1, 2. Habwaki nitusobora kugamba ngu obusege tibusobora kuhwa omu busunge bunu?

BIRO binu, ebintu ebikwatiraine na sente tibirumu obwinganiza. Ekyokurorraho, tikyanguhire ensingaanto kutunga emirimo. Abantu abamu bata obwomeezi bwabo omu kabi nibagenda omu mahanga amaguuda. Baitu kandi n’omu mahanga amaguuda harumu abantu baingi abanaku. Omu nsi yoona, abaguuda nibeyongera kugudahara kandi n’abanaku nibeyongera kunakuhara. Kusigikirra kutebereza okukozerwe ebiro by’enyuma, nikigambwa ngu ngu, ekicweka 1 hali 100 eky’abantu abaguuda omu nsi yoona baine sente zoona obucweka 99 obw’abantu abasigaireho ezi baine. Hataroho kugurukyagurukya, haroho abantu baingi abaine sente ezibahinguraine obwingi kandi haroho n’abandi abali banaku cu. Yesu Kristo nauwe akakirora yagamba: “Abasege nibo muikara nabo obutosa.” (Marako 14:7) Habwaki haroho obutainganaingana obwa mulingo gunu?

² Yesu akaba akimanyire ngu Obukama bwa Ruhanga nubwo bwonka obusobora kumaraho obutainganaingana oburoho omu businge bunu. Baibuli n’eyoleka ngu ab’eby’obulemi n’amadiini otwaliremu “nabaguzi,” rundi eby’obusubuzi byona biri omu busobozi bwa Setani. (Okusuku’rwa 18:3)  Abaheereza ba Ruhanga basoboire kwecweraho kimu eby’obulemi n’ediini ez’ebisuba. Baitu kigumire kwecweraho kimu eby’obusubuzi eby’ensi enu.

3. Bikaguzo ki ebiturukugenda kugarukamu?

³ Nk’Abakristaayo, tusemeriire kwekebera turole omulingo tutwaramu eby’emirimo eby’ensi enu. Nitusobora kwekaguza: ‘Itungo lyange ninsobora kulikozesa nta kwoleka ngu ndi mwesigwa hali Ruhanga? Ninsobora kukora ki kurora tinayetahya muno omu by’emirimo eby’ensi enu? Byokurorraho ki ebirukwoleka ngu abantu ba Ruhanga nibamwesigira kimu biro binu?’

4, 5. (a) Kiki ekyahikire hali muketo ou Yesu yabalizeho? (b) Yesu akatererra abegeswa be kukora ki?

⁴ Soma Luka 16:1-9. Tusemeriire kwecumitiriza ha ruganikyo rwa Yesu orukukwata ha muketo atali w’okuhikirra. Mukama we akamubinga habw’okuba bakaba nibamujunaana ogw’okurarangya itungo lya mukama we. * (Rora obugambo obuli hansi.) Baitu omuketo onu akakozesa amagezi ge. Atakarugire ha mulimo gwe, akarora abantu abakaba nibasobora kumukonyera omu busumi bw’omu maiso yabanywana. Yesu atakozese oruganikyo runu kwekambisa abegeswa bwe kwetwaza omu mulingo ogutahikire obu barukuba nibagonza kwebesaho. Eki nikyo abantu b’ensi bakora. Baitu Yesu akakozesa oruganikyo runu kutwegesa isomo erikuru.

⁵ Yesu akaba akimanyire ngu nk’omuketo onu ayayesangire omu buzibu, abegeswa be abarukukira obwingi nabo kikaba nikigenda kubagumira kutunga ebyetago byabo habw’ensi kuburwamu obwinganiza. Nahabweki akabagambira ati: “Mwekorre enganjani nimukozesa eby’obuguda ebitali by’okuhikirra.” Habwaki yagambire ati? Habwokuba kakuba bihwaho, abanywani abo, Yahwe na Yesu, nibaija “kubatahya omu biikaro ebitahwaho eby’okwikaramu.’ Obuhabuzi bwa Yesu nibutwegesa ki?

