1, 2. (a) Nsonga ki enkuru erukukwataho buli muntu? (b) Habwaki ensonga enu eri nkuru?

ABANTU abarukukira obwingi biro binu batwara sente kuba kintu kikuru. Nizo baikara nibatekerezaho kandi niberalikirra muno. Bamara obwire bwingi nibakora kwongera hali ezi ezibaine rundi kulinda ezi baine. Kandi hali abandi, ensonga enkuru niyo eka yabo, obwomeezi, rundi ebintu ebi barukugonza kuhikiriza omu bwomeezi bwabo.

² Baitu haroho ensonga endi enyakuli nkuru muno kukira zinu zoona. Egi niyo ensonga y’okusagika obulemi bwa Yahwe. Baitu tusemeriire kwegendereza kurora ensonga enu tiyaturuga omu bitekerezo. Kakuba tutegendereza, nitusobora kugira bingi eby’okukora omu bwomeezi rundi tuketuntura habw’ebizibu byaitu tukamalirra tweberwe ensonga enu enkuru. Kusagika obulemi bwa Yahwe, nikiija kutukonyera kumanya omulingo omurungi ogw’okurabamu ebizibu byaitu ebya buli kiro kandi nitwija kwirra haihi na Yahwe.

3. Setani arora ata obulemi bwa Ruhanga?

³ Setani akaletaho okugurukyagurukya Yahwe obwaraaba asemeriire kulema. Setani n’agonza abantu batekereze ngu Yahwe mulemi mubi kandi ngu tarukutugondeza ebirungi. Setani akaba n’amanyisa ngu abantu nibasobora kutunga okusemererwa okurukukiraho kakuba berema. (Okubanza 3:1-5) Kandi akaba n’amanyisa ngu busaho muntu ali mwesigwa hali Yahwe kandi ngu kakuba obwomeezi buguma, omuntu n’asobora kwanga obulemi bwe. (Yobu 2:4, 5) Nahabweki Yahwe alekere obwire burabeho nukwo buli omu akirole ngu obwomeezi tiburukusobora kuba burungi kakuba Yahwe aba atali mulemi waitu.

4. Habwaki ensonga y’obulemi esemeriire kugonjorwa?

⁴ Baitu Yahwe akimanyire ngu Setani eby’arukugamba bisuba. Hati, habwaki Yahwe alekiire Setani obwire bunu bwona? Eky’okugarukamu nikikwataho buli muntu omu iguru n’omunsi. (Soma Zabuli 83:18.) Adamu na Haawa bakanga obulemi bwa Yahwe, kandi abantu baingi muno beteranize ha bujemu obu. Kinu nikisobora kuletera abamu kutekereza ngu Setani eby’arukugamba bihikire. Ensi terukwija kutunga obusinge n’obumu ensonga enu obweraba etagonjoirwe omu bitekerezo by’abantu n’eby’abamaraika. Baitu obu kirimara kugumibwa ngu Yahwe nuwe asemeriire kulema, abantu boona baliremwa Yahwe. Halibaho obusinge omu nsi n’omu iguru.—Abefeso 1:9, 10.

5. Nitukwatwaho tuta ensonga y’obulemi bwa Yahwe?

⁵ Nikiija kugumibwa ngu Yahwe nuwe asemeriire kulema, kandi obulemi bwa Setani n’abantu nibwija kulemwa kandi bwihweho. Obulemi bwa Ruhanga hansi ya Masiya nibwija kuhika ha businguzi. Abantu abesigwa balinanuka ngu abantu nibasobora kulinda obwesigwa bwabo kandi nibasobora kusagika obulemi bwa Ruhanga. (Isaya 45:23, 24) Naitwe twakugondeza kuba bamu ha bantu banu abesigwa? Hataroho kugurukyagurukya! Obu kiraaba kiri kiti, tusemeriire kwetegereza omulingo ensonga enu eri nkuru.

6. Kusagika obulemi bwa Yahwe kikuru kwingana nkaha?

⁶ Kusagika obulemi bwa Yahwe kikuru muno kukira okusemererwa kwaitu habwaitu. Baitu kinu tikirukumanyisa ngu okujunwa kwaitu tikuli kukuru rundi ngu Yahwe tarukutufaho. Habwaki nitugamba tuti?

