1. Bamu h’abaheereza ba Yahwe abesigwa behurra bata?

 KANIKIGARRAMU amaani kukimanya ngu Yahwe nagonza abantu be boona nk’ekitebe! Baibuli egamba ngu: “[Yahwe] nasemere’rwa abantube.” (Zab. 149:4) Baitu obwire obumu, abamu nibasobora kuhwamu amaani nibekaguza bati: ‘Mali Yahwe nangonza nyowe nk’omuntu?’ Abamu h’abaheereza ba Yahwe abesigwa abarukubazibwaho omu Baibuli, haroho obubaayehurraga omu mulingo nk’ogu.—1 Sam. 1:​6-10; Yob. 29:​2, 4; Zab. 51:11.

2. Nibaha Yahwe abaagonza?

² Baibuli eyoleka ngu n’abantu abatahikiriire nibasobora kusiimwa Yahwe. Omu mulingo ki? Tusemeriire kwikiririza omuli Yesu Kristo kandi tubatizibwe. (Yoh. 3:16) Obutukora eki, tukyoleka omu rwijwire ngu twegarukiremu ebibi byaitu kandi twehaireyo hali Yahwe kukora ebyagonza. (Eng. 2:38; 3:19) Yahwe asemererwa obutukora ebintu ebi nukwo tusobole kuba n’enkoragana enungi nauwe. Obuturagumizaamu nitukora ekiturukusobora kuhikiiriza ekitwamuraganiize, naija kusemererwa kandi atutwale kuba banywani be.—Zab. 25:14.

3. Nitwija kubazaaho ki?

³ Baitu, habwaki obwire obumu abamu behurra ngu Ruhanga tarukubagonza? Yahwe ayoleka ata ngu nabagonza? Kandi nitusobora kukigumya tuta ngu Ruhanga natugonza?

HABWAKI ABAMU BEHURRA NGU YAHWE TARUKUBAGONZA?

4-5. N’obukiraaba ngu nitwehurra nk’abataine mugaso, kiki ekiturukugumya?

⁴ Abamu haliitwe, kuruga omu buto nitusobora kuba twikaire  nitwehurra nk’abataine mugaso. (Zab. 88:15) Ow’oruganda arukweta Adrián n’agamba ati: “Nkira kwehurra nk’omuntu ow’ataine mugaso. Obunkaba nkyali muto, nasabaga ngu ab’omu ka bahike omu nsi empyaka, baitu nyowe nkaba ntarukukigumya ngu ninsobora kubayo.” Tony, ayakuziibwe abazaire abatali bamu h’Abakaiso ba Yahwe n’agamba ati: “Bazaire bange bakaba batakangambiraga ngu nibangonza kandi tibaansiimaga. Baandeteraga kwehurra ngu busaho ekinsobora kukora kikabasemeza.”

⁵ Obwire obumu obuturaaba twehurra nk’abataine mugaso, tusemeriire kukiijuka ngu Yahwe akatucunda nambere ali. (Yoh. 6:44) Aturoramu ebirungi itwe ebitutasobora kweroramu kandi amanyire kyonyini ekiri omu mutima gwaitu. (1 Sam. 16:7; 2 Byom. 6:30) Nahabweki, nitusobora kukigumya ngu aba nakimanyisa obwatugambira ngu tuli b’omuhendo.—1 Yoh. 3:​19, 20.

6. Omwenda Paulo akehurra ata habw’ebibi ebyakaba akozere?

⁶ Abamu haliitwe, obutwali tutakegere amananu, nitusobora kuba twakozere ebintu ebitukyayeyijukya na hati. (1 Pet. 4:3) N’abantu abandi abaheeriize Yahwe n’obwesiga kumara akasumi nibasobora kuba nibakyarwanisa obuceke obumu. Omutima gwawe nigukyakurumiiriza? Obukiraaba nukwo kiri, nikisobora kukuhuumuza kukimanya ngu n’abaheereza ba Yahwe abaakara kandi abesigwa nabo haroho obubaayehurraga nkaiwe. Ekyokurorraho, omukwenda Paulo akahwamu amaani, obuyatekeriizeeho obutahikirra bwe. (Bar. 7:24) Ky’amananu ngu, Paulo akaba ayegarukiremu ebibi bye kandi yabatizibwa. Baitu nabwo, akeyeta “omuto owabakwenda” kandi “owokubanza” omu basiisi.—1 Kol. 15:9; 1 Tim. 1:15.