6. Nitumanya tuta ngu kitabe kigendererwa kya Ruhanga ensi kubamu eby’obusubuzi ebiroho hati?

⁶ Nobukiraaba ngu Yesu atasoborre habwaki yalyesere itungo eritali ly’okuhikirra, Baibuli netwoleka ngu kukora sente nyingi kuruga kitabe kigendererwa kya Ruhanga. Nikyo orukurora ngu Yahwe akaha Adamu na Haawa ebintu bingi ebi bakaba nibetaga omu rugonjo rwa Adeni. (Okubanza 2:15, 16) Hanyuma y’akasumi, Yahwe obu yahaire abaheereza be abaseserweho amagita omwoyo gwe ogurukwera, “busaho ayagambire ekintukye kyona ekiyatungire kintukye wenka; baitu bakakoba omu bintu byabu byona.” (Engeso Ezabakwenda 4:32) Nabbi Isaya akagamba ngu obwire bulihika abantu boona obu balirya ebyana by’ensi hataroho arukubasasuza. (Isaya 25:6-9; 65:21, 22) Baitu obwire obu butakahikire, abegeswa ba Yesu baine kukozesa amagezi. Baine kwebeisaho nibakozesa itungo eritali ry’okuhikirra kandi ha bwire nubwo bumu, baine kukora ebirukusemeza Yahwe.

7. Buhabuzi ki obu Yesu yahaire omu Luka 16:10-13?

⁷ Soma Luka 16:10-13. Omuketo ou Yesu yabalizeho akanywana abantu abakaba nibagenda kumugasira. Baitu Yesu akaba n’agonza  abegeswa be kwekorra enganjani omu iguru hatali habw’ebigendererwa by’okwegasira bonka. Akaba n’agonza tumanye ngu omulingo tukozesa itungo lyaitu eritali ly’okuhikirra nigusobora kwoleka obu turaaba tuli besigwa hali Ruhanga. Eki nitusobora kukyoleka tuta?

8, 9. Ha ebyokurorraho ebirukwoleka omulingo abamu barukwoleka obwesigwa bwabo omu kukozesa itungo lyabo.

⁸ Ogumu ha miringo tusobora kwoleka ngu tuli besigwa ha bikwatiraine n’itungo lyaitu nukwo kuraba omu kuhayo sente kusagika omulimo gw’okutebeza ogw’ensi yoona ogu Yesu yabalizeho. (Matayo 24:14) Haroho omwana omwisiki omu ihanga lya India ow’akaba aine akasanduuko kataito akayatekamuga sente. Akanga n’okugura ebidole habwokuba akaba nagonza kwahura sente. Akasanduuko ke obu kaijwire, sente zoona ezikaba zirumu akazihayo zikonyere omu mulimo gw’okutebeza. Ow’oruganda omu kuruga India aine omusiri gwa coconut. Akahayo coconut nyingi hali ofiisi yaitu erukujunanizibwa n’okuhindura orulimi rwa Malayalam. Kusigikirra nk’oku ofiisi egura bugura coconut, uwe akarora ngu kakuba ebijuma bye abigabira ofiisi, nikiija kuba nikikira kuhayo sente. Mali kinu kintu ky’amagezi. Nikyo kimu n’ab’oruganda omu ihanga lya Greece, bahayo ebintu nk’amagita g’eby’okulya, cheese, hamu n’eby’okulya bindi hali Beseri.

⁹ Ow’oruganda ondi kuruga omu ihanga lya Sri Lanka ahaireyo itaka lye n’enju ze bikozesebwe habw’enso’rokano ez’ekitebe, enso’rokano enkooto, hamu n’okwikarwamu abaheereza b’akasumi koona. Ow’oruganda onu akerekesa kutunga sente omu bintu binu yacwamu kubihayo kukonyera abatebezi omu kicweka eki abataine sente ezirukumara. Omu biikaro nambere omulimo gwaitu gutangirwe, ab’oruganda bahayo amaka gabo kukozesebwa nk’Ebyombeko by’Obukama. Kinu kikonyera aba payoniya n’abatebezi bandi abataine sente ezirukumara kusobora kuba n’ekiikaro ky’okuso’rokaniramu ekitali ky’okupangisa.

