1. Obututekerezaaho okwikiriza kwa Iburahimu, kikaguzo ki ekitusobora kwekaguza?

 N’OBUKIRAABA ngu abantu baingi bakahurraho Iburahimu, abarukukira obwingi bamanyire bike ebirukumukwataho. Baitu iwe omumanyireho bingi. Ekyokurorraho, okimanyire ngu Baibuli emweta “isenkurubo bona abanyakuikiriza.” (Bar. 4:11) Baitu n’osobora kwekaguza oti: ‘Nikisoboka kuhondera ekyokurorraho kya Iburahimu kandi nkatunga okwikiriza nk’okwe?’ Ego, n’osobora.

2. Habwaki kikuru kwesomesaaho ekyokurorraho kya Iburahimu? (Yakobo 2:​22, 23)

² Gumu ha mulingo tusobora kutunga okwikiriza nk’okwa Iburahimu nukwo kuraba omu kwesomesaaho ekyokurorraho kye. Iburahimu yayoroberaga Yahwe. Akaragirwa kugenda omu nsi eya hara, yaikara omu heema kumara emyaka nyingi, kandi yaikiriza kuhayo omwana we Isaka nk’ekihongwa. Ebikorwa ebi byona nibyoleka ngu akaba aine okwikiriza kw’amaani. Kandi eki, kikamuleetera kusiimwa Ruhanga, n’okuba munywani we. (Soma Yakobo 2:​22, 23.) Yahwe nagonza itwena, otweliiremu naiwe, kuba bantu abarukusiimwa omu maiso ge kandi banywani be. Habw’ensonga egi, akakozesa Paulo na Yakobo kuhandiikaho ekyokurorraho kya Iburahimu eky’okwikiriza. Leka tubazeeho ekyokurorraho kye nk’oku kyolekerwe omu Abarumi esuura 4 na Yakobo esuura 2. Esuura zinu zoona zirumu ebigambo ebikuru muno ebirukukwataho Iburahimu.

3. Kyahandiikirwe ki Paulo na Yakobo ekibaajuliize?

³ Paulo na Yakobo, bakajuliza ebigambo ebiri omu Okubanza  15:​6, ebirukugamba ngu: “[Iburahimu] yaikiriza Mukama; yakumubarra okuba okuhikirra.” Omuntu ow’okuhikirra nuwe ogu ow’akora ebihikire omu maiso ga Ruhanga kandi ow’ataine omusango. Mali ka kirungi kukimanya ngu Ruhanga n’asobora kurora omuntu ow’atahikiriire kandi omusiisi nk’ow’ahikiriire! Hataroho kugurukyagurukya, naiwe nogonza Yahwe akurole nk’ow’okuhikirra, kandi eki nikisoboka. Hati leka turole habwaki Yahwe yayesere Iburahimu ow’okuhikirra kandi naitwe ekitusemeriire kukora kwetwa ab’okuhikirra.

4. Kiki ekiremesa abantu kuba ab’okuhikirra?

⁴ Omu bbaruha ye hali Abarooma, Paulo akagamba ngu abantu boona basiisi. (Bar. 3:23) Hati nikisoboka kita omuntu kuba ow’ahikiriire kandi akasiimwa omu maiso ga Ruhanga? Paulo akakozesa ekyokurorraho kya Iburahimu kukonyera Abakristaayo.

5. Yahwe akasigikirra hali ki kweta Iburahimu ow’okuhikirra? (Abarumi 4:​2-4)

⁵ Iburahimu obwakaba naikara omu nsi ya Kanaani, Yahwe nubwo yamwesere ow’okuhikirra. Habwaki Yahwe yayesere Iburahimu ow’okuhikirra? Kinu akakikora ngu habwokuba akaba nayorobera Ebiragiro bya Musa? Nangwa. (Bar. 4:13) Yahwe akaha ihanga lya Isaleri ebiragiro binu emyaka nka 400 hanyuma y’okweta Iburahimu ow’okuhikirra. Hati, habwaki Ruhanga yayesere Iburahimu ow’okuhikirra? Yahwe akamwoleka embabazi yamweta ow’okuhikirra habw’okwikiriza okw’akaba aine.​—Soma Abarumi 4:​2-4.

