1-2. Kiki ekibaho hanyuma y’okubatizibwa?

 KITUSEMEZA obutubatizibwa tukafooka kicweka ky’eka ya Yahwe. Kuba n’enkoragana enungi na Yahwe mugisa gw’amaani kandi boona abaine omugisa gunu baikiranganiza n’ebigambo bya Daudi ayagambire ati: “Ayina omugisa omuntu owokoma, owoiriza holi, aikalege omu zigati zawe.”—Zab. 65:4.

² Yahwe tamara gaikiriza buli muntu wena kuba n’enkoragana enungi nauwe. Nk’okutwarozere omu kicweka ekihoire, airra haihi naabo abooleka ngu nibagonza kuba n’enkoragana enungi nauwe. (Yak. 4:8) Obw’oyehayo hali Yahwe kandi okabatizibwa, otunga enkoragana ey’embaganiza nauwe. N’osobora kukigumya ngu Yahwe naija kukuha “omugisa, kunu tihalibaho omwanya” ahokuguteeka.—Mara. 3:10; Yer. 17:​7, 8.

3. Bujunanizibwa ki obw’amaani Abakristaayo abehaireyo kandi ababatiziibwe obubaine? (Omugambizi 5:​4, 5)

³ Kubatizibwa eba eri ntandikwa y’okuheereza Yahwe. Hanyuma y’okuteera orutambu runu, noija kukora kyona eky’orukusobora kugumira ha kweraga kwawe obworayohebwa rundi obworatunga ebizibu. (Soma Omugambizi 5:​4, 5.) Nk’omu h’abegeswa ba Yesu, noija kuhondera ekyokurorraho kye kandi oyorobere ebiragiro bye. (Mat. 28:​19, 20; 1 Pet. 2:21) Ekicweka kinu nikiija kukukonyera kurora omulingo osobora kukikora.

 IKARA N’OHONDERA YESU N’OBWORATUNGA EBIZIBU N’EBYOHYO

4. Yesu akaba namanyisa ki obuyagambire ngu abegeswa be nibaija kwetweka “omuti”? (Luka 9:23)

⁴ Hanyuma y’okubatizibwa otatekereza ngu noija kuba n’obwomeezi obutarumu bizibu. Yesu akakyoleka kurungi ngu abegeswa be baakwetwekere “omuti.” Kandi eki baakukikozere “obukyabukya.” (Soma Luka 9:23.) Tugambe ngu Yesu akaba namanyisa ngu abegeswa be nibaija kwikara nibabonabona? Nangwa. Akaba namanyisa ngu oihireho kutunga emigisa, baakutungire n’emitalibaine. Kandi emu haliyo yakubaletiire kubonabona.—2 Tim. 3:12.

5. Migisa ki Yesu eyiyaraganiize abo abefeereza?

⁵ Abanyabuzaale baawe nibasobora kuba nibakuhiiganiza, rundi oine ekyoyefeeriize kusobora kwebembeza Obukama. (Mat. 6:33) Obukiraaba nukwo kiri, kigumye ngu Yahwe narora byona ebyorukumukorra. (Baheb. 6:10) Kandi n’osobora kuba orozere ebigambo bya Yesu binu nibihikirra: “Busaho muntu asigire enju, rundi bene babu, rundi banyanya, rundi nyina, rundi ise, rundi abana, rundi obutaka, habwange na habwenjiri, baitu alihebwa emirundi kikumi omu biro binu ebya hati, enju, na bene babu, na banyanya, nabanyina, nabana, nobutaka, hamu nokuhigwa; kandi omubusinge oburukugenda kuija, obwomezi obutahwaho.” (Mar. 10:​29, 30) Emigisa eyoratunga nekirra hara ebintu byona ebyoyeferiize.—Zab. 37:4.