10. Tugasirwa tuta obu tugabira abandi?

¹⁰ Ebyokurorraho nka binu nibyoleka ngu abantu ba Ruhanga ‘besigwa hali ebintu ebike.’ (Luka 16:10) Bakozesa itungo lyabo kugasira abandi. Abanywani ba Yahwe banu behurra bata obu bahayo ebintu byabo? Basemererwa muno habwokuba bamanyire ngu okugaba kwabo kubaletera kutunga itungo “lyonyini.” (Luka 16:11) Munyaanya itwe omu ow’aikara nahayo sente kusagika omulimo gw’Obukama nagamba ngu habw’okuba muntu omugabi, haroho ekintu ky’embaganiza ekimubaireho emyaka yoona ei aikaire nagaba. Nagamba: “Nkizoire ngu obu nyeyongera kugaba eby’itungo, omutima gwange ogw’okugonza kugabira abandi gweyongera. Nyeyongiire kuganyira, kugumisiriza, hamu  n’okwikiriza kuhaburwa.” Abantu baingi nibagamba ngu kuba bagabi kibagasiire muno.​—Zabuli 112:5; Enfumo 22:9.

11. (a) Okugaba kwaitu kwoleka kuta ngu twine “amagezi amarungi”? (b) Kiki ekirukubaho omu kitebe kya Ruhanga omu kasumi kanu? (Rora ekisisani ekiri ha kutandika kw’isomo linu.)

¹¹ Kandi twoleka “amagezi amarungi” obu tukozesa ebintu byaitu kusagika abandi omu buheereza. Omu mulingo ogu tuba nitugasira abandi n’obu turaaba tutarukusobora kuheereza omu buheereza bw’akasumi koona rundi kuheereza nambere hali obwetago bw’amaani. (Enfumo 19:17) Ekyokurorraho, sente ezi tuhayo zikonyera omu kusindikira ebitebe ebitabu n’okukonyera omu mulimo gw’okutebeza omu biikaro ebinaku nambere abantu baingi barukweteraniza ha mananu. Omu mahanga nka Congo, Madagascar, hamu na Rwanda, Baibuli nibaiseera muno. Obumu omuhendo gwazo nigusobora kumaraho omusaara gwa wiiki emu rundi ogw’okwezi kwona. Emyaka ey’enyuma egi abagenzi baitu babaire baine kucwamu kugurra eka zabo eby’okulya rundi kugura Baibuli. Habw’okuhayo kw’abandi na “habwokuinganaingana” omu bya sente, ekitebe kya Yahwe kisoboire kuhindura Baibuli omu ndimi ezindi n’okwigabira buli muntu omu ka otwaliremu n’abegi ba Baibuli. (Soma 2 Abakolinso 8:13-15.) Nahabweki boona abagaba n’abagabirwa nibasobora kufooka banywani ba Yahwe.

12. Iburahimu akoleka ata ngu yayesigaga Ruhanga?

¹² Omulingo gundi ogu tusobora kufooka banywani ba Yahwe nukwo kwetantara kwetahya muno omu by’emirimo ey’ensi enu baitu kuserra itungo “lyonyini.” Eki nikyo Iburahimu yakozere. Akorobera Yahwe yaruga omu rubuga oruguda orwa Uru nukwo aikale omu hema habwokuba akaba n’agonza kuba munywani wa Yahwe. (Abaheburaniya 11:8-10) Yaikaraga nayesiga Yahwe hatali itungo. (Okubanza 14:22, 23) Yesu akatererra abandi nabo kuba n’okwikiriza nk’okwa Iburahimu. Kiro kimu akagambira omusigazi omuguuda ngu: “Oraba nogonza okuhiki’ra, genda, [otunde] ebyonyinabyo, obahe abasege, oliba nitungo omu iguru; kandi oije, onkuratire.” (Matayo 19:21) Omusigazi onu atabe n’okwikiriza nk’okwa Iburahimu. Baitu haroho abantu bandi abayesigire Ruhanga.

