1. Yesu akabazaho n’abegeswa be isomo ki erikuru ha kiro kye eky’okumalirra omu nsi?

YESU obwakaba ali n’abegeswa be ha kiro eky’okumalirra atakafiire, akabazaho ensonga y’okugonza haihi emirundi 30. Akagambira abegeswa be ngu bakaba basemeriire ‘kugonzangana.’ (Yohana 15:12, 17) Okugonza kwabo kukaba nikugenda kuba kwembaganiza muno kuletere n’abantu kumanya ngu baali bahondezi ba Kristo ab’amananu. (Yohana 13:34, 35) Okugonza Yesu okuyabalizeho tikuli kw’okubaza bubaza omu bigambo; guli mulingo ogw’okwefereza. Yesu akagamba ati: “Busaho anyakuina okugonza kwingi okurukukira kunu, omuntu okuhayo obwomezibwe habwenganjanize. Inywe muli nganjani zange, obumukora ebimbaragiire.”​—Yohana 15:13, 14.

2. (a) Abaheereza ba Yahwe omu kasumi kanu nibamanywa kuba bantu abakora ki? (b) Bikaguzo ki ebiturukwija kugarukamu omu kicweka kinu?

² Abakaiso ba Yahwe omu kasumi kanu nubo bamanyirwe kuba n’okugonza okw’amananu, okw’okwefereza, kandi nubo baine obumu obw’amaani. (1 Yohana 3:10, 11) Ihanga rundi orulimi rw’omuntu,  ekiikaro nambere turukuruga, rundi omulingo omuntu akuziibwe titubyebembeza nk’ebintu ebikuru. Omu nsi yoona, abaheereza ba Yahwe bolekangana okugonza kwonyini. Habwaki okugonza nikwetagisibwa muno omu kasumi kanu? Yahwe na Yesu basoboire bata kukozesa okugonza kutugarramu amaani? Kandi okugonza kunu nitusobora kukwoleka tuta obuturukuba nituhumuza kandi nitugarramu abandi amaani?​—1 Abakolinso 8:1.

3. Ebiro binu “ebyakabi kaingi” bikwasireho bita abantu?

³ Ebiro ebiturumu nibyetwa “ebyakabi kaingi” kandi obwomeezi bwijwire “kutalibana nokutuntura.” (2 Timoseo 3:1-5; Zabuli 90:10) Habw’okubonabona muno, abantu baingi bahurra obwomeezi bubatamire. Buli mwaka, abantu abarukuhingura omu 800,000 nubo beyita, kandi buli hanyuma y’obutikitiki 40, habaho omuntu arukweyita. Eky’enaku, haroho n’Abakristaayo bagenzi baitu abatungire ebizibu bamalirra beyisire.

4. Bantu ki ababazibwaho omu Baibuli abahuliire nibagonza kufa?

⁴ Omu busumi bwa kara, abamu ha baheereza ba Ruhanga abesigwa bakaraba omu bizibu bingi bahika n’okugonza kufa. Ekyokurorraho, Yobu akatunga oburumi bwingi yahika n’okugamba ngu: “Ninuga obwomezi bwange; tindukwenda okwomera ebiro byona.” (Yobu 7:16; 14:13) Yona akabihirwa muno yahika n’okugamba ati: “Nukwo hati bunu nkwesengeriize, ai [Yahwe], onyiheho obwomezi bwange; baitu hakire nfe ntaba mwomezi.” (Yona 4:3) Nabbi Eriya obuyayehuliire ahoirwemu amaani akagamba ati: “Kiramara; hati bunu, ai [Yahwe], ihaho obwomezi bwange.” (1 Ekyabakama 19:4) Baitu Yahwe akagonza abaheereza be banu abesigwa kandi akabagondeza obwomeezi. Atabajunaane habw’okwehurra bati. Oihireho akabakonyera kwongera kugonza obwomeezi bwabo nukwo beyongereyo kumuheereza.

