HATAROHO kugurukyagurukya, osiima Yahwe habwokukuha ebisembo bingi, n’okukuha obugabe obw’okwecweramu nk’oku orabikozesa. Baibuli egamba ngu amaarwa kiri kimu ha bisembo Ruhanga eby’atuhaire. N’egamba eti: “Obugenyi babucumbira enseko, kandi amarwa gasemeza obwomezi.” (Mug. 10:19; Zab. 104:15) Baitu n’osobora kuba okyetegeriize ngu abantu abamu amaarwa gabafokera kizibu. Ekindi, abantu baine entekereza ezirukwahukana ha kunywa amaarwa. Hati, kiki ekirakonyera Omukristaayo kukora encwamu ey’ehikire obukirukuhika ha kunywa amaarwa?

Obutuba nitukora encwamu, tusemeriire kusigikirra ha ntekereza ya Ruhanga hatali ey’abantu ab’omu kiikaro nambere turukwikara rundi nambere twakuliire. Obutuhondera entekereza ya Ruhanga, kitugasira kandi tutunga okusemererwa.

Naiwe n’osobora kuba okirozere ngu abantu omu nsi bagonza muno kunywa amaarwa n’okutamiira. Abamu banywa amaarwa habwokuba gabaleetera kwehurra kurungi. Abandi baganywa nukwo beebwe ebizibu byabo. Omu biikaro ebindi, omuntu ow’anywa amaarwa maingi, atwarwa kuba ow’akuzire kandi ow’amaani.

Baitu obukirukuhika h’Abakristaayo, Ruhanga abahaire oburagirizi obubasemeriire kuhondera. Ekyokurorraho, atugambira akabi akali omu kunywa ekihinguraine. N’osobora kuba wasomereho ebigambo ebiri omu Enfumo 23:​29-35 ebirukwoleka omulingo omutamiizi ayetwazaamu n’ebizibu eby’asobora kutunga. a Omugurusi w’ekitebe kuruga Bulaaya ow’arukwetwa Daniel, naijuka omulingo obwomeezi bwe bukaba buli obwakaba atakafookere omu h’Abakaiso ba Yahwe. N’agamba ati: “Kunywa amaarwa maingi kyandeteraga kukora encwamu embi kandi kyandugirramu kuba n’enyehurra embi ezikyantalibaniza kuhikya na hati.”

Kiki ekisobora kukonyera Abakristaayo kukora encwamu enungi kandi baketantara ebizibu ebiruga omu kunywa maarwa ekihinguraine? Nukwo kucwamu nibasigikirra ha ntekereza ya Ruhanga.

Leka turole Baibuli ekyebaza h’amaarwa n’ensonga habwaki abamu baganywa.

Baibuli tetanga kunywa amaarwa make. Etugambira ngu kuganywa nikisobora kuleetera omuntu okusemererwa. Egamba eti: “Olyege ebyokulya nokusemererwa, onywege amarwa gawe nomutima oguhiriirwe.” (Mug. 9:7) Obwire obumu Yesu yanywaga amaarwa kandi nabaheereza ba Ruhanga abesigwa nabo baaganywaga. —Mat. 26:​27-29; Luk. 7:34; 1 Tim. 5:23.

N’obukiraaba ngu Ekigambo kya Ruhanga kiikiriza kunywaho amaarwa amake, kitanga obutamiizi. Baibuli egamba eti: “Mutalitamira amarwa.” (Bef. 5:18) Kandi eyongera eyoleka ngu “abatamizi . . . tibaligwetwa bukama bwa Ruhanga.” (1 Kol. 6:10) Mali, Yahwe atangira kimu kunywa amaarwa maingi, n’okutamiira. Omu kiikaro ky’okucwamu nitusigikirra ha ntekereza z’abantu abandi, tuhondera oburagirizi bwa Ruhanga oburukukwata ha kunywa amaarwa.

Abamu batekereza ngu nibasobora kunywa amaarwa maingi muno batatamiire. Baitu eki nakyo ky’akabi muno. Ebyahandiikirwe bikyoleka kurungi ngu kuba mwiru w’okunywa amaarwa nikisobora kuleetera omuntu kukora ensobi, n’okukora ebibi ebirasiisa enkoragana ye na Yahwe. (Tit. 2:3; Nfu. 20:1) Yesu akooleka ngu ‘kutamiira amaarwa’ nikisobora kulemesa omuntu kutaaha omu nsi empyaka. (Luk. 21:​34-36) Hati, kiki ekisobora kukonyera Omukristaayo kwetantara ebizibu ebiruga omu kunywa amaarwa?

