1. Habwaki Iburahimu yaikaire nanihira ngu akaba naija kuzaara omwana?

 YAHWE akaraganiza munywani we Iburahimu ngu amahanga goona gaakutungire omugisa kuraba omu ruzaaro rwe. (Kub. 15:5; 22:18) Habwokuba Iburahimu akaba aine okwikiriza okw’amaani, akaba nakigumiza kimu ngu byona Ruhanga ebiyaraganiize nibiija kuhikirra. Baitu nabwo, Iburahimu obwakaba aine emyaka 100 kandi mukazi we aine emyaka 90, bakaba batakatungire mwana. (Kub. 21:​1-7) Baibuli egamba ngu Iburahimu “[akaikiriza] nanihira ekitarukunihirwa, afoke isenkuru wamahanga maingi, nkokukyagambirwe.” (Bar. 4:18) Tukimanyire ngu Iburahimu ekyaba nanihira kikahikirra. Akazaara Isaka, omwana ow’akaba alindiriire kumara akasumi. Habwaki Iburahimu akaba nakigumya ngu Yahwe naija kuhikiiriza ekiyamuraganiize?

2. Habwaki Iburahimu akaba nakigumya ngu Yahwe ekyakaba amuraganiize nikiija kuhikirra?

² Habwokuba Iburahimu akaba aine enkoragana enungi na Yahwe, akaba “amanyiire kimu ati [Ruhanga] ekiyaragire” nikiija kuhikirra. (Bar. 4:21) Yahwe akasiima Iburahimu kandi yamweta omuntu ow’ahikiriire habw’okwikiriza kwe. (Yak. 2:23) Nk’oku kyolekerwe omu Abarumi 4:​18, Iburahimu akaba aine okwikiriza n’okunihira. Hati leka tubazeeho omukwenda Paulo ekiyabalize ha kunihira nk’oku kyolekerwe omu Abarumi esuura 5.

3. Kiki Paulo ekiyabalize ha kunihira?

³ Paulo asoborra ensonga habwaki nitusobora kukigumya  ngu “okunihira [kwaitu] tikurukukwasa ensoni.” (Bar. 5:5) Kandi atukonyera kwetegereza omulingo tusobora kweyongera kugumya okunihira kwaitu. Obuturaaba nitubazaaho ebiri omu Abarumi 5:​1-5, tekerezaaho omulingo okunihira kwawe kweyongiire kuguma. Nitwija kubazaaho n’omulingo tusobora kweyongera kugumya okunihira kwaitu kukira nk’oku kuli hati. Leka tubazeeho okunihira okw’ekitiinisa Paulo okuyagambire ngu tikurukukwasa ensoni.

4. Paulo akabazaaho ki omu Abarumi 5:​1, 2?

⁴ Soma Abarumi 5:​1, 2. Ebigambo binu Paulo akabihandiikira Abakristaayo ab’omu kitebe kya Rooma. Baali beegere ebirukukwata hali Yahwe na Yesu, baabikiriza kandi baafooka Bakristaayo. Nahabweki Ruhanga ‘akabaihaho omusango habw’okwikiriza,’ kandi yabasesaho omwoyo ogurukwera. Mali bakatunga okunihira okurungi!

5. Abaseserweho amagita baine kunihira ki?

⁵ Hanyuma, Paulo akahandiikira Abakristaayo abaseserweho amagita ab’omu kitebe kya Efeso ha kunihira Ruhanga okw’akaba abahaire. Okunihira oku, akakweta ‘ekyobugwetwa hali abarukwera.’ (Bef. 1:18) Paulo akagambira Abakristaayo ab’omu Kolosai nambere empeera yabo ekaba eri. Akagamba ngu okunihira kwabo ‘kubaahuliirwe omu iguru.’ (Bak. 1:​4, 5) Abaseserweho amagita baine okunihira okw’okutunga obwomeezi obutahwaho omu iguru, n’okulema hamu na Kristo.—1 Bas. 4:​13-17; Kus. 20:6.

