1, 2. Abaheereza ba Yahwe batunga bulemezi ki? (Rora orupapura 27)

BADAKITALI n’abanaasi baingi bakira kujanjaba abantu abaine oburwaire oburukusobora kuturra. Bajanjaba abarwaire habwokuba nibagonza kubakonyera. Baitu kandi nabo basemeriire kweteraho emiringo kurora ngu oburwaire obu barukujanjaba tibwabakwata. Naitwe nk’Abakaiso ba Yahwe, nitusobora kugamba ngu tuli nk’abadakitali n’abanaasi. Itwena twetoroirwe abantu abarwaire omu ntekereza kandi abaine emiringo etarukusiimwa Yahwe. Obwomeezi nibusobora kutugumira habw’okwikara omu bantu ba mulingo gunu.

² Omu biro binu ebya ha mpero, abantu baingi abatarukuheereza Ruhanga bagaya endengo ze ezirukukwata ha bihikire n’ebitahikire. Omukwenda Paulo akabazaho emiringo yabo emibi obwakaba n’ahandika ebbaruha ye hali Timoseo. Paulo akagamba ngu emiringo enu emibi eryeyongera kukanya obwire obu buliba nibweyongera kuhwayo. (Soma 2 Timoseo 3:1-5, 13.) Emiringo enu n’obweraaba netuhuniriza, kakuba tuterinda naitwe nitusobora kwesanga tutandikire kubaza,  kutekereza, n’okwetwaza nk’abantu abatwetoroire. (Enfumo 13:20) Omu kicweka kinu, nitwija kurora omulingo emiringo enu erukwahukanaho n’emiringo y’abantu ba Ruhanga. Kandi nitwija kurora omulingo tusobora kwerinda kukwatwa emiringo emibi obu turukuba nitukonyera abantu kwega hali Yahwe.

3. Ekyahandikirwe eky’omu 2 Timoseo 3:2-5 nikibazaho abantu ba mulingo ki?

³ Omukwenda Paulo akahandika nagamba ngu ebiro bya hanyuma bikaba nibigenda kuba “ebiro ebyakabi kaingi.” Hanyuma akabazaho emiringo 19 emibi ey’ekaba negenda kweyongera. Emiringo enu n’esisana n’egi ei yasangirwe abalizeho omu Abarumi 1:29-31, baitu kandi omu Timoseo akabazaho ebintu ebitutasobora kusanga hantu hoona omu Byahandikirwe by’Ekikristaayo eby’Oruyonani. Paulo akatandika n’agamba ngu “abantu baliba.” Akakozesa ebigambo binu kwoleka ngu abasaija n’abakazi boona nibasobora kuba n’emiringo embi. Baitu kinu tikirukumanyisa ngu buli muntu wena aine emiringo emibi ei Paulo yabalizeho. Abakristaayo bagira emiringo erukwahukanira kimu n’emiringo enu emibi.​—Soma Maraki 3:18.

4. Abantu ab’emyehembo betwaza bata?

⁴ Paulo obu yamazire kugamba ngu abantu baliba abegonza bonka kandi abagonza sente, akongera yagamba ngu abantu baliba bemyehembo, bekuniki, kandi baliba abenyumiza bonka. Abantu ba mulingo gunu batekereza ngu barungi kukira abandi habw’enzooka yabo, habw’emirimo ei barukukora, itungo lyabo, n’ebitinisa ebi baine. Abantu nka banu bagonza muno kwegombebwa. Omuserulirizi omu akagamba ngu: “abantu ba mulingo gunu baba nakatuuti omu mitima yabo nambere beyinamira.” Abantu abamu bakagamba ngu, kumanya emyehembo eri y’akabi, n’omuntu ow’emyehembo wenka tagonza kurora omuntu ondi nayehemba.

5. Abamu ha baheereza ba Ruhanga abesigwa bakoleka bata emyehembo?

⁵ Yahwe anoba emyehembo rundi “amaiso agemyekuniko.” (Enfumo 6:16, 17) Kandi emyehembo esiisa enkoraga y’omuntu na Ruhanga. (Zabuli 10:4) Emyehembo guli mulingo gwa Diabolo. (1 Timoseo 3:6) Ekyenaku, n’abaheereza ba Yahwe abamazire emyaka nyingi nibamuheereza omu bwesigwa bamaliriire basingwirwe emyehembo. Ekyokurorraho, Omukama Uziya owa Yuda akaba amazire emyaka naheereza Yahwe ali mwesigwa. Baitu Baibuli negamba ngu: “Obuyagumireho, omutima gwe gwanyumizibwa, nokukora akakora ebyobubi, yasisira Mukama Ruhangawe.” Uziya akataha omu yekaro yatandika kukora omulimo ogukaba gutali gwe. Hanyuma y’akasumi, omukama Hezekiya owakaba ali mwesigwa nauwe akatunga emyehembo n’obukiraaba ngu obwire bukahika yayegarukamu.​—2 Ekyebyomubusinge 26:16; 32:25, 26.

