1-3. (a) Zabuli 147 n’esobora kuba yahandikirwe di? (b) Zabuli 147 n’etwegesa ki?

EMIRUNDI erukukira obwingi omuntu obwagamba rundi obw’akora ekintu ekirukutusemeza tumuhaisaniza. Obu turaaba nitusobora kuhaisaniza abantu, kandi Yahwe Ruhanga uwe tasemeriire kuhaisanizibwa n’okukiraho? Tumuhaisaniza habw’amaani ge amaingi, ageyolekera omu bihangwa bye byona, kandi tumuhaisaniza habw’okugonza kwamaani okwatwolekere okweyolekera omu kicunguro ky’omwana we.

² Kakuba osoma Zabuli 147, noija kurora ngu ayagihandikire akaba nagonza kuhaisaniza Yahwe. Kandi akekambisa n’abantu abandi kuhaisaniza Ruhanga.​—Soma Zabuli 147:1, 7, 12.

³ Titurukumanya omuntu ayahandikire Zabuli 147. Baitu omuhandiki wayo nasobora kuba yabaireho Abaisareri obu balekiirwe kuruga omu bunyagwa bwa Baburoni kugaruka Yerusalemu. (Zabuli 147:2) Omuhandiki wayo akakugiza Yahwe habw’okugarra abahereza be omu nsi yabo nukwo bagarukemu kumuramya. Hanyuma akaha ensonga ezindi habwaki tusemeriire kukugiza Yahwe. Akaha nsonga ki ezindi? Kandi iwe  nsonga ki ezisobora kukuletera kugamba “Mukugize Mukama”?​—Zabuli 147:1.

4. Notekereza Abaisareri bakehurra bata Omukama Kuro obu yabalekire, kandi habwaki?

⁴ Tekereza omulingo Abaisareri basobora kuba bayehulire obu bali omu bunyagwa omu Baburoni. Abo ababanyagire bakaba nibabasekereza nibagamba: “Mutuzinire ha bizina bya Sayuni.” Baitu Abayudaaya bakaba batarukugonza kuzina. Orubuga Yerusalemu orukaba nirukira kubaletera okusemererwa rukaba ruhwerekerezibwe. (Zabuli 137:1-3, 6) Bakaba bahoirwemu amaani nahabweki bakaba nibetaga kuhumuzibwa. Baitu Yahwe akakonyera abantu be nkoku akaba araganize. Akabakonyera ata? Omukama Kuro owa Peresi obu yasingwire Baburoni akagamba ngu Yahwe akamuragira “okumwombekera enju Yerusalemu.” Kuro akongera yagambira Abaisareri ati: “Wena ali omulinywe owomu bantube bona, Mukama Ruhangawe aikale nauwe, kandi atabale.” (2 Ebyomubusinge 36:23) Ekintu kinu mali kine kuba kyahumwizi Abaisareri abakaba bali omu Baburoni!

5. Omuhandiki wa Zabuli akabazaho ata amaani ga Yahwe ag’okutukiza?

⁵ Yahwe atahumuze Isareri nk’ihanga kwonka, baitu akahumuza na buli omu nk’omuntu. N’omu kasumi kanu, Yahwe nukwo arukukora. Omuhandiki wa Zabuli akagamba ngu Yahwe “akiza abayina emitima ecwekere, kandi aboha ebihuta byabo.” (Zabuli 147:3) Obu turaaba turwaire rundi twetuntwire, twikale tukimanyire ngu Yahwe natufaho. Yahwe ayetekanize kutuhumuza n’okukiza ebihuta ebitwine ha mutima. (Zabuli 34:18; Isaya 57:15) Atuha amagezi n’amaani agatusobozesa kuraba omu bizibu ebi tutunga.​—Yakobo 1:5.

6. Ebigambo ebirukusangwa omu Zabuli 147:4 nibisobora kutugasira bita? (Rora ekisisani ekiri ha kutandika kw’isomo linu.)