7. Kiki ekitusemeriire kwikara nitwijuka obukirukuhika ha bibi ebitwakozere kara?

⁷ Yahwe araganiize kutuganyira kakuba twegarukamu ebibi byaitu. (Zab. 86:5) Kakuba twegarukamu kuruga ha mutima, nitusobora kukigumya ngu mali Yahwe atuganyiire.—Bak. 2:13.

8-9. Kiki ekisobora kutukonyera kuleka kutekereza ngu titusobora kusiimwa Yahwe?

⁸ Tugonza kuheereza Yahwe n’obwekambi. Baitu, abamu behurra ngu tibarukukora ekirukumara kusiimwa Yahwe. Munyaanya itwe Amanda n’agamba ati: “Nkira kutekereza ngu kusobora kuha Yahwe ekirukukirayo oburungi, nsemeriire kukora ebirukukira ha bindukusobora. Kandi eki nikyo nkora. Baitu obubindema, nyehurra nk’ow’alemerwe kandi ngu Yahwe tarukusiima n’ebyo ebinsoboire kukora.”

⁹ Nitusobora tuta kweihamu enyehurra ey’okutekereza ngu titusobora kusemeza Yahwe? Twijuke ngu Yahwe nayetegereza enyehurra zaitu kandi talemeraho. Tatusaba kukora ekitutarukusobora. Asiima kyona ekitumukorra obukiba nikyo turukusobora. Ekindi, wecumiitirizeeho ebyokurorraho by’abo abaaheeriize Yahwe n’omutima gwabo gwona. Tekerezaaho Paulo. Akamara emyaka nyingi naheereza Yahwe n’obwekambi, akagenda engendo eziraihire, kandi yakonyera omu kutandikaho ebitebe bingi. Baitu enyikara obuzaali zitakyamusobozesa kutebeza nk’oku yakugondeze, akehurra ngu Ruhanga takyamugonza? Nangwa. Akagumizaamu nakora ekyarukusobora kandi Yahwe akamuha emigisa. (Eng. 28:​30, 31) Naitwe nitusobora kuba tutakyasobora kuheereza Yahwe nk’oku twakoraga kara. Baitu ekirukukirayo obukuru niyo ensonga habwaki nitumuheereza. Leka tubazeeho omulingo Yahwe ayoleka ngu nasiima ebiturukumukorra.

 YAHWE AYOLEKA ATA NGU NASIIMA EBITURUKUMUKORRA?

10. Nitusobora tuta kuhurra iraka lya Yahwe natugambira nk’oku arukutugonza? (Yohana 16:27)

¹⁰ Akozesa Baibuli. Yahwe ayoleka abantu ngu n’abagonza kandi n’abasiima. Baibuli ebazaaho emirundi ebiri Yahwe obuyagambiire Omwana we Yesu ngu n’amugonza. (Mat. 3:17; 17:5) Naiwe wakugondeze kuhurra Yahwe nakugambira ebigambo nk’ebi? Yahwe tabaza naitwe kuruga omu iguru, baitu abaza naitwe kuraba omu Baibuli. Nitusobora kuhurra iraka lya Yahwe natugambira ngu natugonza obutusoma ebigambo bya Yesu ebiri omu bitabu by’Enjiri. (Soma Yohana 16:27.) Yesu akahondera ekyokurorraho kya Ise kikumi ha kikumi. Nahabweki obutusomaho Yesu nagambira abahondezi be abatahikiriire ngu nabagonza, nitusobora tuteeramu akasisani Yahwe natugambira ebigambo ebi.—Yoh. 15:​9, 15.

11. Obututunga ebizibu, habwaki kiba kitarukumanyisa ngu Yahwe takyatugonza? (Yakobo 1:12)

¹¹ Kuraba omu bikorwa. Yahwe ayetekaniize kutukonyera. Ekyokurorraho, n’asobora kutuha ebyetaago byaitu eby’omubiri. Obwire obumu, Yahwe n’asobora kutuleka nituhikwaho ebizibu nk’oku yakozere hali Yobu. (Yob. 1:​8-11) Baitu eki kiba kitarukumanyisa ngu takyatugonza. Oihireho, kituha omugisa ogw’okwoleka ngu nitumugonza kandi nitumwesiga. (Soma Yakobo 1:12.) Naija kutukonyera kugumiisiriza, kuraba omu kutusagika n’okutwoleka okugonza.

