1, 2. (a) Omulingo Yahwe atwazaamu abantu nigwahukana guta ha mulingo abantu ab’amaani batwazaamu abantu bagenzi babo? (b) Nitwija kubazaaho ki omu kicweka kinu?

ABANTU ab’amaani bakira kulema abantu abandi n’ireme kandi babasaliza. (Matayo 20:25; Omugambizi 8:9) Yahwe tayetwaza mulingo gunu! N’obwaraaba ali w’Obusobozi bwona, Muntu arukukirayo amaani, Yahwe nafaayo hali abantu abatahikiriire. Wembabazi kandi nafaaho omulingo turukwehurra hamu n’ebyetaago byaitu. Aijuka ngu tuli bantu abatahikiriire kandi namanya obuceke bwaitu, nahabweki tatusaba kukora ekitutarukusobora.​—Zabuli 103:13, 14.

² Omu Baibuli, twega omulingo Yahwe afaaho abantu be. Leka turole ebyokurorraho bisatu: Ekyokubanza, omulingo Yahwe yakonyiire omwojo Samuiri kuhikyaho Nyakatagara Omukuru Eri obutumwa obw’omusango. Ekyakabiri, omulingo Yahwe yagumisiriize Musa hanyuma ya Musa kwehurra ngu tasobora kwebembera ihanga lya Isareri kuruga omu nsi ya Misiri. Kandi  ekyakasatu, omulingo Yahwe yayolekere ngu nafaaho Abaisareri obubaali nibaruga omu nsi ya Misiri. Eby’okurorraho binu nibitwegesa ki hali Yahwe, kandi nitusobora tuta kumwegeraho?

3. Kiro kimu Samuiri obwakaba abyamaire, Kintu ki ekitali kya bulikiro ekyabaireho, kandi, nitusobora kwekaguza kikaguzo ki? (Rora ekisisani ekiri ha rupapura 21.)

³ Samuiri akatandika kuheereza ha hema obwakaba akyali muto. (1 Samuiri 3:1) Kiro kimu obwakaba abyamire, haroho ekintu ekitali kyabuli kiro ekyabaireho. * (Rora obugambo obuli hansi.) (Soma 1 Samuiri 3:2-10.) Akahurra omuntu nayeta ibara lye. Samuiri akatekereza ngu Nyakatagara Omukuru Eri ayali agurusire nuwe akaba amwesere. Nahabweki akaimuka yagenda nairuka kurora Eri kandi yamugambira ngu: “Ndi hanu: baitu onyesere.” Baitu Eri akamugambira ati: ‘Tinkwesere.’ Hanyuma y’eki, ekintu nikyo kimu kikabaho emirundi endi biri, Eri akakyetegereza ngu Ruhanga nuwe kaba nayeta Samuiri. Nahabweki Eri akagambira Samuiri nk’oku aragarukamu obwarayongera kuhurra iraka nirimweta, kandi Samuiri nikyo yakozere. Habwaki Yahwe ataratandikire nagambira Samuiri ngu nuwe arukumweta? Baibuli tetusobororra. Baitu nikisobora kuba ngu Yahwe akakora ebintu omu mulingo ogu habwokuba akaba nafaaho enyehurra ya Samuiri.

4, 5. (a) Samuiri akakora ki Yahwe obuyamuhaire obutumwa kububaliza Eri? (b) Ekintu kinu nikitwegesa ki hali Yahwe?

⁴ Soma 1 Samuiri 3:11-18. Ekiragiro kya Yahwe kikaba nikiragira abaana abato kutekamu abantu abakuzire ekitinisa, kukira muno abo abaine obusobozi. (Okuruga 22:28; Ebyabalevi 19:32) Nahabweki kigumire kutekerezaho omwojo omuto nka Samuiri kwimuka nyenkyakara, akagenda hali Eri, kandi akamugambira atarukututiina obutumwa obw’amaani kandi obw’omusango kuruga hali Yahwe. Baibuli netugambira ngu Samuiri “[akatiina] okumanyisa Eri okwolekwa.” Baitu Ruhanga akoleka Eri ngu Nuwe akaba nayeta Samuiri. Egi niyo ensonga habwaki Eri akasaba Samuiri kutamusereka ekintu kyona Yahwe ekyakaba agambire. Samuiri akakora Eri ekiyamugambiire “kandi yamugambira byona.”

