanyisa “Kusemererwa,” kandi mali orugonjo runu kyali kiikaro kirungi muno. Orugonjo runu rwali rurungi muno, habwokuba rukaba rurumu eby’okulya bingi kandi hali haroho obusinge hagati y’ebisoro n’abantu.​—Okubanza 1:29-31.

4. Habwaki tusobora kugamba ngu Adeni rukaba rugonjo orurungi ngi muno?

⁴ Ekigambo orugonjo ekyahindwirwe kuruga omu Ruheburaniya kugaruka omu Ruyonaani nikyo pa·raʹdei·sos. Ekitabu ekirukwetwa Cyclopaedia ekyahandiikirwe M’Clintock hamu na Strong kyoleka ngu omuntu arukubaza Oruyonaani obuyahurraga ekigambo pa·raʹdei·sos, yatekerezahoga ekikaro ekirungi muno, ekitarumu kabi, ekirumu emiti emirungi erukwana ebijuma eby’embaganiza kandi kirumu amaizi amayonjo agarukugera, n’obunyansi oburungi nambere amagana g’enjobe hamu n’entaama biriira.​—Lengesaniza na Okubanza 2:15, 16.

5, 6. Habwaki Adamu na Hawa baferiirwe omugisa gw’okwikara omu Rugonjo orurungi, kandi kinu nikisobora kuletera abantu kwekaguza ki?

⁵ Yahwe akateka Adamu na Hawa omu rugonjo runu orurungi. Baitu habw’okujeemera Yahwe, ubo n’abaana babo bakaferwa omugisa gw’okwikara omu rugonjo runu. (Okubanza 3:23, 24) Nikisisana ngu orugonjo oru rukaikaraho kuhikya obusumi bw’Okusandaara kw’Amaizi okwabaireho omu busumi obwa Nuha, n’obukiraaba ngu hakaba hatarumu omuntu weena arukurwikaramu.

⁶ Abamu nibasora kuba nibekaguza, ‘Mali ensi eryongera efooke orugonjo orurungi?’ Obwakaiso nibwoleka ki? Obworaaba oine okunihira kw’okwikara omu Rugonjo orurungi n’abagonzebwa baawe, oine ensonga enungi ez’orukusigikirraho kuba n’okunihira oku? Nosobora kusoborra ensonga habwaki n’okigumya ngu ensi erifooka orugonjo orurungi?

7, 8. (a) Ruhanga akaraganiza ki Iburahimu? (b) Omurago gunu nigusobora kuba gwaletiire Iburahimu kutekerezaho ki?

⁷ Baibuli niyo yonka esobora kutukonyera kwetegereza ebirukukwata ha Rugonjo orurungi habwokuba Yahwe, ayahangire Orugonjo orwabandize nuwe yagihandikisize. Tekerezaaho Ruhanga ekiyagambiire munywani we Iburahimu. Akamugambira ngu akaba nagenda kukanyisa abaijukuru be nukwo bakanye “nkomusenyi oguli ha musa gwenyanja.” Hanyuma Yahwe akaraganiza Iburahimu ekintu ekikuru muno nagamba ati: ‘Kandi omu oruzaaro rwawe amahanga gona agomu nsi numwo galiheerwa omugisa; baitu ohuliire iraka lyange.’ (Okubanza 22:17, 18) Hanyuma y’akasumi, Ruhanga akongera yagarukamu omurago gunu nagugambira mutabani n’omwijukuru wa Iburahimu.​—Soma Okubanza 26:4; 28:14.

⁸ Tiharoho ekintu kyona omu Baibuli ekirukwoleka ngu Iburahimu akatekereza ngu abantu bakaba nibagenda kutunga empeera yabo ey’okumalirra ey’okwikara omu rugonjo omu iguru. Nahabweki Ruhanga obuyaraganiize Iburahimu ngu “amahanga gona agomu nsi” gakaba nigagenda kutunga omugisa, Iburahimu aine kuba yakyetegeriize kumanyisa ngu emigisa enu ekaba negenda kuba omu nsi. Baitu bunu nubwo bwa kaiso bwonka obuli omu  Baibuli oburukwoleka ngu ensi erifooka orugonjo orurungi?