13. (a) Paulo akaha Timoseo buhabuzi ki? (b) Obuhabuzi bwa Paulo nitusobora tuta kubuta omu nkora?

¹³ Timoseo nauwe akaba muntu w’okwikiriza. Paulo obu yamazire kweta Timoseo ‘omurwani omurungi owa Kristo Yesu,’ akongera yamugambira ati: “Busaho murwani obwaramaga ayetaba [omu by’obusubuzi] byobwomezi bunu; nukwo asimwe ogu ayamuhandikire okuba omurwani.” (2 Timoseo 2:3, 4) Abahondezi ba Yesu otwaliremu n’abaheereza b’akasumi koona abarukuhingura omu kakaikuru kamu bakora kyona ekirukusoboka kuta omu nkora obuhabuzi bwa Paulo. Banga kusikirizibwa ebirango by’ensi enu ey’omururu ebirukusisana nk’ebirukusikiriza. Baikara bamanyire ngu: “Omwohoza nuwe muiru wogu ayohora.” (Enfumo 22:7) Setani n’agonza obwire n’amaani gaitu goona tugamarre  omu kukora emirimo y’ensi enu. Abamu behoza sente nyingi muno nukwo bagule enju, motoka, bamalirre emisomo, rundi bazikozese omu bugenyi bw’okugaitwa. Kakuba tuterinda, nitusobora kumara emyaka nyingi nitusasura amabanja. Twoleka ngu tuli bantu b’amagezi obu tworobyamu obwomeezi bwaitu, tuketantara amabanja, kandi tukerinda kuturukya muno sente. Kukora tuti nikiija kutwanguhira kuheereza Ruhanga omu kiikaro ky’okufooka bairu b’ensi enu.​—1 Timothy 6:10.

14. Ncwamu ki ei tusemeriire kukora twegondiize? Ha ebyokurorraho.

¹⁴ Kurora obwomeezi bwaitu bwaikara bworobere, tusemeriire kwebembeza Obukama bwa Ruhanga. Omusaija omu na mukazi we bakaba baine bizinesi y’amaani eyabaleteraga amagoba. Baitu bakaba nibagonza kugaruka omu buheereza obw’akasumi koona. Bakacwamu kuguza buzinesi yabo hali omuntu ondi, batunda eryato lyabo, hamu n’ebintu bingi ebi bakaba baine. Hanyuma bakehayo kukonyera omu kwombeka ekitebe kyaitu ekikuru eky’ensi yoona ekiri omu Warwick, New York. Bakarora ekintu kinu kiri ky’embaganiza habwokuba bakaba nibagenda kumara sabiiti nyingi nibaheereza ha Beseri na muhara wabo hamu na muko wabo obu nibakora omulimo gw’okwombeka. Munyaanya itwe anyakuli payoniya kuruga omu kicweka ekirukwetwa Colorado, Amerika, akatunga omulimo ha banka nambere yakoraga obwire buke. Akakora emirimo ye kurungi kyasemeza bakama be kandi bacwamu kumusaba akolege ebiro byona kandi bagamba ngu nibagenda kutezamu omusaara gwe emirundi esatu. Baitu, kusigikirra nk’oku omulimo gunu gukaba nigusobora kumulemesa obuheereza bwe, akacwamu kugwanga. Binu biri bimu ha byokurorraho ebirukwoleka omulingo abaheereza ba Yahwe berekesa ebintu habw’okumuheereza. Obutucwamu kwebembeza Obukama, kyoleka ngu obunywani bwaitu na Yahwe hamu n’itungo lyonyini nitubitwara kuba bikuru kukira itungo erya buli kiro.

