1-2. Kiki omuntu eky’asemeriire kukora atakabatiziibwe?

 OMU myaka etaano ey’erabireho, abantu abarukuhingura omu kakaikuru kamu bakabatizibwa nk’Abakaiso ba Yahwe. Nka Timoseo, baingi omulibo bakeegesebwa amananu kuruga “omu buto.” (2 Tim. 3:​14, 15) Abandi bakeega hali Yahwe bakuzire kandi abandi bakaikwire. Omu myaka ey’enyuma, omukazi omu akatandika kwega Baibuli n’Abakaiso ba Yahwe kandi yabatizibwa aine emyaka 97!

² Obworaaba oli mwegi wa Baibuli rundi nokuzibwa abazaire abali bamu h’Abakaiso ba Yahwe, notekerezaaho kubatizibwa? Eki kigendererwa kirungi. Baitu otakabatiziibwe, osemeriire kubanza kwehayo hali Yahwe. Ekicweka kinu nikiija kukukonyera kwetegereza kwehayo hali Yahwe nikimanyisa ki. Ekindi, nikiija kukukonyera kumanya ensonga habwaki otasemeriire kutiina kwehayo n’okubatizibwa obworukuba n’oyehurra ngu ohikire.

NIKIMANYISA KI KWEHAYO?

3. Bazaaho ebyokurorraho by’abantu abaayehaireyo hali Yahwe.

³ Omu Baibuli, omuntu ayayehayoga hali Yahwe yabaga akomerwemu kuhikiiriza obujunanizibwa obw’embaganiza. Isaleri likaba liri ihanga elyehaireyo hali Yahwe. Baitu Abaisaleri abamu bakaba behaireyo hali Yahwe omu mulingo ogw’embaganiza. Ekyokurorraho, Aroni yajwaraga “ekondo erukwera” ey’ekaba eroho akabbali k’ezaabbu akaabaga kali ha kiremba ekiyajwaraga ha mutwe. Akabbali k’ezaabbu  kayolekaga ngu akaba akomerwemu kuheereza Yahwe omu mulingo ogw’embagniza, obu naheereza nka nyakatagara omukuru omu Isaleri. (Lev. 8:9) Abanaziri nabo bakaba behaireyo kuheereza Yahwe omu mulingo ogw’embaganiza. Ekigambo “omunaziri,” ekirukuruga omu kigambo nazirʹ, eky’Oruheburaniya nikimanyisa “ow’Abaganiziibwe hali abandi,” rundi “ow’Ayehaireyo.” Omu Biragiro bya Musa hakaba harumu ebiragiro eby’embaganiza Abanaziri ebibakaba baine kworobera.—Kubar. 6:​2-8.

4. (a) Obw’oyehayo hali Yahwe oba oine bujunanizibwa ki? (b) Nikimanyisa ki ‘kweyangisa’? (Rora ekisisani.)

⁴ Obw’oyehayo hali Yahwe, ocwamu kufooka omu h’abegeswa ba Yesu Kristo kandi oyebembeza kukora Ruhanga eby’agonza omu bwomeezi bwawe. Eki nikitwarramu ki? Yesu akagamba ati: “Omuntu obwayenda okuija enyuma yange, ayeyangise wenka.” (Mat. 16:24) Ebigambo eby’Oruyonaani ebirukuhindurwa nka “ayeyangise wenka” nibisobora n’okumanyisa “kwerekesa.” Hanyuma y’okwehayo hali Yahwe, nikiija kukwetaagisa kwanga kukora ebintu ebitarukumusemeza. (2 Kol. 5:​14, 15) Eki nikimanyisa ngu noija kwetantara “engeso ezomubiri,” nk’obusiihani. (Bag. 5:​19-21; 1 Kol. 6:18) Kwetantara ebintu nk’ebi kigumire? Tikirukwija kukugumira obworaaba n’ogonza Yahwe kandi n’okigumya ngu ebiragiro bye bitugasira. (Zab. 119:97; Is. 48:​17, 18) Ow’oruganda arukwetwa Nicholas n’agamba ati: “N’osobora kucwamu kurora emisingi ya Yahwe nk’emitahimbwa y’enkomo erukukulemesa kukora eby’orukugonza rundi nk’emitahimbwa ey’ekiju ky’entale erukukulinda zitakulya.”