⁵ Obutumwa bunu bukaba butali buhyaka, habwokuba enyumaho “omusaija wa Ruhanga” akaba asangirwe agambiireho Eri obutumwa nubwo bumu.(1 Samuiri 2:27-36) Ekintu kinu nikitwegesa ngu Yahwe afaaho abantu kandi w’amagezi.

6. Omulingo Ruhanga yakonyiiremu omwojo omuto Samuiri nigutwegesa ki?

⁶ Obworaaba okyali muto, ebirukukwata hali Samuiri nibyoleka ngu Yahwe nayetegereza kurungi ebizibu eby’orabamu n’omulingo orukwehurra. Nosobora kuba oine ensoni kandi nikikugumira kutebeza abantu abakuru rundi kuba w’embaganiza obworukuba oli n’abaana ab’emyaka nk’eyaawe. Okimanye  ngu Yahwe nagonza muno kukukonyera. Nahabweki musabe kandi omugambire omulingo gwonyini ogw’orukwehurramu. (Zabuli 62:8) Tekerezaaho ebyokurorraho ebiri omu Baibuli ebirukubazaaho abato nka Samuiri. Kandi baza n’aboruganda hamu nabanyaanya itwe ab’emyaka yaawe rundi abakuru kukukira abasobora kuba barabire omu bizibu nk’ebyawe. Nibasobora kukugambira obwire obumu Yahwe obuyabakonyiire, obundi omu mulingo bakaba batarukunihira.

7, 8. Yahwe akoleka ata ngu nayetegereza omulingo Musa akaba nayehurramu?

⁷ Musa obwakaba aine emyaka 80, Yahwe akamuha omulimo ogukaba gugumire muno ogw’okwiha Abaisareri omu bwiru obubakaba barumu omu nsi ya Misiri. (Okuruga 3:10) Omulimo gunu nigusobora kuba gwahuniriize Musa, habwokuba akaba ali muliisa omu Midiani kumara emyaka 40. Musa akagamba: “Ninyowoha, okugenda hali Faraho nokwihayo abaana Baisareri omu Misiri?” Yahwe akagarramu Musa amaani ngu: “Mazimakwo ndiba hamu naiwe.” (Okuruga 3:11, 12) Yahwe akamuraganiza ngu abakuru b’abantu ba Isareri bakaba nibagenda ‘kuhurra iraka’ lye. Baitu nabwo Musa akagamba ngu: “Dora, tibalinyikiriza kunu tibalihurra iraka lyange” (Okuruga 3:18; 4:1) Musa akaba nagamba ngu Yahwe ekyarukukora nikisobora kuba kitahikire. Baitu Yahwe akamugumisiriza. Akamuha n’amaani ag’okukora eby’amahano. Kandi Musa nuwe muntu w’okubanza omu Baibuli kuba n’amaani agamulingo gunu.​—Okuruga 4:2-9, 21.

⁸ Nahanyuma ya binu byona, Musa akaba akyaine ekyokwekwasa. Akagamba ngu akaba atasobora kubaza kurungi. Nahabweki Ruhanga kamugambira ngu: “Ndabaga nakanwa kawe, ndakwegesaga ebyoragambaga.” Notekereza eki kikagumya Musa? Nangwa, akagambira Ruhanga ngu atume omuntu ondi. Obu yabalize eki, Yahwe akamubihirirwa. Baitu aketegereza enyehurra ya Musa, kandi yatuma Aroni kubaza omu kiikaro kya Musa.​—Okuruga 4:10-16.

9. Okugumisiriza n’embabazi za Yahwe bikakonyera bita Musa kuba mwebembezi murungi?

 ⁹ Kinu nikitwegesa ki hali Yahwe? Habwokuba Yahwe nuwe w’Obusobozi bwona, akaba nasobora kukozesa amaani ge kuhambiriza Musa kumworobera. Baitu Yahwe akamugumisiriza, yamwoleka embabazi, kandi yamugumya ngu naija kuba nauwe. Omulingo Yahwe yakwasiremu ensonga gukakora? Ego, gukakora! Musa akafooka mwebembezi w’amaani ow’abantu ba Ruhanga. Musa akalengaho kuba muculeezi kandi yafaahoga abantu abandi, nk’oku Yahwe nauwe yamutwaize.​—Okubara 12:3.

