1, 2. (a) Abaheereza ba Ruhanga balindiriire mpera ki? (b) Kiki ekisobora kutukonyera kwikaza amaiso gaitu ha mpera? (Rora ekisisani ekiri ha rupapura 27)

ABAKRISTAAYO abaseserweho amagita baine okunihira okw’omuhendo. Balindiriire kugenda omu iguru. Omukwenda Paulo akeeta okunihira kunu “empera eyokweta kwa Ruhanga okwahaiguru.” (Abafiripi 3:14) Obu baligenda omu iguru, balirema hamu na Yesu Kristo omu Bukama bwe nukwo bakorre hamu nauwe omu kukonyera abantu kufooka abahikiriire. (Okusuku’rwa 20:6) Kunu ka kunihira okurungi muno! Ab’Entaama ezindi birindiriire ekisembo eky’embaganiza. Balindiriire kwikara omu nsi empyaka, kandi okunihira kunu kubaletera okusemererwa kwonyini!​—2 Petero 3:13.

² Paulo akaba n’agonza kukonyera Abakristaayo bagenzi be abaseserweho amagita okutunga empera yabo. Akabagambira: “Mutekerezege ebyahaiguru.” (Abakolosai 3:2) Bakaba baine kuta omutima gwabo ha kunihira kwabo okw’omuhendo  okw’okwikara omu iguru. (Abakolosai 1:4, 5) Kutekereza ha migisa ya Yahwe kikonyera abaheereza be boona kwikaza amaiso gabo ha mpera. Kinu kitukonyera katube nitunihira kugenda omu iguru rundi kwikara omu nsi.​—1 Abakolinso 9:24.

3. Paulo akahabura Abakristaayo hali ki?

³ Paulo akongera kuhabura Abakristaayo ha kabi akakaba nikasobora kubalemesa kutunga empera yabo. Nk’ekyokurorraho, akatererra Abakolosai kwerinda Abakristaayo ab’ebisuba abakaba nibatekereza ngu kuhondera Ebiragiro bya Musa omu kiikaro ky’okwikiririza omu Kristo kikaba nikisemeza Yahwe. (Abakolosai 2:16-18) Paulo akongera yabazaho akabi ak’omulingo gundi naitwe akasobora kutulemesa kutunga empera yaitu. Akasoborra omulingo tusobora kurwanisa okwegomba okubi, n’omulingo tusobora kukwatamu obutetegerezangana hagati yaitu n’ab’oruganda rundi n’abamu maka gaitu. Obuhabuzi bwa Paulo nibusobora kutukonyera omu kasumi kanu. Hati katubazeho okuhaburwa okurungi okurukusangwa omu bbaruha ye hali Abakolosai.

4. Habwaki okwegomba kw’okusihana kusobora kutulemesa kutunga empera yaitu?

⁴ Hanyuma y’okwijukya Abakristaayo bagenzi be hali okunihira kwabo okw’omuhendo, Paulo akagamba: “Mufese ebicweka byanyu ebyahansi, obusihani, nobugwagwa, nokwegomba okwensoni, nomukoijo omubi, nokwegomba.” (Abakolosai 3:5) Okwegomba okw’obusihani nikusobora kuba kw’amaani nikutuletera kusiisa enkoragana yaitu na Yahwe, kandi nitwesanga tutakyaine okunihira okw’ebiro eby’omu maiso. Ow’oruganda omu ayasihaine kandi hanyuma y’akasumi yagaruka omu kitebe akagamba ngu okwegomba kw’okuterana kukamukira amaani yayesanga agwire ira omu nsobi.