6. Habwaki nikiija kukwetaagisa kugumizaamu n’orwanisa “okwegomba okwomubiri” na hanyuma y’okubatizibwa?

⁶ Nikiija kukwetaagisa kurwanisa “okwegomba okwomubiri” na hanyuma y’okubatizibwa. (1 Yoh. 2:16) Eki nukwo kiri habwokuba noija kuba okyali muntu atahikiriire. Obwire obumu noija kwehurra nk’omukwenda Paulo obuyagambire ati: “Ninsemere’rwa ebiragiro bya Ruhanga omu muntu womunda: baitu mboine ebiragiro ebindi omu bicweka byange, ebirukurwana nebiragiro ebyamagezi gange, kandi nibinfora omuhambwa hali ebiragiro ebyekibi, ebiri omu bicweka byange.” (Bar. 7:​22, 23) N’osobora kuhwamu amaani habwokwikara n’orwanisa okwegomba okubi. Baitu obworatekerezaaho okweraga okuwakozere hali Yahwe, nikiija kukwekambisa kugumizaamu n’orwanisa okwegomba okubi. Amananu gali, obworatunga ebyohyo, okweraga okuwakozere hali Yahwe nikwija kukukonyera kwikara oli mwesiga. Omu mulingo ki?

7. Kwehayo hali Yahwe nikiija kukukonyera kita kwikara oli mwesigwa haluwe?

⁷ Obw’oyehayo hali Yahwe oyeyangisa wenka. Eki nikimanyisa ngu ocwamu kwangira kimu okwegomba okubi n’ebigendererwa ebitarukusemeza Yahwe. (Mat. 16:24) Nahabweki obworayohebwa torukwija kumara obwire notekerezaaho ekyorakora. Noija kuba omanyire ekyokukora, kandi eki nikiija kukukonyera kwikara oli mwesigwa hali Yahwe. Noija kwikara ocweriiremu kimu kusemeza Yahwe. Kandi noija kuba nka Yobu. Obuyatungire ebizibu eby’amaani akagamba ati: “Okuhikya okufa kwange tindyeyihaho okuhikirra kwange.”—Yob. 27:5.

8. Kwecumiitirizaaho okwehayo kwawe nikiija kukukonyera kita kwangirra ebyohyo?

⁸ Obworayecumiitirizaaho okwehayo kwawe hali Yahwe, nikiija kukukonyera kwangirra ebyohyo. Ekyokurorraho, kihikire kutandika kwoleka omuntu ow’otali nauwe omu buswere engonzi ezitasemeriire? Nangwa! Eki noija kukyetantara habwokuba okaraganiza Yahwe ngu tosobora kukora ekintu nk’eki. Kandi eki nikiija kukukonyera kwetantara obusaasi  oburuga omu kurwanisa enyehurra embi obuzifooka z’amaani. Noija kwetantara kutaaha “omu rugendo orwababi.”—Nfu. 4:​14, 15.

9. Kwecumiitirizaaho okwehayo kwawe nikisobora kita kukukonyera kwebembeza eby’omwoyo?

⁹ Kiki eky’osobora kukora kakuba oheebwa omulimo ogurakulemesa kugenda omu nsorrokano butoosa? Hataroho kugurukyagurukya noija kugwanga habwokuba okakora encwamu egi kara. Nahabweki, torukwija kwikiriza omulimo gunu nukwo hanyuma oserre omulingo oraheereza Yahwe. Kwecumiitirizaaho omulingo Yesu akaba acweriiremu kimu kwikara ali mwesigwa hali Ise, nikiija kukukonyera kwetantara kukora ekintu kyona ekirabiihiza Yahwe.—Mat. 4:10; Yoh. 8:29.

10. Yahwe naija kukukonyera ata kwikara n’ohondera Yesu na hanyuma y’okubatizibwa?

¹⁰ Ebirengo n’ebyohyo bikuha omugisa gw’okwoleka ngu ocweriiremu kimu kwikara n’ohondera Yesu. Obworakora eki, kigumye ngu Yahwe naija kukukonyera. Baibuli egamba eti: “Ruhanga wokwesiga, atalibaleka okwohebwa okukira ekimusobora; baitu hamu nokwohebwa alitaho hokuirukira, nukwo musobole okuguma.”—1 Kol. 10:13.

