1. Abahereza ba Ruhanga baingi obu bakora ekibi behurra bata?

OMUKWENDA Paulo akagamba ngu “nyowe ndi muntu wobujune.” (Abarumi 7:24) N’omu kasumi kanu, abaheereza ba Ruhanga baingi abesigwa behurra bahoiremu amaani kandi bentutwire nka Paulo. Habwaki? Habw’okuba n’obu turaba nitugonza kusemeza Yahwe, itwena tukagweterwa ekibi kandi tituhikiriire. Nahabweki nitusobora kwehurra kubi kakuba tusobya. Haroho Abakristaayo abamu abakozere ebibi eby’amaani batekereza ngu Yahwe tasobora kubaganyira.

2. (a) Zabuli 34:22 neyoleka eta ngu abantu ba Yahwe tibasemeriire kwikara nibecwera omusango? (b) Omu kicweka kinu nitugenda kwegaho ki? (Rora akasanduko “ Haroho Ebiturukwega, Rundi Haroho Amakuru Ag’Obunabbi?”)

² Ebyahandikirwe nibitugumya ngu kakuba tufoora Yahwe obwirukiro bwaitu, tikirukwetagisa kwikara nitwecwera omusango. (Soma Zabuli 34:22.) Baitu nikimanyisa ki kufoora Yahwe obwirukiro bwaitu? Tusemeriire kukora ki obu turaba nitugonza Yahwe atugirre embabazi kandi atuganyire? Nitusobora kutunga eby’okugarukamu by’ebikaguzo binu kakuba turora entekaniza  y’embuga ez’okwirukiramu ey’ekaba eri omu Isareri eya kara. Entekaniza enu ekabaho hansi y’Ekiragano ekikuru ekyaihirweho ha Pentekoti omu mwaka 33. Baitu Ekiragano kinu kikaba kirugire hali Yahwe. Nahabweki entekaniza enu y’embuga ez’okwirukiramu n’etwegesa omulingo Yahwe aroramu ekibi, abasiisi, hamu n’abo abegarukamu. Eky’okubanza, leka turole habwaki omu Isareri hakaba haliyo embuga ez’okwirukiramu n’omulingo zikaba nizikozesebwa.

3. Abaisareri bakaba basemeriire kukora ki omuntu obu yaitaga omuntu ondi?

³ Yahwe yakwatwahoga muno omuntu wena obu yaitwaga. Omuisareri wena obu yaitaga mugenzi we, “omuhozi wenzigu,” akaba asemeriire kwita omwisi ogu. Omuhozi onu ow’enzigu akaba asemeriire kuba musaija kandi aine obuzaale bwa haihi muno n’omuntu anyakwisirwe. (Okubara 35:19) Omu mulingo ogu, omwisi yahayoga obwomeezi bwe kusasurra obwomeezi bw’omuntu owaisirwe ataine musango. Omwisi obu yabaga ataisirwe bwangu, Ensi Eraganizibwe yabaga esisikaire rundi etakyali erukwera. Yahwe akabaragira: “Mutalisisa ensi eyimuikaramu” nimwita omuntu.​—Okubara 35:33, 34.

4. Kiki ekyabahoga Omuisareri obu yaitaga omuntu atakigenderiire?

⁴ Baitu kiki ekyabahoga Omwisareri obu yaitaga omuntu atakigenderiire? Yajunanizibwaga esagama y’omuntu ogu n’obu kiraba ngu amwisire atakigenderiire. (Okubanza 9:5) Baitu nabwo, Yahwe akagamba ngu akaba nasobora kwoleka omuntu ogu embabazi. Anyakwisire atakigenderiire akaba nasobora kwiruka omuhozi wenzigu kandi agende omu rumu ha mbuga mukaaga ez’okwirukiramu. Yatungaga obulinzi obu yaikirizibwaga kwikara omu rubuga oru. Baitu akaba asemeriire kwikara omu rubuga orw’okwirukiramu kuhikya nyakatagara omukuru obwalifa.​—Okubara 35:15, 28.

5. Habwaki entekaniza enu ey’embuga ez’okwirukiramu esobora kutukonyera kumanya Yahwe kurungi?

⁵ Entekaniza enu ey’embuga ez’okwirukiramu etabe ntekereza y’abantu. Baitu Yahwe nuwe akaba agitaireho. Akaragira Yosuha ngu: “Gambira abana ba Isareri oti mwetereho embuga ez’okwirukiramu.” Embuga zinu zikaforwa ezirukwera habw’okuba zikatekwaho  Yahwe. (Yosuha 20:1, 2, 7, 8) Entekaniza enu netukonyera kweyongera kwega bingi ebirukukwata hali Yahwe. Ekyokurorraho, n’etukonyera kwetegereza kurungi embabazi za Yahwe. Kandi netwegesa omulingo tusobora kufoora Yahwe obwirukiro bwaitu omu kasumi kanu.