5. Nitusobora kwerinda tuta obu twesanga omu nyikara erukusobora kutunaga omu kabi?

⁵ Kukira muno tusemeriire kwerinda kakuba twesanga omu nyikara erukusobora kutwohya kucwa ebiragiro bya Yahwe. Ekyokurorraho, abarukujumbirangana basemeriire kweteraho ensaro nambere basemeriire kugarukira obu kirukuhika ha bikorwa nk’okukwatangana, kunywegerangana, rundi kuba bonka. (Enfumo 22:3) Haroho akabi k’emiringo nyingi akatusobora kugwamu obu turukuba tugenzere kukorra emirimo omu biikaro ebindi rundi obu turukuba nitukora n’omuntu ou tutarukusisana nauwe omu buhangwa. (Enfumo 2:10-12, 16) Akabi kanu nosobora kukerinda ota? Gambira abantu nk’oku oli omu ha Bakaiso ba Yahwe. Oyetwaze kurungi, kandi otebwa ngu kuzanira ha bitekerezo by’omuntu nikisobora kukurugiramu akabi. Kandi obu turayehurra twine amasu rundi enaku, obu nubwo obwire bw’okuba bulindaara. Nitusobora kwesanga twikiriize omuntu ondi kutuhumuza. Habw’okugonza muno kuhumuzibwa, nitusobora kwesanga twikiriize omuntu ondi wena anyakutwolekere ngu natufaho. Kinu kintu ky’akabi. Kakuba otunga amasu rundi enaku, otakora ekintu kyona ekisobora kukulemesa kutunga empera yaawe. Tunga obukonyezi kuruga omu b’oruganda n’abanyaanya itwe.​—Soma Zabuli 34:18; Enfumo 13:20.

6. Kiki ekitusemeriire kwijuka obu turukuba nitukomamu eby’okwesemeza?

⁶ Kusobora kufisa okwegomba okubi, kirungi twetantale eby’okwesemeza ebirukuhaisaniza obusihana. Biro binu, eby’okwesemeza  ebirukukira obwingi nibisisanira kimu n’ebintu ebyabaireho omu Sodomu na Gomora. (Yuda 7) Biro binu, eby’okwesemeza nibyoleka ngu obusihani kintu kya buli kiro kandi ngu tikiine akabi. Nahabweki, tusemeriire kuba bulindaara. Titusemeriire kwikiriza bwikiriza buli kwesemeza kwona okw’ensi. Baitu tukomemu eby’okwesemeza ebitatulemese kutunga empera yaitu.​—Enfumo 4:23.

7. Bizibu ki ebisobora kubaho omu kitebe Ekikristaayo?

⁷ Mugisa gw’amaani kuba omu kitebe Ekikristaayo. Obu tugenda omu nso’rokano, twega Ekigambo kya Ruhanga, kandi tugarramu ngana amaani. Kinu kitukonyera kwikaza amaiso gaitu ha mpera. Baitu obwire obumu nitusobora kutunga obutetegerezangana n’ab’oruganda rundi n’abanyaanya itwe. Kakuba tutagonjoora ensonga, eki nikisobora kuleta enobi. Ebizibu bya mulingo gunu nitusobora kubimaraho tuta?​—Soma 1 Petero 3:8, 9.

8, 9. (a) Miringo ki erukwija kutukonyera kutunga empera? (b) Kiki ekiratukonyera kulinda obusinge kakuba Omukristaayo mugenzi waitu atubihiza?

⁸ Nitusobora kukora ki kurora ekiniga tikyatulemesa kutunga empera yaitu? Paulo n’atutererra ati: “Nukwo mujwale nkabakome ba Ruhanga, abarukwera kandi abarukugonzebwa, omutima gwembabazi, noburungi, nobuculezi, nokwebundaza, nokugumisiriza; nimucule’rangana, kandi nimuganyirangana inywenka [nobuharaaba] haroho wena anyina ekigambo hali mutahiwe: nka Kristo nauwe okuyaganyiire inywe nukwo nainywe mukole muti: hali ebi byona mujwale nokugonzangana, baitu nukwo kurukugumya [obumu].”​—Abakolosai 3:12-14.

⁹ Okugonza n’embabazi nibisobora kutukonyera kuganyira bagenzi baitu. Kakuba omuntu akora rundi abaza ekintu kikatusaaliza, tulengeho kwijuka naitwe obu twabalize rundi obu twakozere ekintu kyabihiza abantu abandi baitu batuganyira. Nitusiima okugonza n’embabazi ebi batwoleka. (Soma Omugambizi 7:21, 22.) Nitusiima muno habwokuba itwena Kristo atuteraniize omu bumu. (Abakolosai 3:15) Itwena Ruhanga ou tugonza ali omu, obutumwa obu tutebeza nubwo bumu, kandi n’ebizibu ebirukukira obwingi ebi tutangana nibisisana. Obu turaaba n’embabazi, okugonza hamu n’okuganyirangana, obumu nibwija kweyongera omu kitebe kandi nikiija kutukonyera kwikaza amaiso gaitu ha mpera.

