Paulo akaba akimanyire ngu pokopoko ya Setani y’akabi muno. Baitu Abakristaayo abamu bakaba batamanyire akabi kanu. Ekyokurorraho, nikisisana abamu omu Kolinso bakaba nibatekereza ngu bakaba bagumire muno omu by’omwoyo batarukusobora kusingurwa Setani. (1 Abakolinso 10:12) Enu niyo ensonga habwaki yahaire obuhabuzi bunu: “Baitu ntinire, nkenjoka okuyabihirebihire Hawa omu budupebwe, rundi ebitekerezo byanyu bitasisikara okuruga omu mazima nokwera ebiri hali Kristo.”​—2 Abakolinso 11:3.

Ebigambo bya Paulo nibyoleka ngu tikiri kirungi kweyesiga. Kusobora kwanga pokopoko ya Setani, oine kubanza kumanya nk’oku eri y’akabi nukwo hanyuma ogyerinde.

Pokopoko ei turukubazaho nukwo kutera omuntu akalimi okamubaliza ebintu eby’okuhabisa nukwo atekereze kandi ayetwaze nk’okw’orukugonza. Ekitabu ekirukwetwa Propaganda and Persuasion, nikisoborra ngu pokopoko ya mulingo gunu “terukwikirizibwa, yakabi, kandi teri by’obwinganiza.” Haroho ebigambo bingi ebisobora kukozesebwa kusoborra ekintu kinu. Nk’ekyokurorraho “ebisuba, kuburanganiza, hamu n’okuzanira ha bwongo.”

Pokopoko mbi muno habwokuba nesobora kututaaha mpora tutakimanyire. Nitusobora kugirengesaniza n’omwika gw’obutwa ogw’otasobora kurora rundi kununkirwa. Omukugu  omu by’engeso z’abantu arukwetwa Vance Packard, akagamba ngu nambere iwe oigukira amaiso, pokopoko eba ekukwasire.” Omukugu ondi akagamba ngu pokopoko eretiire abantu abamu kwetwaza omu miringo embi, etali y’amagezi, kandi eretiire abantu kwitangana (abantu ab’oruganda rumu nibasobora kwita ab’oruganda orundi nibarumaraho). Kandi eresereho obulemu, hamu n’okuhiganizibwa habw’ediini rundi erangi.​—Easily Led—​A History of Propaganda.

Abantu obu baraaba nibasobora kutuhabisa na pokopoko yabo, kandi Setani? Kuruga abantu bahangwa aikaire nayetegereza emitwalize yabo. Kandi kusigikirra nk’okwali mulemi w’ensi enu, nasobora kukozesa ekintu kyona omu nsi kurarangya ebisuba bye. (1 Yohana 5:19; Yohana 8:44) Setani akozeseze pokopoko ye ‘kwigarra amaiso g’amagezi’ ag’abantu baingi kandi hati nuwe “arukubihabiha ensi zona.” (2 Abakolinso 4:4; Okusuku’rwa 12:9) Nosobora kwetantara ota pokopoko ya Setani?

Yesu akatuha omulingo gumu ogwanguhire ogw’okurwanisa pokopoko. Akagamba: “Mulimanya amananu, namananu galibafora bobugabe.” (Yohana 8:31, 32) Omu bwire bw’obulemu, omuserikale asemeriire kumanya nambere aine kwiha obutumwa oburukwesigwa habwokuba omunyanzigwa nasobora kukozesa ebisuba kumubihabiha. Hati, ninkaha nambere osobora kutunga obutumwa obuhikire? Yahwe atuhaire Ekigambo kye Baibuli kutumanyisa ebitusemeriire kumanya. Erumu buli kintu kyona eky’orukwetagisa kusobora kurwanisa pokopoko ya Setani.​—2 Timoseo 3:16, 17.