⁶ Ekintu ekindi, omuhandiki wa Zabuli akarora haiguru omu mwanya yagamba hali Yahwe ati: “Abara enyunyuzi omuhendo gwazo” kandi ngu “[azeta] zona amabara gazo.” (Zabuli 147:4) Omuhandiki wa Zabuli yaroraga enyunyuzi, baitu akaba atarukusobora kumanya omuhendo gwazo. Omu kasumi kanu, aba sayansi nibagamba ngu haroho obuhumbe n’obuhumbe bwenyunyuzi omu kikonjonjo ekiturumu. Kandi omu mwanya harumu obuhumbe n’obuhumbe obw’ebikonjonjo by’enyunyuzi! Abantu tibasobora kubara enyunyuzi zona, baitu Yahwe nasobora. Kandi kwoleka ngu azimanyire kurungi, buli emu akagiruka ibara. (1 Abakolinso 15:41) Ruhanga obwaraba amanyire nambere buli nyunyuzi eri, naiwe akumanyire. N’amanyira kimu nambere oli, omulingo orukwehurramu, hamu n’eby’etago byawe byona.

7, 8. (a) Kintu ki Yahwe eky’atumanyireho? (b) Ha ekyokurorraho ekirukwoleka ngu Yahwe aine embabazi.

⁷ Yahwe n’amanya ebizibu eby’orukurabamu  kandi n’asobora kukukonyera. (Soma Zabuli 147:5.) Nosobora kuba norora ngu ekizibu ekyoine ky’amaani muno kandi torukusobora kukigumira. Ruhanga amanyire obuceke bwaitu, “aijuka okutuli ecucu.” (Zabuli 103:14) Kusigikirra nk’oku tuli bantu abatahikiriire, twikara nitukora ensobi nizo zimu kandi kinu nikisobora kutumaramu amaani. Katwehurra kubi hanyuma y’okugamba ekintu ekitahikire, kutunga okwegomba okubi, rundi hanyuma y’okwijwamu ihali! Yahwe taine buceke bwona baitu namanya omulingo twehurra.​—Isaya 40:28.

⁸ Naiwe nk’omuntu nosobora kuba warozere omulingo Yahwe yakukonyire kuraba omu mihito yaawe. (Isaya 41:10, 13) Ekintu kinu payoniya omu arukwetwa Kyoko akakiroraho. Akagenda kuheereza omu kiikaro ekihyaka baitu haroho ekyamumaziremu amaani. Baitu kiki ekyakonyire Kyoko kumanya ngu Yahwe akaba nayetegereza ebizibu bye? Ekitebe ekihyaka ekyakaba ayeteranizeho kikaba kirumu abantu baingi abakaba nibamanya omulingo arukwehurra. Ekintu kinu akakirora nka Yahwe nuwe akaba namugambira: “Ninkugonza hatali habw’okuba payoniya kwonka baitu na habwokuba oli muhara wange kandi oyehaireyo hali nyowe. Ningonza oyegondeze omu kuba muheereza wange!” Yahwe akwolekere ata ngu “okwetegerezakwe tikurukulengwa”?

9, 10. Mulingo ki ogurukukira obukuru ogu Yahwe atukonyeramu? Ha ekyokurorraho.

⁹ Itwena tuba n’ebintu ebiturukwetaga nk’eby’okulya, eby’okujwara, hamu n’oburaaro. Nosobora kweralikirra ngu toratunge eby’okulya ebirukumara. Baitu Yahwe akahanga ensi kwana eby’okulya ebirukumara buli muntu otwaliremu “nobungora obuto obucura.” (Soma Zabuli 147:8, 9.) Yahwe obwaraaba aliisa ebingoora, tukigumye ngu naitwe n’aija kutuha ebyetago byaitu.​—Zabuli 37:25.