9, 10. Mirago ki erukutuletera kunihira ngu ensi erifooka orugonjo orurungi?

⁹ Ruhanga akakozesa Daudi ayali omu ha baijukuru ba Iburahimu kubazaho obusumi obw’omu maiso nagamba ngu “omubi alihera.” (Zabuli 37:1, 2, 10) Akongera yagamba ngu “abaculezi baligwetwa ensi; balikyanganuka obwobusinge obwingi.” Daudi akongera yaragura ati: ‘Abahikiriire baligwetwa ensi, baragikaramuga ebiro nebiro.’ (Zabuli 37:11, 29; 2 Samuiri 23:2) Notekereza emirago enu ekakwataho eta abantu abakaba nibagonza kukora Ruhanga eby’agonza? Baali bahikire kutekereza ngu akasumi kalihika ensi ebemu abantu abahikiriire bonka kandi ngu eryongera efooke nungi nk’oku orugonjo rwa Adeni rukaba ruli.

¹⁰ Obwire bukahika Abaisareri abarukukira obwingi abaali nibaramya Yahwe bayanga kumworobera kandi bayanga okuramya okw’amananu. Nahabweki Ruhanga akaleka Abababuroni kurwanisa abantu be, baabasingura, bahwerekereza ensi yabo, kandi batwara baingi halubo nk’abanyagwa. (2 Ekyebyomubusinge 36:15-21; Yeremiya 4:22-27) Baitu banabbi ba Ruhanga bakaragura ngu abantu be baakugarukire omu nsi y’owabo hanyuma y’emyaka 70. Kandi obunabbi obu bukahikirra. Baitu naitwe bwine omulingo burukutukwataho. Obuturaaba nitubazaaho obumu halubwo, lengaho kwetegereza omulingo burukutugumya ngu ensi niija kufooka orugonjo orurungi.

11. Isaya 11:6-9 ekabanza kuhikirizibwa eta, baitu nitusobora kusigara nitukyayekaguza kikaguzo ki?

¹¹ Soma Isaya 11:6-9. Ruhanga akakozesa nabbi Isaya kuragura ngu Abaisareri bakaba nibagenda kugaruka omu nsi yabo, kandi ngu ensi egi ekaba negenda kubamu obusinge. Busaho omuntu akaba nagenda kutiina ngu ebisoro rundi abantu bakaba nibasobora kumutahirra. Abato n’abakuru boona bakaba batarukugenda kuhikwaho akabi koona. Ekintu kinu tikirukukwijukya enyikara ey’ekaba eri omu rugonjo rwa Adeni? (Isaya 51:3) Isaya akongera yaragura ngu ensi yoona, hatali Isareri yonka “eriijura okumanya [Yahwe], nkamaizi okugasweka enyanja.” Eki kikaba nikigenda kubaho di? Hataroho kurugukyagurukya, Isaya akaba nabazaaho obusumi bw’omu maiso oburukugenda kwija.

12. (a) Abaisareri abakaba nibaruga omu bunyagwa baali nibagenda kutunga obwomeezi bwa mulingo ki? (b) Kiki ekirukwoleka ngu Isaya 35:5-10 ekaba negenda kuhikirizibwa omu busumi obw’omu maiso?

