1. Abazaire Abakristaayo babanza kugumya ki omwana wabo obwaba atakabatizibwe?

“NKAMARA emyezi nyingi ningambira abazaire bange ngu ningonza kubatizibwa, kandi twaikaraga nitukibazaaho. Bakaba nibagonza kukigumya ngu nkaba ninyetegereza obukuru bw’encwamu yange. Baitu ebiro by’okwezi 31 Desemba, 1934, ekiro ekikuru muno omu bwomeezi bwange kikahika.” Oku nukwo munyaanya itwe arukwetwa Blossom Brandt arukubazaaho ekyabaireho obu yacwiremu kubatizibwa. N’omu kasumi kanu, abazaire nibagonza kukonyera abaana babo kukora encwamu enungi. Kakuba omwana akerererwa kubatizibwa hataroho ensonga habwaki nakerererwa, nikisobora kusiisa enkoragana ye na Yahwe. (Yakobo 4:17) Abazaire abamagezi babanza kukigumya ngu omwana wabo atakabatiziibwe, ayetekanize kuba muhondezi wa Kristo.

2. (a) Kizibu ki Abaroleerezi b’ebicweka bakizire kusanga kizibu ki? (b) Omu kicweka kinu nitwija kubazaaho ki?

 ² Abaroleerezi ab’ebicweka bakizoire ngu abato baingi hamu n’ensinganto abali omu myaka nka 20 tibakabatizibwe, nobu kiraba ngu bakuliire omu mananu. Obwire oburukukira obwingi, abaana banu bagenda omu nso’rokano, omu buheereza, kandi berora nk’abamu ha Abakaiso ba Yahwe. Baitu ha bw’ensonga ezitali zimu, tibakehaireyo hali Yahwe kandi tibabatiziibwe. Obwire obumu, kisangirwe ngu abazaire babo batekereza ngu tibakahikire kubatizibwa. Omu kicweka kinu, nitwija kubazaaho ebintu bbina ebikira kutanga abazaire kwekambisa abaana babo kubatizibwa.

3. Abazaire ba Blossom bakaba nibekaguza ki?

³ Abazaire ba Blossom abatusangirwe tubalizeeho omu kacweka ak’okubanza, bakaba nibekaguza muhara wabo obwaraaba akuzire kwetegereza amakuru g’okubatizibwa. Abazaire nibasobora kumanya bata omwana wabo obwaraba ahikire kwehayo hali Yahwe?

4. Ekiragiro kya Yesu ekiri omu Matayo 28:19, 20 nikisobora kita kukonyera abazaire omu kasumi kanu?

⁴ Soma Matayo 28:19, 20. Baibuli tetugambira emyaka ey’omuntu asemeriire kubanza kuhikya nukwo abatizibwe. Baitu kirungi abazaire kubanza kutekerezaaho ensonga habwaki kiri kikuru kufoora abantu abegeswa. Omu rulimi Oruyonani, ebigambo “muhindule amahanga abegeswa” ebiri omu Matayo 28:19 nibimanyisa kwegesa abantu n’ekigendererwa ky’okubafoora abeegi ba Baibuli rundi abegeswa. Omwegeswa nuwe ogu arukwega, aketegereza, kandi akorobera Yesu ebiyayegeseze. Nahabweki, abazaire basemeriire kutandika kwegesa abaana baabo kurugira kimu ha kuzaarwa kwabo n’ekigendererwa ky’okubakonyera kwehayo hali Yahwe n’okufoka abegeswa ba Kristo. Ky’amananu enkerembe tibarukwikirizibwa kubatizibwa. Baitu Baibuli neyoleka ngu n’abaana abakyali bato nibasobora kwetegereza kandi bakagonza amananu.

5, 6. (a) Ebintu Baibuli ebazaaho Timoseo nibitwegesa ki ha kubatizibwa? (b)Mulingo ki omurungi ogw’abazaire basobora kukonyeramu abaana babo?