5. (a) Oyehayo ota hali Yahwe? (b) Mbaganiza ki enyakuli hagati y’okwehayo n’okubatizibwa? (Rora ekisisani.)

⁵ Oyehayo ota hali Yahwe? Omuraganiza kuraba omu kusaba ngu noija kuramya uwe wenka kandi ngu noija kwebembeza  ebyarukugonza omu bwomeezi bwawe. Obwokora eki, oba noraganiza Yahwe ngu noija kugumizaamu nomugonza “nomutima gwawe gwona, nobwomezi bwawe bwona, namagezi gawe gona, namani gawe gona.” (Mar. 12:30) Kinu okikora omu nsita hagati yaawe na Yahwe. Baitu okubatizibwa, kubaho omu rwijwire kandi oba noyoleka abandi boona ngu oyehaireyo hali Yahwe. Obw’oyehayo hali Yahwe oba omuraganiize kumuheereza kandi nakunihirramu kuhikiiriza okweraga oku.—Mug. 5:​4, 5.

HABWAKI OSEMERIIRE KWEHAYO HALI YAHWE?

6. Kiki ekyekambisa omuntu kwehayo hali Yahwe?

⁶ Ensonga ey’erukukirayo obukuru ey’esemeriire kukuleetera kwehayo hali Yahwe nukwo okugonza okwomwiniire. Okugonza oku tikurukusigikirra ha nyehurra kwonka. Baitu kusigikirra ha “kumanya” nokwetegereza amananu agarukuwata hali Yahwe n’ekigendererwa kye. (Bak. 1:9) Kwega Baibuli kikukonyiire kukigumya ngu (1) Yahwe aroho kwo, (2) Baibuli Kigambo kye ekyaterekereziibwe omwoyo ogurukwera, kandi ngu (3)  akozesa ekitebe kye kuhikiiriza eby’agonza.

7. Kiki ekitusemeriire kukora tutakehaireyo hali Ruhanga?

⁷ Abo abehayo hali Yahwe basemeriire kuba bamanyire enyegesa ezokubandizaaho kandi nibahondera endengo za Baibuli. Bakora kyona ekibarukusobora kugambiraho abandi ebibeegere. (Mat. 28:​19, 20) Habwokuba nibagonza Yahwe, kibekambisa kuheereza uwe wenka. Naiwe nukwo orukwehurra oti? Obworaaba n’ogonza Yahwe, torukwija kwehayo n’okubatizibwa habw’okugonza kusemeza  omwegesa waawe owa Baibuli rundi bazaire baawe. Kandi torukwija kukikora ngu habwokuba banywani baawe nabo nikyo bakozere.

8. Kwoleka okusiima nikiija kukwekambisa kita kwehayo hali Yahwe? (Zabuli 116:​12-14)

⁸ Kakuba otekerezaaho ebintu byona Yahwe ebyakukoliire, nikiija kukwekambisa kugonza kuhayo obwomeezi bwawe haluwe. (Soma Zabuli 116:​12-14.) Baibuli egamba ngu Yahwe Ruhanga nuwe atuha “ekisembo kyona ekirungi nekisembo kyona ekihikiriire.” (Yak. 1:17) Omu bisembo byona, ekisembo ekirukukirayo Yahwe ekiyatuhaire nikyo eky’Omwana we Yesu Kristo. Kitekerezeeho! Ekicunguro kikusobozeseze kuba n’enkoragana enungi na Yahwe. Kandi oine okunihira kw’okwomeera ebiro n’ebiro. (1 Yoh. 4:​9, 10, 19) Obw’oyehayo hali Yahwe, oba noyoleka ngu n’osiima habw’ebisembo binu n’emigisa endi ey’akuhaire. (Bir. 16:17; 2 Kol. 5:15) Omulingo tusemeriire kwolekamu okusiima gubazibweho omu isomo 46 akacweka 4, omu kitabu Wegondeze omu Bwomeezi Ebiro n’Ebiro!, nambere hali vidiyo ey’edakiika isatu enyakwine omutwe, Kuhayo Ebisembo Byawe Hali Ruhanga.