OMULINGO OSOBORA KWIKARA N’OHONDERA YESU

11. Mulingo ki omukuru ogw’osobora kwikara n’ohondera Yesu? (Rora ekisisani.)

¹¹ Yesu akaba ali mwekambi kandi akaikara aine enkoragana enungi na Yahwe kuraba omu kusaba. (Luk. 6:12) Kimu ha bintu ebirakukonyera kwikara n’ohondera Yesu nukwo kukora ebintu ebirakusobozesa kwirra haihi na Yahwe. Baibuli egamba eti: “Nkokutuhikireho, nukwo tugende tuti.” (Baf. 3:16) Noija kwikara nohurra ebyokurorraho eby’ab’oruganda na banyaanya itwe abasoboire kwongera ha buheereza bwabo. Obundi  bagenzere omu Isomero lya Batebezi b’Obukama rundi bagenzere kuheereza nambere hali obwetaago. Naiwe n’osobora kweteraho ebigendererwa nka binu enyikara obuziraaba nizikusobozesa. (Eng. 16:9) Abaheereza ba Yahwe bagonza kwongera ha buheereza bwabo. Baitu kiki eky’osobora kukora kakuba oba otarukusobora kuhika ha bigendererwa binu? Otatekereza ngu abandi nibakukira. Ijuka ngu ekirukukirayo obukuru nukwo kugumiisiriza. (Mat. 10:22) Kisemeza Yahwe obwokora kyona eky’osobora kumuheereza kusigikirra ha nyikara n’obusobozi bwawe. Ogu guli mulingo mukuru ogw’osobora kwikara n’ohondera Yesu hanyuma y’okubatizibwa.—Zab. 26:1.

12-13. Kiki eky’osobora kukora kakuba otandika kuleka kwegondeza omu bintu eby’omwoyo? (1 Abakolinso 9:​16, 17) (Rora akasanduuko “ Ikara omu Kaliitango.”)

¹² Kiki eky’osobora kukora kakuba oyehurra ngu tokyasaba kuruga ha mutima rundi tokyayegondeza omu buheereza? Kandi kiki eky’osobora kukora kakuba oba otakyayegondeza omu kusoma Baibuli nk’oku wakoraga kara? Eki kakuba kibaho, otatekereza ngu tokyaine omwoyo gwa Yahwe. Habwokuba tuli bantu abatahikiriire, enyehurra zaitu ziikara nizihinduka. Kakuba ohwamu amaani, wecumiitirizeeho ekyokurorraho ky’omukwenda Paulo. N’obukiraaba ngu akalengaho kwegera hali Yesu, akaba akimanyire ngu obwire obumu yakulemerwe kukora ebiyakugondeze. (Soma 1 Abakolinso 9:​16, 17.) Akagamba ati: “Baitu obumba ninkora obwokuhambirizibwa, nyina obuketo.” Ekirukumanyisa ngu Paulo akaba acweriiremu kimu kuhikiiriza obuheereza bwe n’obukiraaba ngu obwire obumu yayehambirizaaga.

¹³ Omulingo nugwo gumu, otakora ebintu nosigikira ha mulingo orukwehurra.  Nahabweki ikara ocweriiremu kimu kukora ekihikire nobworukuba otarukugonza kukikora. Kandi obworagumizaamu nokikora, noija kuhika nokyegondezaamu. Kuba n’entekaniza enungi ey’eby’omwoyo nk’okwesomesa Baibuli, kusaba, kugenda omu nsorrokano, n’okutebeza, nibiija kukukonyera kwikara n’ohondera Yesu na hanyuma y’okubatizibwa. Ekyokurorraho kyawe nikiija kwekambisa abandi kukora ekintu nikyo kimu.—1 Bas. 5:11.

“MWEROLE INYWENKA . . . MWERENGE INYWENKA”

14. Habwaki tusemeriire kwikara nitwekebera, kandi bikaguzo ki ebitusemeriire kwekaguza? (2 Abakolinso 13:5)

¹⁴ Ekindi ekirakukonyera nukwo kwikara noyekebera butoosa. (Soma 2 Abakolinso 13:5.) Ikara noyekebera kurora obworaaba nokyayesomesa Baibuli, nokyasaba, nogenda omu nsorrokano kandi obworaaba noyejumbira omu buheereza. Lengaho kuserra omulingo orayegondeza omu bintu binu nukwo bikugasire. Ekyokurorraho, wekaguze ebikaguzo binu: ‘Ninsobora kusoborra omuntu enyegesa za Baibuli ezokubandizaaho? Haroho empindahinduka ezinsobora kukora nukwo nyegondeze omu buheereza? Nsaba Yahwe kuruga ha mutima kandi esaara zange zooleka ngu nimwesigira kimu? Ngenda omu nsorrokano butoosa? Kiki ekinsobora kukora kweyongera kugarukamu n’okuteekaho omutima obundukuba ndi omu nsorrokano?’

