1. Kiki ekyaletiire Kaini kucwamu kubi, kandi biki ebyarugiremu?

KAINI akaba aine kucwamu eky’okukora. Akaba n’asobora kulema enyehurra ye, rundi akaba n’asobora kuleka enyehurra ye niyo emuleme. Kulema enyehurra ye kyakumurugiriiremu ebirungi. Baitu kuleka enyehurra ye niyo emuleme kyakumurugiriremu ebibi. Baibuli n’eyoleka ngu Kaini akacwamu kuleka enyehurra ye niyo emuleme ekyarugiriiremu enkoragana ye na Yahwe kusisikara hamu n’okufa kwa mugenzi we Aberi.—Okubanza 4:3-16.

2. Habwaki kikuru kukora encwamu enungi?

² Omu mulingo nugwo gumu, itwena tukora encwamu omu bwomeezi. Ezimu ziba nkuru kukira ezindi. Baitu nabwo, encwamu ezirukukira obwingi ziine omulingo zikwataho obwomeezi bwaitu. Nahabweki, kukora encwamu enungi, nikisobora kukehya ha bizibu kandi kikatukonyera kutunga obusinge. Baitu kukora encwamu embi nikisobora kwongera ebizibu omu bwomeezi bwaitu kandi kikatubuza obusinge.— Enfumo 14:8.

3. (a) Obu turaaba nitugonza kukora encwamu enungi, kiki ekitusemeriire kwikiririzaamu? (b) Bikaguzo ki ebiturabazaaho?

 ³ Kiki ekiratukonyera kukora encwamu enungi? Okwikiririza omuli Ruhanga, n’okwesiga ngu n’agonza kutukonyera n’okutuha amagezi agaratukonyera kukora encwamu enungi. Kandi tusemeriire n’okwikiririza omu buhabuzi obuli omu Kigambo kye. (Soma Yakobo 1:5-8.) Okwirra haihi na Yahwe n’okweyongera kugonza Ekigambo kye, nikiija kutukonyera kumwesiga n’okumanya ngu n’atugondeza ebirungi. Nikiija kutukonyera kubanza kuseruliirizaga omu Kigambo kye tutakakozere encwamu yoona. Baitu kiki ekiratukonyera kweyongera kukora encwamu enungi? Nitusobora kuhinduramu encwamu ei tubaire tukozere ira?

4. Adamu akacwamu kukora ki, kandi biki ebyarugiremu?

⁴ Abantu baikaire nibakora encwamu z’amaani kuruga bahangwa. Omusaija w’okubanza, Adamu, akaba aine kucwamu kuhuliriza Omuhangi we rundi kuhuliriza omukazi we Hawa. Adamu akacwamu kuhuliriza Hawa ayamuletiire kukora encwamu embi muno. Ekyarugiremu, Yahwe akamubinga omu rugonjo rwa Adeni, kandi hanyuma y’akasumi akafa. Nahati, nitubonabona habw’encwamu ye embi.

5. Obujunanizibwa obw’okwecweramu tusemeriire kubutwara tuta?

⁵ Abantu abandi nibasobora kutekereza ngu obwomeezi bwakubaire bwanguhire kakuba twali tutarukwetagisibwa kukora encwamu yoona. Obundi naiwe nukwo orukwehurra. Baitu kirungi kwijuka ngu Yahwe atatukole nk’ebyoma ebitasobora kutekereza rundi kwecweramu. Atuhaire Ekigambo kye, ekirukutwegesa kucwamu omu mulingo ogw’amagezi. Yahwe n’agonza twecweremu itwenka kandi obujunanizibwa bunu nibusobora kutukonyera. Tekereza ha by’okurorraho binu.

6, 7. Abaisareri bakaba baine kucwamu kukora ki, kandi habwaki kitabanguhire kukora encwamu enu? (Rora ekisisani ekiri ha kutandika kw’isomo linu.)