OHIKIRE KWEHAYO OKABATIZIBWA?

9. Habwaki omuntu atasemeriire kuhurra ahambiriziibwe kwehayo hali Yahwe?

⁹ N’osobora kwehurra ngu tokahikire kwehayo kandi okabatizibwa. Obundi oine empindahinduka ez’osemeriire kukora omu bwomeezi bwawe kusobora kuteeka omu nkora ebyorukwega, rundi noyetaaga obwire kweyongera kugumya okwikiriza kwawe. (Bak. 2:​6, 7) Abeegi boona bakurakurana ha rulengo orurukwahukana kandi abaana boona tibehayo bakabatizibwa ha myaka niyo emu. Lengaho kwetegereza empindahinduka ez’osemeriire kukora hatali kwerengesaniza n’omuntu ondi.—Bag. 6:​4, 5.

10. Kiki eky’osobora kukora kakuba oyehurra ngu tokahikire kwehayo kandi okabatizibwa? (Rora akasanduuko “ Hali Abo Abakuliire omu Mananu.”)

¹⁰ N’obworaaba noyehurra ngu tokahikire kwehayo hali Yahwe, n’osobora kukyeteraho nk’ekigendererwa. Saba Yahwe akukonyere kukora empindahinduka ezirukwetaagisa. (Baf. 2:13; 3:16) Kandi kigumye ngu naija kugarukamu esaara yaawe.—1 Yoh. 5:14.

HABWAKI ABAMU BATIINA?

11. Yahwe naija kutukonyera ata kwikara tuli besigwa haluwe?

¹¹ N’obukiraaba ngu abamu bahikire kwehayo n’okubatizibwa, batiina kukikora. Nibasobora kweralikirra ngu hanyuma y’okubatizibwa nibaija kukora ekibi ky’amaani babingwe omu kitebe. Kakuba oba oine okutiina nk’oku, kigumye ngu Yahwe naija kukuha buli kimu kyona ekyorukwetaaga ‘kugenda kurungi nk’okukisemeriire Mukama waitu obw’okusiimwa kwona.’ (Bak. 1:10) Ekindi, naija kukuha amaani kukora ebihikire. Habwokuba haroho baingi abaakonyiire. (1 Kol. 10:13) Egi niyo ensonga habwaki abantu bataito muno nubo babingwa omu kitebe. Yahwe akonyera abantu be kwikara bali besigwa.

12. Nitusobora tuta kwetantara kukora ekibi eky’amaani?

¹² Buli muntu wena atahikiriire ayohebwa kukora ekibi. (Yak. 1:14) Baitu n’osobora kucwamu kuhondera okwohebwa oku rundi kukora ekihikire. Niiwe oine obusobozi obwokucwamu omulingo oratwazaamu obwomeezi bwawe. Abantu abamu bagamba ngu eki tikirukusoboka, baitu ago tigali mananu. N’osobora kwega kulema enyehurra zaawe embi. N’obukiraaba ngu obwire obumu enyehurra ezitahikire nizisobora kugaruka,  n’osobora kugumizaamu n’ozirwanisa. Nahabweki, saba buli kiro. Ikara oine entekaniza enungi ey’okwesomesa Baibuli, kugenda omu nsorrokano zoona, kandi oikale noyejumbira omu mulimo ogw’okutebeza. Obworaikara nokora ebintu binu, nikiija kukwekambisa kwikara oli mwesigwa hali Yahwe. Kandi ikara noijuka ngu Yahwe naija kukukonyera.—Bag. 5:16.

13. Yusufu akatuteraho kyokurorraho ki ekirungi?

¹³ Nikiija kukwanguhira kwikara oli mwesigwa hali Yahwe kakuba ocwamu kara ekyorakora obworayohebwa. Omu Baibuli harumu ebyokurorraho eby’abantu abaakozere eki n’obukiraaba ngu baali batahikiriire. Ekyokurorraho, muka Potifa akaikara nasoonasoona Yusufu kubyama nauwe. Baitu Yusufu akaba amanyire ekyokukora. Baibuli eyoleka ngu ‘akanga’ kandi yagamba ati: “Ninsobora nta okukora ekibi kinu ekingi muno nokusisira Ruhanga?” (Kub. 39:​8-10) Kinu nikyoleka kurungi ngu Yusufu akaba amanyire kara ekyokukora omukazi onu atakalengeroho kumusoonasoona. Kandi kikamwanguhira kukora ekihikire obuyayohiibwe.