¹⁰ Ekirukukira obukuru, Yahwe atuha ebyetago byaitu eby’omwoyo nukwo okwikiriza kwaitu kwikale kugumire, kandi atuha “nobusinge bwa Ruhanga obukukira okumanya kwona.” (Abafiripi 4:6, 7) Ow’oruganda Mutsuo na mukazi we bakarora omulingo Yahwe yabakonyire. Omu 2011, omusisa gukatera omu nyanja, gwaleta ebigonzi by’amaani muno ebyalesere okuhwerekerra kw’amaani. Ow’oruganda onu na mukazi we bakaba bali haihi kufa baitu ekyabajunire nukwo kutemba ha rusu rw’enju yabo. Amaizi gakahwerekereza haihi buli kimu kyona eki bakaba baine. Ekiro eki bakaraara haiguru omu kaina yabo yakasatu omu mwirima n’omu mbeho nyingi muno. Obwire obu bwakiire, bakaserra ekintu ekirabagarramu amaani. Ekintu kimu kyonka eki batungire ekaba Yearbook y’Abakaiso ba Yahwe ey’omwaka 2006. Mutsuo obwakaba nasukura akatabu kanu, akarora omutwe ogurukugamba “Sunami Eyakizire Kuba Mbi Muno omu Byafaayo.” Omutwe ogu gukaba nigusoborraho omusisa ogwatiire Sumatra omu mwaka 2004 ogwalesereho sunami ezabaire mbi muno omu byafaayo. Mutsuo na mukazi we bakarra obu bakaba nibasoma ebyahikire hali ab’oruganda n’abanyaanya itwe ha kizinga kya Sumatra. Bakarora ngu Yahwe akaba nakozesa akatabu kanu kubahumuza. Yahwe akabarolerra n’omu miringo endi. Abaheereza  bagenzi babo omu bicweka bindi ebya Japani bakabaha eby’okulya n’ebijwaro. Baitu ekyakizire kubagarramu amaani bakaba ab’oruganda abatumwaga ekitebe kya Yahwe kubungira ekitebe kyabo. Mutsuo n’agamba: “Nkarora ngu Yahwe akaba ali haihi na buli omu haliitwe. Kunu ka kukaba kuhumuzibwa kw’amaani!” Yahwe abanza kutuha ebintu ebiratukonyera kugumya okwikiriza kwaitu, nukwo ayongeraho ebyetago eby’omubiri.

11. Tusemeriire kukora ki kurora obukonyezi bwa Ruhanga bwatugasira?

¹¹ Yahwe “asagika abaculezi.” Atugonza kandi aikara ayetegekere kutukonyera. (Zabuli 147:6a) Nitusobora kukora ki kurora obukonyezi bwe bwatugasira? Tusemeriire kuba n’enkoragana egumire hamu nauwe.  Kutunga enkoragana ya mulingo gunu, twine kuba baculeezi. (Zefaniya 2:3) Abantu abaculeezi baleka Yahwe nuwe amaleho obutali bwinganiza n’okubonabona oku barukurabamu. Yahwe abasiima.

12, 13. (a) Obu turaaba nitugonza Yahwe atukonyere, kiki eki tusemeriire kwetantara? (b) Bantu ba mulingo ki abasemeza Yahwe?

¹² Ha rubaju orundi, Ruhanga “agwisa hansi ababi.” (Zabuli 147:6b) Titwakugondeze ekintu kya mulingo gunu kutubaho! Nitugonza Yahwe atwoleke okugonza kwe okutalekerra. Nahabweki twine kunoba ekintu kyona ekyanoba. (Zabuli 97:10) Ekyokurorraho, tusemeriire kunoba obusihani omu miringo yoona ei bwiziramu. Kinu nikimanyisa ngu twine kwetantara ekintu kyona ekisobora kutuletera kusihana otwaliremu n’okurora ebisisani eby’orwanju. (Zabuli 119:37; Matayo 5:28) Nikisobora kutanguha baitu Yahwe n’aija kutuha emigisa obu turatamu amaani.

¹³ Obulemu bunu titusobora kuburwanisa omu maani gaitu habwaitu. Tusemeriire kwesiga Yahwe. Notekereza kiramusemeza kakuba arora naitwe nitwesiga ebintu abantu bandi besiga? No, Yahwe “tasemere’rwa amaani gembarasi.” Tusemeriire kwesiga amaani gaitu habwaitu rundi kwesiga amaani g’abantu abandi? Yahwe “tahiri’rwa amaguru gomuntu.” (Zabuli 147:10) Kinu nikyoleka ngu tusemeriire kusaba Yahwe atukonyere kandi tumwesengereze atukonyere kusingura obuceke bwaitu. Yahwe tasobora kujwaha kuhurra esaara zaitu. “Abasemere’rwa abanyakumutina, abo abanihira okuganyirakwe.” (Zabuli 147:11) Tumanyire ngu Yahwe naija kwikara natukonyera kurwanisa okwegomba okubi habw’okuba ali Ruhanga omwesigwa kandi n’atugonza.