6, 7. (a) Abakuru bakaba baine bujunanizibwa ki omu kucwera omusango ogu anyakwisire omuntu atakigenderiire? (Rora ekisisani ekiri ha rupapura 9.) (b) Habwaki kyali kintu ky’amagezi omuntu onu kwesoborraho hali abakuru?

⁶ Omwisareri obu yaitaga omuntu atakigenderiire, akaba asemeriire kwiruka agende omu rubuga orw’okwirukiramu nukwo ‘asoborre ebigambo bye’ hali abakuru omu irembo ery’orubuga. Abakuru omu rubuga oru bakaba basemeriire kumutangirra. (Yosuha 20:4) Hanyuma y’obwire, bamuletaga hali abakuru b’orubuga nambere yaitiire omuntu, kumucwera omusango. (Soma Okubara 35:24, 25.) Abakuru obu bakizoraga ngu akaba atakigenderiire kwita omuntu, bamugarrayoga omu rubuga orw’okwirukiramu.

⁷ Habwaki kikaba nikyetagisa omuntu anyakwirukire, kwesoborraho hali abakuru b’orubuga? Abakuru bakaba baine kurora ngu balinda ihanga lya Isareri niryera kandi bakaba baine n’okukonyera ogu anyakwisire omuntu atakigenderiire kugasirwa omu mbabazi za Yahwe. Omu ha bantu abaseruliriza ha bya Baibuli akahandika ngu omwisi akaba nasobora kwitwa obu yabaga atagenzere kwesoborraho hali abakuru. Kandi akongera yagamba ngu omwisi nuwe yakubaire ayeretiire kwitwa habwokuba yabaga atakozere eki Ruhanga yaragiire. Omuntu ogu akaba asemeriire kuserra kandi aikirize obukonyezi nukwo aikale ali mwomeezi. Obu yalemwaga kugenda omu rumu ha mbuga ez’okwirukiramu, omunyabuzale w’omuntu anyakwisirwe akaba aine obugabe bw’okumwita.

8, 9. Habwaki Omukristaayo anyakukozere ekibi eky’amaani asemeriire kukigambira abagurusi?

⁸ Omu kasumi kanu, Omukristaayo anyakukozere ekibi ky’amaani asemeriire kugenda hali abagurusi b’ekitebe nukwo bamukonyere kugarraho enkoragana ye na Yahwe. Habwaki nikyetagisa? Eky’okubanza, Yahwe nuwe yataireho abagurusi kucwera abaheereza be omusango obu barukuba bakozere ebibi eby’amaani. (Yakobo 5:14-16) Ekyakabiri, Abagurusi baroho kukonyera abasisi abarukwegarukamu kwongera kuba bantu abarukusimwa Yahwe kandi n’okubakonyera kutagarukamu ensobi ezibakozere. (Abagaratiya 6:1; Abaheburaniya 12:11) Ekyakasatu, abagurusi bahairwe obusobozi kandi batendekwa kukonyera kugumya abasiisi abarukwegarukamu, n’okubakonyera kuruga omu busaasi habw’okwikara nibecwera omusango. Yahwe nalengesaniza abagurusi “nkekiikaro ekyokweserekamu hali omuyaga.” (Isaya 32:1, 2) Gunu guli gumu ha miringo Ruhanga atwolekamu embabazi.

⁹ Baingi ha bahereza ba Yahwe batungire okuhumura n’obukonyezi okuruga omu kubaza n’abagurusi b’ekitebe. Ekyokurorraho, ow’oruganda arukwetwa Daniel akakora ekibi eky’amaani baitu yamara emyezi nyingi atakagenzere kugambira abagurusi. Akagamba ngu: “Habw’okuba hakaba harabireho obwire bwingi, nkatekereza ngu busaho ekintu kyona eki abagurusi bakaba nibasobora kunkorra.” Yaikaraga atiinire ngu omuntu ondi nasobora kumanya ekibi eki yakozere, kandi yayehurraga ngu buli murundi arukuba n’asaba, aine kubanza kusaba Yahwe ekiganyiro. Akahika yasaba abagurusi kumukonyera. Habwebiyarabiremu, nagamba ngu: “Amananu gali, nkaba  ntiinire kubagambira. Baitu hanyuma y’okubagambira kikasisana ngu omugugu omukooto gukaba gundugire ha mabega.” Hati Daniel akaba nasobora kusaba Yahwe ataine kintu kyona ekirukumurumiriza. Hati aine omuntu ow’omunda omurungi, kandi ebiro eby’enyuma, akakomwa kufooka omuhereza omu kitebe.