15-16. Ekyokurorraho ky’ow’oruganda kikwegeseze ki ha kwangirra ebyohyo?

¹⁵ Ekindi, kwekebera kumanya obuceke obwoine nikiija kukukonyera. Ow’oruganda Robert atugambira ekyamubaireho ekirukwoleka ensonga egi. N’agamba ati: “Obunkaba nyine emyaka nka 20, nkatunga omulimo kandi kiro kimu hanyuma y’okwinuka omwisiki outwakoraga hamu akandaaliza omu ka ye. Akangambira ngu nitwija kubayo itwenka kandi twegonze. Hakubanza, nkekwasa obusongasonga baitu hakumalirra nkanga kandi namugambira ensonga habwaki.” Robert akangirra ekyohyo kinu kandi eki mali kirungi. Baitu hanyuma akatekerezaaho omulingo yayetwaize hakubanza kandi akakyetegereza ngu akaba asemeriire kumwangirra ahonaaho. N’agamba ati: “Ntangirre ekyohyo kinu ahonaaho nk’oku Yusufu yayangiriire muka Potifa. (Kub. 39:​7-9) Kikampuniiriza obunatekeriizeeho omulingo kyangumiire kwangirra ekyohyo kinu. Ekyabaireho kikankonyera kukirora ngu nkaba nsemeriire kweyongera kugumya enkoragana yange na Yahwe.”

 ¹⁶ Kwekebera nk’oku Robert yakozere nikisobora kukukonyera. Baitu na hanyuma yokwangirra ekyohyo wekaguze, ‘Kintwaliire bwire ki kukyangirra?’ Obuharaaba haroho empindahinduka ez’osemeriire kukora, otahwamu amaani. Semererwa habwokuba omanyire obuceke bwawe. Ikara n’osaba Yahwe akukonyere kandi ocweremu kimu kuhondera endengo ze ezirukukwata ha ngeso.—Zab. 139:​23, 24.

17. Robert obuyaikaire ali mwesigwa, kikakwataho kita ibara lya Yahwe?

¹⁷ Haroho ekintu ekindi ekiturukwegera ha kyokurorraho kya Robert. N’agamba ati: “Hanyuma y’okwangirra okuraaliza kw’omwisiki onu, akangambira ati, ‘osingire!’ Kandi nkamukaguza ekyakaba namanyisa. Akangambira ngu munywani we ow’akaba atakyali omu h’Abakaiso ba Yahwe akaba amugambiire ngu Abakaiso ba Yahwe abato abarukukira obwingi bakora ebintu ebibi omu nsita. Kandi akagambira munywani we ngu naija kundenga kurora nanyowe obundaaba ndi nk’abo. Kikansemeza ngu nkahaisa ibara lya Yahwe ekitiinisa.”

18. Kiki eky’ocwiremu kukora hanyuma y’okubatizibwa? (Rora akasanduuko “ Ebicweka Ebirakukonyera.”)

¹⁸ Obw’oyehayo hali Yahwe kandi okabatizibwa, oyoleka ngu nogonza kweza ibara lye n’obuharaabaho ki. Kigumye ngu Yahwe namanya ebizibu ebyorukurabamu n’ebirengo orukwangirra. Naija kukuha emigisa habw’amaani orukuteekamu kwikara oli mwesigwa. Naija kukozesa omwoyo gwe ogurukwera kukuha amaani ag’orukwetaaga. (Luk. 11:​11-13) Habw’obukonyezi bwa Yahwe noija kugumizaamu n’ohondera Yesu na hanyuma y’okubatizibwa.