¹² Soma Isaya 35:5-10. Wetegereze ngu Isaya akongera yagamba ngu Abaisareri abakaba nibagaruka omu nsi y’owabu kuruga omu Baburoni bakaba batarukugenda kutahirirwa ebisoro rundi abantu. Akagamba ngu ensi yabo ekaba negenda kweza eby’okulya bingi muno habwokuba ekaba negenda kubamu amaizi maingi, nk’oku orugonjo Adeni rwali rwine amaizi maingi. (Okubanza 2:10-14; Yeremiya 31:12) Obunabbi bunu bukaba nibugenda kuhikirizibwa omu busumi bw’Abaisareri honka? Wetegereze ngu obunabbi bukongera bwagamba ngu abafu b’amaiso, abalema, n’abafu b’amatu bakaba nibagenda kukizibwa. Baitu  Abaisareri batahikweho ebintu binu. Oihireho Ruhanga akaba nayoleka nk’oku akaba nagenda kumaraho endwaire zoona omu busumi obw’omu maiso.

13, 14. Isaya 65:21-23 rukahikirizibwa ruta Abaisareri obubarugire Baburoni, baitu kintu ki omu bunabbi obu ekitakahikiriziibwe? (Rora ekisisani ekiri ha rupapura 3.)

¹³ Soma Isaya 65:21-23. Abayudaaya obugagarukire omu nsi yabo, batasangeyo amaju amarungi rundi emisiri ey’ekaba ebyairwe ira. Baitu habw’omugisa gwa Ruhanga, obwire bukahika ebintu byahinduka. Teramu akasisani orole omulingo abantu baasemeriirwemu obubayombekere amaju bagatahamu, kandi baalya ha by’okulya byabo ebirukunura ebibakaba babyaire!

¹⁴ Wetegereze ngu kusigikirra ha bunabbi bunu, ebiro byaitu “biriba nkebiro byomuti.” Emiti emu ehangaara kumara enkumi n’enkumi y’emyaka. Abantu baine kuba n’obwomeezi oburungi kusobora kwomeera akasumi ako koona. Kandi kakuba baba nibaikara omu bwomeezi n’obusinge Isaya obw’arukubazaaho, oru niruba ruli rugonjo orurungi muno! Kandi obunabbi obu nibwija kuhikirizibwa!

15. Emu ha migisa ey’erukubazibwaho omu kitabu kya Isaya niyo eha?

¹⁵ Tekerezaaho omulingo obunabbi obutwaruga kubazaho burukugumya ngu omu bwire obutali bwa hara, ensi erifooka orugonjo orurungi. Ensi yoona eribamu abantu Ruhanga abaliba ahaire omugisa. Busaho omuntu alitiina ngu naija kutahirirwa ebisoro rundi abantu. Abafu b’amaiso, abafu b’eminwa, hamu n’abalema balikizibwa. Abantu balyeyombekera amaju gabo habwabo, kandi balibyara eby’okulya ebyabo habwabo. Balihangaara kukira n’emiti. Mali Baibuli erumu obwakaiso oburukwoleka ngu orugonjo orurungi nirugenda kubaho. Baitu haroho abantu abamu abagamba ngu emirago enu terukumanyisa ngu ensi erifooka orugonjo. Iwe nosobora kubakonyera kwetegereza ekintu kinu? Nsonga ki ezirukukugumya ngu omu nsi nihaija kubaho orugonjo? Yesu akatuha ensonga ezirukwesigwa kandi ezirukutugumya ngu orugonjo nirwija kubaho.

16, 17. Yesu akabazaaho di orugonjo?

¹⁶ N’obukiraaba ngu Yesu akaba atakozere musango gwona, bakamusibaho omusango bamalirra bamuhanikire ha muti, kandi ha mbaju ze zombi bakamuhanika n’abacwi b’ebiragiro babiri Abayudaaya. Omu ha nkozi zinu ez’ebibi akakyetegereza ngu Yesu akaba ali mukama kandi akagamba ati: “Yesu olinyijuka obwolizira omu bukama bwawe.” (Luka 23:39-42) Omurago Yesu yahaire omucwi w’ebiragiro onu, nigukwataho obusumi bwawe obw’omu maiso. Ebigambo bya Yesu bikahandiikwa omu Luka 23:43. Abahandiiki abamu bata akokurorraho ak’okuhumuzamu otakahikire ha kigambo “hati” kandi ebigambo byabo babihindura bati: “Mananukwo ninkugambira, hati oraaba nanyowe omu Rugonjo.” Abantu baine entekereza ezirukwahukana obukirukuhika nambere akokurorraho ak’okuhumuzaaho kasemeriire kuba omu bigambo ebinu. Baitu Yesu akaba namanyisa ki obuyagambire “hati”?