10, 11. (a) Habwaki kibi kuba n’ihali? (b) Nitusobora kukora ki kurora ihali tiryatulemesa kutunga empera?

¹⁰ Ihali nirisobora kutulemesa kutunga empera. Haroho eby’okurorraho omu Baibuli ebirukwoleka omulingo ihali lireta akabi. Ekyokurorraho, ihali likaletera Kaini kwita mugenzi we Aberi. Kora, Dasani, hamu na Abiramu bakajemera Musa habwokuba bakamukwatirwa ihali. Omukama Saulo akakwatirwa Daudi ihali yalengaho kumwita. Baibuli ehikire obw’egamba: “Baitu nambere haroho ihali nokukungana, nuho haba okwetabura nokukora kwona okubihire.”​—Yakobo 3:16.

¹¹ Obu turayekamba kwoleka okugonza kwonyini n’embabazi, titurukwija kukwatwa bwangu ihali. Baibuli egamba: “Okugonza nikugumisiriza, kuba nembabazi; okugonza tikuba nihali.” (1 Abakolinso 13:4) Obu turaaba nitugonza kwetantara ihali, tusemeriire kurora ensonga nk’oku Yahwe azirora.  Ab’oruganda n’abanyaanya itwe tusemeriire kubarora nk’omubiri gumu, kandi omubiri ogu nikyo ekitebe. Baibuli egamba: “Ekicweka kimu obu kiba nikisemererwa, ebicweka byona bisemere’rwa hamu.” (1 Abakolinso 12:16-18, 26) Kakuba omu ha b’oruganda bagenzi baitu ahikwaho ekintu kirungi, titumukwatirwa ihali baitu tusemererwa hamu nauwe. Tekereza ha kyokurorraho ekirungi mutabani wa Saulo arukwetwa Yonasani eki yatuteriireho. Yonasani atakwatwe ihali Daudi obu yafoirwe mukama omu kiikaro kye. Kwoleka ngu atamukwatirwe ihali, akamugarramu amaani kandi akamusagika. (1 Samuiri 23:16-18) Naitwe nitusobora kwoleka okugonza n’embabazi nka Yonasani?

12. Baibuli n’eha buhabuzi ki oburukusobora kukonyera eka kutunga empera?

¹² Kakuba buli muntu omu ka ahondera emisingi ya Baibuli, eka niija kuba n’obusinge hamu n’okusemererwa kandi niija kutunga empera. Paulo akaha buli ka amagezi ganu: “Inywe abakazi mworoberege baiba inywe nkokukisemeriire omu Mukama waitu. Inywe abasaija mugonzege bakazi banyu, mutababihi’rwa. Inywe abana abato muhurrege abazaire omu byona, baitu nikyo kirukusemera omu Mukama waitu. Baisebo, mutabihiza abana banyu, baleke okugwa ensazi.” (Abakolosai 3:18-21) Obuhabuzi bunu nibusobora kugasira boona omu maka.

13. Munyaanya itwe Omukristaayo n’asobora ata kukonyera iba kuheereza Yahwe?

¹³ Nosobora kuba oli munyaanya itwe anyakuswirwe omusaija atarukuheereza Yahwe. Orakora ki obworarora ngu tarukukutwaza omu mulingo ogusemeriire? Notekereza kukwatwa ekiniga n’omukunganiza kiragonjoora ensonga? Kakuba omukunganiza  hanyuma akoroba, notekereza eki kiramuletera kugonza kuheereza Yahwe? Nikisobora kuguma. Baitu kakuba omutamu ekitiinisa nk’omutwe gw’eka, nikisobora kukonyera eka yaawe kubamu obusinge kandi nikisobora kuhaisa Yahwe ekitiinisa. Ekyokurorraho kyawe ekirungi nikisobora n’okuletera baro kugonza kuheereza Yahwe nukwo inywena nimumalirra mutungire empera.​—Soma 1 Petero 3:1, 2.

