1. Okuzina kutukonyera kukora ki?

OMUHANDIIKI w’ebizina ruranganwa akagamba: “Obw’ohurra ebigambo, bikuletera kutekereza. Obw’ohurra endongo, ekuletera kuba n’enyehurra. Baitu obw’ozina, ebigambo bikuhika ha mutima.” Ebizina byaitu byoleka okugonza kandi bihaisaniza Yahwe, Isitwe ow’omu iguru. Bituletera kwirra haihi nauwe. Nahabweki, nikitwanguhira kwetegereza habwaki okuzina kiri kicweka kikuru omu kuramya okw’amananu, obu turukuba nituzina itwenka rundi obu turukuba tuli n’aboruganda na banyaanya itwe.

2, 3. (a) Abamu nibasobora kwehurra bata obu kirukuhika ha kuzinira hamu n’ekitebe omu iraka erya haiguru? (b) Nitwija kugarukamu bikaguzo ki omu kicweka kinu?

² Oyehurra ota obu kirukuhika ha kuzinira hamu n’ekitebe omu iraka erya haiguru? Ohurra nikikuswaza? Omu biikaro ebimu, abasaija nibasobora kuhurra ensoni kuzinira omu maiso g’abantu abandi. Entekereza nk’enu n’esobora kujanjaara omu kitebe kyona, kukira muno kakuba abagurusi baba batarukuzina rundi kakuba baba n’ebintu bindi ebi barukukora omu bwire bw’okuzina.​—Zabuli 30:12.

 ³ Okuzina nakwo kicweka ky’okuramya kwaitu hali Yahwe. Nahabweki titurukugonza kugenda aheru rundi kuferwa ekicweka eky’okuzina omu nso’rokano. Nahabweki, tusemeriire kwekaguza: ‘Nyehurra nta obu kirukuhika ha kuzina omu nso’rokano? Ninsobora kukora ki kakuba mpurra nintiina kuzina omu maiso g’abantu abandi? Kandi ninsobora nta kuzina n’omuhimbo?’

4, 5. Ntekaniza za mulingo ki ez’okuzina ezikaba ziri omu Isareri eyakara?

⁴ Kuruga kara, abarukuramya Yahwe baikaire nibakozesa endongo kukugiza Yahwe. Ekirukusemeza kiri ngu, Abaisareri obu babaga besigwa hali Yahwe, ekicweka eky’okuzina kyabaga kikuru omu kuramya kwabo. Eky’okurorraho, Daudi obu akaba n’akora entekaniza ez’okwombeka yekaru, akatekaniza Abalevi 4000 kukugiza Yahwe n’endongo. Hali banu, 288 bakaba “begesibwe kuzinira Mukama, kandi bona bakaba bali bakugu.”​—1 Ekyebyomubusinge 23:5; 25:7, NW.

⁵ Kuteera endongo n’okuzina nakyo kikaba kicweka kikuru muno omu kuhayo yekaru hali Yahwe. Baibuli n’etugambira ngu: “Kyahika, abatezi bamakondere nabazini obu bateraine hamu, okuimukya iraka limu lyonka eryokukugiza n’okusima Mukama; kandi obu baimukize iraka lyabu hamu namakondere nenyege nebintu ebigamba, bakugiza Mukama . . . ekitinisa kya Mukama kyaijura omu nju ya Ruhanga.” Teramu akasisani omulingo omukoro gunu nk’oku gwagumize okwikiriza kw’Abaisareri!​—2 Ekyebyomubusinge 5:13, 14; 7:6.

6. Ntekaniza ki ez’okuzina ezi Nehemiya yataireho obu akaba ali mulemi wa Yerusalemu?

⁶ Nehemiya ayayebembiire Abaisareri kwombeka buhyaka ebisiika by’orubuga, nauwe akatekaniza Abalevi kuzina n’okuteera endongo. Okuzina kwabo kukalete omuhimbo mwingi ha mukoro gw’okuhayo ebisiika by’orubuga hali Yahwe. Nehemiya akatekaho ebitebe bibiri ebikooto eby’abazini abarukuzina ebizina eby’okusiima. Ebitebe binu eby’abazini bikarubatira eruguru ha bisiika by’orubuga kandi ekitebe kimu kikaraba ha mukono gw’obulyo n’ekindi kyaraba ha mukono gw’emoso kuhikya obu batangatangaine ha kisiika ekiri haihi na yekaru. Abantu bakatokera haiguru kandi amaraka gabo gakahulirwa abantu abakaba bali hara muno. (Nehemiya 12:27, 28, 31, 38, 40, 43) Nitusobora kukigumya ngu Yahwe akasemererwa kuhurra abantu be nibamuzinira n’omuhimbo ebizina by’okumukugiza.