6. Yahwe asigikirra hali ki kurora omuntu nk’ow’ahikiriire?

⁶ Paulo akagumizaamu yasoborra ngu omuntu obwaikiririza omuli Ruhanga, “okuikirizakwe, kumutekerezebwaho okuba okuhikirra.” (Bar. 4:5) Paulo akongera yagamba ati: “Nka Daudi okwagamba ha mugisa ogwomuntu Ruhanga owatekerezaho anyina okuhikirra hataloho mirimo, ati Bayina omugisa abaihiibweho ebyokusisa byabu, nebibi byabu biswekeriirwe. Ayina omugisa omusaija ogu [Yahwe] owatarukutekerezaho ekibi.” (Bar. 4:​6-8; Zab. 32:​1, 2) Ruhanga aganyira rundi aswekerra ebibi byabo abamwikiririzaamu. Yahwe abaganyirra kimu kandi taijuka ebibi byabo. Abantu abo abarora nk’abataine musango kandi abahikiriire habw’okwikiriza kwabo.

7. Habwaki abaheereza ba Ruhanga abaakara baayeserwe ab’okuhikirra?

⁷ Iburahimu, Daudi, n’abaheereza ba Ruhanga abandi bakaba batahikiriire. Baitu habw’okwikiriza kwabo, Ruhanga akabarora nk’abahikiriire kakuba obalengesaniza n’abantu abandi abaali bataine enkoragana nauwe. (Bef. 2:12) Omu bbaruha ye hali Abarooma, Paulo akyoleka kurungi ngu kikuru muno kuba n’okwikiriza kusobora kuba n’enkoragana enungi na Ruhanga. Iburahimu na Daudi nikyo baakozere kandi naitwe nikyo tusemeriire kukora.

8-9. Ntekereza ki ezitahikire abantu abamu ezibaine obukirukuhika ha bigambo bya Paulo na Yakobo kandi habwaki?

⁸ Kumara emyaka nyingi, abebembezi b’amadiini baikaire baine entekereza ezirukwahukana ha kakwate akali hagati y’okwikiriza n’ebikorwa. Abamu beegesa ngu kusobora kujunwa, ekintu kyonka eky’osemeriire kukora nukwo kwikiririza omuli Yesu Kristo. Obundi warabahuliireho nibagamba ngu, “Ikiriza Yesu nukwo ojunwe.” Abamu basigikirra ha bigambo bya Paulo ebirukugamba ngu:  “Ruhanga owatekerezaho anyina okuhikirra hataloho mirimo.” (Bar. 4:6) Baitu abandi batekereza ngu omuntu n’asobora “kwejuna” kuraba omu kugenda omu biikaro ebitwarwa kuba ebirukwera kandi akakora byona ediini ye ebyerukumusaba kukora. Kinu bakibaza nibasigikirra ha Yakobo 2:​24, aharukugamba ngu: “Obwokukora omuntu aihibwaho omusango, kunu tibuli obwokuikiriza kwonka.”

⁹ Habw’enyikiriza zinu ezirukwahukana, kiretiire abakugu abamu abarukuhandiika ha by’ediini kutekereza ngu Paulo na Yakobo bakahakanizangana obukirukuhika ha kwikiriza n’ebikorwa. Abebembezi b’ediini abamu baikiriza ngu Ruhanga arora omuntu nk’ow’okuhikirra, nasigikirra ha kwikiriza kwe hatali habw’ebikorwa bye. Baitu Yakobo we akegesa ngu ebikorwa bikuru muno kusobora kusiimwa Ruhanga. Omukugu omu omu by’ediini akagamba ati: “Yakobo atetegereze ensonga habwaki Paulo yagambire ngu omuntu kusobora kurorwa nk’ow’ahikiriire, kikuru muno kuba n’okwikiriza kyonka hatali ebikorwa.” Baitu Yahwe akakozesa Paulo na Yakobo kuhandiikaho ensonga zinu ibiri. (2 Tim. 3:16) Nahabweki haroho omulingo ogwanguhire ogusobora kutukonyera kwetegereza ebibaahandiikire. Tusemeriire kwetegereza ebyetoroire ebibaahandiikire.

