Ekicunguro Yesu ekiyahaireyo habw’esagama ye nikyo kitusobozesa kuganyirwa ebibi byaitu. (Bef. 1:7) Baitu Baibuli egamba eti: ‘Ruhanga ouyataireho okuba ekicunguro, obw’okwikiriza esagama ye, okwoleka okuhikirra kwe omu kuganyira ebibi ebyakozerwe ira.’ Orukarra runu nirubazaaho ebibi ebyakozerwe Yesu atakahaireyo ekicunguro. (Bar. 3:25) Yahwe akaba n’asobora ata kuganyira abantu ebibi, baitu ha murundi nugwo gumu akalinda orulengo rwe orw’obwinganiza?

Yahwe obuyaraganiize okusindika ‘oruzaaro’ orwakujunire abantu, akisisana nk’ow’amazire kuhayo ekicunguro hali abo abaakukiikiririzeemu. (Kub. 3:15; 22:18) Ruhanga akaba nakigumiza kimu ngu omu bwire obuhikire, Omwana we yakuhaireyo ekicunguro ayegondiize. (Bag. 4:4; Baheb. 10:​7-10) Yesu obwakaba ali omu nsi, Yahwe akamuha obusobozi obwokuganyira ebibi ekicunguro kitakahairweyo. Yesu akaba n’asobora kuganyira ebibi byabo abaali baine okwikiriza habwokuba akaba amanyire ngu ekicunguro ekyakaba nagenda kuhayo kikaba nikiija kubasobozesa kuganyirwa ebibi.—Mat. 9:​2-6.