5. Habwaki tusemeriire kwoleka okugonza hali ab’oruganda n’abanyaanya itwe?

⁵ Biro binu, Abakristaayo bagenzi baitu abarukukira obwingi nibatunga obulemeezi bwingi kandi nibagonza tuboleke okugonza. Abamu nibasekerezebwa rundi nibahiganizibwa. Abandi obubaba bali nambere barukukorra, abantu babendereza rundi babazaho kubi. Kandi abandi bajwahire habwokuba bamara esaaha nyingi nibakora, rundi emirimo yabo erumu okutalibana kwingi. Abandi baine ebizibu by’amaani omu maka gabo. Nibasobora kuba bali omu buswere n’omuntu atarukuramya Yahwe kandi arukwikara nabajunaana obwire bwona. Habw’ebizibu nka binu, baingi nibehurra batakyaine amaani goona kandi nibasobora kutandika n’okwerora nkabataine omugaso. Nooha asobora kubakonyera?

6. Okugonza kwa Yahwe kugarramu kuta amaani abaheereza be?

⁶ Yahwe nagumya abaheereza be ngu nabagonza kandi ngu naija kubagonza ebiro byona. Teramu akasisani orole omulingo Abaisareri bayehuliremu Yahwe obuyabagambire ngu: “Okaba oli womuhendo omu maiso gange, kandi owekitiinisa, kandi nkakugonza,” kandi “Otatina; baitu ndi hamu naiwe”! (Isaya 43:4, 5) Tukimanyire ngu buli omu hali itwe w’omuhendo hali Yahwe. * (Rora obugambo obuli hansi.) Baibuli etugarramu eti amaani: “Owamani alijuna: alikukyanganukiraho nokusemererwa.”​—Zefaniya 3:16, 17.

7. Okugonza kwa Yahwe nikusisana kuta n’okw’omukazi arukwonkya? (Rora ekisisani ekiri ha rupapura 8.)

 ⁷ Yahwe naraganiza kugarramu amaani n’okuhumuza abaheereza be abaine ebizibu bya buli mulingo. Akagamba ati: “Mulyonkaho; mulihekwa ha rubaju, muligurukibwagurukibwa ha maju. Nkomwana okwahumuzibwa nyina, nukwo ndihumuza inywe.” (Isaya 66:12, 13) Tekerezaho omulingo omwana akyahimbwa ayehurra nyina obwamuhimba rundi obwazana nauwe! Yahwe nakugondeza kimu kandi nagonza ohurre oine obulinzi. Okigumye ngu oli w’omuhendo hali Yahwe.​—Yeremiya 31:3.

8, 9. Okugonza kwa Yesu nikusobora kutugarramu amaani omu mulingo ki?

⁸ Ensonga endi erukutugumya ngu Yahwe atugonza niyo enu: “Ruhanga nukwo yagondeze ati ensi, nahayo Omwanwe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.” (Yohana 3:16) Yesu kwehayo kutufeera nikitugumya ngu nauwe atugonza, kandi okugonza kwe kutugarramu amaani. Baibuli egamba ngu “obujune” rundi “emihito” tibisobora ‘kutubaganiza ha kugoza kwa Kristo.’​—Abarumi 8:35, 38, 39.

⁹ Haroho obututunga ebizibu ebitumaramu amaani omu mubiri rundi omu bitekerezo, rundi ebitumaraho kusemererwa kwaitu omu kuheereza Yahwe. Baitu kakuba twijuka okugonza okw’amaani Kristo okwatwiniire, nitwija kutunga amaani tweyongere kugumisiriza. (Soma 2 Abakolinso 5:14, 15.) Okugonza Yesu atwiniire kutukonyera kuba n’ekihika ky’okwikara tuli bomeezi n’okweyongera kuheereza Yahwe. Okugonza kunu kutukonyera okutahwamu amaani n’obutwakuba nitubonabona habw’ebigwererezi, okuhiganizibwa, okwetuntura rundi ebintu obubitatugendera kurungi.

10, 11. Nooha aine obujunanizibwa bw’okugarramu ab’oruganda n’abanyaanya itwe amaani? Soborra.

¹⁰ Ekintu ekindi Yahwe ekyakozesa kutwombeka n’okugonza kwe nikyo ekitebe. Obutugonza ab’oruganda n’abanyaanya itwe, tuba nitwoleka ngu nitugonza Yahwe. Tukora kyona ekirukusoboka kukonyera ab’oruganda bagenzi baitu kumanya ngu b’omugaso kandi ngu Yahwe abagonza. (1 Yohana 4:19-21) Omukwenda Paulo akahandiika n’agamba ati: “Muhumuzanganege inywenka, kandi mwombekege inywena, omuntu wena omutahiwe, nkokumurukukora.” (1 Abasesalonika 5:11) Gunu tiguli mulimo gw’abagurusi b’ekitebe bonka. Buli omu haliitwe nasobora kuhondera ekyokurorraho kya Yahwe na Yesu nukwo ahumuze ab’oruganda n’abanyaanya itwe.​—Soma Abarumi 15:1, 2.