14. Nyineka Omukristaayo asemeriire kukora ki kakuba mukazi we atali muheereza wa Yahwe aba atarukumutamu ekitinisa?

¹⁴ Rundi oli w’oruganda kandi mukazi waawe tali muheereza wa Yahwe. Nosobora kukora ki kakuba aba atarukukutamu ekitiinisa? Kakuba olengaho kumwoleka obusobozi bwawe kuraba omu kumucomera, arakutamu ekitiinisa? Nangwa! Yahwe n’agonza obe nyineka w’engonza arukuhondera ekyokurorraho kya Yesu. (Abefeso 5:23) Yesu, nk’omutwe gw’ekitebe, aikara n’agumisiriza kandi nayoleka okugonza. (Luka 9:46-48) Kakuba ohondera ekyokurorraho kya Yesu, obwire nibusobora kuhika mukazi waawe nawe ahurre nagonza kuheereza Yahwe.

15. Nyineka Omukristaayo n’asobora kwoleka ata ngu n’agonza mukazi we?

¹⁵ Yahwe n’atererra abanyineka ati: “Mugonzege bakazi banyu, mutababihi’rwa.” (Abakolosai 3:19) Nyineka ow’okugonza atamu mukazi we ekitiinisa. Omu mulingo ki? Ahuliriiza entekereza ya mukazi we kandi amwoleka ngu eby’arukubaza bikuru haluwe. (1 Petero 3:7) Nobukiraaba ngu tasobora kukora buli kimu mukazi we arukugamba, kumuhuliiriza nikisobora kumukonyera kukora encwamu ez’amagezi. (Enfumo 15:22) Nyineka ow’okugonza tahambiriza mukazi we kumutamu ekitiinisa. Oihireho alengaho kukora ebintu ebiramuhaisa ekitinisa. Nyineka obwagonza mukazi  we n’abaana be, kibaletera kutunga okusemerererwa omu kuheereza Yahwe kandi nikisobora kubarugiramu kutunga empera ey’obwomeezi.

16, 17. Ensinganto, kiki ekisobora kukukonyera kutakwatirwa abazaire bawe ekiniga kingi?

¹⁶ Nosobora kuba oli nsingaanto norora abazaire baawe batarukukwetegereza rundi nibakutaho ebiragiro bingi. Kinu nikisobora kukubihiza nikikuletera n’okwekaguza obu kiraaba kikusemeriire kuheereza Yahwe. Baitu kakuba oruga hali Yahwe, noija kwerorra wenka ngu busaho omuntu weena omu nsi arukukugonza kukira abazaire baawe n’abanywani baawe ab’omu kitebe.

¹⁷ Banza otekerezoho kinu: Abazaire baawe obu baraaba batakuhabwire, oramanya ota ngu mali nibakufaho? (Abaheburaniya 12:8) Mananu ngu tibahikiriire, nahabweki nibasobora kukuhabura omu mulingo ogurakubihiza. Baitu eki otakitaho omutima. Lengaho kumanya ensonga habwaki bakozere rundi babalize ekintu kya mulingo ogu. Lema enyehurra yaawe, kandi otabatabukira. Ekigambo kya Ruhanga kigamba: “Akehya ebigambobye nuwe anyina okumanya, Nogu anyina omwoyo ogurukufuka nuwe ayetegereza.” (Enfumo 17:27) Wekambe kufooka muntu akuzire omu by’omwoyo ow’aikiriza kandi ahondera obuhabuzi omu mulingo gwona ogu buhairwemu. (Enfumo 1:8) Otebwa ngu kuba n’abazaire abarukuhereza Yahwe mugisa gw’amaani. Nibagonza kukukonyera kwomerra ebiro n’ebiro.

18. Habwaki ocwiremu kwikaza amaiso gaawe ha mpera?

¹⁸ Tube nitunihira kugenda omu iguru, rundi kwikara omu nsi, itwena tusemeriire kulinda n’ekihika obwomeezi oburungi ebw’ebiro eby’omu maiso. Okunihira kwaitu nikwija kuhikirra. Okunihira kunu nikusigikirra ha murago gw’Omuhangi waitu ayagambire ngu: “Ensi eriijura okumanya Mukama.” (Isaya 11:9) Omu bwire obutali bwa hara, buli muntu omu nsi n’aija kuba nayegesebwa Ruhanga. Enu eri mpera ei tusemeriire kukolerra. Obwire bwona oikalege noijuka Yahwe ekyakuraganiize, kandi otaleka ekintu kyona kukulemesa kutunga empera yaawe!