7, 8. Okugumya ngu Yahwe nuwe asemeriire kulema nikwija kutugasira kuta?

⁷ Yahwe agonza muno abantu. Kandi tuli b’omuhendo mwingi habwokuba akahika n’okuhayo Omwana we ow’agonza muno nukwo tusobole kutunga obwomeezi obutahwaho. (Yohana 3:16; 1 Yohana 4:9) Kakuba Yahwe atarahikiriize ebi yaraganiize, Setani n’abasagiki be bakubaire bahikire. Setani agamba ngu Yahwe mubiihi, aima abantu ebintu ebirungi, kandi ngu  alema omu mulingo ogutali gw’obwinganiza. Abasekerezi badibya emirago ya Ruhanga nibagamba ngu: “Guraha omurago gwokwijakwe? Baitu nambere baisenkuru itwe bagwijagirire, byona biikaire biti nkoku bikaba biri kuruga ha kubanza kwokuhangwa.” (2 Petero 3:3, 4) Baitu Yahwe n’aija kuhikiriza emirago ye yoona. N’aija kurora ngu obwire obu bulihika, okugumibwa kw’obulemi bwe kulitwarramu okujunwa kw’abantu abaculezi. (Soma Isaya 55:10, 11.) Obulemi bwa Yahwe nibusigikirra ha kugonza. Nahabweki tukimanye ngu obwire bwona aragonzaga abahereza be kandi arabatwaraga kuba b’omuhendo.—Okuruga 34:6.

⁸ Baitu okulema kwa Yahwe kuba kikuru muno tikirukumanyisa ngu n’arora okujunwa kwaitu nk’oku kutali kw’omugaso. Yahwe atufaho muno. Baitu tusemeriire kwikara nitwijuka ngu ekirukukira obukuru nukwo kusagika obulemi bwa bwe.

9. Setani akabazaho ki Yobu? (Rora ekisisani ekiri ha kutandika kw’isomo linu.)

⁹ Kikuru tube n’entekereza ehikire erukukwata ha bulemi bwa Yahwe. Kinu nitusobora kukirora kakuba tusoma ekitabu kya Yobu ekinyakuli kimu ha bitabu bya Baibuli ebyabandize kuhandiikwa. Ekitabu kinu nikyoleka ngu Setani akekwasa ngu Yobu akaba n’asobora kwehoga Ruhanga kakuba yabonaboine. Setani akahika n’okusaba Ruhanga kubonabonesa Yobu. Yahwe akaba atasobora kukikora, baitu akaleka Setani kulenga Yobu. Akagamba: ‘Byona ebyanyinabyo biri omu mukono gwawe.’ (Soma Yobu 1:7-12.) Hakarabaho obwire buke, Yobu akaferwa abakozi be n’itungo lye lyona. Abaana be ikumi n’abo bakaitwa ekigwererezi. Setani akalengaho kwoleka ngu Ruhanga nuwe akaba alesere ebizibu binu. (Yobu 1:13-19) Ekyahondireho, Setani akarwaza Yobu oburwaire oburukuruma kandi obubi muno. (Yobu 2:7) Kwongerezaho, mukazi wa Yobu n’abayeforaga kuba nganjani ze boona bakabaza ebintu ebirukucumita kandi ebirukumaramu amaani.—Yobu 2:9; 3:11; 16:2.

10. (a) Yobu akoleka ata ngu akaba ali mwesigwa hali Ruhanga? (b) Habwaki kyali nikyetagisa Yobu kuhaburwa?

¹⁰ Ebi Setani yabalize gakaba mananu? Nangwa. Yobu nobwaraaba yatungire ebizibu by’amaani, atehooge Yahwe. (Yobu 27:5) Baitu haroho obwire obu Yobu yayeberwe ekintu ekikuru yatandika kwefaho wenka. Akaikara n’agamba ngu taine musango gwona. Kandi Yobu akagonza kumanya habwaki akaba n’abonabona. (Yobu 7:20; 13:24) Nitusobora kutekereza ngu Yobu akaba ahikire. Baitu Yahwe akaba akimanyire ngu entekereza ya Yobu ekaba etahikire, nahabweki akamuhabura. Akakikora ata?