¹¹ Abamu omu kitebe abenuubire rundi abetuntwire muno nikisobora kubetagisa kukonyerwa abakugu n’okutunga emibazi y’okubakonyera. (Luka 5:31) Abagurunsi n’Abakristaayo abandi omu kitebe bakimanyire ngu n’obubaraaba batali badakitaali, obukonyezi n’okuhumuza okubaha bikuru muno. Itwena nk’Abakristaayo omu kitebe nitwekambisibwa tuti: “Mwekambisege abobugara omu mutima, musagikege abatanyina amani, mugumisirizege bona.” (1 Abasesalonika 5:14) Tulengeho kumanya omulingo ab’oruganda bagenzi baitu barukwehurra. Tubagumisirize kandi obubaraaba bahoirwemu amaani tubaze nabo omu mulingo ogurabahuumuza. Iwe nk’omuntu, olengaho kugarramu abandi amaani? Nosobora kukora ki kurora wayeyongera kuba muntu arukuhuumuza kandi arukugarramu abandi amaani?

12. Ha ekyokurorraho ky’omuntu ayagarwirwemu amaani habw’okugonza kw’ekitebe eky’akaba arumu.

¹² Munyaanya itwe kuruga Bulaaya nagamba  ati: “Obwire obumu nyijwamu ebitekerezo by’okweyita, baitu ekirungi kiri ngu ntunga obusagiki bwingi kandi kinu kinkonyera kutakora ekintu kinu. Ekitebe ekindumu kijunire muno obwomeezi bwange. Ab’oruganda n’abanyaanya itwe baikara nibangarramu amaani kandi nibanyoleka okugonza. Nobukiraaba ngu bake muno abamanyire ngu nyine ekizibu ky’okwenuuba, ekitebe kyona kiikara kiri ha rubaju rwange kunkonyera. Haroho ow’oruganda na mukazi we abali nk’abazaire bange omu by’omwoyo. Bandolerra kurungi kandi baikara betegekere kukonyera ha bwire bwona obundukuba ningonza obukonyezi.” Mananu ngu abantu boona tibasobora kukuha obukonyezi oburukwingana. Baitu itwena twine ekitusobora kukora kusagika ab’oruganda n’abanyaanya itwe. * (Rora obugambo obuli hansi.)

13. Nitusobora kuhumuza tuta bagenzi baitu?

¹³ Ba muntu arukuhuliiriza kurungi. (Yakobo 1:19) Twoleka okugonza obutuhuliiriza abandi kandi tukaboleka ngu nitukwatwaho. Kozesa ebikaguzo omu mulingo gw’embabazi kumanya omulingo mugenzi wawe arukwehurramu. Naija kumanya ngu n’omufaaho, kandi nasobora n’okukirorra ha buso bwawe. Obwaraaba nakusoborra, muleke eyesoborreho omulingo arukwehurra otamucwire akalimi. Obw’orahuliiriza kurungi, noija kumwetegereza kurungi kandi nosobora kumuletera kukwesiga. Kandi nauwe nikiija kumwanguhira kuhuliiriza eky’oramugambira obw’orukuba nolengaho kumukonyera. Obworayoleka abandi ngu nobafaaho mali, noija kusobora kubahumuza.

14. Habwaki tutasemeriire kuba bantu abarukujunaana?

¹⁴ Otaba muntu arukujunaana. Abantu abanyakwenubire beyongera kwehurra kubi obubakimanya ngu nitulengaho kubajunaana. Kakuba kinu kibaho, tikirukwija kutwanguhira kumukonyera. “Haroho ekirukwanguhiriza okugamba nkokutema okwa busitama: baitu orulimi orwabamagezi bwomezi.” (Enfumo 12:18) Nobukiraaba ngu nitusobora kuba tutakigenderiire kukora kubi omuntu anyakwenuubire kuraba omu bigambo byaitu, nitusobora kwesanga tukozere kubi omuntu kakuba tubaza tutabandize kwecumitiriza ha bigambo byaitu. Kurora twagumya mugenzi waitu, twine kumuletera kwehurra ngu nitulengaho kwetegereza enyikara eyarumu.​—Matayo 7:12.