⁶ Hanyuma y’okuhika omu nsi ekaba ebaraganiziibwe, Abaisareri bakaba baine kucwamu kuramya Yahwe rundi abaruhanga abandi. (Soma Yosuha 24:15.) Nosobora kutekereza ngu kyali kyanguhire kucwamu ou bararamya. Baitu encwamu yabo ekaba negenda kurugamu obwomeezi rundi okufa. Omu busumi bw’Abacwi b’Emisango, Abaisareri bakaikara nibacwamu kubi. Bakaleka Yahwe batandika kuramya abaruhanga ab’ebisuba. (Ekyabacwi 2:3, 11-23) Rundi tekereza ha kyabaireho omu busumi bwa Eriya, nambere abantu bakaba baine kucwamu kuhereza Yahwe rundi Baali ruhanga ow’ebisuba. (1 Ekyabakama 18:21) Enu n’esobora kuzooka nk’encwamu eyali eyanguhire kukora habwokuba kiri kirungi kuhereza Yahwe. Omuntu omugezi tasobora kuhereza ruhanga ow’atali mwomeezi. Baitu  Abaisareri bakalemwa kucwamu ou bararamya. Baibuli egamba ngu bakaba ‘nibagurukyagurukya nibatekereza habiri.’ Baitu, Eriya akekambisa abantu kukomamu kuramya Ruhanga ow’amananu, Yahwe.

⁷ Habwaki Abaisareri abo balemerwe kukora encwamu ey’amagezi? Eky’okubanza, bataikiririze omu Yahwe, kandi bakanga kumuhuliriza. Batesige Yahwe kandi batafeyo kwega ebirukumukwataho hamu n’okuhondera amagezi ge. Kakuba bakozere eki, kyakubakonyire kwega kukora encwamu enungi. (Zabuli 25:12) Ekyakabiri, bakahabisibwa abantu kuruga omu mahanga agandi. Abanyamahanga banu bakasiisa entekereza y’Abaisareri kandi babakorraga encwamu. Eki kikaletera Abaisareri kukuratira emiringo y’abanyamahanga n’okuramya abaruhanga babo ab’ebisuba. Emyaka y’enyuma, Yahwe akaba ahabwire Abaisareri ha kintu kinu.—Okuruga 23:2.

8. Isomo ki erikuru eriturukwegera hali Abaisareri?

⁸ Ekyokurorraho ky’Abaisareri nikitwegesa ngu, obu turaaba nitugonza kucwamu omu mulingo ogw’amagezi, tusemeriire kusigikirra ha Kigambo kya Ruhanga. Abagaratiya 6:5 nirwoleka ngu buli muntu n’ajunanizibwa habw’encwamu ze ez’akora. Kinu nikyoleka ngu titusemeriire kuleka omuntu ondi kutucweramu. Baitu buli omu asemeriire kumanya ebintu Ruhanga atwara kuba bihikire kandi nibyo akole.

9. Habwaki kyakabi kuleka abantu abandi kutucweramu?

⁹ Nitusobora kwesanga tulekere abantu kutucweramu. Omu mulingo ki? Kakuba tubaleka bakatusindikiriza kukora encwamu embi. (Enfumo 1:10, 15) Kinu kintu ky’akabi. Bujunanizibwa bwaitu okuhondera omuntu waitu ow’omunda anyakutendekerwe kusigikirra ha Baibuli. Kakuba tuleka abandi kutukorra encwamu, eki nikiija kuba nikyoleka ngu tucwiremu kubakuratira. Encwamu ya mulingo gunu n’esobora kutuletera akabi.

10. Buhabuzi ki Paulo obu yahaire Abakristaayo?

¹⁰ Omukwenda Paulo akahabura Abagaratiya okutaleka abandi kubakorra encwamu ezi bakaba basemeriire kwekorra. (Soma Abagaratiya 4:17.) Ab’oruganda abamu omu kitebe kya Garatiya bakaba batandikire kukorra abandi encwamu. Bakaba baine ekigendererwa ki? Abasaija banu abakaba nibeyendeza bonka bakaba nibagonza ab’oruganda babahondera omu kiikaro ky’okuhondera abakwenda. Batabe baculeezi kandi bakatahirra obugabe bw’abandi obw’okwecweramu.