10. Omuntu anyakwisire omuntu ondi atakigenderiire akaba asemeriire kukora ki kurora yaganyirwa?

¹⁰ Omuntu anyakwisire mugenzi we atakigenderire kurora yaganyirwa, akaba aine kwiruka bwangu agende omu rubuga orw’okwirukiramu oruli haihi. (Soma Yosuha 20:4.) Kusigara ali mwomeezi kyasigikirraga hali uwe kuhika omu rubuga n’okurwikaramu kuhikya nyakatagara omukuru obw’alifa. Haloho ebintu omuntu onu yali asemeriire kuferwa. Kikaba nikimwetagisa kulekaho emirimo ye, eka ye enungi, n’obugabe bwe obw’okugenda hona hona. * (Rora obugambo obuli hansi.) (Okubara 35:25) Baitu ebi bikaba bitarukukira obwomeezi. Obu yakuturukire omu rubuga oru, yakubaire nayoleka ngu uwe eby’okwita omuntu tibirukumukwataho, kandi akubaire nateka obwomeezi bwe omu kabi.

11. Omukristaayo anyakwegarukiremu nasobora ata kwoleka ngu n’asiima muno embabazi za Ruhanga?

¹¹ Omusiisi arukwegarukamu omu kasumi kanu nauwe aine ebintu eby’asemeriire kukora kurora y’aganyirwa Ruhanga. Asemeriire kuleka ebikorwa ebibi. Kinu nikitwarramu n’okuleka ekintu kyona ekisobora kumuletera kusiisa. Omukwenda Paulo akasoborraho ebintu ebi Abakristaayo ab’omu Kolinso bakozere kwoleka ngu begarukiremu. Akahandika ngu: “Baitu dora, binu nibyo ebyarugire omu kwetuntura okwa Ruhanga agonza: okwekamba muno, okuterekereza ensonga, okubihirwa, kutiina Ruhanga, kugonzaga muno okwegarukamu, okutamu amaani, okuterekereza ebisobere! Omu buli miringo yona nimugonza kuba abecumi omu bintu byona!” (2 Abakolinso 7:10, 11, NW ) Nahabweki kakuba tukora kyona ekirukusoboka kurora twaleka kukora ebibi, nitwija kuba nitwoleka Yahwe ngu nitukwatwaho muno kandi ngu embabazi ze titurukuzitwara nk’ekintu ky’okuzanisa.

12. Bintu ki Omukristaayo asobora kuleka kurora yaikara omu mbabzi za Yahwe?

¹² Bintu ki ebi Omukristaayo asobora kwerekesa kurora yaikara omu mbabazi za Yahwe? Asemeriire kwerekesa ebintu ebyarukugonza obu biraba nibisobora kumuletera kukora ekibi. (Matayo 18:8, 9) Ekyokurorraho, kakuba banywani bawe bakusonasona kukora ebintu ebirukubihiza Yahwe, orabetantara? Kakuba osanga ngu torukusobora kwetanga obu kikuhika ha kunywa amarwa, orayetantara enyikara ezisobora kukuletera kunywa amarwa maingi? Kakuba osanga ngu nikikugumira kuleka okwegomba okw’obusihani, orayetantara firimu, emikura, rundi ebikorwa ebisobora kukuletera ebitekerezo ebibi? Oijuke ngu, kyona ekyorayerekesa kworobera ebiragiro bya Yahwe kitaito muno kakuba okirengesaniza n’okwikara omu mbabazi za Yahwe. Busaho ekintu kibi nk’okumanya ngu Yahwe atulekereho. Kandi busaho ekintu ekirungi nk’okuba “nembabazi ezitalihwaho” eza Yahwe Ruhanga.​—Isaya 54:7, 8.

13. Habwaki omuntu anyakuli omu rubuga orw’okwirukiramu yabaga aine obulinzi n’okusemerewa?

¹³ Omuntu anyakwirukire akaba aine obulinzi obu yabaga ali munda y’orubuga. Yahwe  akabazaaho embuga zinu ngu: “Zirabaga namberemuli ezokuirukiramu.” (Yosuha 20:2, 3) Yahwe akaba atarukwetagisa omuntu onu kwongera kucwerwa omusango. Kandi n’omuhoozi w’enzigu akaba atarukwikirizibwa kutaaha omu rubuga kumwita. Omuntu onu obu yaikaraga omu rubuga, yabaga ali hansi y’obulinzi bwa Yahwe. Yabaga atali omu nkomo. Akaba nasobora kuba n’emirimo ey’okukora, kukonyera abandi, n’okuhereza Yahwe omu businge. Yabaga n’okusemererwa kandi n’obwomeezi oburungi!