10. Tugasirwa tuta obutufaaho abantu abandi nk’oku Yahwe akora?

¹⁰ Kinu itwe nikitwegesa ki omu kasumi kanu? Obworaaba oli nyineeka, omuzaire, rundi omugurusi omu kitebe, haroho obusobozi obwoine ha bantu abandi. Nahabweki kikuru muno kuhondera ekyokurorraho kya Yahwe eky’okuba muntu arukufaaho, ow’embabazi kandi arukugumisiriza hali mukazi wawe, abaana, hamu n’ab’omu kitebe. (Abakolosai 3:19-21; 1 Petero 5:1-3) Obworahondera ekyokurorraho kya Yahwe Ruhanga hamu na Yesu Kristo Ogu arukukira Musa obukuru, abandi nibaija kwanguhirwa kukuhikirra bakabaza naiwe, kandi noija kugarramu abandi amaani. (Matayo 11:28, 29) Noija kubateraho ekyokurorraho ekirungi.​—Abaheburaniya 13:7.

11, 12. Yahwe akaletera ata abantu ba Isareri kuhurra baine obulinzi obw’akaba nabaiha omu nsi ya Misiri?

¹¹ Abaisareri abarugire omu ihanga lya Misiri omu mwaka 1513 Kristo atakazairwe bakaba nibahingura omu bukaikuru busatu. Omu kitebe eki hakaba harumu abaana, abakuru, hamu n’abantu abandi abasobora kuba baali barwaire rundi balema. Ekitebe kinu ekikooto eky’abantu kikaba nikyetaaga Omwebembezi arukufaaho kandi ow’arukubetegereza. Kandi eki nikyo Yahwe akaba ali kurabira omuli Musa. Ekyarugiremu, Abaisareri bakahurra baine obulinzi obubakaba nibaruga omu kiikaro kyonka ekibakaba bamanyire omu bwomeezi bwabo bwona.​—Zabuli 78:52, 53.

¹² Yahwe akaletera ata abantu kuhurra baine obulinzi? Obubakaba nibaruga omu nsi ya Misiri, Yahwe akatekaniza ihanga lya Isareri “omu bitebe by’okurwana”. (Okuruga 13:18, NW) Habwokuba baali batekanizibwe omu mulingo gunu, bakaba nibakirorra kimu ngu Ruhanga wabo nuwe akaba nabebembera. Yahwe akabebembera n’ekicu nyamusana kandi omu bwire bw’ekiro yabebemberaga n’ekimuli  ky’omurro kuboleka ngu akaba ali nabo, nabebembera kandi nabalinda. (Zabuli 78:14) Kandi ekintu kinu kyakugumize ihanga lya Isareri habw’ekintu ekikaba nikigenda kubaho.

13, 14. (a) Yahwe akoleka ata ngu nafaaho Abaisareri obubakaba bali ha Nyanja Erukutukura? (b) Yahwe akoleka ata ngu akaba nakira Abamisiri amaani?

¹³ Soma Okuruga 14:19-22. Hati teramu akasisani oyerole oli hamu n’Abaisareri. Mugoserwe. Ihe lya Misiri libali enyuma niribahambya, kandi omu maiso ganyu nimurora haliyo Enyanja Erukutukura. Baitu Ruhanga agira ekiyakoraho. Enyomyo y’omurro eyebaire ebebembiire egaruka enyuma y’enkambi kandi hati eyemerra hagati yanyu hamu n’Abamisiri. Hati mwesanga mwine ekyererezi omu nkambi yanyu, baitu ihe lya Misiri liswekerwe omwirima! Hanyuma murora Musa yaimukya omukono gwe haiguru y’enyanja, kandi omuyaga gw’amaani kuruga buruga izooba gwija, gubaganizamu enyanja kandi haijaho omuhanda ogugalihire. Nahabweki, iwe, ab’omuka yaawe, ebisoro byawe hamu n’abantu abandi boona muraba ha itaka elyomere. Kibahuniriza kurora ngu itaka tirirumu bisabu baitu lyomere. Omuhanda gw’omeere kandi nimwanguhirwa kugurubatiramu. Kandi kinu kisobozesa n’abo abarukukirayo kurubata mpora kuhika nsere y’enyanja batahikirweho kabi.