⁵ Timoseo akaba mwegeswa ayacwiremu kuheereza Yahwe obw’akaba akyali muto. Omukwenda Paulo akagamba ngu Timoseo akatandika kwega amananu agarukukwata hali Ruhanga “okuruga omu buto.” Ise akaba atarukuheereza Yahwe, baitu nyina na nyinenkuru bakamukonyera kugonza Ekigambo kya Ruhanga. Ekyarugiremu, akaba n’okwikiriza okw’amaani. (2 Timoseo 1:5; 3:14, 15) Nasobora kuba yali omu myaka nka 20 nambere yatandikire kutunga obujunanizibwa obw’embaganiza omu kitebe.​—Engeso Ezabakwenda 16:1-3.

⁶ Abaana bahukana. Boona tibakurra ha rulengo rumu. Abaana abamu betegereza amananu, bakora encwamu ez’amagezi, kandi bagonza kubatizibwa bakyali bato. Abandi nikisobora kubatwarra obwire kurora bahika ha kubatizibwa. Abazaire ab’amagezi tibahambiriza baana babo kubatizibwa, baitu babakonyera kukurakurana kusigikirra ha kwetegereza kwabo. Abazaire basemererwa omwana wabo obwata omu nkora omusingi oguli omu Enfumo 27:11. (Soma.) Baitu baine kwijuka ngu ekigendererwa kyabo nikyo kukonyera abaana babo  kufooka abegeswa ba Kristo. Nahabweki basemeriire kwekaguza, ‘Eby’omwana wange amanyire, nibimara kumusobozesa kwehayo hali Ruhanga n’okubatizibwa?’

7. Kiragiro ngu omuntu aine kubanza kumanya buli kintu kyona ekiri omu Baibuli kusobora kubatizibwa? Soborra.

⁷ Abazaire obubegesa abaana babo, baba nibabakonyera kumanya kurungi amananu. Okumanya kunu kubakonyera kugonza kwehayo hali Ruhanga. Baitu eki tikirukumanyisa ngu omwana aine kubanza kumanya enyegesa za Baibuli zoona nukwo abatizibwe. Buli muhondezi wa Kristo asemeriire kwikara nayega na hanyuma y’okubatizibwa. (Soma Abakolosai 1:9, 10.) Nahabweki omuntu asemeriire kumanya ebintu ebirukwingana nkaha atakabatizibwe?

8, 9. Kiki ekyahikire hali Omulinzi w’enkomo omu rubuga rwa Firipi, kandi eki nikitwegesa ki?

⁸ Eka emu ebiyarabiremu nibisobora kukonyera abazaire ab’omu kasumi kanu. (Engeso Ezabakwenda 16:25-33) Omu mwaka 50, omukwenda Paulo akagenda omu rubuga orukwetwa Firipi ha rugendo rwe orw’obumisaani orwakabiri. Obuyahikireyo, uwe na Sira bakahangirirwa, basibwa kandi batwarwa omu nkomo. Omu bwire bw’ekiro, hakabaho omusisa gw’amaani kandi enyigi z’enkomo zikakinguka. Omulinzi akatekereza ngu abanyankomo boona batorokere, kandi akagonza kweyita. Baitu Paulo akamutanga. Hanyuma Paulo na Sira bakegesa omulinzi w’enkomo onu hamu n’eka ye amananu agarukukwata hali Yesu. Bakaikiriza ebintu ebibayegere hali Yesu kandi bakyetegereza ngu kikuru kumworobera. Nahaweki ahonaho bakabatizibwa. Ekyokurorraho kyabo nikitwegesa ki?

⁹ Omulinzi w’ekomo onu nasobora kuba yali muserikale ow’akaba ahumwire amahe ag’Abarumi. Akaba atamanyire Kigambo kya Ruhanga. Nahabweki kurora yafooka Mukristaayo, kikaba nikimwetagisa kubanza kwega amananu ag’okubandizaho ag’omu Baibuli, kumanya ebintu Yahwe arukugoza abaheereza be bakole, n’okworobera enyegesa za Yesu. Ebiyayegere omu kasumi kataito bikamukonyera kwenda kubatizibwa. Baitu hanyuma y’okubatizibwa akeyongera kwega ebirukukiraho. Hati omwana wawe kakuba akugambira ngu nayenda kubatizibwa habwokuba nagonza Yahwe kandi nayenda kumworobera, kiki ekyorakora? Nosobora kumuleka agambire abagurusi nukwo ubo bacwemu obwaraba ahikire kubatizibwa. * (Rora obugambo obuli hansi.) Nk’Abakristaayo abandi boona, omwana wawe naija kweyongera kwega ebirukukwata hali Yahwe obwomeezi bwe bwona, n’omu nsi empyaka.​—Abarumi 11:33, 34.

