Omu kubanza, nukwo tukaba nitutekereza habwokuba tukaba nitusigikirra ha Baheburaniya 12:16, NW. Ekyahandikirwe kinu nikigamba ngu Esau ‘atasiime ebintu ebirukwera’ kandi ngu akaha Yakobo “omugabo gwe ogw’okuba mwana omuzigaijo habw’ekiihuro kimu.” Nahabweki tukaba nitutekereza ngu, kusigikirra nk’oku Yakobo yatungire “omugabo  . . . ogw’okuba mwana omuzigaijo,” akatunga omugisa gw’okufooka isenkuru Masiya.—Matayo 1:2, 16; Luka 3:23, 34.

Baitu, hanyuma y’okweyongera kwecumitiriza ha byahandiikirwe bindi omu Baibuli, tukyetegeriize ngu kikaba kitarukwetagisa omusaija kuba mwana omuzigaijo kusobora kuba omu ruganda orukaba nirugenda kurugwamu Masiya. Leka tubazeho ebimu ha byahandikirwe binu:

Mutabani wa Yakobo ow’okubanza ou yazaire omuli Leya akaba Reubeni, kandi mutabani wa Yakobo ow’okubanza ou yazaire omuli Rakeri akaba Yusufu. Reubeni obu yasihaine, akaferwa omugabo gwe ogw’obugwetwa nk’omwana ow’okubanza kandi obugwetwa obu bwafooka bwa Yusufu. (Okubanza 29:31-35; 30:22-25; 35:22-26; 49:22-26; 1 Ekyebyomubusinge 5:1, 2) Baitu nabwo, Masiya atabe omu ruganda rwa Reubeni rundi orwa Yusufu. Akaizira omu ruganda rwa Yuda, kandi Yuda akaba ali mwana wa kana omu baana ba Yakobo na Leya.—Okubanza 49:10.

Luka 3:32 ebazaho abaisenkuru Masiya abandi abarukuhika omu bataano, kandi nikisisana ngu boona basobora kuba baali baana bazigaijo. Ekyokurorraho, Boazi akaba ise Obeda, kandi Obeda nuwe yali ise Yese.—Rusi 4:17, 20-22; 1 Ekyebyomubusinge 2:10-12.

Daudi omutabani wa Yese atabe mwana muzigaijo. Akaba macura omu baana munaana aboojo aba Yese. Baitu ekirukuhuniriza, Masiya akaija kurabira omuli Daudi. (1 Samuiri 16:10, 11; 17:12;  Matayo 1:5, 6) Nikyo kimu na Sulemani. Nauwe akaba isenkuru Masiya nobukiraaba ngu atabe mwana muzigaijo.—2 Samuiri 3:2-5.

Baitu kinu tikirukumanyisa ngu kuba muzigaijo kikaba kitarukutwarwa nk’ekintu ekikuru muno. Omwojo omuzigaijo yatungaga ebintu abaana abandi aboojo bakaba batasobora kutunga. Nuwe ou bakiraga kufoora mutwe gw’eka ise obu yafaga, kandi ebintu ebi yagweterwaga babitezamuga emirundi ebiri kukira eby’abandi.—Okubanza 43:33; Ekyebiragiro 21:17; Yosuha 17:1.

Baitu obuzigaijo bunu bukaba nibusobora kufururwa kuruga hali omwojo w’okubanza nibuheebwa omwojo ondi. Iburahimu obu yabingire Isameri, obuzigaijo bunu bukamwihwaho bwagabirwa Isaka. (Okubanza 21:14-21; 22:2) Kandi nk’oku tusangirwe turozere, obuzigaijo bwa Reubeni bukamurugaho bwafooka bwa Yusufu.

Hati, omukwenda Paulo akaba namanyisa ki obu yabalize ebigambo ebiri omu Abaheburaniya 12:16, NW? Ekyahandikirwe kinu nikigamba: “Mwerinde hatabaho omuli inywe omuntu arukukora ebikorwa eby’obusihani rundi omuntu atarukusiima ebirukwera nka Esau ayahaireyo omugabo gwe ogw’okuba mwana omuzigaijo habw’ekiihuro kimu.”

Paulo obu yagambire ebigambo binu, akaba atarukubazaho ba isenkuru Masiya. Baitu akaba nahabura Abakristaayo. Akabagambira ati: “Muhendere ebigere byanyu empenda eziterekeriire” nukwo “haleke okubaho omuntu wena atarukuhika omu mbabazi za Ruhanga.” Ekyenaku, ekintu kinu kikaba nikisobora kubahikaho kakuba bakozere ebikorwa eby’obusihani. (Abaheburaniya 12:12-16) Kandi kakuba kyabaireho, bakaba nibagenda kuba nka Esau habwokuba ‘atasiime ebintu ebirukwera” baitu akagonza kwigusa okwegomba kwe wenka.

Kusigikirra ha migenzo y’akasumi ako, obwire obumu n’obumu, Esau nasobora kuba yatungire omugisa gw’okuhongera Yahwe ebihongwa. (Okubanza 8:20, 21; 12:7, 8; Yobu 1:4, 5) Baitu Esau akata muno omutima gwe ha kuhikiriza okwegomba kwe kyamuletera kuhika n’okugaba omugabo gwe nk’omwojo omuzigaijo habwokugonza kulya. Esau nasobora kuba yali natekereza ngu kugaba obuzigaijo bwe kyakumujunire okubonabona oku Yahwe yagambire ngu abaijukuru ba Iburahimu balitunga. (Okubanza 15:13) Esau akongera yayoleka ngu akaba atarukusiima ebintu ebirukwera obu yakozere ekintu ekyasaliize muno abazaire be eky’okuswera abakazi babiri abakafiiri. (Okubanza 26:34, 35) Akahukanira kimu hali Yakobo ayafireyo muno kurora ngu yaswera omuheereza wa Yahwe mugenzi we!—Okubanza 28:6, 7; 29:10-12, 18.

Ebyahandikirwe binu nibitwegesa ki hali abaisenkuru Masiya? Abaisenkuru Masiya abamu bakaba bazigaijo kandi abandi batabe. Ekintu kinu Abayudaaya bakaba bakimanyire kandi baikirranizaga nakyo. Kiki ekirukwoleka? Habwokuba ubo bonka bagambaga ngu Kristo akaba nagenda kuba mwijukuru wa Daudi, kandi tumanyire ngu Daudi akaba macura wa Yese.—Matayo 22:42.