6. Kiki ekikaba nikisobora kuletera Daudi kwepanka? Baitu habwaki atarayepankire?

⁶ Abantu abamu batandika kwepanka habw’okwerora basemiire, bali bantu ruranganwa, bakugu omu by’okuzina, baine amaani, rundi habwokuba abantu abandi nibabegomba. Daudi akaba aine ebintu binu byona baitu atepanke ekiro na kimu omu bwomeezi bwe bwona. Ekyokurorraho, hanyuma ya Daudi kwita Goliasi, Omukama Saulo akaha Daudi muhara we kumuswera. Baitu Daudi akagamba ati: “Ninyowoha? Nobwomezi bwange ki, rundi abaisenyowe bali ki omu  Isareri, nyowe okuba omuko womukama?” (1 Samuiri 18:18) Kiki ekyakonyire Daudi kwikara ayebundaize? Akaba amanyire ngu byona ebyakaba aine, nk’emiringo, obusobozi, n’obujunanizibwa, byona akaba abitungire habwokuba Ruhanga akebundaaza yamukonyera. (Zabuli 113:5-8) Daudi akamanya ngu ebirungi bye byona akabitunga kuruga hali Yahwe.​—Lengesaniza na 1 Abakolinso 4:7.

7. Kiki ekiratukonyera kwikara tuli bebundaazi?

⁷ Nka Daudi, abaheereza ba Yahwe ab’omu kasumi kanu balengaho kwebundaaza. Nitukwatwaho muno kumanya ngu Yahwe, ow’arukukirrayo kimu obusobozi nauwe mwebundaazi. Tulengaho kuhondera ebigambo binu: “Nukwo mujwale, nkabakome ba Ruhanga, abarukwera kandi abarukugonzebwa omutima gwembabazi, noburungi, nobuculezi, nokwebundaza, nokugumisiriza.” (Abakolosai 3:12) Kandi nitukimanya ngu okugonza “tikwenyumiza kwonka, tikwehemba.” (1 Abakolinso 13:4) Kakuba abantu barora ngu nitwebundaaza, nabo nibasobora kusikirizibwa kwega hali Yahwe. Nk’oku nyineeka atarukuheereza Yahwe asobora kusikirizibwa kwega hali Yahwe habw’engeso enungi eza mukazi we Omukrsitaayo, abantu nabo nibasobora kusikirizibwa kwega hali Yahwe habw’obwebundaazi bw’abaheereza be.​—1 Petero 3:1.

8. (a) Biro binu abantu abamu batwara bata ensonga y’okujemera abazaire? (b) Baibuli etererra abaana kukora ki?

⁸ Paulo akasoborraho omulingo abantu balitwaza bagenzi babo omu biro ebya ha mpero. Akagamba ngu abaana tibalihurra ababazaire. Biro binu, ebitabu, emizaano, hamu na puroguramu za ha tivi birengaho kwoleka ngu tikiri kibi abaana kujemera abazaire babo. Baitu amananu gali ngu, obujeemu bucekya eka kandi kunu niyo ndugirro y’obumu bw’abantu abali omu kiikaro. Ekintu kinu abantu bamazire emyaka nyingi nibakimanya. Ekyokurorraho, omu Buyonani ya kara, omusigazi obu yateraga abazaire be bamusendaga. Kandi omu biragiro bya Roma, omuntu ayateraga ise bamufubiraga nk’oku bafubiraga omwisi. Ebyahandikirwe eby’Oruheburaniya n’eby’Oruyonani byatererraga abaana kutamu abazaire babo ekitiinisa.​—Okuruga 20:12; Abefeso 6:1-3.

9. Kiki ekirakonyera abaana kworobera abazaire babo?

⁹ Kiki ekisobora kukonyera abaana kworobera abazaire babo n’obu baraaba betoroirwe abantu abajemu? Abaana obu batekereza ha birungi byona abazaire babo babakoliire, kisemeriire kubaletera kusiima n’okugonza kuborobera. Kandi abato baine kumanya ngu Ruhanga, Isiitwe, nagonza abaana borobere abazaire babo. Abato obu babazaho kurungi abazaire babo, kiretera n’abaana abandi nabo kwongera kutamu abazaire babo ekitiinisa. Mananu ngu kakuba abazaire batoleka abaana babo okugonza, nikisobora kugumira abaana kuborobera. Baitu omwana obwarora ngu mali abazaire be nibamugonza, kimuletera kuborobera n’obu kirukuba kitanguhire. Haroho  ow’oruganda muto arukwetwa Austin ayagambire ngu: “Nobukiraaba ngu emirundi erukukira obwingi tinagonzaga kwikirraniza n’abazaire bange, bakanteraho ebiragiro ebitagumire kworobera, kandi bansoborraga habwaki babitaireho, kandi baikaraga nibabaza nanyowe. Ekintu kinu kikankonyera kuba muhulizi. Kikanyoleka ngu bakaba nibanfaho, kandi kikandetera kugonza kukora ebintu ebirukubasemeza.”