7. Yesu akoleka ata ngu okuzina kikaba nikigenda kuba kintu kikuru omu kuramya okw’Abakristaayo?

⁷ Omu busumi bwa Yesu, okuzina kukaikara kuli kicweka kikuru omu kuramya okw’amananu. Tekerezaho ekyabaireho omu ekiro ekikuru muno omu byafaayo by’abantu. Hanyuma ya Yesu kumara kulya Ekiihuro ekya Mukama Waitu n’abegeswa be, bona bakazina ebizina eby’okukugiza Yahwe.​—Soma Matayo 26:30.

8. Abakristaayo ab’abandize bakatekaho bata ekyokurorraho eky’okukugiza Ruhanga n’ebizina?

⁸ Abakristaayo ababandize bakatekaho ekyokurorraho ekirungi eky’okukugiza Yahwe n’ebizina. Okutasisana n’Abaisareri, abaramizaga Yahwe omu yekaru, Abakristaayo bo baso’rokaniraga omu maka. Amaka ganu gakaba gatarukuzoka kurungi nka Yekaru oku ekaba eri, baitu nabwo ab’oruganda bayekambaga kuzina. Omukwenda Paulo akagambira Abakristaayo bagenzi be ngu: “mwikale nimwegesangana nimugarramungana amaani  na zabuli, n’ebizina ebirukukugiza Ruhanga, n’ebizina eby’omwoyo ebirukuzinwa n’okusemererwa, nimuzinira Yahwe omu mitima yanyu.” (Abakolosai 3:16, NW) Ebizina ebiri omu kitabu kyaitu eky’ebizina bisemeriire kuzinwa n’okusemererwa. Nabyo ‘by’okulya’ ebi ‘omwiru omwesigwa kandi ow’amagezi’ arukutuha omu kasumi akahikire.​—Matayo 24:45.

9. (a) Habwaki abamu nibasobora kutiina kuzinira haiguru n’okusemererwa omu nso’rokano ez’ekitebe n’enkooto? (b) Tusemeriire kuzina tuta ebizina eby’okukugiza Yahwe, kandi nibaha abasemeriire kwebembera? (Rora ekisisani ekiri ha rupapura 3.)

⁹ Nsonga ki ezisobora kukuletera kutiina kuzina? Nikisobora kuba ngu omu ka yanyu rundi nambere orukuruga timukira kuzina. Rundi obw’oyerengesaniza n’abazini abakugu ab’ohurra ha radio rundi ab’orora ha TV, ohurra n’okwatwa ensoni rundi bikutamire. Baitu kuzinira Yahwe ebizina eby’okumukugiza buli bujunanizibwa bwaitu itwena. Nahabweki kwatira ekitabu kyawe ekyebizina haiguru, oimukye omutwe gwawe, kandi ozine n’omuhimbo (Ezera 3:11; soma Zabuli 147:1.) Ebyombeko Eby’Obukama ebimu byoleka ebigambo by’ebizina ha rutimbe, kandi kinu nikisobora kutukonyera kuzina n’iraka erya haiguru. Kandi ekirukusemeza kiri ngu kuzina ebizina eby’Obukama hati nakyo kiri kimu ha bicweka ebiri omu Isomero ery’Obukama ery’abagurusi. Kinu nikyoleka ngu kikuru abagurusi kwebembera omu kuzina obu barukuba bali omu ns’orokano z’ekitebe.