¹⁷ Omu ndimi ezirukukira obwingi ez’omu kasumi kanu, ak’okurorraho ak’okuhumuza kaha ebigambo amakuru agarukwetegerezebwa kurungi. Baitu omu byahandiikirwe ebyaira eby’Oruyonaani, akokurorraho ak’okuhumuzaamu tikakozesebwaga. Hati nitusobora kwekaguza: Yesu akagamba ngu, “Mananukwo ninkugambira, hati oraaba nanyowe omu Rugonjo”? Rundi ngu, “Mananukwo ninkugambira hati, oraaba nanyowe omu Rugonjo”? Abahinduzi bata akokurorraho enyuma rundi omu maiso g’ekigambo “hati” kusigikirra ha kibarukutekereza ngu Yesu akaba namanyisa,  kandi eki nikyo osobora kusanga omu mpindura za Baibuli ez’omu kasumi kanu.

18, 19. Kiki ekisobora kutukonyera kwetegereza amakuru g’ebigambo bya Yesu?

¹⁸ Baitu, ijuka Yesu ekiyagambiire abahondezi be atakafiire. Akagamba ati: “Omwana womuntu aliikara ati ebiro bisatu nyamusana nekiro omu mutima ogwitaka.” Akongera yagamba: “Omwana womuntu nagenda okuhebwayo omu mikono yabantu; balimuita; na ha kiro ekyakasatu alihumburwa.” (Matayo 12:40; 16:21; 17:22, 23; Marako 10:34) Omukwenda Petero nayoleka ngu ekintu kinu kikabaho. (Engeso Ezabakwenda 10:39, 40) Nahabweki Yesu n’omucwi w’ebiragiro ow’akaba ahanikirwe ha rubaju rwe batagende omu Rugonjo rwa Ruhanga ha kiro eki kyonyini ekibaferiireho. Baibuli egamba ngu Yesu akamara ebicweka by’ebiro bisatu “okuzimu” kuhikya Ruhanga obuyamuhumbwire.​—Engeso Ezabakwenda 2:31, 32. * (Rora obugambo obuli hansi.)

¹⁹ Nahabweki Yesu akakozesa ebigambo “Mananukwo ninkugambira hati” kutekaniza omutima gw’omusaija onu nukwo amuraganize. Embaza ya mulingo gunu ekabaho muno n’omu busumi bwa Musa. Kiro kimu Musa akagamba ati: “Nebigambo binu, ebindukubaragira hati birabaga ha mutima gwawe.”​—Ekyebiragiro 6:6; 7:11; 8:1, 19; 30:15.

20. Kiki ekirukusagika enyetegereza yaitu ey’ebigambo bya Yesu?

 ²⁰ Omuhinduzi omu wa Baibuli kuruga omu kicweka ekirukumanywa nka Middle East akagamba ati: “Omu kyahandiikirwe kinu, amaani gakizire kutekwa ha kigambo ‘hati’ kandi kisemeriire kusomwa kiti, ‘Mananukwo ninkugambira hati, oliba nanyowe omu Rugonjo rwa Ruhanga.’ Okuraganiza kukaba kw’ekiro eki baitu kukaba nikugenda kuhikirizibwa omu busumi obw’omu maiso.” Omuhinduzi onu akongera yagamba ngu gunu nugwo omulingo abantu babazaamu omu kiikaro eki kandi nikimanyisa ngu “haroho ekiro eky’omurago gwakoliirweho kandi gukaba gwine kuhikirizibwa.” Empindura ya Baibuli ey’erukumanywa nka Syriac ey’omu kyasa kyakataano ehindura orukarra runu eti: “Amina, ninkugambira kiro kinu ngu oliba nanyowe omu Rugonjo rwa Adeni.” Itwena omurago gunu gusemeriire kutugarramu amaani.