Kyakabi muno omuntu kukora encwamu ezirukukwata h’amaarwa nasigikirra ha ntekereza z’abantu. Obukirukuhika ha nsonga eziine akakwate n’okulya n’okunywa, Abakristaayo bacwamu nibasigikirra ha kiki ekirasemeza Yahwe. Baibuli etutererra eti: “Nukwo obumuba nimulya, rundi nimunywa, rundi nimukora ekigambo kyona, mubikolege byona obwekitinisa kya Ruhanga.” (1 Kol. 10:31) Leka turole bimu ha bikaguzo ebitusobora kwekaguza, n’emisingi ya Baibuli ey’eratukonyera:

Nywa amaarwa habwokuba ningonza kuba nk’abantu abandi barukuganywa? Okuruga 23:2 nihagamba ngu: “Otalikuratira abaingi.” Hanu, Yahwe akaba natererra Abaisaleri kwetantara kwetwaza nk’abantu abandi abaali nibakora ebintu ebibi. Ebigambo binu nibikwataho n’Abakristaayo kasumi kanu. Kakuba tucwamu kunywa amaarwa nitusigikirra ha ntekereza z’abantu, nitusobora kumalirra tucwire emisingi ya Baibuli kandi kisiise enkoragana yaitu na Yahwe.—Bar. 12:2.

Nywa amaarwa habw’okugonza kwoleka abandi ngu ndi w’amaani? Omu biikaro ebimu, kunywa amaarwa ekihinguraine n’okutamiira kirorwa nk’ekintu ekitaine kabi kandi ekirukwikirizibwa. (1 Pet. 4:3) Baitu wetegereze obuhabuzi oburukusangwa omu 1 Abakolinso 16:13: “Murolege, mwemerrege omu kuikiriza, mube abasaija mali, mugumege.” Mali amaarwa nigasobora kukonyera omuntu kuba w’amaani? Nangwa. Kuganywa ekihinguraine nigamuleetera kuceka. Nigasobora kuhindura entekereza n’enyehurra ye natandika kukora ebintu eby’obudoma. Isaya 28:7 n’ebazaaho omuntu arukuzongazonga habw’amaarwa kandi ayesiitara.

Amaani agaturukwetaaga kukora ebihikire garuga hali Yahwe, kandi nugo gatukonyera ‘kwikara twemeriire omu kwikiriza.’ (Zab. 18:32) Eki tukikora obutwikara tuli bulindaara kandi tuketantara ekintu kyona ekisobora kusiisa enkoragana yaitu na Yahwe. Yesu obw’akaba ali omu nsi akooleka amaani ga mulingo ogu, kandi abantu baingi bakamuteekamu ekitiinisa habwokuba akaba ali musaija omumanzi kandi ayakoraga ebihikire.

Nywa amaarwa, nukwo ndeke kutekerezaaho ebizibu byange? Baibuli egamba eti: ‘Omu bitekerezo byange ebingi ebiri omuli nyowe, okuhumuza kwawe Yahwe kunsemeza.’ (Zab. 94:19)  Kakuba oyetuntura habw’ebizibu, omu kiikaro ky’okunywa amaarwa, tunga okuhuumuzibwa kuruga hali Yahwe. Omulingo omurungi ogw’okukikoramu nukwo kumusaba obwire bwona. Ekindi, baingi bakirozere ngu kugambiraho munywani wabo omu kitebe kibakonyiire. Kunywa amaarwa nikisobora kuleetera omuntu kugumanganirwa kwetantara engeso embi n’okukora ekihikire. (Hos. 4:11) Daniel, outubalizehoga n’agamba ati: “Naikaraga nyetuntwire kandi ninyecwera omusango. Nanywaga amaarwa nukwo ndeke kutekerezaaho ebizibu byange, baitu namalirraga ntungire ebindi. Banywani bange bakanyecwaho kandi naleka kweteekamu ekitiinisa.” Kiki ekyakonyiire Daniel? N’agamba ati: “Nkakyetegereza ngu Yahwe nuwe asobora kunkonyera hatali amaarwa. Yahwe akankonyera kugumiisiriza ebizibu byange kandi hanyuma bikahwaho.” Twijuke ngu Yahwe aikara ayetekaniize kutukonyera, ekizibu kyaitu n’obukizooka nk’ekitarukwija kuhwaho.—Baf. 4:​6, 7; 1 Pet. 5:7.