10. Kiki eki tusemeriire kwijuka obu turaba nitutiina kuzina n’iraka erya haiguru?

¹⁰ Abamu batiina kuzina n’iraka erya haiguru habw’okuba batekereza ngu nibaija kutoka muno kukira abandi rundi ngu amaraka gabu tigali marungi. Baitu kitekerezeho. “Tusobya itwena” omu bigambo ebitubaza, baitu eki tikirukututanga kubaza. (Yakobo 3:2)  Nahabweki titusemeriire kuleka amaraka gaitu agatahikiriire kutulemesa kuzinira Yahwe ebizina eby’okumukugiza.

11, 12. Nitusobora tuta kusemeza omulingo turukuzina?

¹¹ Obundi nitutiina habw’okuba titumanyire omulingo tusemeriire kuzina. Baitu haroho ebintu ebi tusobora kukora kusemeza omulingo tuzina. *​—Rora obugambo obuli hansi.

¹² N’osobora kuzina n’iraka ery’amaani kandi erya haiguru kakuba oyega kwikya kurungi. Nk’oku amasanyarazi gasobozesa etaara kwaka, orwoya rwawe narwo nirusobozesa iraka lyawe kurugayo kurungi obw’oba n’obaza rundi n’ozina. N’osemerra kuzina omu iraka ery’okozesa obwoba n’obaza rundi n’osobora n’okulyongeraho. (Rora amagezi agali omu Benefit From Theocratic Ministry School Education, rupapura 181 kuhika 184, hansi y’omutwe “Ikya Kurungi.”) Haroho Baibuli obw’eragira abaheereza ba Yahwe kutokera haiguru “niraka likoto” obu barukuba nibazina ebizina eby’okukugiza.​—Zabuli 33:1-3.

13. Soborra omulingo tusobora kweyongera kuzina tutarukutiina.

¹³ Mukuramya kwawe okweka, lengaho okole ebintu binu: Komamamu ekizina oky’orukukira kugonza. Soma ebigambo omu iraka erirukuhulirwa kandi eritarumu kutiina kwona. Hanyuma y’okubisoma, omu iraka eri lyonyine, yatura ebigambo eby’orukarra rwona otakaikize. Obw’oramara, ozine ebigambo ebi otakeheze ha iraka lyawe. (Isaya 24:14) Iraka lyawe niriija kwikara nilyeyongera amaani, kandi eki kirungi. Otaikiriza eki kikakutinisa rundi kikakuswaza.

14. (a) Okwasamya akanwa kawe nikisobora kita kukukonyera kuzina? (Rora akasanduko “ Kusobora Kweyongera Kusemezamu Omulingo Turukuzina.”) (b) Magezi ki agakukonyiire kumaraho ekizibu ky’iraka?

¹⁴ Kurora wazina omu iraka ery’amaani, osemeriire kulengaho kuba n’omwanya omu kanwa kawe. Nahabweki obw’oraba n’ozina, yasamya akanwa kawe kukira nk’oku oyesama obw’oba n’obaza. Baitu orakora ki kakuba oba oine iraka eritaine maani? Kusobora kuba n’iraka erirungi, nikiwetagisa kusemeza omulingo lirikuhulirwa, eki nikikwetagisa kurora ngu otekaine wena kandi ebinywa byawe tibyeregere. Kakuba oikara n’olengaho kumumuuta nikisobora kukonyera iraka lyawe. Kandi kakuba iraka lyawe liba liri rya haiguru muno? Lengaho okutagumanganiza ebinywa byawe eby’omumiro, eki nikiija kuletera iraka  lyawe kutereega, ekisobora kuliretera kuba lya hansi.

15. (a) Kirango ki ekyarangirwe ha ruso’rokano orw’omwaka 2016? (b) Habwaki ekitabu ky’ebizina kikahindurwamu?

¹⁵ Buli muntu ayabaireho ha ruso’rokano orw’omwaka 2016 akasemererwa ow’Oruganda Stephen Lett ow’Akatebe Akalemi obu yaturukize ekitabu eky’ebizina ekihyaka ekirukwetwa “Sing Out Joyfully” to Jehovah. Kusigikirra nk’oku ow’Oruganda Lett yasoboroire, emu ha nsonga habwaki tukaba nitwetaaga ekitabu ky’ebizina ekihyaka eri habwokuba Baibuli ya New World Translation of the Holy Scriptures ekahindurwamu. Ebigambo by’ebizina ebimu bikahindurwa habwokuba ebigambo ebi tibikyakozesebwa omu Baibuli ya New World Translation. Ekintu ekindi, ebizina ebindi ebirukubaza ha mulimo gw’okutebeza hamu n’ekicunguro bikongerwa omu kitabu kinu ekihyaka. Okwongererezaaho, habwokuba kuzina kikuru omu kuramya kwaitu, Akatebe Akalemi kakagonza katurukye ekitabu ekirukuzoka kurungi. Eky’esweko ky’ekitabu nikisisanira kimu n’ekya Baibuli eya New World Translation.