21. Kintu ki ekitarahikire hali omucwi w’ebiragiro ow’akaba ahanikirwe ha rubaju rwa Yesu, kandi habwaki?

²¹ Yesu obuyagambiire omusaija onu hali Orugonjo, akaba atarukumanyisa orugonjo orw’omu iguru. Eki nitukimanya tuta? Emu ha nsonga niyo ngu, omucwi w’ebiragiro onu akaba ataine eky’amanyire ha kiragaano Yesu yaragaine n’abakwenda be abesigwa eky’okugenda kulema omu iguru. (Luka 22:29) Ekintu ekindi, omusaija onu akaba atabatiziibwe. (Yohana 3:3-6, 12) Nahabweki Yesu aine kuba yali nabazaaho orugonjo orw’omu nsi obuyaraganiize omusaija onu. Hanyuma y’emyaka kurabaho, omukwenda Paulo akabazaaho ekirooto ekiyatungire nambere yarozere omusaija “natwarwa omu nsi ya Ruhanga.” (2 Abakolinso 12:1-4) N’obukiraaba ngu Paulo n’abakwenda abandi bakakomwa kugenda omu iguru kulema hamu na Yesu, Paulo uwe akaba nabazaaho orugonjo orukaba nirugenda kubaho omu busumi obw’omu maiso. * (Rora obugambo obuli hansi.) Orugonjo oru rukaba nirugenda kuba omu nsi? Nosobora kurubamu?

22, 23. Kiki eky’osemeriire kunihira?

²² Ijuka ngu Daudi akabazaaho akasumi nambere ‘abahikiriire baligwetwa ensi.’ (Zabuli 37:29; 2 Petero 3:13) Daudi akaba nabazaaho akasumi nambere abantu boona omu nsi baliba niborobera emisingi ya Yahwe ey’ehikiriire. Obunabbi obw’omu Isaya 65:22 bugamba: “Ebiro byabakome bange biriba nkebiro byomuti.” Kinu nikyoleka ngu abantu ba Yahwe abaliba omu nsi empyaka balyomeera kumara enkumi n’enkumi z’emyaka. Ekintu kinu nonihira nikisobora kubaho? Ego, habwokuba kusigikirra ha Okusuku’rwa 21:1-4, Ruhanga naija kuha abantu emigisa, kandi ogumu ha migisa enu nugwo ogurukugamba ngu ‘tihalibaho okufa.’

²³ Baibuli eky’eyegesa hali Orugonjo rwa Ruhanga nikyetegerezebwa kurungi. Adamu na Hawa bakaferwa omugisa gw’okwomeera ebiro n’ebiro omu Rugonjo, baitu ensi eryongera efooke orugonjo orurungi. Nk’oku Ruhanga yaraganiize, aliha abantu ab’omu nsi omugisa. Daudi akagamba ngu abaculeezi n’abahikiriire baligwetwa ensi kandi baligiikaramu ebiro n’ebiro. Kandi n’obunabbi obuli omu kitabu kya Isaya nibutukonyera kulindirra akasumi nambere tulyegondeza omu rugonjo orurungi omu nsi. Akasumi ako kalibaho di? Kalibaho omu kasumi nambere omurago gwa Yesu hali omucwi w’ebiragiro gulihikirizibwa. Naiwe nosobora kuba omu rugonjo oru. Omu kasumi ako, ebigambo “Tulirorangana omu Rugonjo rwa Ruhanga!” eby’agambirwe ab’oruganda n’abanyaanya itwe abaali ha rusorrokano orukooto omu Korea nubwo birihikirra.