15. Itungo ki erireta okumarwa kwonyini?

¹⁵ Kuba n’itungo kiba kitarukumanyisa ngu Ruhanga n’atusiima. Yahwe aha emigisa “abaguda omu ngeso enungi.” (Soma 1 Timoseo 6:17-19.) Ekyokurorraho, haroho munyaanya itwe arukwetwa Lucia ayakyetegeriize ngu hakaba haroho obwetaago bw’amaani obw’abatebezi omu kiikaro ekirukwetwa Albania. * (Rora obugambo obuli hansi.) Omwaka gwa 1993, akacwamu kuruga omu ihanga lye kugenda omu ihanga eri erya Albania. Akaba ataine omulimo baitu akesiga ngu Yahwe n’aija kumurolerra. Akega orulimi orwa Albania kandi yakonyera abantu abarukuhingura omu 60 okwehayo hali Yahwe. Nitusobora kutatunga ebyana bya mulingo gunu omu buheereza bwaitu nk’omunyaanya itwe onu. Baitu kyona kyona eki turakora kukonyera abantu kufooka banywani ba Yahwe nikiija kuba ky’omuhendo ebiro byona.​—Matayo 6:20.

16. (a) Kiki ekirukwija kuhika ha by’obusubuzi eby’ensi enu? (b) Kinu kisemeriire kutuletera kurora tuta itungo?

¹⁶ Yesu akakyolekera kimu ngu enkora y’eby’obusubuzi ey’obusinge bunu niija kuhwaho. Akagamba: “Obu birihwaho” baitu atagambe ngu ‘kakuba bihwaho.’ (Luka 16:9) Omu biro binu ebya ha mpero, banka ezimu zigwire kandi n’amahanga agamu  gatungire ibura lya sente. Baitu obwire obutali bwa hara, ebintu nibigenda kweyongera kusisikara. Eby’obulemi, eby’ediini, n’eby’obusubuzi ebiine akakwate n’obusinge bwa Setani nibiija kuhwaho. Nabbi Ezekyeri na Zefania bakaragura ngu zabu na feza ebintu abasubuzi ebi batwara kuba bikuru muno birifoka bintu ebitali by’omugaso. (Ezekyeri 7:19; Zefaniya 1:18) Nosobora kwehurra ota kakuba obwire bwawe bw’okufa buhika okesanga ngu obwomeezi bwawe bwona obusisire n’oserra itungo ery’ensi enu eritarumu omu kiikaro ky’okuserra itungo lyonyini? Nitusobora kwehurra nk’omusaija amazire obwomeezi bwe bwona n’akorra sente baitu hanyuma yasanga ngu sente zoona bikwangara. (Enfumo 18:11) Itungo ly’ensi enu lyona niriija kuhwaho. Nahabweki otaferwa omugisa ogwoine ogw’okukozesa itungo lyawe kwekorra omugainjaine omu iguru. Ebintu ebi tukorra Yahwe n’Obukama bwe nibiija kutuletera okusemererwa kwonyini.

17, 18. Abanywani ba Yahwe balindiriire ki?

¹⁷ Obukama bwa Ruhanga obu buliija, busaho muntu alipangisa enju rundi alyeyohoza sente. Eby’okulya biriba bya busa kandi biriba omu bwingi. Tikiritwetagisa kweralikirra kusasura abadakitali rundi kugura emibazi habwokuba oburwaire buliba butaroho. Abanywani ba Yahwe balyegondeza omu bintu birungi eby’ensi. Abantu balikozesa zabu, feza, hamu n’amabale ag’omuhendo habw’oburungi bwabyo baitu hatali habw’okufooka baguda. Embbaho, amabale, hamu n’ebyoma ebirungi muno biribaho kandi biriba bya busa nukwo tubikozese kwombeka amaju amarungi. Abanywani baitu balitukonyera kuruga ha mutima gwabo hatali habw’omusaara. Tuligabana buli kimu kyona eky’ensi eryana.

¹⁸ Enu eri nke muno ha migisa enungi ei turukugenda kutunga obu turayeganjanira enganjani omu iguru. Abaheereza ba Yahwe omu nsi balitokera haiguru habw’okusemererwa obu balihurra ebigambo bya Yesu ebirukugamba: “Muije, inywe Isenyowe abayahaire omugisa, mugwetwe obukama obwabatekaniriziibwe okuruga ha kuhangwa kwensi.”​—Matayo 25:34.