10, 11. (a) Miringo ki embi erukwoleka ngu abantu tibakyagonzangana? (b) Abakristaayo ab’amananu boleka bata ngu nibagonza abantu abandi?

¹⁰ Paulo akabazaho emiringo endi erukwoleka ngu abantu tibarukugonza bagenzi babo. Hanyuma y’okugamba ngu abaana baliba ‘abatarukuhurra ababazaire,’ akongera yagamba ngu baliba nabatarukusima. Kandi mali abantu abatasiima nubo batarora ebirungi ebi babakorra. Paulo akongera yagamba ngu baliba abatarukwera. Kandi ngu baliba abataterana hamu, ekirukumanyisa ngu baliba abatarukugonza kwikara omu businge n’abantu abandi. Kandi ngu baliba abajumi hamu n’abadupi, nibabazaho abantu hamu na Ruhanga ebintu ebibi kandi ebirukusisa ibara. Kandi baliba bahangirizi, nibabaza ebisuba kusobora kusiisa amabara g’abandi. *​—Rora obugambo obuli hansi.

¹¹ Abaheereza ba Yahwe tibasisana n’abantu abarukukira obwingi habwokuba ubo bagonzangana mali. Kuruga ira abaheereza ba Yahwe baikare nibolekangana okugonza. Niyo ensonga habwaki Yesu yagambire ngu ekiragiro kyakabiri ekikuru omu biragiro byona ebya Musa kikaba eky’okugonza abantu abandi. (Matayo 22:38, 39) Kandi Yesu akagamba ngu Abakristaayo ab’amananu balimanyirwa ha kugonza oku bolekangana. (Soma Yohana 13:34, 35.) Abakristaayo ab’amananu basemeriire n’okugonza abanyanzigwa babo.​—Matayo 5:43, 44.

12. Yesu akoleka ata ngu yagonzaga abantu abandi?

¹² Yesu akoleka ngu mali akaba nagonza abantu. Okugonza kunu akakwoleka obu yagenzere rubuga ha rubuga natebeza amakuru amarungi ag’Obukama bwa Ruhanga. Akakiza abafu b’amaiso, abalema, abagenge, hamu n’abafu b’amatu. Kandi akahumbuura n’abafu. (Luka 7:22) Yesu akahika n’okuhayo obwomeezi bwe kusobora kujuna abantu, nobukiraaba ngu abaingi bakaba bamunobere. Yesu akoleka okugonza kwonyini nk’okwa Ise. Abakaiso ba Yahwe omu nsi yona bahondera ekyokurorraho kya Yesu kandi bagonza abantu abandi.

13. Kugonza abandi nikisobora kukwataho kita abantu abatarukuheereza Yahwe?

¹³ Obu tugonza abantu, kibaletera kugonza kwega hali Yahwe. Ekyokurorraho, haroho omusaija omu ihanga lya Thailand ayagenzere ha ruso’rokano rw’ebiro bisatu kandi yakwatwaho habw’okurora omulingo ab’oruganda n’abanyaanya itwe bayolekanganaga okugonza. Obu yagarukire omu ka, akasaba Abakaiso ba Yahwe bamwegese Baibuli emirundi ebiri buli wiiki. Akagenda yatebeza abanyabuzaale be boona. Hanyuma y’ameezi mukaaga gonka, omusaija onu akaha orubazo rwe orw’okubanza orw’okusoma Baibuli ha Kyombeko ky’Obukama. Kusobora kumanya obworaaba oli muntu ayoleka okugonza, wekaguze: ‘Ninkora kyona ekirukusoboka kusobora kukonyera ab’omu ka yange, ab’omu kitebe, n’abantu abansanga omu buheereza? Ndengaho kurora abantu abandi nk’oku Yahwe abarora?’

14, 15. Abantu baine ngeso ki embi muno? Abantu abamu bakozere mpindukahinduka ki omu bwomeezi bwabo?

¹⁴ Haroho engeso ezindi ez’abantu ab’omu biro binu ebya ha mpero ezi tusemeriire kwetantara. Ekyokurorraho, abantu abarukukira obwingi tibagonza oburungi. Banoba ebintu ebirungi kandi babihakaniza. Abantu ba mulingo gunu tibetanga kandi bali abarruma. Abamu bagumangaine kandi bakora ebintu batabandize kubitekerezaho, batarukufayo ha mulingo ebikorwa byabo bikwataho abantu abandi.