14. Omukristaayo anyakwegarukiremu asemeriire kugumya ki?

¹⁴ Abantu abamu abakozere ebibi by’amaani baitu baganyirwa habw’okwegarukamu na hati nibakyayecwera omusango. Abamu nibehurra ngu Yahwe talyebwa ebibi ebi bakozere. Naiwe obworaba noyehurra oti, okimanye ngu Yahwe obw’aganyira, aganyirra kimu. Tosemeriire kwikara n’oyecwera omusango. Kinu nikyo kyahikire hali Daniel ou tusangirwe tubalizeho. Hanyuma y’abagurusi kumuha obuhabuzi n’okumukonyera kwongera kuba n’omuntu ow’omunda omurungi, akehurra kurungi. Nagamba ngu: “Kikaba kitakyanyetagisa kwikara ninyecwera omusango. Obwoba oganyirwe, oba oganyirwe. Nk’oku Yahwe atugambira, atwara emigugu kandi agiteka hara muno kuruga nambere oli. Tosobora kwongera kugiroraho.” Omuntu anyakwisire atakigenderiire obu yamaraga kutaaha omu rubuga orw’okwirukiramu, akaba atasemeriire kutiina ngu omuhoozi w’enzigu nasobora kumusanga omu rubuga amwitiremu. Nikyo kimu naitwe, Yahwe obw’amara kutuganyira ebibi, titusemeriire kutiina ngu n’aija kubijuka rundi ngu n’aija kutufubira.​—Soma Zabuli 103:8-12.

15, 16. Habwaki tusemeriire kwesiga embabazi za Yahwe?

 ¹⁵ Amananu gali, itwena twine ensonga nyingi kukira Abaisareri ezisemeriire kutuletera kwesiga ngu Yahwe aine embabazi. Paulo obu yamazire kugamba ngu nayehurra ali “wobujune” habwokuba akaba atarukusobora kworobera Yahwe omu bwijwire, akagamba ngu: “Ninsiima Ruhanga, habwa Yesu Kristo Mukama waitu” (Abarumi 7:25) Akaba namanyisa ki? Paulo n’obwaaraba yarwanisaga okwegomba okubi kandi akaba akozere ebibi eby’amaani atakafookere Omukristaayo, akaba ayegarukiremu. Nahabweki akaba nakigumya ngu Yahwe akaba amuganyire kusigikirra ha kihongwa kya Yesu. Habwokuba Yesu akahayo ekicunguro, nitusobora kuba n’omuntu ow’omunda omurungi hamu n’obusinge omu mutima. (Abaheburaniya 9:13, 14) Nka Nyakatagara Omukuru, Yesu “asobora ati okubajunira kimu abanyakuija hali Ruhanga omuluwe, baitu aikara omwomezi ebiro byona okubatonganiraga.” (Abaheburaniya 7:24, 25) Omu bwire bwa kara, nyakatagara omukuru yakonyeraga Abaisareri kukigumya ngu Yahwe akaba nasobora kuganyira ebibi byabo. Twine Yesu nka Nyakatagara waitu Omukuru, nahabweki enu nayo nsonga endi habwaki tusemeriire kukigumya ngu nitwija kutunga “okuganyirwa, tutunge embabazi ezokukonyerwa obu turatagaga bwona.”​—Abaheburaniya 4:15, 16.

¹⁶ Kurora twafoora Yahwe obwirukiro bwaitu, tusemeriire kwikiririza omu kihongwa kya Yesu. Otatekereza ngu ekicunguro kikahebwa abantu boona obatwalire hamu. Ba n’okwikiriza ngu ekicunguro nikikugasira iwe nk’omuntu. (Abagaratiya 2:20, 21) Ba n’okwikiriza ngu habw’ekicunguro, Yahwe n’akuganyira ebibi byawe. Ba n’okwikiriza ngu ekicunguro nikihereza iwe nk’omuntu okunihira okw’okwomeera ebiro byona. Ekicunguro kya Yesu kisembo eki Yahwe ahaire iwe nk’omuntu.

17. Habwaki wakugondeze kufoora Yahwe obwirukiro bwawe?

¹⁷ Embuga ez’okwirukiramu nizitukonyera kwetegereza embabazi za Yahwe. Entekaniza enu kuruga hali Ruhanga netwegesa ngu obwomeezi nibwera. Neyongera kutwoleka ngu abagurusi nibasobora kutukonyera, kumanya okwegarukamu nikimanyisa ki, kandi n’omulingo tusobora kukigumya ngu Yahwe atuganyira ebibi byaitu byona. Yahwe omufoire obwirukiro bwawe? Busaho ekikaro kindi kyona nambere tusobora kwiha obulinzi! (Zabuli 91:1, 2) Omu kicweka ekirukwongeraho, nitwija kurora omulingo embuga ez’okwirukiramu zirukutukonyera kwegera hali Yahwe, anyakutaireho ekyokurorraho ekirukukirayo okwoleka obwinganiza hamu n’okuganyira.