16, 17. Mpinduka ki ezindi ezakozerwe omu kitabu eky’ebizina ekihyaka?

¹⁶ Kurora twayanguhirwa kukozesa ekitabu kinu, ebizina bisorozibwe kusigikirra ha ekibirukubazaaho. Ekyokurorraho, ebizina 12 ebirukubanza nibibazaho Yahwe, ebizina 8  ebirukwongeraho nibibazaaho Yesu n’ekicunguro. Ha kutandika kw’ekitabu haroho orukarra orw’ebizina n’ekibirukubazaho. Kinu nikikonyera muno. Ekyokurorraho nikisobora kukonyera ow’oruganda obwarukuba naserra ekizina ekirazinwa atakahaire orubazo rwa boona.

¹⁷ Kurora buli omu yazina kuruga ha mutima, ebigambo ebimu bikahindurwamu nukwo amakuru agali omu bizina geyongere kwetegerezebwa kurungi. Kandi ebigambo ebitakira kukozesebwa bikaihwamu hatekwamu ebirukukira kukozesebwa. Kandi kikaba nikyetagisa kuhindura omutwe gw’ekizina “Linda Omutima Gwawe” kuba “Tulinde Emitima Yaitu.” Habwaki? Habw’okuba kara omuntu obu yazinaga ebigambo by’ekizina kinu, yasisanaga nk’arukuragira abantu abandi eky’okukora. Kinu kikaba nikisobora kutabaijura abahyaka, abato hamu na banyaanya itwe omu nso’rokano ez’ekitebe hamu n’enkooto. Nahabweki omutwe n’ebigambo eby’ekizina bikahindurwamu.

18. Habwaki tusemeriire kwega kuzina ebizina ebiri omu kitabu kyaitu ekihyaka? (Rora obugambo obuli hansi.)

¹⁸ Ebizina ebirukukira obwingi ebiri omu kitabu “Sing Out Joyfully” to Jehovah biri omu mulingo gw’esaara. Ebizina binu nibisobora kukukonyera kugambira Yahwe enyehurra yawe. Ebizina ebimu nibisobora kutwekambisa “okugonzangana, nokukora engeso ezisemiire.” (Abaheburaniya 10:24) Nitugonza kumanya omulingo ekizina kirukuzinwa n’ebigambo byakyo hamu n’omulingo ebigambo birukuhonderana. Kinu nitusobora kukikora kakuba tuhuliriza ebizina eby’amaraka ag’ab’oruganda nabanyaanya itwe. Ebizina eby’amaraka nosobora kubiiha ha mukura gwaitu ogwa jw.org. Obw’orayemanyiza kuzina ebizina binu omu ka yawe, noija kwega kubizina otarukutiina kandi n’omuhimbo. *​—Rora obugambo obuli hansi.

19. Bona abali omu kitebe nibasobora bata kuramya Yahwe?

¹⁹ Ijuka ngu okuzina kikuru muno omu kuramya kwaitu. Guli mulingo gw’amaani ogu tusobora kwolekeramu Yahwe ngu nitumugonza kandi nitumusiima byona ebi atukoliire. (Soma Isaya 12:5.) Obw’ozina n’obutagasi, oyekambisa abandi nabo kukora nikyo kimu. Abantu boona omu kitebe, kababe bato, abakuzire rundi bahyaka omu mananu, nibasobora kuramya Yahwe omu mulingo gunu. Nahabweki otatiina kuzina n’omutima gwawe gwona. Yorobera oburagirizi obw’omuhandiki wa zabuli ayagambire ngu: “Muzinire Yahwe” ego, leka tuturukye iraka ery’okusemererwa​—Zabuli 96:1, NW.