12. Ekyokurorraho kya Dmitrii nikisobora kutwegesa ki?

¹² Tekerezaaho ekyokurorraho eky’ow’oruganda arukwetwa Dmitrii kuruga omu Asia. Akafeerwa omulimo gwe kandi yamara emyezi nyingi atakatungire ogundi. Akooleka ngu nayesiga Yahwe, kuraba omu kwongera ha bwire obw’amara omu kutebeza. Hakarabaho emyezi endi nyingi atakatungire omulimo. Hanyuma, akarwara kandi yamara obwire bwingi ali ha kitabu atasobora n’okurubata. Akatandika kwehurra ngu takyali nyineeka rundi taata ow’omugaso, kandi yatandika kwekaguza Yahwe obwaraaba nakyamufaaho. Baitu rwebagyo rumu muhara we akahandiika ha rupapura ebigambo ebiri omu Isaya 30:​15, ebirukugamba ngu, “omu [kutekaana] nomu kwesiga nuho haliba amani ganyu.” Akaruleeta yarubamba ha rubaju rw’ekitabu kye, yamugambira ati: “Taata, obworahurra ohoiremu  amaani, oijuke ekyahandiikirwe kinu.” Dmitrii akakyetegereza ngu Yahwe akaba namukonyera habwokuba ab’omu ka ye bakaba bakyaine ebyokulya ebirukumara, ebijwaro, n’oburaaro. Dmitrii n’agamba ati: “Ekinkaba nsemeriire kukora, nukwo kwikara ntekaine n’okugumizaamu ninyesiga Ruhanga.” Obworaaba noraba omu nyikara niyo emu, kigumye ngu Yahwe nakufaaho kandi naija kukukonyera kugumiisiriza.

13. Nibaha Yahwe abaasobora kukozesa kutwoleka ngu n’atugonza kandi omu mulingo ki?

¹³ Akozesa ab’oruganda na banyaanya itwe. Yahwe akozesa ab’oruganda na banyaanya itwe kutwoleka ngu natugonza. Ekyokurorraho, n’asobora kukozesa abandi kutugambira ebigambo ebirukugarramu amaani, omu kasumi turukubyetaagiramu. Munyaanya itwe kuruga Asia eki nikyo kyamuhikireho. Akafeerwa omulimo gwe kandi yarwara muno. Hanyuma, iba akakora ekibi eky’amaani kandi yaleka kuheereza nk’omugurusi. Munyaanya itwe n’agamba ati: “Nkaba ntasobora kwetegereza habwaki ebizibu ebi bikaba nibimpikaho. Nkatekereza ngu obundi nkaba nkozere ekibi naleka kusiimwa Yahwe.” Baitu akasaba Yahwe kumwoleka obwaraaba nakyamugonza. Yahwe akagarukamu ata esaara ye? N’agamba ati: “Abagurusi b’ekitebe bakabaza nanyowe kandi bangumya ngu Yahwe nakyangonza.” Baitu akongera yasaba Yahwe ha nsonga niyo emu. N’agamba ati: “Kiro eki nkatunga ebbaruha eyahandiikirwe guruupu ey’ab’oruganda na banyaanya itwe ab’omu kitebe kyaitu. Obunasomere ebigambo ebirukuhuumuza ebikaba biri omu bbaruha enu, nkehurra ngu Yahwe agarukiremu esaara yange.” Mali, Yahwe atwoleka ngu natugonza kuraba omu bigambo eby’embabazi abandi ebibatugambira.—Zab. 10:17.

14. Mulingo ki ogundi Yahwe atwoleka ngu n’atugonza?

 ¹⁴ Ekindi, Yahwe akozesa ab’oruganda na banyaanya itwe kutuha obuhabuzi obuturukwetaaga. Ekyokurorraho, omu kyasa eky’okubanza Yahwe akakozesa omukwenda Paulo kuhandiikira Abakristaayo bagenzi be ebbaruha 14. Omu bbaruha ezi, Paulo akabagambirraho bbwa baitu omu mulingo gw’okugonza. Habwaki Yahwe yaterekeriize Paulo kuhandiika obuhabuzi bunu? Yahwe ali Isiitwe ow’okugonza, kandi ahabura abaana be ‘abaasemerererwa.’ (Nfu. 3:​11, 12) Nahabweki, kakuba tutunga obuhabuzi oburukusigikirra ha Baibuli, tusemeriire kuburora nk’obwakaiso oburukwoleka ngu Ruhanga n’atugonza hatali ngu takyatugonza. (Baheb. 12:6) Bwakaiso ki obundi oburukutugumya ngu Ruhanga nakyatugonza?