6. Ow’oruganda omu akabazaaho ata okunihira kwe?

⁶ Abaseserweho amagita batwara okunihira okubaine nk’okw’omuhendo. Ow’oruganda Frederick Franz nauwe ow’akaba abaseserweho amagita akagamba ati: “Okunihira kwaitu nikwija kuhikirra, itwena 144,000, nitwija kutunga byona Yahwe ebyaturaganiize kandi empeera yaitu niija kuba nungi muno kukira nk’oku turukutekereza.” Na hanyuma  y’okumara emyaka nyingi naheereza Yahwe n’obwesigwa, omu 1991, Ow’oruganda Franz akongera yagamba ati: “Okunihira kwaitu tukyakutwara kuba kw’omuhendo mwingi. . . . Obutweyongera kulindirra, tweyongera kusiima Yahwe habw’okutuha okunihira kunu. Twikara tukulindiriire n’ekihika n’obutwakumara obukaikuru bw’emyaka. Nyeyongiire kutwara okunihira kunu nk’ekintu eky’omuhendo kukira na kara.”

7-8. Abaheereza ba Yahwe abarukukira obwingi baine kunihira ki? (Abarumi 8:​20, 21)

⁷ Abaheereza ba Yahwe abarukukira obwingi baine okunihira nk’okwa Iburahimu, okw’okutunga obwomeezi obutahwaho omu nsi hansi y’Obukama bwa Ruhanga. (Baheb. 11:​8-10, 13) Paulo akabazaaho ebintu ebirungi abaine okunihira kunu ebibalyegondezaamu. (Soma Abarumi 8:​20, 21.) Omurundi gw’okubanza obuwayegere ha kunihira kunu, kiki ekiwakizireyo kugonza? Kikakusemeze kukimanya ngu akasumi kalihika ofooke omuntu ow’ahikiriire otakyakora ebibi? Rundi kikuhuumuza kukimanya ngu abantu baawe abaafiire balihumbuuka baikale omu rugonjo orurungi? Kumanya ebintu ebi, kikakuha okunihira omu bwomeezi.

⁸ Katube twine okunihira okw’okutunga obwomeezi obutahwaho omu nsi rundi omu iguru, itwena twine okunihira okw’ekitiinisa kandi eki kisemeriire kutuleetera kusemererwa. Kandi nitusobora kweyongera kugumiza kimu okunihira kwaitu. Paulo asoborra omulingo eki tusobora kukikoramu. Leka turole ekiyabalize ha kunihira kwaitu. Eki nikiija kutukonyera kweyongera kukigumya ngu ebiturukunihira nibiija kuhikirra.

9-10. Kusigikirra ha byahikire hali Paulo, Abakristaayo nibaija kuhikwaho ki? (Abarumi 5:3) (Rora ekisisani.)

⁹ Soma Abarumi 5:3. Paulo akagamba ngu obututunga obujune nikisobora kutukonyera kweyongera kugumya okunihira kwaitu. Mali eki nikihuniiriza. Amananu gali ngu abahondezi ba Kristo boona nibaija kutunga obujune.  Tekerezaaho ekyokurorraho kya Paulo. Akagambira Abakristaayo ab’omu Sesalonika ati: “Obutukaba tuli hamu nainywe, tukabatebeza kara ngu ntugenda okusalizibwa; kandi nukwo kihikiriire kiti.” (1 Bas. 3:4) Kandi akahandiikira Abakristaayo ab’omu Kolinso ati: “Titurukugonza inywe okutamanya, bene baitu, ebyokubonabona kwaitu okwatubaireho . . . nokunihira tutanihire obwomezi bwaitu.”—2 Kol. 1:8; 11:​23-27.

¹⁰ N’omu kasumi kanu, Abakristaayo bahikwaho ebizibu ebirukwahukana. (2 Tim. 3:12) Wakahikirweho okuhiiganizibwa habw’okwikiririza omuli Yesu n’okumuhondera? Obundi abanywani n’abanyabuzaale baawe bakusekeereza. Rundi nibasobora kuba bakutwaize kubi. Obundi mukama waawe ha mulimo rundi ab’orukukora nabo nibakuhiiganiza habwokuba n’ogonza kuba mwesigwa omu bintu byona? (Baheb. 13:18) Obundi n’ohiiganizibwa gavumenti habw’okugambiraho abandi okunihira kwawe? N’obuturahikwaho emitalibaine ya mulingo ki, Paulo n’agamba ngu tusemeriire kusemererwa. Habwaki?