11. Nitusobora kukonyera tuta abandi obu barukuba nibagonza kukora encwamu?

¹¹ Haroho ekyokurorraho kirungi eki omukwenda Paulo yatuteriireho. Atacweremu ab’oruganda bagenzi be habwokuba akaba akimanyire ngu nabo baine obugabe  obwʼokwecweramu, kandi obugabe obwo atabutahirre. (Soma 2 Abakolinso 1:24.) Omu kasumi kanu, abagurusi nibasobora kuhondera ekyokurorraho kinu obu barukuba nibahabura omuntu ha nsonga erukumwetagisa okukora encwamu eye habwe. Nibasobora kumuha amagezi kuruga omu Baibuli baitu basemeriire kumulekera obugabe bwe obw’okwecweramu. Tibasemeriire kucweramu abandi habwokuba buli muntu aba najunanizibwa habw’encwamu ey’akora. Kinu nikyo tusemeriire kwega: Nitusobora kukonyera ow’oruganda rundi munyaanya itwe kwetegereza obuhabuzi bwa Baibuli oburukumukwataho, baitu obujunanizibwa obw’okwecweramu tubumusigire. Obu bakora encwamu ey’amagezi, bagasirwa muno. Nahabweki, titusemeriire kutekereza ngu twine obusobozi obw’okucweramu ab’oruganda n’abanyaanya rundi kubagambira eki basemeriire kukora.

12, 13. Habwaki ky’akabi kukora encwamu obuturukuba tukwasirwe ekiniga rundi tuhoirwemu amaani?

¹² Biro binu, abantu bangi bacwamu kukora ekintu nibasigikirra ha ky’omutima gwabo gurukugonza. Baitu eki nikisobora kuba kintu ky’akabi. Baibuli etutererra okutacwamu nitusigikirra ha mitima yaitu rundi enyehurra yaitu. (Enfumo 28:26) Titusemeriire kwesiga emitima yaitu habwokuba “omutima gwobugobya okukira ebintu byona.” (Yeremiya 17:9) Baibuli erumu ebyokurorraho bingi ebirukwoleka akabi akaruga omu kuhondera omutima. (1 Ekyabakama 11:9; Yeremiya 3:17; 13:10) Baitu, kiki ekisobora kutuhikaho kakuba tucwamu nitusigikrra ha kugonza kw’omutima gwaitu?

¹³ Yahwe atuhaire ekiragiro ky’okumugonza n’omutima gwaitu gwona hamu n’okugonza abagenzi baitu nk’okutwegonza.  (Matayo 22:37-39) Baitu haroho ekintu eki tusemeriire kwegendereza. Akacweka akatumazire karumu ebyahandiikirwe ebirukwoleka ngu ky’akabi kuleka enyehurra yaitu kwebembera entekereza n’ebikorwa byaitu. Ekyokurorraho, kigumire omuntu kucwamu omu mulingo ogw’amagezi obw’arukuba akwasirwe ekiniga. (Enfumo 14:17; 29:22) Kandi, tikyanguhire omuntu anyakuhoirwemu amaani kukora encwamu ey’amagezi. (Okubara 32:6-12; Enfumo 24:10) Tusemeriire kwikiriza Ekigambo kya Ruhanga okwebembera entekereza yaitu. (Abarumi 7:25) Obuturaaba nitukora encwamu enkuru, tutaikora nitusigikirra ha nyehurra yaitu.

14. Nitumanya tuta ngu obwire obumu kihikire kuhinduramu encwamu ei tubaire tukozere?

¹⁴ Tusemeriire kucwamu omu mulingo ogw’amagezi. Baitu nabwo, omuntu omugezi aikara akimanyire ngu nikisobora kumwetagisa kwecumitiriza ha ncwamu ye rundi n’okugihinduramu. Yahwe Ruhanga akatuteraho ekyokurorraho ekirungi. Rora ekintu ekiyakoliire Nineve omu busumi bwa Yona: “Kandi Ruhanga yarora emirimo yabu, okubahindukire okuleka omuhanda gwabu omubi; Ruhanga yayeyijukya habwakabi akayagambire okubakora; tiyakakora.” (Yona 3:10) Abantu ba Nineve obu bayegarukiremu baleka kukora ebintu ebibi, Yahwe akahinduramu encwamu ye. Kinu kikoleka ngu ali muntu arukwetegereza, muculeezi, kandi w’embabazi. Okutasisana n’abantu, Yahwe tacwamu atabandize kuteekereza, n’obwaba akwasirwe ekiniga.

15. Habwaki obwire obumu kisobora kutwetagisa kuhinduramu encwamu zaitu?

¹⁵ Obumu, nikisobora kutwetagisa kuhinduramu encwamu yaitu kukira muno kakuba ebintu bihinduka. Oijuke ngu obwire obumu, Yahwe nauwe yahinduramuga encwamu ze. (1 Ekyabakama 21:20, 21, 27-29; 2 Ekyabakama 20:1-5) Obwire obundi nambere kisobora kwetagisa kuhinduramu encwamu nubwo kakuba tutunga okumanyisibwa okundi. Tekereza ha kyokurorraho ky’Omukama Daudi. Akakora encwamu erukukwata ha mwijukuru wa Saulo arukwetwa Mefibosesi n’asigikirra ha bintu ebitahikire ebiyamanyisiibwe. Hanyuma obu yamanyisiibwe ebintu ebihikire, akahindura encwamu ye. (2 Samuiri 19:24-29) Obwire obumu, naitwe nikisobora kutwetagisa okuhinduramu encwamu zaitu.