Obworaaba okira kunywa amaarwa, ebikaguzo binu nibisobora kukukonyera kwekebera: ‘Omu ha b’omu ka yange rundi munywani wange nfenanfe ayolekere okweralikirra habw’omulingo ndukunywamu?’ Obukiraaba nukwo kiri, nikisobora kuba nikikwetaagisa kuhinduramu. Obundi nonywa muno rundi amaarwa nigakuleetera kwetwaza kubi baitu iwe tokakirozere. ‘Ntandikire kunywa muno kukira nk’oku nanywaga kara?’ N’obukiraaba ngu kasumi kanu toine muze gw’okunywa amaarwa, nikisobora kuba ngu otandikire kugutunga. ‘Kingumira kumara ebiro bike rundi akasumi karaihire ntanywireho amaarwa?’ Obukiraaba nukwo kiri, nikisobora kuba ngu omuze gw’okunywa amaarwa buli kiro gutandikire kukukwatiramu. Nikisobora kukwetaagisa kuhikirra badakitaali bakukonyere kwecwaho omuze gunu.

Habw’ebizibu ebisobora kuruga omu kunywa amaarwa, Abakristaayo abamu bacwiremu kwanga kuganywa. Abandi tibaganywa habwokuba tigarukubanurra. Kakuba omuntu acwamu kutanywa amaarwa, n’osobora kumwoleka okugonza kuraba omu kuteekamu ekitiinisa encwamu ye kandi otamucwera omusango.

 Rundi n’osobora kuba okyetegeriize ngu ky’amagezi kweteraho ahokugarukira. Omukristaayo n’asobora kucwamu obwingi bw’amaarwa agaaranywa kandi atahinguzaaho. Rundi n’asobora kweteraho ekiragiro obukirukuhika ha mirundi ey’aranywa amaarwa. Ekyokurorraho, n’asobora kuganywa omurundi gumu omu wiiki, rundi anyweho make obwaraaba nalya. Abandi bacwamu kutanywa ebika ebimu eby’amaarwa. Ekyokurorraho, bacwamu kunywa amaarwa agatarukutamiiza muno nka viini rundi bbiya kandi tibagatabura. Kakuba omuntu ayeteraho ebiragiro obukirukuhika ha kunywa amaarwa nikiija kumwanguhira kubihondera. Kandi Omukristaayo ow’akuzire omu by’omwoyo tasemeriire kuhurra aswaire kuhondera encwamu ye.

Ekindi, tusemeriire kutekerezaaho enyehurra z’abandi. Abarumi 14:21 nihagamba ngu: “Tikiri kirungi okulya enyama, nobukwakuba okunywa amarwa, nobukwakuba okugira ekigambo kyona ekirukutabaijura mugenzi wawe.” N’osobora ota kuteeka omu nkora omusingi gunu? Yoleka abandi okugonza. Kakuba oyehurra ngu kunywa amaarwa nikisobora kutabaijura omuntu ondi, okugonza kusemeriire kukwekambisa kucwamu kutaganywa. Obwokora oti, kyoleka ngu nofaaho abandi, noteekamu ekitiinisa enyehurra zaabo, kandi n’oyebembeza ebyetaago byabo hatali ebyawe wenka.—1 Kol. 10:24.

Ekindi, kakuba gavumenti eba etaireho ebiragiro ebirukukwata ha kunywa amaarwa, Omukristaayo asemeriire kubyorobera. Ebiragiro ebi nibisobora kutwarramu emyaka omuntu ey’asemeriire kuba aine kwikirizibwa kunywa amaarwa, rundi ebirukutanga kuvuga onywire rundi kukozesa ebyoma ebimu.—Bar. 13:​1-5.

Yahwe atuhaire obugabe obwokwegondeza omu bisembo bingi ebyatuhaire. Eki nikitwarramu obugabe bw’okwecweramu ebituralya n’ebituranywa. Leka encwamu zaitu zooleke ngu nitutwara ekisembo kinu nk’eky’omuhendo, kuraba omu kukikozesa kusemeza Isiitwe ow’omu iguru.