14. Nitusobora tuta kwega kwangirra ebyohyo?

¹⁴ N’osobora ota kwegera ha kyokurorraho kya Yusufu? N’osobora kucwamu hati ekyorakora obworayohebwa. Ahonaaho oyangire kimu ebintu Yahwe anoba kandi otaikara nobitekerezaaho. (Zab. 97:10; 119:165) Obworakora eki, torukwija kukora ekibi habwokuba noija kuba omanyire ekyokukora obworayohebwa. Eki, nikiija kukukonyera kwikara nokora ebirukusemeza Yahwe.

15. Omuntu ayoleka ata ngu ‘naserra’ Yahwe? (Abaheburaniya 11:6)

¹⁵ Obundi n’osobora kuba okimanyire ngu ozoire amananu, kandi n’ogonza kuramya Yahwe n’omutima gwawe gwona, baitu nabwo oyehurra ngu tokahikire kwehayo n’okubatizibwa. N’osobora kukora Omukama Daudi ekiyakozere. N’osobora kwesengereza Yahwe oti: “Ndora muno, ai Ruhanga, omanye omutima gwange: ondenge, omanye ebitekerezo byange: Kandi orole, rundi haroho omuhanda gwona ogwobubi omuli nyowe, kandi onterekereze omu muhanda ogutahwaho.” (Zab. 139:​23, 24) Yahwe aha emigisa abo boona “abanyakumuserra.” Obwoyekamba kuhika ha kigendererwa kyawe eky’okwehayo n’okubatizibwa  oba noyoleka ngu n’oserra Yahwe.—Soma Abaheburaniya 11:6.

IKARA NOIRRA HAIHI NA YAHWE

16-17. Yahwe acunda ata abo abaine abazaire abali bamu h’Abakaiso ba Yahwe? (Yohana 6:44)

¹⁶ Yesu akagamba ngu Yahwe nuwe acunda abegeswa be. (Soma Yohana 6:44.) Tekerezaaho ensonga habwaki ekintu kinu kirungi muno n’omulingo kirukukukwataho iwe nk’omuntu. Buli muntu Yahwe ow’acunda aba amurozeremu ekirungi. Kandi amurora nk’ow’omuhendo haluwe. (Bir. 7:6) Naiwe nukwo arukukurora ati.

¹⁷ Nikisobora kuba ngu okyali muto, kandi bazaire baawe bali bamu h’Abakaiso ba Yahwe. N’osobora kwehurra ngu noheereza Yahwe habwokuba bazaire baawe nikyo barukukora. Baitu nabwo, Baibuli egamba eti: “Mwirre haihi Ruhanga, nauwe alibairra haihi.” (Yak. 4:8; 1 Byom. 28:9) Obwoyekamba kwirra haihi na Yahwe nauwe akwirra haihi. Yahwe tatutwarra hamu nka guruupu y’abantu. Oihireho acunda buli muntu omuomu otwaliiremu n’ogu ow’akuliire omu mananu. Omuntu ogu obwayekamba kwirra haihi na Yahwe, nauwe amwirra haihi nk’oku kyolekerwe omu Yakobo 4:8.—Lengesaniza na 2 Abasesalonika 2:13.

18. Nitwija kubazaaho ki omu kicweka ekirukuhonderaho? (Zabuli 40:8)

¹⁸ Obw’oyehayo hali Yahwe kandi okabatizibwa, okora ekintu Yesu nauwe ekiyakozere. Akehayo hali Ise ayegondiize kukora byona ebyarukugonza. (Soma Zabuli 40:8; Baheb. 10:7) Omu kicweka ekirukuhonderaho, nitwija kurora ekirakukonyera kwikara noheereza Yahwe n’obwesigwa hanyuma y’okubatizibwa.