11. Habwaki tusemeriire kucweramu kimu kugumiisiriza obututunga ebizibu?

¹¹ Nitusobora kuba n’okusemererwa nobututunga ebizibu habwokuba kitukonyera kukurakuraniza omulingo omukuru. Abarumi 5:3 nihagamba ngu ‘obujune nibuleeta okugumiisiriza.’ Abakristaayo boona nibaija kutunga ebizibu, nahabweki tusemeriire kwikara twetekaniize kugumiisiriza. Eki nikiija kutukonyera kulindirra kuhikya okunihira kwaitu obukulihikirra. Titurukugonza kuba nk’abantu Yesu abaakaba namanyisa obuyabalizeeho embibo eyagwire ha mwandara nambere hatali itaka lingi. Hakubanza bakaikiriza ekigambo n’okusemererwa baitu obubaahikirweho “obujune rundi okuhigwa” bakatabaijuka. (Mat. 13:​5, 6, 20, 21) Ky’amananu ngu tikitusemeza obututunga obujune rundi obutuhiiganizibwa. Baitu obutugumiisiriza kandi tukagumizaamu nituheereza Yahwe, tugasirwa. Omu mulingo ki?

12. Tugasirwa tuta obutugumiisiriza?

¹² Omwegeswa Yakobo akabazaaho ebirungi ebiruga omu kugumiisiriza. Akagamba ati: “Muleke, okugumisiriza kuhikirize omulimo gwakwo, nukwo mube abahikiriire, munyina byona, mutarukuburwa omu kigambo kyona.” (Yak. 1:​2-4) Yakobo abazaaho okugumiisiriza nk’okwine omulimo gw’okuhikiiriza. Kuhikiiriza mulimo ki? Nikusobora kutukonyera kuba n’okwikiriza, kweyongera kwesiga Ruhanga, n’okulindirra tutarukujwaha. Obutugumiisiriza tugasirwa omu mulingo ogundi omukuru.

13-14. Kiki ekibaho obutugumiisiriza, kandi kiki ekihika ha kunihira kwaitu? (Abarumi 5:4)

¹³ Omu Abarumi 5:​4, NWT, Paulo akagamba ngu “okugumiisiriza nikuleeta okusiimwa, kandi okusiimwa nikuleeta okunihira.” Eki nikimanyisa ngu obutugumiisiriza tusemeza Yahwe. Baitu eki tikirukumanyisa ngu Yahwe asemererwa obwarora noraba omu bizibu. Oihireho nasiima amaani orukutamu iwe nk’omuntu. Nahabweki obw’ogumiisiriza kimuleteera okusemererwa. Mali ogu mugisa gw’amaani!—Zab. 5:12.

¹⁴ Ijuka ngu Iburahimu akagumiisiriza obuyatungire ebizibu kandi akasiimwa Yahwe. Yahwe akamurora nka munywani we kandi nk’omuntu ow’ahikiriire. (Kub. 15:6; Bar. 4:​13, 22) Naitwe nukwo n’asobora kuturora ati. Ruhanga tatusiima nasigikirra ha mirimo eitukora omu kumuheereza n’obujunanizibwa obutwine, baitu asigikirra ha kugumiisiriza n’obwesigwa bwaitu. Itwena nitusobora kugumiisiriza katube tuli bato rundi bakuru,  twine busobozi bwa mulingo ki, rundi nituraba omu nyikara ya mulingo ki. Oine ekizibu eky’oliyo n’ogumiisiriza? Obukiraaba nukwo kiri, ijuka ngu nosiimwa Ruhanga. Eki nikiija kukukonyera kweyongera kugumya okunihira kwawe.

