1, 2. (a) Abazaire abamu behurra bata abaana babo obubabagambira ngu nibagonza kubatizibwa? (b) Habwaki ababa nibagonza kubatizibwa bakaguzibwa obubaraba behaireyo hali Yahwe? (Rora ekisisani ekiri ha rupapura 3.)

ABAZAIRE ba Maria bakarora muhara wabo ayemeriire hamu n’abandi abarukugenda kubatizibwa. Ow’aruganda arukuha orubazo akakaguza ebikaguzo bibiri. Maria akagarukamu n’iraka eryahaiguru kandi erikuhulirwa. Hanyuma yabatizibwa.

² Abazaire ba Maria bakasemererwa muno kurora muhara wabo ayehaireyo hali Yahwe kandi yabatizibwa. Baitu ebi byona bitakabaireho, nyina Maria akaba nayekaguza: ‘Maria yakahikire kubatizibwa? Mali nayetegereza kurungi obukuru bw’okwehayo hali Yahwe? Nikyetagisa abanze alindeho kubatizibwa?’ Abazaire baingi bekaguza ebikaguzo nka binu abaana babo obubabagambira ngu nibenda kubatizibwa. (Omugambizi 5:5) Habwokuba encwamu erukukira obukuru ey’omuntu asobora kukora nukwo kwehayo hali Yahwe n’okubatizibwa.​—Rora akasanduuko “ Oyehaireyo hali Yahwe?”

3, 4. (a) Omukwenda Petero akoleka ata obukuru bw’okubatizibwa? (b) Habwaki Omukwenda Petero yalengesaniize okubatizibwa n’elyato Nuha yayombekere omu busumi bwe?

 ³ Omukwenda Petero akalengesaniza okubatizibwa n’elyato lya Nuha. Akagamba ati: “Hati ekintu ekirukusisana na kinu nikibajuna.” (Soma 1 Petero 3:20, 21. *) Elyato likoleka abantu abandi ngu Nuha akaba nagonza kukora Ruhanga ebyagonza. Nuha akakora omulimo Yahwe yamuhaire n’obwesigwa. Habw’okwikiriza kwe, Yahwe akamujuna hamu n’eka ye Okusandaara kw’Amaizi obu kwaizire. Hati Petero akaba nalengaho kutwegesa ki?

⁴ Abantu obubarozere elyato, bakamanya ngu Nuha akaba aine okwikiriza omuli Ruhanga. Abantu obubarora omuntu nagenda kubatiziibwa, bamanya ngu ahaireyo obwomeezi bwe hali Ruhanga habwokuba naikiririza omu Kristo ayahumbuukire. Nka Nuha, abo ababatiziibwa borobera Ruhanga kandi bakora omulimo ogw’abahaire. Kandi nk’oku Yahwe yajunire Nuha Okusandaara kw’Amaizi, naija kujuna abahereza be abesigwa ababatiziibwe obw’araaba nahwerekereza ensi enu embi. (Marako 13:10; Okusuku’rwa 7:9, 10) Eki nikyolekera kimu ngu kwehayo hali Yahwe n’okubatiziibwa kintu kikuru muno. Amananu gali, omuntu kakuba akerererwa kubatizibwa n’asobora kuferwa omugisa ogw’okutunga obwomeezi obutahwaho.

5. Nitwija kwega hali ki omu kicweka kinu?

⁵ Nk’oku twayetegereza ngu okubatizibwa  kintu kikuru, hati katurole ebyokugarukamu eby’ebikaguzo binu bisatu: Baibuli ebazaaho eta okubatizibwa? Omuntu aine kukora ki obwarukuba atakabatizibwe? Obuturukuba nitwegesa abaana baitu rundi abeegi baitu ba Baibuli, habwaki tusemeriire kwikara nitwijuka ngu okubatizibwa kintu kikuru?

6, 7. (a) Habwaki abantu baizire hali Yohana kubatizibwa? (b) Noha ayabaire n’okubatizibwa okw’embaganiza kandi habwaki?