11, 12. Kintu ki Yahwe ekiyaijukize Yobu? Yobu aketwaza ata?

¹¹ Yahwe ebiyagambiire Yobu nitusobora kubisanga omu kitabu kya Yobu esuura 38 kuhika 41. Yahwe atasoborre Yobu habwaki akaba nabonabona. Oihireho Yahwe akaba n’agonza kukonyera Yobu kwetegereza ngu akaba ali mutaito muno olengesanize na Ruhanga. Akoleka Yobu ngu hakaba haroho ensonga ezikaba ziri nkuru kukira n’ebizibu bya Yobu. (Soma Yobu 38:18-21.) Ebigambo bya Yahwe bikakonyera Yobu kuterekereza entekereza ye.

 ¹² Nitusobora kugamba ngu kusigikirra ha bizibu Yobu akaba narabamu, ebigambo bya Yahwe bitabe by’embabazi? Nangwa, na Yobu atakirole ati. Yobu aketegereza kandi akasiima obuhabuzi bwa Yahwe. Kandi akagamba: “Nikyo nyenugiire nyenka, kandi ninyegarukamu omu cucu nomu iju.” (Yobu 42:1-6) Enyumaho, omusigazi arukwetwa Erihu akaba ahabwire Yobu. (Yobu 32:5-10) Yobu obu yahondiire obuhabuzi oburungi kuruga hali Yahwe kandi yahinduramu entekereza ye, Yahwe akagambira abandi ngu eki Yobu yakozere kikamusemeza.—Yobu 42:7, 8.

13. Obuhabuzi bwa Yahwe nibusobora kuba bwakonyire buta Yobu hanyuma y’okubonabona kwe?

¹³ N’ebizibu obu byahoireho, Yobu akongera kugasirwa ha buhabuzi Yahwe akaba amuhaire. Yahwe akaha omugisa “empero ya Yobu eyahanyuma okukira eyokubanza.” Obwire bukahika Yobu yatunga abaana “abojo musanju nabana abaisiki basatu.” (Yobu 42:12-14) Nobukiraaba ngu Yobu akatunga abaana bandi baitu kandi n’abafiire bakamuruma. Kandi nasobora kuba atarayeberwe ebizibu ebyamuhikireho uwe n’eka ye. Nobukiraaba ngu ha kumalirra Yobu akamanya ensonga habwaki yali nabonabona, n’asobora kuba yasigaire nayekaguza habwaki Ruhanga yamulekere abonabone muno. Yobu obwaraaba yatekeriize ha kintu kinu, n’asobora kuba yaijukire eki Yahwe yamugambire. Ekintu kinu nikisobora kuba kyamugarwiremu amaani kandi kyamukonyera kuba n’entekereza ehikire.—Zabuli 94:19.

14. Ebyahikire hali Yobu nibitwegesa ki?

¹⁴ Kwecumitiriza ha byahikire hali Yobu nikisobora kutukonyera kuhinduramu entekereza n’okutugarramu amaani. Ekitabu kya Yobu nakyo Yahwe akakihandikisa ‘obwokwegesa itwe, nukwo tube nokunihira obwokugumisiriza nobwokuhumura okwomu Byahandikirwe.’ (Abarumi 15:4) Nikitwoleka ngu titusemeriire kutekereza muno ha bizibu ebyaitu tukesanga tweberwe  kusagika obulemi bwa Yahwe. Naitwe nitugonza kuba nka Yobu tusagike obulemi bwa Yahwe kandi tulinde obwesigwa bwaitu haluwe n’obu kirukuba kitanguhire.

15. Kiki ekibaho obu tulinda obwesigwa bwaitu omu bwire bw’ebizibu?

¹⁵ Yobu ebi yarabiremu nibituhumuza habwokuba nibitwoleka ngu obu tutunga ebizibu, kiba kitarukumanyisa ngu Yahwe atubihiriirwe. Ebizibu bituha omugisa gw’okusagika obulemi bwa Yahwe. (Enfumo 27:11) Obutusigara tuli besigwa omu bizibu, Yahwe asemererwa, kandi n’okunihira kwaitu okw’ebiro ebirukwija kweyongera kuguma (soma Abarumi 5:3-5.) Ebi Yobu yarabiremu nibyoleka Yahwe “okwali wembabazi nyingi nokuganyira.” (Yakobo 5:11) Kakuba tusagika obusobozi bwa Yahwe kulema, n’aija kutuha emigisa. Kumanya kinu kitukonyera kugumisiriza n’okwikara tusemeriirwe.—Abakolosai 1:11.