14. Kintu ki omuhandiiki wa Zabuli ekyakaba nagumya ngu Yahwe naija kukora?

¹⁴ Yahwe natunihiza ngu n’aija kutukonyera omu bwire bw’ebizibu. Abaisareri obu bagarukire Yerusalemu, omuhandiiki wa Zabuli akabazaho omulingo Yahwe yabakonyire. Akagamba: “Baitu agumize ebihongozo byenyigi zawe; abahaire omugisa abana bawe omuliiwe. Aleta obusinge omu  mitano yawe.” (Zabuli 147:13, 14) Kumanya ngu Yahwe akaba nagenda kugumya enyigi z’orubuga kikaletera omuhandiiki wa Zabuli kuhurra aine obulinzi. Kikamwoleka ngu Yahwe akaba nalinda abantu be.

15-17. (a) Obwire obumu ebizibu nibisobora kutuletera kwehurra tuta, baitu Yahwe akozesa ata Ekigambo kye kutukonyera? (b) Kozesa ekyokurorraho kwoleka ngu Ekigambo kya Ruhanga “nikiiruka bwango” kwija kutukonyera.

¹⁵ Nosobora kuba oyetuntwire habw’ebizibu ebyoine. Baitu oijuke ngu Yahwe n’asobora kukuha amagezi agarakukonyera kubirabamu. Omuhandiiki wa Zabuli akagamba ngu Ruhanga “atuma ekiragirokye hansi; Ekigambokye nikiiruka bwango.” Baitu hanyuma y’okubazaaho ebirika, orume, hamu n’orubaale, akakaguza: “Noha asobora okweme’ra ha mbehoze ziri?” Akagarukamu ngu Yahwe “atuma ekigambokye abyagya.” (Zabuli 147:15-18) Yahwe n’asobora kukukonyera kusingura ekizibu kya buli mulingo habwokuba amanyire buli kimu, nasobora kukora ekintu kyona, nk’okutanga orubaale hamu n’ebirika.

¹⁶ Biro binu Yahwe akozesa Baibuli kutuha oburagirizi. Omuhandiiki wa Zabuli akagamba ngu “ekigambokye [kya Ruhanga] nikiiruka bwango” kwija kutukonyera. Yahwe atuha oburagirizi obuhikire kandi ha kaire konyini. Banza otekereze omulingo ogasirwe kuruga omu bintu nka Baibuli, ebitabu by’omwiru omwesigwa kandi ow’amagezi, puroguramu y’okwezi eya ha tivi yaitu eya JW Broadcasting, omukura gwaitu ogwa jw.org, abagurusi, hamu n’ab’oruganda n’abanayaanya itwe. (Matayo 24:45) Naiwe okyeroliire wenka ngu Yahwe narahuka kuha oburagirizi?

¹⁷ Munyaanya itwe arukwetwa Simone akarora omulingo Ekigambo kya Yahwe kyamukonyire. Akaba nayerora nk’omuntu ataine omugaso kandi akaba natekereza ngu Yahwe tarukumusiima. Baitu obu yabaga ahoirwemu amaani, yaikaraga nayesengerezaga Yahwe kumukonyera. Kandi akagumizamu n’okwega Baibuli. Simone nagamba: “Tiharoho ekizibu kyona ekyampikireho nambere Yahwe atarankonyiire rundi ataranyebembiire.” Ekintu kinu kimukonyire kwikara aine entekereza ehikire.

18. Kiki ekirukukuletera kwehurra ngu Yahwe ali haihi naiwe, kandi nosigikirra hali ki ‘kukugiza Mukama’?

¹⁸ Omuhandiiki wa Zabuli akaba akimanyire ngu Yahwe akaba akomeremu ihanga lya Isareri okuba bantu be omu nsi yoona. Busaho ihanga lindi lyona erikaba limanyire “ekigambo” kye hamu “nebyobulyobye,” oihireho Isareri yonka. (Soma Zabuli 147:19, 20.) Biro binu twine omugisa gw’amaani ogw’okwetwa ibara lya Ruhanga. Nikitusemeza muno kurora ngu tumumanyire, atuhaire Ekigambo kye kutwebembera, n’okumanya ngu nikisoboka kuba n’enkoragana egumire hamu na Yahwe. Nk’omuhandiiki wa Zabuli 147, naiwe oine ebintu bingi ebirukusobora kukuletera ‘kukugiza Mukama’ n’okutererra abandi kumukugiza.