16. (a) Magezi ki agasobora kutukonyera obuturukuba nitukora encwamu? (b) Habwaki tusemeriire kwongera kwecumitiriza ha ncwamu ezitwakozere ira, kandi nitusobora kukikora tuta?

¹⁶ Baibuli n’etutererra okutarahukiriza omu kukora encwamu enkuru. (Enfumo 21:5) Tusemeriire kubanza kutekereza ha kintu kandi tukyetegereze nukwo hanyuma tukole encwamu ey’amagezi. (1 Abasesalonika 5:21) Nyineka atakacwiremu eky’okukora, asemeriire kubanza  kuseruliiriza omu Byahandiikirwe n’omu bitabu eby’omwiru omwesigwa. Kandi kirungi n’okuhuliiriza entekereza y’abantu abandi omu ka. Ijuka ngu, Yahwe akatererra Iburahimu kuhuliiriza mukazi we eky’akaba n’agamba. (Okubanza 21:9-12) Abagurusi b’ekitebe nabo basemeriire kubanza kuseruliiriza. Kakuba batunga okumanyisibwa kundi okurukubetagisa kuhindura encwamu ei babaire bakozere ira, tibasemeriire kutiina kugihindura nibatekereza ngu abandi nibaija kuleka kubesiga. Abagurusi abaine okwetegereza kandi abarukumanya obusobozi bwabo basemeriire kumanya ngu haroho obu kirukusobora kuba nikyetagisa bahindulemu encwamu yabo. Kandi kintu kirungi kakuba itwena tuhondera ekyokurorraho kyabo. Kinu nikisobora kukonyera ekitebe kubamu obusinge n’okwikara omu bumu.—Engeso Ezabakwenda 6:1-4.

17. Kiki ekirukusobora kutukonyera kuhika ha businguzi obu turukuba nitukora encwamu?

¹⁷ Encwamu ezimu ziba nkuru kukira ezindi. Nk’ekyokurorraho, kucwamu obworaaba oli w’okutaaha obuswere, rundi omuntu w’okubutaahamu nauwe eri ncwamu nkuru. Encwamu endi enkuru eri y’okucwamu ddi okutandikaho obuhereza bw’akasumi koona. Otakakozere encwamu zinu enkuru, osemeriire kubanza kutekereza ha nsonga egi n’okusaba Yahwe akukonyere. Nikisobora kutwara obwire, baitu obu turaaba nitugonza kukora encwamu ey’amagezi, tusemeriire kwesiga Yahwe, tuhulirize oburagirizi bwe, kandi tubuhondere. (Enfumo 1:5) Yahwe atuteriireho obuhabuzi oburungi muno omu Baibuli. Nahabweki kikuru kuseruliiriza n’okumusaba oburagirizi bwe. N’aija kutuha emiringo eratukonyera kukora encwamu ezirukwikiraniza n’eby’agonza. Tutakakozere encwamu enkuru, tusemeriire kwekaguza: ‘Encwamu yange erayoleka ngu ningonza Yahwe? Eraleta okusemererwa n’obusinge omu ka yange? Kandi erayoleka ngu ndi mugumisiriza kandi muntu w’embabazi?’

18. Habwaki Yahwe n’ayetaaga twecweremu itwenka?

¹⁸ Yahwe tatuhambiriza kumugonza n’okumuhereza. Baitu atusigira obugabe nukwo twecweremu. Kandi tatahirra obugabe bwaitu obw’okwecweramu obuturaaba nitugonza kumuhereza. (Yosuha 24:15; Omugambizi 5:4) Baitu n’ayetaga tukole ekitucwiremu nitusigikirra ha Baibuli. Obuturaikiririza omu buragirizi bwa Yahwe, kandi tukata omu nkora emisingi ya Baibuli, nitwija kukora encwamu ez’amagezi. Kandi nitwija kwoleka ngu tuli bantu abagumire.—Yakobo 1:5-8; 4:8.