Baitu Setani nauwe akimanyire, nahabweki akozesa ensi ye kutuhugura n’okutumaramu amaani nukwo atulemese kusoma n’okwesomesa Baibuli. Oyerinde kubihabihibwa “obudupe bwa Setani.” (Abefeso 6:11) Tikirukumara kumanya bumanya amananu agawayegere ha kubanza. Osemeriire kwekamba kwongera ha kumanya kwawe okw’amananu. (Abefeso 3:18) Omuhandiki omu arukwetwa Noam Chomsky akagamba, “Tiharoho omuntu arukugenda kuyoora amananu akagasesa omu bwongo bwawe. Niiwe asemeriire kugeserurra.” Nahabweki amananu gaserre kuruga “omu byahandikirwe obukyabukya.”​—Engeso Ezabakwenda 17:11.

Setani tarukugonza obe n’entekereza ehikire kandi tarukugonza oyetegereze amananu ag’orukwegesebwa. Habwaki? Habwokuba omuntu obwaba ataine entekereza ehikire, pokopoko “emukoraho kurungi.” (Media and Society in the Twentieth Century) Ekintu kyona eky’orahurra  banza okitekerezeho hatali kugumya gakiikiriza bwikiriza. (Enfumo 14:15) Ruhanga akakuha obwongo ‘n’amagezi’, nahabweki bikozese kwongera kugumya okwikiriza kwawe.​—Enfumo 2:10-15; Abarumi 12:1, 2.

Abaserikale obu batandika kuhuliiza pokopoko, batandika kutiina kandi nibetantara kurwana. Pokopoko n’esobora n’okubaletera kurwanisangana rundi kwesorooraho abaserikale bandi ab’ihe lyabo. Haroho omukuru omu ihe lya Bujirimani ayagambire ngu pokopoko niyo yaletiire ihanga lyabo kusingurwa omu bulemu bw’ensi yoona obw’okubanza. Akagamba ngu abantu bakahuliiriza muno pokopoko bahika n’okutatekereza ha kintu kindi kyona. Setani nauwe akozesa emiringo niyo emu kurwanisa Abakristaayo nukwo acwe obumu bwabo. Ekyokurorraho, aletaho obutetegerezangana hagati y’ab’oruganda. Rundi alengaho kubasonasona baruge omu kitebe kya Yahwe kuraba omu kubaletera kutekereza ngu ekitebe tikibaire ky’obwinganiza rundi ngu kikozere ekintu ekitali ekibi.

Oyerinde kuhabisibwa! Gendera ha buhabuzi obuli omu Kigambo kya Ruhanga kandi oikale n’ab’oruganda bagenzi baawe omu bumu. Ekyokurorraho, Baibuli etutererra kuganyirangana n’okurahuka kugonjoora ensonga. (Abakolosai 3:13, 14; Matayo 5:23, 24) Kandi etutererra okutesorooraho ekitebe. (Enfumo 18:1) Wekebere orole obworaaba oyetegekere kurwanisa pokopoko ya Setani. Obu haraaba haroho ow’oruganda ayakubihiize wekaguze, ‘Omulingo nayetwaize gukaba nigusemeza Ruhanga rundi Setani?’​—Abagaratiya 5:16-26; Abefeso 2:2, 3.

Omuserikale atali mwesigwa hali mukama we tasobora kurwana kurungi. Nahabweki abanyanzigwa bakozesa pokopoko kuletera omuserikale kugurukyagurukya mukama we. Kakuba omwebembezi akora ensobi, abanyanzigwa nibasobora kugikozesa nibagamba ngu: “Tosemeriire kwesiga abantu nkabo!” rundi “Otaikiriza bakakunaga omu kabi!” Na Setani nikyo kintu kimu eky’akora. Atuletera kugurukyagurukya abantu Yahwe arukukozesa kwebembera ekitebe kye.

Nosobora kukora ki kurora wayerinda? Ocwemu kuruga ha mutima ngu noija kuguma omu kitebe kya Yahwe. Oikale oli mwesigwa kandi osagike abasaija Yahwe ahaire obujunanizibwa omu kitebe n’obu baraaba batahikiriire. (1 Abasesalonika 5:12, 13) Abahakaniza hamu n’ababiihi nibasobora kurwanisa ekitebe. (Tito  1:10) Nobu bakulengaho kubaza ebintu ebirukusina nk’amananu werinde “okutabatabana omu magezi” gaawe. (2 Abasesalonika 2:2) Hondera obuhabuzi Paulo yahaire Timoseo: “Oikalege omwebi ebiwayegere,” kandi oijukege “abakwegeseze okubali.” (2 Timoseo 3:14, 15) Banza otekereze ha bwakaiso bwona obu twine oburukwoleka ngu tusemeriire kwesiga omwiru omwesigwa ou Yahwe akozeseze kumara haihi emyaka 100 natwegesa amananu.​—Matayo 24:45-47; Abaheburaniya 13:7, 17.