OBWAKAISO OBUNDI OBURUKUTUGUMYA NGU RUHANGA NATUGONZA

15. Nibaha Yahwe abaaha omwoyo gwe ogurukwera kandi eki nikitukonyera kugumya ki?

¹⁵ Yahwe aha omwoyo gwe ogurukwera abo abakora ebyarukugonza. (Mat. 12:18) Nitusobora kwekaguza, ‘Omu bwomeezi bwange, nyoleka emiringo ey’eretwa omwoyo ogurukwera?’ Nokirora ngu hati oyeyongiire kwoleka okugumiisiriza kukira nk’oku wakwolekaga otakegere hali Yahwe? Obworayeyongera kwoleka emiringo ey’eretwa omwoyo ogurukwera, noija kweyongera kukigumya ngu nosiimwa Yahwe.—Rora akasanduuko “ Emiringo ey’Eretwa Omwoyo Ogurukwera . . . ”

16. Nibaha Yahwe abaakozesa kutebeza amakuru amarungi, kandi eki nikikuleetera kwehurra ota? (1 Abasesalonika 2:4)

¹⁶ Yahwe ahaire abo boona abaagonza omugisa ogw’okutebeza amakuru amarungi. (Soma 1 Abasesalonika 2:4.) Wetegereze omulingo munyaanya itwe Jocelyn yagasiirwe omu kugambiraho abandi amakuru amarungi. Kiro kimu, akaimuka ayetuntwire muno. N’agamba ati: “Nkaba ninyehurra ntaine maani. Baitu habwokuba nkaba ndi payoniya kandi kiro kyange eky’okugenda omu buheereza, nkasaba Yahwe kandi hanyuma nagenda omu buheereza.” Nyenkyakara egi, Jocelyn akatebeza omukazi arukwetwa Mary kandi yaikiriza kwega Baibuli. Hanyuma y’emyezi nke kurabaho, Mary akagamba ngu nyenkyakara egi Jocelyn obuyaizire omu ka ye, akaba nasaba Ruhanga kumukonyera. Ekyokurorraho kinu kikegesa ki Jocelyn? N’agamba ati: “Yahwe  akaba nangambira ngu, ‘ninkugonza.’” Ky’amananu ngu abantu abamu, tibarukwija kutuhuliiriza. Baitu nitukigumya ngu Yahwe asemererwa obutwekamba kugambiraho abantu abandi, amakuru amarungi.

17. Ebigambo bya Vicky ebirukukwata ha kicunguro nibikwegesa ki? (Zabuli 5:12)

¹⁷ Yahwe akahayo ekicunguro nukwo kigasire abo boona abaarukugonza. (1 Tim. 2:​5, 6) Baitu tusemeriire kukora ki kakuba kiba nikitugumira kukiikiriza ngu Yahwe n’atugonza, n’obuturaaba nitwikiririza omu kicunguro kandi tubatiziibwe? Ijuka ngu titusemeriire kuteeka omutima ha mulingo turukwehurra, baitu tusemeriire kwesiga Yahwe. Abo abaikiririza omu kicunguro, abarora nk’ab’okuhikirra kandi naraganiza kubaha emigisa. (Soma Zabuli 5:12; Bar. 3:26) Vicky akecumiitirizaaho ekicunguro kandi eki kikamukonyera. N’agamba ati: “Yahwe akaba angumiisiriize muno, . . . Baitu nkaba ninsisana nk’arukumugamba ngu: ‘Okugonza kwawe tikurukummara. Ekihongwa ky’Omwana waawe tikirukumara kuswekerra ebibi byange.’” Baitu obuyayecumiitirizeeho ekisembo kinu eky’ekicunguro, akatandika kukirora ngu Yahwe namugonza. Naitwe obuturayecumiitirizaaho ekicunguro, nitwija kukirora ngu nitusiimwa Yahwe kandi n’atugonza.

18. Kiki ekitusobora kugumya kakuba twikara nitugonza Isiitwe ow’omu iguru?

¹⁸ N’obuturateeka omu nkora ebitwayega omu kicweka kinu, obwire obumu nitusobora kuhwamu amaani nitwekaguza obuturaaba nitusiimwa Yahwe. Eki obukiraabaho, ijuka ngu Yahwe agonza abo boona “abarukumugonza.” (Yak. 1:12) Nahabweki, gumizaamu noirra haihi na Yahwe kandi olengeho kurora emiringo yoona ey’akwolekamu okugonza. Kandi oikale noijuka ngu Yahwe tali “hara nomu wena haliitwe.”—Eng. 17:27.