10, 11. (a) Abazaire abamu bagira ntekereza ya mulingo ki? (b) Kiki ekisobora kulinda omwana wawe?

¹⁰ Abazaire abamu batekereza ngu kirungi abaana babo kubatizibwa hanyuma y’okutunga obwegese obwahaiguru n’emirimo emirungi. Abazaire abo nibasobora kuba nibagondeza abaana bobo ebirungi, baitu basemeriire kubanza kwekaguza: ‘Eki kirakonyera omwana wange kuba musinguzi omu bwomeezi? Eki nikikiraniza n’ebitusoma omu Baibuli? Yahwe nagonza tukozese tuta obwomeezi bwaitu?’​—Soma Omugambizi 12:1.

¹¹ Kikuru muno kwijuka ngu ensi enu hamu n’ebintu ebirumu nibyahukanira kimu n’ebintu Yahwe agonza, kandi tibirukwikiraniza n’entekereza ye. (Yakobo 4:7, 8; 1 Yohana 2:15-17; 5:19) Enkoragana enungi na Yahwe niyo esobora kuha omwana wawe obulinzi oburukukirayo hali Satani, ensi enu, hamu n’entekereza embi enyakwijwire omu nsi. Abazaire kakuba bebembeza obwegese n’emirimo emirungi, abaana babo nabo nibaija kutekereza ngu ebintu eby’omu nsi by’omugaso muno kukira enkoragana yabo na Yahwe. Ekintu kinu kyakabi. Mali omuzaire ow’okugonza nasobora kuleka ensi enu niyo eyegese omwana we ha nsonga y’obusinguzi? Kwebembeza Yahwe omu bwomeezi bwaitu nikyo kyonka ekisobora kutuletera okusemererwa kwonyini.​—Soma Zabuli 1:2, 3.

12. Habwaki abazaire abamu batekereza ngu kirungi abaana babo kulindaho kubatizibwa?

¹² Omuzaire omu akasoborra ensonga habwaki akaba atarukwenda muhara we abatizibwe. Akagamba: “Nikinkwasa ensoni kugamba ngu ekyantinisize niyo entekaniza ey’okubinga omuntu omu kitebe.” Nka munyaanya itwe onu, abazaire abamu batekereza ngu abaana babo batakabatiziibwe, kirungi babanze bakule kandi balekeraho kukora ensobi ez’ekidomadoma. (Okubanza  8:21; Enfumo 22:15) Abazaire aba mulingo gunu batekereza ngu abaana babo obubaraikara batabatizibwe tibarukwija kubingwa omu kitebe. Baitu habwaki entekereza yamulingo gunu etahikire?​—Yakobo 1:22.

13. Kakuba omuntu aba atabatizibwe, nikimanyisa ngu tarukujunanizibwa omu maiso ga Yahwe? Soborra.

¹³ Tukimanyire ngu busaho muzaire arukugonza omwana we abatizibwe atakahikire kwehayo hali Yahwe. Baitu kandi n’eba eri nsobi kutekereza ngu omwana wawe tarukujunanizibwa omu maiso ga Yahwe ngu habwokuba takabatizibwe. Omwana ajunanizibwa omu maiso ga Yahwe obwatandika kumanya ekibi n’ekirungi. (Soma Yakobo 4:17.) Abazaire ab’amagezi bekambisa omwana wabo kubatizibwa. N’obwaba akyali muto, bamwegesa kugonza Yahwe ebyagonza n’okunoba Yahwe ebyanoba nk’oku nabo bakora. (Luka 6:40) Okugonza okwainiire Yahwe nikwija kumukonyera kutakora ekibi ky’amaani, habwokuba naija kuba nagonza kukora ebintu ebihikire omu maiso ga Yahwe.​—Isaya 35:8.