¹⁴ Soma Okuruga 14:23, 26-30. Binu byona obubiba nibigenda omu maiso, Faraho anyakwijwire emyehembo n’obudomadoma, atandika kuhambya iwe n’Abaisareri bagenzi bawe. Aho Musa ayongera aimukya omukono gwe haiguru y’enyanja, kandi ebisiika bibiri ebibaire bikozerwe amaizi bigwa. Amaizi  gaswekerra Faraho hamu n’ihe lye. Busaho n’omu halibo akiraho!​—Okuruga 15:8-10.

15. Ebintu ebyahikire hali Abaisareri nibitwegesa ki hali Yahwe?

¹⁵ Ebintu binu ebyahikire hali Abaisareri nibitwegesa ekintu ekindi hali Yahwe. Yahwe ali Ruhanga anyakukora ebintu omu mulingo ogutekanizibwe kurungi, kandi kinu kituletera kwehurra twine obulinzi. (1 Abakolinso 14:33) Nk’omuliisa anyakugonza entaama ze kandi akazirolerra kurungi, Yahwe nauwe akonyera abantu be. Abalinda hali abanyanzigwa babo. Kinu kitugarramu amaani kandi kituhumuza muno obutuliyo nitwirra haihi n’empero ey’ensi enu.​—Enfumo 1:33.

16. Nitusobora kugasirwa tuta obutwikara nitwijuka omulingo Yahwe yajuniremu abantu be?

¹⁶ N’omu kasumi kanu, Yahwe afaaho abantu be nk’ekitebe. Abakonyera kulinda enkoragana yabo nauwe eri nungi kandi abalinda hali abanyanzigwa babo. Kandi naija kwikara nabalinda n’omu muhito omwingi oguli haihi okwija. (Okusuku’rwa 7:9, 10) Nahabweki kababe bato rundi abakuzire, balema rundi batali, akasumi ak’omuhito omwingi n’obukarahika abantu ba Ruhanga tibalitiina. * (Rora obugambo obuli hansi.) Amananu gali, baliba bagumire kandi baliijuka ebigambo bya Yesu ebirukugamba ngu: “Mulirora haiguru, mulimukya emitwe yanyu; baitu okucungurwa kwanyu kumalize okuhika.” (Luka 21:28) Gogi, ganu nugo amahanga ageteranize hamu kandi ag’amaani kukira na Faraho, n’obugalitahirra abantu ba Ruhanga, baliba bagumire nibamanya ngu Yahwe naija kubalinda. (Ezekyeri 38:2, 14-16) Habwaki abaheereza ba Yahwe baija kuba batarukutiina? Habwokuba nibamanya ngu Yahwe tahinduka. Naija kwongera akyoleke nk’oku ali Mujuni ow’engozi kandi arukufaaho abantu be.​—Isaya 26:3, 20.

17. (a) Nitusobora kugasirwa tuta obuturasomaho ebintu ebirukwoleka omulingo Yahwe afaaho abantu be? (b) Nitwija kwegaho ki omu kicweka ekirukwongeraho?

¹⁷ Omu kicweka kinu, turozere ebyokurorraho ebirukwoleka ngu Yahwe nafaaho kandi w’embabazi obwarukuba nayebembera kandi najuna abantu be. Obw’oraaba noyecumitiriza ha by’okurorraho binu, lengaho kwega ekintu ekihyaka hali Yahwe kurabira omu kuseruliza ha bintu eby’otaaha otarukutaho mutima. Obworayeyongera kwega ha miringo ya Yahwe, okugonza kwawe hali uwe, n’okwikiriza kwawe omuluwe nibiija kweyongera kuguma. Omu kicweka ekirayongeraho, nitwiija kwega omulingo tusobora kwegera ha kyokurorraho kya Yahwe ekyokuba bantu abarukufaaho ab’omu maka gaitu, omu kitebe, hamu n’omu buheereza.