Osomere kurungi magaziini eza Omunaara gw’Omulinzi ez’omwaka gunu? Hati, rora obworaaba n’osobora kugarukamu ebikaguzo ebirukuhonderaho:

“Kuhindurwa omu magezi ganyu” nikimanyisa ki? (Bar. 12:2)

Tikirukumanyisa ngu tusemeriire kugarukira ha kukoraho ebintu ebirungi byonka. Baitu, tusemeriire n’okwekebiija omuntu waitu ow’omunda kandi tukole empindahinduka omu bwomeezi bwaitu nukwo tusobole kworobera endengo za Yahwe nk’oku kirukusoboka.—w23.01, rup. 8-9.

Habwaki tusemeriire kuba n’entekereza ey’ehikire obuturukuba niturora ebintu nibibaho omu nsi?

Tugonza kumanya omulingo ebintu ebirukubaho omu nsi bihikiriza obunabbi obw’omu Baibuli. Omu kiikaro ky’okutebesereza, ekisobora kutabangura obumu omu kitebe, ebitubazaaho bisemeriire kusigikirra ha bintu ebiturukiibwe ekitebe kya Yahwe. (1 Kol. 1:10)—w23.02, rup. 16.

Okubatizibwa kwa Yesu nikwahukana kuta n’okw’abahondezi be?

Yesu akaba atarukwetaaga kuhayo obwomeezi bwe hali Yahwe, habwokuba akaba azaalirwe omu ihanga erikaba lyehaireyo hali Ruhanga. Akaba atarukwetaaga kwegarukamu habw’ebibi bye habwokuba akaba ahikiriire, ataine kibi.—w23.03, rup. 5.

Nitusobora tuta kukonyera abandi kuhayo eby’okugarukamu omu nsorrokano?

Nitusobora kugarukamu omu bugufu nukwo tuhe n’abandi omugisa gw’okugarukamu. Tusemeriire kwetantara kubazaaho ensonga nyingi ha murundi gumu. Nukwo kikonyere abandi kuhayo eby’okugarukamu.—w23.04, rup. 23.

“Omuhanda ogurukwera” ogurukubazibwaho omu Isaya 35:8 nigumanyisa ki?

Ha kubanza, omuhanda gunu ogw’akokurorraho gwali nigumanyisa omuhanda abayudaaya ogubaakurabiremu nibaruga Baburoni kugaruka Yerusalemu. Kandi kasumi kanu? Kumara ebyasa bingi omwaka 1919 gutakahikire, Yahwe akakozesa abasaija abarukumutiina kutekaniza omuhanda gunu ogurukwera kuraba omu kuhindura n’okuteera Baibuli hamu n’ebintu ebindi. Abantu baikaire nibagendera omu ‘Muhanda Ogurukwera’ ogurukubahikya omu orugonjo orurungi orw’eby’omwoyo, ekirabarugiramu kutunga emigisa hansi y’Obukama bwa Ruhanga.—w23.05, rup. 15-19.

Enfumo 9 ebazaaho buhabuzi ki oburukusisanizibwa n’abakazi babiri ab’akokurorraho?

Enfumo ebazaaho “omukazi omudomadoma” ow’aha okuraaliza okurukuhikya “okuzimu” kandi eyongera ebazaaho “magezi,” nk’omukazi ow’aha okuraaliza okurukuhikya “omu muhanda ogwokwetegereza” n’obwomeezi. (Nfu. 9:​1, 6, 13, 18)—w23.06, rup. 22-24.

Ruhanga akooleka ata obwebundaazi n’okwetegereza obwakaba nagenda kujuna Loti?

Yahwe akaragira Loti kuruga Sodomu kwirukira omu bicweka by’ensozi. Loti obuyasabire Yahwe kwirukira omu rubuga rwa Zoara, akaikiriza okusaba kwa Loti.—w23.07, rup. 21.

Omukazi n’asobora kukora ki kakuba ow’ali nauwe omu buswere arora ebisisani eby’orwanju?

Asemeriire kukiijuka ngu tali nuwe aletiire iba kwetwaza omu mulingo ogu. Asemeriire kuteeka omutima ha nkoragana ye na Ruhanga kandi ayecumitiirizeeho ebyokurorraho eby’omu Baibuli eby’abakazi abaali betuntwire kandi baasaba Yahwe kubahuumuza. Ekindi, n’asobora kukonyera iba kwetantara enyikara eziramuleetera kweyongera kurora ebisisani eby’orwanju.—w23.08, rup. 14-17.

Kakuba omuntu ahakaniza enyikiriza zaitu, okwetegereza nikusobora kuta kutukonyera kumugarukamu omu mulingo ogw’obuculeezi?

Nitusobora kukozesa omugisa ogu kumanya ekyarukutekereza. Eki nikisobora kutukonyera kumugarukamu omu mulingo ogw’obuculeezi.—w23.09, rup. 17.

Kiki ekitusobora kwegera hali Malyamu obukirukuhika ha kutunga amaani?

Malyamu obuyakimanyire ngu akaba naija kuzaara Masiya, Yahwe akozesa abantu abandi kumugarramu amaani. Gabiryeri na Erisabesi bakakozesa ebyahandiikirwe kumugarramu amaani. Naitwe, Abakristaayo bagenzi baitu nibasobora kutugarramu amaani.—w23.10, rup. 15.

Yahwe n’asobora ata kugarukamu esaara zaitu?

Naturaganiza kugarukamu esaara zaitu nasigikirra ha kigendererwa kye. (Yer. 29:12) N’asobora kugarukamu esaara ezirukusisana omu miringo erukwahukana, baitu naija kwikara natusagika.—w23.11, rup. 21-22.

Abarumi 5:2 nirubazaaho “okunihira,” habwaki orukarra 4 rwongera kukubazaaho?

Omuntu obwayega amananu, atunga okunihira okw’okwomeera ebiro n’ebiro omu rugonjo orurungi omu nsi. Baitu obwatunga ebizibu, akagumiisiriza, kandi akakimanya ngu nasiimwa Ruhanga, okunihira kwe kweyongera kuguma kandi ayeyongera kukigumya ngu ebyarukunihira nibiija kuhikirra.—w23.12, rup. 12-13.