⁶ Omuntu ow’okubanza arukubazibwaho omu Baibuli ayabandize kubatiza abandi nuwe Yohana Omubatizi. (Matayo 3:1-6) Habwaki abantu baizire hali uwe kubatizibwa? Bakabatizibwa kwoleka ngu begarukiremu ebibi byabu, ekirukumanyisa ngu bakaikiriza nk’oku bakaba bajemiire Ekiragiro kya Musa. Baitu haroho okubatizibwa okukuru muno oku Yohana yakozere okukaba kwine amakuru ag’embaganiza. Yohana akatunga omugisa gw’okubatiza Yesu, Omwana wa Ruhanga. (Matayo 3:13-17) Yesu akaba atakakoraga kibi kyona. Kikaba kitarukumwetagisa kwegarukamu. (1 Petero 2:22) Hati, habwaki Yesu yabatiziibwe? Akabatizibwa kwoleka ngu akaba nagenda kukozesa obwomeezi bwe kukora Yahwe ebyagonza.​—Abaheburaniya 10:7.

⁷ Hanyuma ya Yesu kutandika kutebeza, abegeswa be nabo bakatandika kubatiza abandi. (Yohana 3:22; 4:1, 2) Abantu abo nabo bakabatizibwa habwokuba bakaba begarukiremu ebibi ebibakozere obubajemiire Ekiragiro kya Musa. Baitu hanyuma ya Yesu kufa n’okuhumbuuka, abo boona abakaba nibagonza kufooka begeswa be bakubatizibwe habw’ensonga endi.

8. (a) Kiragiro ki eki Yesu yahaire hanyuma y’okuhumbuuka? (b) Habwaki Abakristaayo baine kubatizibwa?

⁸ Omu mwaka 33, hanyuma y’okuhumbuuka, Yesu akabaliza abasaija abarukuhingura 500, abakazi, obundi n’abaana. Kanu nuko kasobora kuba kasumi akayagambiiremu ngu: ‘Mugende, muhindule amahanga gona abegeswa, nimubabatiza okutaaha omu ibara lya Isitwe n’Omwana n’omwoyo ogurukwera: nimubegesa okukwata byona ebinabaragiire.’ (Matayo 28:19, 20; 1 Abakolinso 15:6) Yesu akaragira abahondezi be kufoora bantu abegeswa. Omuntu wena arukugonza kuba omwegeswa we rundi kuhimba “ekikoligo” kye asemeriire kubatizibwa. (Matayo 11:29, 30) Kusobora kuheereza Ruhanga omu mulingo ogurukumusemeza, nikyetagisa omuntu kubanza kwikiriza ngu Ruhanga nakozesa Yesu kuhikiriza ebigendererwa bye. Obu nubwo arukusobora kubatizibwa kandi akasiimwa Ruhanga. Omu Baibuli harumu obwakaiso oburukwoleka ngu abegeswa ba Yesu abakara bakaba bamanyire ngu kikuru omuntu kubatizibwa. Batatekereze ngu bakaba basemeriire kulindaho babatizibwe ha bwiire obundi.​—Engoso Ezabakwenda 2:41; 9:18; 16:14, 15, 32, 33.

9, 10. Ekyokurorraho ky’omusaija Omunyesiyopiya hamu na Saulo nikitwegesa ki ha kubatizibwa?

⁹ Soma Engeso Ezabakwenda 8:35, 36. Omusaija Omunyesiyopiya ow’akaba naikiririza omu nyegesa y’Ekiyudaaya akaba nataaha naruga kuramya ha yekaru omu Yerusalemu. Maraika wa Yahwe akatuma Firipo kugenda kumutebeza, kandi Firipo ‘akamutebeza amakuru amarungi agarukukwata hali Yesu.’ Omusaija onu Omunyesiyopiya  akakwatwaho ata? Aketegereza habwaki kikaba kikuru kwikiriza Yesu nka Mukama, kandi akaba nagonza kukora ekintu Yahwe akaba nayetagisa Abakristaayo bakole. Nahabweki akabatizibwa aho n’aho.