Haroho emiringo endi Setani ey’akozesa ey’enyakwanguhire kwetegereza. Obwire obumu nasobora kukutinisa. “Ogumu ha miringo ya pokopoko enyakwikaire nekozesebwa kuruga ira” nukwo kutiinisa. (Easily Led​—A History of Propaganda) Omukugu omu owa Bungereza arukwetwa Philip M. Taylor, akagamba ngu Abasura bakozesaga pokopoko hamu n’okutinisiriza nukwo baikale nibalema abanyanzigwa babo. Setani n’asobora kukozesa okutiina, nk’okutiina abantu, kutiina kuhiganizibwa, hamu n’okutiina kufa nukwo akulemese kuheereza Yahwe.​—Isaya 8:12; Yeremiya 42:11; Abaheburaniya 2:15.

Otaikiriza Setani kukukora ekintu kya mulingo gunu! Yesu akagamba: “Mutatina abo abanyakuita omubiri, hanyuma tibanyina kindi ekibasobora okukora.” (Luka 12:4) Okigumize kimu ngu Yahwe n’aija kuhikiriza omurago gwe ogw’okukurolerra, kukuha “amani agali amaingi muno,” kandi n’aija kukukonyera kurwanisa Setani.​—2 Abakolinso 4:7-9; 1 Petero 3:14.

Baitu haroho obwire obw’osobora kwehurra otaine amaani rundi otinire. Kakuba kibaho, ijuka ebigambo binu ebi Yahwe yagambiire Yosuha obwakaba namugarramu amaani: “Foka wamani, ogume omutima; otatina nobukwakuba okwekanga: baitu Mukama Ruhanga wawe ali naiwe nambere ogenda hona.” (Yosuha 1:9) Kakuba oijwamu okutiina kwona, aho n’aho saba Yahwe omugambire nk’oku otiinire. Obworakikora ‘obusinge bwa Ruhanga oburukukira okumanywa kwona bulirinda emitima yanyu nebitekerezo byanyu.’ Obu nubwo oratunga amaani g’okurwanisa pokopoko ya Setani.​—Abafiripi 4:6, 7, 13.

Noijuka pokopoko ei omutumwa w’Abasura arukwetwa Rabusake yakozeseze kutinisa abantu ba Ruhanga? Akaba nagonza batekereze ngu busaho muntu akaba nasobora kubajuna omu mikono y’Abasura, nobwakuba Yahwe. Hanyuma akagamba ngu Yahwe nuwe yaragiire Abasura kuhwerekereza Yerusalemu. Ekintu kinu Yahwe akakibazaho ki? Akagamba: “Otatina ebigambo ebyohuliire, abairu bomukama wa Asura ebibanjumire.” (2 Ekyabakama 18:22-25; 19:6) Hanyuma, Yahwe akatuma maraika we yahwerekereza abaserikale ba Asura abarukuhika omu 185,000 omu itumbi limu lyonka!​—Isaya 37:36.

Orarozereho filimu erukwoleka omuntu nibamubihabiha baitu uwe atakimanyire? Obu kyabaireho, okagonza kutokera haiguru nukwo ogambire omuntu ogu ngu: ‘Otabiikiriza! Nibakubiiha!’ Teramu akasisani abamaraika nabo nibakugambira: “Otaikiriza Setani kukudomya n’ebisuba bye!”

Nahabweki otahuliiriza pokopoko ya Setani. (Enfumo 26:24, 25) Huliiriza Yahwe kandi omwesige omu buli kimu kyona eky’orukukora. (Enfumo 3:5-7) Nakugonza kandi nakutererra: “Mwana wange, foka wamagezi, osemeze omutima gwange.” (Enfumo 27:11) Kakuba okora oti, noija kusingura obulemu bw’ebitekerezo byawe!