10. “Mirimo” ki Paulo ey’akaba nabazaaho? (Abarumi 3:​21, 28) (Rora ekisisani.)

¹⁰ “Mirimo” ki Paulo eyakaba n’abazaaho omu Abarumi esuura 3 n’eya 4? Akaba namanyisa “emirimo eyebiragiro,” kandi ebi nibyo Ebiragiro bya Musa Yahwe ebiyahaire Abaisaleri ha Rusozi Sinai. (Soma Abarumi 3:​21, 28.) Nikizooka ngu omu kasumi ako, Abakristaayo Abayudaaya kyali nikibagumira kwikiriza ngu kikaba kitakyayetaagisa kworobera ebiragiro bya Musa kandi nk’oku byali bihoireho.  Nahabweki, Paulo akakozesa ekyokurorraho kya Iburahimu kubooleka ngu omuntu kusobora kusiimwa Ruhanga, kikaba kitarukumwetaagisa kworobera ebiragiro ebi. Oihireho, akooleka ngu nikyetaagisa kuba n’okwikiriza. Eki nikigarramu amaani habwokuba nikitukonyera kukimanya ngu naitwe nitusobora kusiimwa Ruhanga. Kakuba twikiririza omuli Ruhanga hamu na Kristo, nitusobora kubarwa nk’abantu ab’okuhikirra.

11. Bikorwa bya mulingo ki Yakobo ebyakaba namanyisa?

¹¹ Baitu harubaju orundi, ebikorwa rundi “emirimo” erukubazibwaho omu Yakobo esuura 2 teriniyo emirimo y’ebiragiro Paulo eiyabalizeeho. Yakobo akaba nabazaaho ebintu Abakristaayo ebibakora omu bwomeezi bwabo obwa buli kiro. Ebikorwa ebi byoleka omuntu obwaraaba aine okwikiriza okugumire omuli Ruhanga rundi nangwa. Leka turole ebyokurorraho bibiri Yakobo ebiyabalizeeho.

12. Yakobo akasoborra ata akakwate akali hagati y’okwikiriza n’ebikorwa? (Rora ekisisani.)

¹² Omu kyokurorraho eky’okubanza, Yakobo akooleka ngu Abakristaayo tibasemeriire kusoroora abandi. Akabazaaho omusaija ayatwaize kurungi omuguuda baitu yatwaza kubi omunaku. Yakobo akooleka ngu omusaija ogu n’asobora kugamba ngu aine okwikiriza baitu ebikorwa bye nibyoleka ngu takwine. (Yak. 2:​1-5, 9) Omu kyokurorraho ekyakabiri, Yakobo akabazaaho omuntu ayarozere ‘Omukristaayo mugenzi we ataine engoye rundi ebyokulya’ baitu tiyamukonyera. N’obwaraaba n’agamba ngu aine okwikiriza, atakwoleke omu bikorwa. Nahabweki kukaba kutaine mugaso. Enu niyo ensonga habwaki Yakobo yahandiikire ati: “Nokuikiriza obukutabaho nokukora buli kufire.”​—Yak. 2:​14-17.

13. Kyokurorraho ki Yakobo ekiyabalizeeho kusoborra habwaki kikuru kwoleka okwikiriza omu bikorwa? (Yakobo 2:​25, 26)

 ¹³ Yakobo akakozesa ekyokurorraho kya Rahabu nk’omuntu ayayolekere okwikiriza kwe omu bikorwa. (Soma Yakobo 2:​25, 26.) Akahurra ebirukukwata hali Yahwe kandi yakyetegereza ngu asemeriire kusagika Abaisaleri. (Yos. 2:​9-11) Akooleka okwikiriza kwe omu bikorwa kuraba omu kusereka entasi ibiri. Ekyarugiremu, kusisanaho na Iburahimu omukazi onu ow’atahikiriire kandi ow’akaba atali hansi y’Ebiragiro bya Musa, Yahwe akamurora nk’ow’okuhikirra. Ekyokurorraho kye nikitwoleka obukuru obw’okwoleka okwikiriza kuraba omu bikorwa.