¹⁵ Baingi abakaba nibetwaza nk’ebisoro basoboire kuhinduka basemeza engeso zabo. Empinduka zinu zikarangwa kara omu bunabbi bwa Baibuli. (Soma Isaya 11:6, 7.) Ekyahandikirwe kinu kyoleka ngu ebisoro nk’engagya hamu n’entale biriikara hamu n’ebisoro eby’omu maka nk’entaama n’enyana. Obusinge bunu bwakusobokere buta? Obunabbi bukongera bwagamba: “Ensi eriijura okumanya [Yahwe].” (Isaya 11:9) Ebisoro tibisobora kwega hali Yahwe, nahabweki obunabbi bunu bukaba bwine amakuru gandi agarukwoleka empindukahinduka ezikorwa abantu.

16. Baibuli ekonyire abantu kukora mpinduka ki omu bwomeezi bwabo?

¹⁶ Baingi omu baheereza ba Yahwe bakaba baine engeso nk’ez’ebisoro baitu hati bantu b’obusinge. Ebyokurorraho by’abantu ba mulingo gunu nosobora kubisanga ha mukura gwaitu ogwa jw.org nambere hali ekicweka ekigamba “Baibuli Ehindura Obwomeezi bw’Abantu.” Boona abarukuheereza Yahwe tibali nk’abo abanyina okusisana nkokutina Ruhanga, baitu amani gakwo  bagehakaine. Abantu nka banu befoora ngu nibaramya Ruhanga, baitu ebikorwa byabo tibyoleka ngu nibamugonza. Baitu haroho abaheereza baingi aba Yahwe abakaba bali nk’ebisoro baitu hati bajwaire “omuntu omuhyaka, arukuhangwa Ruhanga omu kuhikirra nokwera okwamazima.” (Abefeso 4:23, 24) Abantu obu bega ebirukukwata hali Yahwe, barora ngu nikibetagisa kuhondera endengo ze. Ekintu kinu kibaletera kukora empinduka omu nyikiriza zabo, entekereza, n’ebikorwa byabo. Tikyanguhire kukora empindukahinduka zinu, baitu omwoyo gwa Ruhanga nigusobora kukonyera omuntu weena arukugonza kusemeza Yahwe.

17. Kiki ekiratukonyera kwetantara emiringo embi ey’abantu b’ebiro bya ha mpero?

¹⁷ Kyanguhire kurora enyahukana eri hagati y’abaheereza ba Ruhanga n’abo abatarukumuheereza. Tusemeriire kwerinda kurora ngu emiringo emibi ey’abantu abatarukuheereza Yahwe tiyatutahamu. Nitugonza kuhondera obuhabuzi bwa Yahwe obw’okutera amabega omuntu wena anyakwine emiringo enyakugambirweho omu 2 Timoseo 3:2-5. Baitu tukimanyire ngu titusobora kwetantarra kimu omuntu weena anyakwine emiringo enu emibi. Nitusobora kwesanga twine kukora nabo ha mulimo, kusoma nabo ha isomero, rundi twine kwikara nabo. Baitu kinu nobukyakuba nukwo kiri, titusemeriire kutandika kutekereza rundi kwetwaza nk’abo. Kiki ekisobora kutukonyera? Kugumya enkoragana yaitu na Yahwe kurabira omu kusoma Baibuli n’okunywana abanywani ba Yahwe.

18. Ebigambo n’ebikorwa byaitu nibisobora bita kukonyera abantu kwega hali Yahwe?

¹⁸ Ekintu ekindi, nitugonza kukonyera abantu abandi nabo kumanya Yahwe. Kozesa omugisa gwona ogworatunga okutebeza kandi osabe Yahwe akukonyere kumanya obwire obuhikire obwokubaza, n’ekintu ekihikire eky’okubazaho. Tusemeriire kumanyisa abandi nk’oku tuli Bakaiso ba Yahwe. Obu nubwo engeso zaitu enungi zirahaisa Yahwe ekitinisa hatali itwe kutebwamu ekitinisa. Yahwe atwegeseze “okwanga obutatina Ruhanga nokwegomba okwomunsi, nukwo tube abomezi omu businge obwa hati bunu omu kwerinda nokuhikirra nokutina Ruhanga.” (Tito 2:11-14) Obu turahondera ekyokurorraho kya Yahwe tukakora ebintu arukugonza tukole, abantu abandi nibaija kukirora. Abamu nibasobora n’okugamba ngu: “Tuligenda hamu nainywe, baitu tuhuliire ngu Ruhanga ali nainywe.”​—Zakaliya 8:23.