¹⁰ Ekyokurorraho ekindi nikyo eky’omusaija arukwetwa Saulo. Ihanga lyona ery’Abayudaaya likaba lyehaireyo hali Yahwe, baitu Yahwe akaleka kukoragana nabo habwokuba batamworobere. Saulo akaba naikiriza ngu Abayudaaya bakaba nibakyaheereza Ruhanga omu mulingo ogunyakuhikire, nahabweki akahiganiza Abakristaayo. Baitu kiro kimu, Yesu ow’akaba ahumbuukire ou Saulo yatekeriize ngu akaba afiire, akabaza na Saulo kuruga omu iguru. Saulo akakoraho ki? Akaikiriza kukonyerwa omwegeswa wa Kristo arukwetwa Ananiya. Baibuli n’egamba ngu aho n’aho Saulo “yabatizibwa.” (Engeso Ezabakwenda 9:17, 18; Abagaratiya 1:14) Hanyuma Saulo akamanywa nka omukwenda Paulo. Obuyamazire kwetegereza ngu Ruhanga akaba nakozesa Yesu kuhikiriza ebigendererwa bye, Saulo akaikiriza kubatizibwa aho n’aho.​—Soma Engeso Ezabakwenda 22:12-16.

11. (a) Kiki ekiretera abeegi ba Baibuli kukora encwamu y’okubatizibwa? (b) Twehurra tuta omuntu obwabatizibwa?

¹¹ Omu kasumi kanu, abeegi ba Baibuli abato n’abakuru bakora ekintu nikyo kimu. Habw’okugonza Baibuli n’okwesiga ebyeyegesa, kibaletera kuba n’ekihika eky’okwehayo hali Yahwe n’okubatizibwa. Nahabweki obwire bw’orubazo orw’okubatizibwa buba bw’embaganiza ha nso’rokano zaitu enkooto. Abakaiso ba Yahwe basemererwa muno abeegi ba Baibuli obubaikiriza amananu kandi bakacwamu kubatizibwa. Kandi abazaire nabo basemererwa obubarora abaana babo nibabatizibwa. Omu mwaka ogw’obuheereza ogwa 2017, abantu abarukuhingura omu 284,000 nubo babatiziibwe kwoleka ngu behaireyo kukozesa obwomeezi bwabo kuhereza Yahwe. (Engeso Ezabakwenda 13:48) Eki nikyoleka ngu baketegereza nkoku buli Mukristaayo asemeriire kubatizibwa. Baitu bakaba baine kubanza kukora ki batakabatiziibwe?

12. Abeegi ba Baibuli basemeriire kubanza kukora ki batakabatiziibwe?

¹² Abeegi ba Baibuli batakabatiziibwe, baine kubanza kwega amananu agarukukwata hali Ruhanga, ekigendererwa kye hali abantu n’ensi, n’ekiyakozere kujuna abantu. (1 Timoseo 2:3-6) Hanyuma baine kuba n’okwikiriza okurabakonyera kworobera ebiragiro bya Ruhanga kandi okurabakonyera kuleka kukora eby’anoba. (Engeso Ezabakwenda 3:19) Ekintu kinu kikuru, habwokuba Yahwe tasobora kwikiriza omuntu arukwehayo haluwe baitu akaikara nakora ebibi. (1 Abakolinso 6:9, 10) Baitu tikiri eki kyonka, abo boona abahayo obwomeezi bwabo hali Yahwe basemeriire kuba omu nso’rokano kandi bakole n’omulimo ogw’okutebeza n’okwegesa abandi amakuru amarungi. Wena arukugonza kuba muhondezi wa Kristo aine kukora ebintu binu. (Engeso Ezabakwenda 1:8) Omwegi asemeriire kubanza kukora ebintu binu  byona, nukwo hanyuma ayeheyo hali Yahwe omu kusaba kandi abatizibwe.

13. Obuturaaba nitwegesa abandi, habwaki kikuru kwijuka ngu nikibetagisa kubatizibwa kuba Abakristaayo ab’amananu?

¹³ Obutukonyera abaana baitu rundi abeegi ba Baibuli kukora ebintu ebiturozere, twine kwijuka ngu boona abagonza kuba bahondezi ba Kristo basemeriire kubatizibwa. Nahabweki omu kasumi akasemeriire, titusemeriire kutiina kubagambira ha bukuru bw’okwehayo n’okubatizibwa. Nitugonza abaana baitu hamu n’abeegi ba Baibuli kukurakurana kandi bahike ha idaara ely’okubatizibwa!