14. Habwaki nitugamba ngu Paulo na Yakobo ebibaahandiikire nibiikiranganiza?

¹⁴ Paulo na Yakobo bakaba nibasoborra okwikiriza omu miringo ebiri erukwahukana. Paulo akaba nagambira Abakristaayo Abayudaaya ngu bakaba batasobora kusiimwa Ruhanga kuraba omu kworobera Ebiragiro bya Musa kyonka. Yakobo akaba nagambira Abakristaayo ngu kikuru muno kwoleka okwikiriza kwabo obu nibakorra abantu abandi ebirungi.

15. Miringo ki emu eitusobora kwoleka okwikiriza kwaitu omu bikorwa? (Rora ekisisani.)

¹⁵ Yahwe tatugambira ngu tusemeriire kukora ebintu byonyini Iburahimu yakozere kusobora kwetwa ab’okuhikirra. Haroho emiringo nyingi eitusobora kwolekamu okwikiriza kwaitu kuraba omu bikorwa. Yahwe asemererwa kandi atuha emigisa obututangirra abahyaka abaizire omu nsorrokano, tukakonyera ab’oruganda na banyaanya itwe abali omu bwetaago, kandi tukakorra ab’omu maka gaitu ebirungi. (Bar. 15:7; 1 Tim. 5:​4, 8; 1 Yoh. 3: 18) Gumu ha mulingo omukuru twoleka ngu twine okwikiriza nubwo obutwekamba kutebeza abandi. (1 Tim. 4:16) Kuraba omu bikorwa byaitu, itwena nitusobora kwoleka ngu nitwikiriza ngu emirago ya Yahwe niija kuhikirra kandi emihanda ye niyo erukukirayo oburungi. Obuturakora eki, nitwija kukigumiza kimu ngu Yahwe naija kuturora nk’abantu ab’okuhikirra kandi tube banywani be.

16. Okunihira kukagumya kuta okwikiriza kwa Iburahimu?

¹⁶ Abarumi esuura 4 n’ebazaaho isomo erindi erikuru eritusobora kwegera hali Iburahimu. Nitwega ngu kikuru kuba n’okunihira. Yahwe akaraganiza ngu kuraba omu Iburahimu, “amahanga maingi” galihabwa omugisa. Tekerezaaho ebintu ebirungi Iburahimu eby’akaba nanihira! (Kub. 12:3; 15:5; 17:4; Bar. 4:17) N’obukiraaba ngu Iburahimu akaba aine emyaka 100, kandi Sara aine emyaka 90, bakaba batakatungire omwana Yahwe ow’akaba abaaraganiize. Kusigikirra ha ndora y’abantu, kyali nikizooka nk’ekitarukusoboka Iburahimu na Sara kuzaara omwana. Eki kiine kuba kyalengere okwikiriza kwa Iburahimu. Baitu “akaikiriza nanihira ngu alifoka isenkuru wamahanga maingi.” (Bar. 4:​18, 19) Kandi hanyuma, eky’akaba nanihira kikahikirra. Akatunga omwana ow’akaba alindiriire kumara emyaka nyingi.​—Bar. 4:​20-22.

17. Nitukimanya tuta ngu nikisoboka Ruhanga kuturora nk’abantu ab’okuhikirra kandi banywani be?

¹⁷ Nka Iburahimu, naitwe nitusobora kusiimwa Ruhanga kandi naturora nk’abanywani be ab’okuhikirra. Eki Paulo akakibazaaho obuyahandiikire ati: “Kitahandikwe [habwa Iburahimu] wenka ngu okuhikirra kukamutekerezebwaho, baitu habwaitu naitwe, abalitekerezebwaho okuhikirra, itwe abarukuikiriza ogu ayahumbuire Yesu.” (Bar. 4:​23, 24) Nka Iburahimu, naitwe tusemeriire kuba n’okwikiriza, tukwoleke omu bikorwa kandi tube n’okunihira. Omu Abarumi esuura 5, Paulo agumizaamu n’abazaaho okunihira kwaitu, kandi okunihira kunu nukwo turabazaaho omu kicweka ekirukuhonderaho.