14. Abagurusi nibasobora kusagika bata abazaire?

¹⁴ Abagurusi omu kitebe nibasobora kusagika abazaire kakuba babazaaho kurungi ebigendererwa eby’omuntu asobora kweteraho omu kuheereza Yahwe. Munyaanya itwe omu naijuka ow’Oruganda Russell obuyabalize nauwe obwakaka aine emyaka mukaaga. Nagamba ngu: “Akakozesa edakiika 15 kubazaaho nanyowe ebigendererwa eby’omwoyo.” Kiki ekyarugiremu? Obwire bukahika munyaanya itwe onu yatandika kuheereza nka payoniya, kandi akamara emyaka erukuhingura omu 70 ali omu buheereza bunu! Nikyeyoleka kurungi ngu, ebigambo ebirungi kandi ebirukugarramu amaani, nibisobora kukwataho omuntu obwomeezi bwe bwona. (Enfumo 25:11) Abagurusi nibasobora kuraliza abazaire hamu n’abaana kukonyera kusemeza Ekyombeko ky’Obukama. Nibasobora kuha abaana emirimo kusigikirra ha myaka yabo n’okwetegereza kwabo.

15. Abandi omu kitebe nibasobora bata kukonyera abato?

 ¹⁵ Abantu abandi omu kitebe nibasobora kukonyera omu mulingo ki? Nibasobora kwoleka abato ngu nibabafaaho. Ekyokurorraho, kirungi kurora obwokurorraho oburukwoleka ngu abato baliyo nibalengaho kwirra haihi na Yahwe. Kakuba omwana aha eky’okugarukamu ekirungi, aha ekicweka omu ruso’rokano orwa hagati omu wiiki, atebeza ha isomero, rundi akora ekihikire hanyuma y’okwohebwa, kirungi omusiime! Enso’rokano obuziraaba zitakatandikire rundi obu ziraaba zihoire, lengeho kubaza n’abaana abato. Obutukora eki, abaana nabo behurra bali omu “kitebe ekingi.”​—Zabuli 35:18.

16, 17. (a) Habwaki kikuru abaana kubatizibwa? (b) Abazaire Abakristaayo nibasobora kutunga okusemererwa kwa mulingo ki? (Rora ekisisani ekiri ha rupapura 9.)

¹⁶ Omugisa ogw’amaani abazaire baine nugwo ogw’okwegesa abaana babo kugonza Yahwe. (Zabuli 127:3; Abefeso 6:4) Omu ihanga lya Isareri, abaana obu bazarwaga, bahebwayoga hali Yahwe. Baitu eki tinukwo kiri ha baana baitu. Abazaire obubarukuba nibagonza Yahwe hamu n’amananu, tikirukumanyisa ngu n’abaana babo nibaija kukora nikyo kimu. Kuruga ha kuzarwa kw’omwana, abazaire basemeriire kuba n’ekigendererwa ky’okumukonyera kuba mwegeswa, kwehayo hali Yahwe, n’okubatizibwa. Habwaki ekintu kinu kikuru? Habwokuba, okwehayo kw’omuntu, okubatizibwa kwe, hamu n’okuheereza Yahwe n’obwesigwa nibiija kumusobozesa kukiraho muhito omwingi.​—Matayo 24:13.

¹⁷ Blossom Brandt obuyagondeze kubatizibwa, abazaire be bakagonza kubanza kukigumya ngu akaba ahikire kubatizibwa. Obubananukire ngu akaba ahikire, bakasagika encwamu ye. Blossom nagamba ngu kinu nikyo ise nyowe yakozere ekiro ekinkaba ningenda kubatizibwa kitakahikire: “Itwena akatweta twateeza amaju, hanyuma yasaba. Obwakaba nasaba akagamba ngu aine okusemererwa habwa muhara we kukora encwamu ey’okwehayo hali Yahwe.” Hanyuma y’emyaka erukuhingura omu 60, Blossom nagamba ngu: “Ninsobora kukugumiza ngu, ekiro eki tikirinyeba.” Abazaire, nitugonza nainywe mube n’okusemererwa hamu n’okumarwa obumuraaba nimurora abaana banyu nibehayo kandi nibabatizibwa kuba baheereza ba Yahwe.