15. Kikwato ki eky’omuhendo ekitusobora kukozesa kuhuumuza abandi?

¹⁵ Kozesa Ekigambo kya Ruhanga kuhuumuza abandi. (Soma Abarumi 15:4, 5.) Baibuli ekaruga hali “Ruhanga owokugumisiriza, owokuhumura,” nikyo turukurorra ngu erumu ebigambo bingi ebirukuhumuza. Twine n’ebitabu nka Watch Tower Publications Index hamu na Research Guide for Jehovah’s Witnesses. Kukozesa ebikwato binu nikisobora kutukonyera kutunga ebyahandiikirwe n’ebitabu ebitusobora kukozesa kuhumuza n’okugarramu amaani Abakristaayo bagenzi baitu.

16. Miringo ki eratukonyera kugarramu amaani omuntu anyakwenubire?

¹⁶ Twaza omuntu mporampora kandi n’obwegendereza. Yahwe nuwe “Isitwe owokuganyira, kandi Ruhanga owokuhumuza kwona,” kandi ayoleka abaheereza be embabazi nyingi muno. (Soma 2 Abakolinso 1:3-6; Luka 1:78;  Abarumi 15:13) Paulo akatuteraho ekyokurorraho kirungi ha nsonga enu habwokuba akegera hali Yahwe. Akahandika ati: “Tukaba tuli baculezi hagati omulinywe, nkomulezi okwalinda abanabe wenka: nukwo obutwabaganzire muno tukasemererwa okutabaha enjiri ya Ruhanga yonka, baitu nobwomezi bwaitu itwenka, baitu mukaba nimugonzebwa itwe.” (1 Abasesalonika 2:7, 8) Obutukwaza abandi n’obwegendereza nk’oku Yahwe akora, nitusobora kuha Omukristaayo mugenzi waitu okuhumura kwonyini okwabaire nasaba Yahwe!

17. Bagenzi baitu tusemeriire kubarora omu mulingo ki oguratukonyera kubagarramu amaani?

¹⁷ Otatekereza ngu ab’oruganda bagenzi bawe bahikiriire. Rora ebintu nk’oku biri. Obworanihirramu Abakristaayo bagenzi baawe obuhikiriire, ebintu tibirukwija kukugendera kurungi. (Omugambizi 7:21, 22) Ijuka ngu Yahwe tatunihirramu kuba ekitutali. Nahabweki tusemeriire kugumisirizangana. (Abefeso 4:2, 32) Titwakugondeze kuletera ab’oruganda bagenzi baitu kwehurra ngu ekibarukukora tikirukumara, rundi titwakugondeze kubalengesaniza n’abandi. Oihireho tubagarramu amaani kandi tubagambira ebirungi ebibarukukora. Ekintu kinu niija kubakonyera kutunga okusemererwa omu buheereza bwabo hali Yahwe.​—Abagaratiya 6:4.

18. Habwaki tusemeriire kwombeka abandi n’okugonza?

¹⁸ Buli muheereza wa Yahwe weena w’omuhendo hali Yahwe na Yesu. (Abagaratiya 2:20) Ab’oruganda n’abanyaanya itwe tubagonza muno, nahabweki tusemeriire kubatwaza n’obwegendereza. “Tuhonderege ebyobusinge, nebyokwekambisangana.” (Abarumi 14:19) Mali katulindiriire ensi empyaka ey’etalibamu ekintu kyona ekirukutumaramu amaani! Haliba hatakyaroho endwara, kandi haliba hatakyaroho obulemu. Ekibi ekitwagwetiirwe kiriba kitakyaroho kwita abantu, kandi haliba hatakyaroho okuhiganizibwa kwona, ebizibu by’amaka, rundi ebintu ebirukumara amaani omu bwomeezi. Hanyuma y’emyaka rukumi, buli muntu weena aliba ahikiriire. Abalisingura okulengwa okwa ha kumalirra balifoorwa baana ba Yahwe hanu omu nsi kandi balitunga ‘obugabe bwekitinisa kyabana ba Ruhanga.’ (Abarumi 8:21) Nahabweki leka itwena twoleke okugonza okurukwombeka abandi nukwo tukonyerangane kutaaha omu nsi empyaka.