15. Kintu ki ekindi Paulo ekiyabalizeeho kandi habwaki nikisobora kuhuniiriza abamu?

¹⁵ Nk’oku Paulo yasoboroire, tusiimwa Yahwe obutugumira ebizibu kandi tukaikara tuli besigwa. Paulo akongera yagamba ati: “[Okusiimwa] nukuleta okunihira: kandi okunihira tikurukukwasa ensoni.” (Bar. 5:​4, 5) Kinu nikisobora kuhuniiriza abamu. Habwaki? Habwokuba nk’oku tusangirwe turozere omu Abarumi 5:​2, Paulo akagamba ngu Abakristaayo ab’omu Rooma bakaba baine ‘okunihira okw’ekitiinisa kya Ruhanga.’ Nahabweki, abamu nibasobora kwekaguza, ‘Abakristaayo banu obubaraaba baali baine okunihira, habwaki Paulo yayongiire y’akubazaaho?’

16. Okunihira kweyongera kuta? (Rora ekisisani.)

¹⁶ Nitusobora kwetegereza Paulo eky’akaba nabazaaho kakuba tukiijuka ngu okunihira nikusobora kweyongera kuguma. Ekyokurorraho: Noijuka omurundi gw’okubanza obuwayegere ha kunihira okurukusangwa omu Kigambo kya Ruhanga? Kasumi ako, n’osobora kuba watekeriize ngu kwomeera ebiro n’ebiro omu nsi kirooto kwonka ekitasobora kuhikirra. Baitu obuwagumiizeemu kwega hali Yahwe, okatandika kukigumya ngu omurago gunu nigwija kuhikirra.

17. Okunihira kwawe kweyongera kuta kuguma hanyuma y’okwehayo n’okubatizibwa?

¹⁷ Na hanyuma y’okwehayo n’okubatizibwa, okunihira kwawe kwayeyongera kuguma obuwayeyongiire kwega hali Yahwe, n’okukura omu by’omwoyo. (Baheb. 5:13–6:1) Obundi naiwe ohikirweho ebirukubazibwaho omu Abarumi 5:​2-4. Ohikirweho ebizibu  ebitali bimu na bimu, wabigumiisiriza kandi warora omulingo Yahwe arukukusagika. Habwokuba nokimanya ngu nakugonza kandi n’osiimwa omu maiso ge, nokigumya ngu naija kuhikiiriza ebyaraganiize. Okunihira kwawe kweyongiire kuguma kukira na kara kandi eki kikuletiire kukora empindahinduka omu bwomeezi bwawe, nk’okutwaza kurungi ab’omu ka yaawe, kukora encwamu enungi, n’okukozesa kurungi obwire bwawe.

18. Yahwe atukonyera ata kukigumya ngu ebiturukunihira nibiija kuhikirra?

¹⁸ Omukwenda Paulo ayongera abazaaho ekintu ekikuru ekibaho obututunga okunihira kandi tukasiimwa Ruhanga. Atukonyera kukigumya ngu okunihira kwaitu nikwija kuhikirra. Habwaki nitusobora kukigumya? Wetegereze Paulo ekiyagambiire Abakristaayo: ‘Okunihira tikurukukwasa ensoni: baitu okugonza kwa Ruhanga kuseserwe omu mitima yaitu habw’omwoyo ogurukwera ogutwahairwe.’ (Bar. 5:5) Nitusobora kwesigira kimu okunihira Yahwe okwatuhaire.

19. Kiki ekitusobora kugumya obukirukuhika ha kunihira kwaitu?

¹⁹ Tekerezaaho Yahwe ekiyaraganiize Iburahimu n’omulingo yamusiimire kandi yamurora nka munywani We. Baibuli n’egamba ngu Iburahimu “obuyamazire okugumisiriza yahabwa omurago.” (Baheb. 6:15; 11:​9, 18; Bar. 4:​20-22) Mali, Iburahimu eky’akaba nanihira kikahikirra. Naiwe n’osobora kukigumya ngu obworaikara oli mwesigwa hali Yahwe, ebyorukunihira nibiija kuhikirra. Haroho ensonga nyingi ezisemeriire kukuleetera kusemererwa habwokuba nokigumya ngu ebyorukunihira nibiija kuhikirra! (Bar. 12:12) Paulo akagamba ati: “Ruhanga owokunihira alibaijuza inywe okusemererwa kwona nobusinge bwona omu kuikiriza, inywe musaganege omu kunihira, omu mani [ag’omwoyo ogurukwera].”—Bar. 15:13.