14. Habwaki tutahambiriza omuntu wena kubatizibwa?

¹⁴ Amananu gali ngu, busaho muntu asemeriire kuhambiriza omwana rundi omwegi wa Baibuli kubatizibwa. Yahwe tatuhambiriza kumuheereza. (1 Yohana 4:8) Obuturaba nitwegesa abandi, tusemeriire kubakonyera kumanya ngu kikuru buli omu kuba n’enkoragana enungi na Yahwe. Omwegi wa Baibuli obwaraba nasiima amananu agarukukwata hali Ruhanga kandi mali nagonza kukora byona eby’Abakristaayo bakora, naija kugonza kubatizibwa.​—2 Abakolinso 5:14, 15.

15, 16. (a) Haroho emyaka ey’omuntu asemeriire kubanza kuhikya nukwo abatizibwe? Soborra. (b) Habwaki nikyetagisa omwegi wa Baibuli kubatizibwa nk’omu ha Bakaiso ba Yahwe n’obwaraba yali abatiziibwe omu diini ezindi?

¹⁵ Tiharoho myaka ey’omuntu asemeriire kubanza kuhikya nukwo abatizibwe. Abantu nibahukana, abeegi ba Baibuli abamu bakurakurana bwango kukira abandi. Baingi babatizibwa obubaba bakyali bato, kandi  baikara bali besigwa hali Yahwe n’obu bakura. Abandi beega amananu bakuzire kandi bamara babatizibwa. Abamu babatizibwa bahingwize n’emyaka 100!

¹⁶ Omukazi omu akatandika kwega Baibuli hanyuma y’okubatizibwa omu diini isatu ezirukwahukana. Egi niyo ensonga habwaki yakagwize ow’akaba namwegesa Baibuli obukiraba nikyetagisa kwongera kubatizibwa. Omwegesa we akakozesa Baibuli kumugarukamu. Omukazi onu obuyamazire kwetegereza ekya Baibuli erukumwetagisa, akaikiriza kubatizibwa n’obukiraba ngu akaba ali haihi kuhikya emyaka 80 ey’obukuru. Ekyokurorraho kye nikitwegesa ki? Kurora Yahwe yaikiriza okubatizibwa kwaitu, tusemeriire kuba twetegeriize amananu agarukukwata ha byagonza. Nahabweki n’obuturaba twabatiziibwe omu diini ezindi, nikitwetagisa kubatizibwa nka bamu ha Bakaiso ba Yahwe.​—Soma Engeso Ezabakwenda 19:3-5.

17. Kiki eky’omuntu asemeriire kuba natekerezaaho ha kiro kye eky’okubatizibwa?

¹⁷ Ekiro omuntu abatizibwa kiba kiro ky’okusemererwa. Kandi obu nubwo obwire obwasemeriire kutekerezaaho muno amakuru ag’okwehayo n’okubatizibwa kwe. Nikitwetagisa kutekamu amaani kukora buli kimu ekirukwetagisa Omukristaayo ow’amananu kukora. Abahondezi ba Yesu tibaine “kwomera habwabo bonka, baitu habwogu ayafire nahumbuka habwabo.”​—2 Abakolinso 5:15; Matayo 16:24.

18. Nitwija kugarukamu bikaguzo ki omu kicweka ekirukwongeraho?

¹⁸ Nkoku tumazire kwega omu kicweka kinu, encwamu ey’okuba Omukristaayo ow’amananu nkuru muno. Egi niyo ensonga habwaki nyina Maria yayekagwize ebikaguzo ebiturozereho ha kutandika kw’ekicweka kinu. Obworaba oli muzaire, nosobora kuba wayekagwizeho: ‘Omwana wange mali ahikire kubatizibwa? Omwana wange namanya Yahwe ekirukumara kwehayo haluwe? Omwana wange asemeriire kubanza kumara kusoma n’okutunga omulimo nukwo abatizibwe? Kandi kakuba akora ekibi ky’amaani hanyuma y’okubatizibwa?’ Nitwija kutunga ebyokugarukamu eby’ebikaguzo binu omu kicweka ekirukwongeraho, kandi nitwija kwega omulingo abazaire basobora kuba n’entekereza ehikire erukukwata ha kubatiziibwa.