16. Habwaki kiri kikuru kwikara nitumanya ngu obusobozi bwa Yahwe kulema eri nsonga nkuru muno?

¹⁶ Gali mananu ngu nikisobora kugumu omutima gwaitu kugwikaza ha nsonga y’okusagika obulemi bwa Yahwe obu turukuba twine ebizibu. Kakuba twikara nitutekereza muno ha bizibu, n’ebizibu ebitali by’amaani nibisobora kuzooka nk’ebikooto. Nahabweki kikuru obwire bwona twikale nitwecumitirizaho omulingo obusobozi bwa Yahwe kulema eri nsonga nkuru ekizibu n’obu kirukuba kiri ky’amaani.

17. Kwekambira omulimo gwa Yahwe nikisobora kutukonyera kita kwikara nitwijuka ekintu ekirukukirayo obukuru?

¹⁷ Kwekambira omulimo gwa Yahwe nikisobora kutukonyera kwikara nitwijuka ekintu ekikuru. Ekyokurorraho, munyaanya itwe arukwetwa Renee akarwara oburwaire bwa kokoro n’oburwaire bundi obwamusaraize. Obwakaba ali omu irrwaro, akatebeza abakozi b’omu irrwaro, abarwaire  abandi, hamu n’abaijaga kurora abarwaire. Haroho akasumi obu Renee yamazire sabiiti emu n’ekicweka ali omu irwarro, kandi yatebeza esaha 80. Nobukiraaba ngu munyaanya itwe onu akaba akimanyire ngu n’agenda kufa, atebwe ekintu ekinyakuli kikuru muno. Kusagika obulemi bwa Yahwe kikamuletera obusinge.

18. Ekyokurorraho kya Jennifer nikitwegesa ki ha kusagika obulemi bwa Yahwe?

¹⁸ Nitusobora n’okusagika obulemi bwa Yahwe nobu turukuba nituraba omu bizibu ebitali by’amaani kandi ebikira kubaho. Munyaanya itwe arukwetwa Jennifer akamara ebiro bisatu ha kizaniro ky’enyonyi alinzire enyonyi ey’okumutwara owabo. Habw’okwikara nibasazamu enyonyi ezibaire zisemeriire kugenda, Jeniffer akahurra ajwahire kandi ataine ow’okubaza nauwe. Omu kiikaro ky’okweganyira, akasaba Yahwe amukonyere nukwo atebeze abantu bandi abakaba balinzire enyonyi z’okubatwara. Akesanga atebiize abantu baingi kandi agabire n’ebitabu bingi muno. Jennifer n’agamba ngu, “Nkarora ngu Yahwe nuwe akaba n’ankonyera kuraba omu kulengwa kunu kandi nuwe yampaire amaani g’okubazaho kurungi ibara lye.”

19. Abakristaayo ab’amananu babarorra hali ki?

¹⁹ Abaheereza ba Yahwe bonka nubo bamanyire ngu kikuru kusagika obulemi bwe. Ekintu kinu kikonyera abantu abandi kwahukaniza Abakristaayo ab’amananu hali ab’ebisuba. Nahabweki itwena tusemeriire kwikara nitusagika obusobozi bwa Yahwe kulema.

20. Yahwe arora ata amaani ag’otamu kusagika obulemi bwe?

²⁰ Obwoheereza Yahwe omu bwesigwa kandi okagumisiriza ebizibu habw’okugonza kusagika obulemi bwe, akirora kandi asiima amaani ag’otamu. (Zabuli 18:25) Ekicweka ekirukuhonderaho nikiija kwongera kutusoborra habwaki tusemeriire kusagika obulemi bwe n’omulingo tusobora kukikora omu bwijwire.