1. Kusigikirra ha 1 Petero 5:2, abagurusi b’ekitebe baine bujunanizibwa ki?

 ABAGURUSI b’ekitebe baine obujunanizibwa obw’okurolerra entaama za Yahwe ez’omuhendo. Omugisa gunu ogw’okuheereza ab’oruganda na banyaanya itwe bagutwara kuba gw’omuhendo, kandi bekamba kuba “abalisa” abarungi. (Yer. 23:4; soma 1 Petero 5:2.) Mali nitusiima muno kuba n’abasaija bamulingo ogu omu bitebe byaitu!

2. Mitalibaine ki abagurusi eibasobora kutunga?

² Abagurusi batunga emitalibaine nyingi obubaba nibahikiiriza obujunanizibwa bwabo. Nikibetaagisa kuteekamu amaani kurolerra ekitebe. Omugurusi arukwetwa Tony kuruga United States akeega kwikiriza obujunanizibwa obwarukusobora bwonka. N’agamba ati: “Oburwaire bwa Korona obubukaba bukyaizire, nkakora emirimo nyingi omu kutekaniza ensorrokano, n’obuheereza kukira ha binkaba ninsobora. N’obukiraaba ngu nakoraga ebintu bingi, habahoga ebindi bingi ebyokukora. Hakumalirra, nkaburwa obwire obw’okwesomesa, kusoma Baibuli, n’okusaba.” Omugurusi ondi kuruga Kosovo arukwetwa Ilir, akatunga emitalibaine erukwahukanaho. Akaba ali omu kiikaro ekirumu obulemu, kandi kikamugumira kuhondera oburagirizi obuyatungire kuruga omu kitebe. N’agamba ati: “Nkeralikirra muno ofiisi y’itaagi obuyampaire obujunanizibwa obwokurolerra ab’oruganda abali omu kiikaro kinu. Nkatiina habwokuba oburagirizi obwampairwe bwali nibuzooka nk’obutarukukora.” Omumiisani arukwetwa Tim kuruga Asia kikamugumira kukora ebintu ebyakaba asemeriire kukora. N’agamba ati: “Obwire obumu, nahurraga njwahire kandi ntakyaine kusemererwa.” Kiki ekisobora kukonyera abagurusi abatunga emitalibaine niyo emu?

3. Itwena nitusobora tuta kugasirwa omu kwegaho ekyokurorraho kya Gideoni?

 ³ Abagurusi nibasobora kwegera ha kyokurorraho eky’omucwi w’emisango Gideoni. (Baheb. 6:12; 11:32) Akarolerra kandi yalinda abantu ba Ruhanga. (Bac. 2:16; 1 Byom. 17:6) Nka Gideoni, abagurusi nabo bakomerwe kurolerra n’okulinda abantu ba Ruhanga omu kasumi akagumire. (Eng. 20:28; 2 Tim. 3:1) Nitusobora kwegera ha kyokurorraho kya Gideoni eky’obuculeezi, obwebundaazi, n’obuhulizi. Okugumiisiriza kwe kukalengwa obwakaba nahikiiriza obujunanizibwa bwe. Katube nituheereza nk’abagurusi rundi nangwa, itwena tusemeriire kusiima omulimo abagurusi barukukora. Tusemeriire kusagika abasaija banu abekambi.—Baheb. 13:17.

4. Gideoni akooleka ata obuculeezi n’obwebundaazi?

⁴ Gideoni akaba ali musaija omuculeezi kandi omwebundaazi. b Malaika wa Yahwe obuyamugambiire ngu akaba akomerwe kujuna Abaisaleri omu mukono gw’Abamidiani, Gideoni akamugarukamu ati: “Bagenzi bange nibakira obunaku bona abomu Manase, nanyowe ninkira obuto bona abomu nju ya isenyowe.” (Bac. 6:15) Akerora nk’owatarukusobora kuhikiiriza obujunanizibwa obu, baitu Yahwe akaba akimanyire ngu n’asobora. Habw’obukonyezi bwa Yahwe, akasobora kubuhikiiriza kurungi.

5. Nidi obukisobora kugumira omugurusi kwikara ali muculeezi kandi mwebundaazi?

⁵ Abagurusi bekamba kwoleka obuculeezi n’obwebundaazi omu byona ebibarukukora. (Mik. 6:8; Eng. 20:18, 19) Tibehaisaniza habw’ebibakozere rundi habw’ebibasobora kukora; kandi tiberora nk’abataine mugaso habw’ensobi ezimu ezibakora. Baitu obwire obumu nikisobora kubagumira kwikara bali bebundaazi kandi baculeezi. Ekyokurorraho, omugurusi n’asobora kwikiriza obujunanizibwa bwingi kandi obumu bukamulema kuhikiiriza. Rundi abamu nibasobora kumuhaisaniza habw’omulingo ahikiirizeemu obujunanizibwa obumu kandi abandi nibasobora kutagonza omulingo ahikiirizeemu obundi. Kiki abagurusi ekibasobora kwegera ha Gideoni ekirabakonyera omu nyikara nka zinu?

6. Kiki Abagurusi ekibasobora kwegera ha buculeezi bwa Gideoni? (Rora ekisisani.)

⁶ Saba obukonyezi. Omuntu omuculeezi amanya obugarukiro bwe. Gideoni akooleka ngu  muculeezi obuyasabira abandi obukonyezi. (Bac. 6:27, 35; 7:24) Omulingo nugwo gumu abagurusi abaculeezi nabo basaba obukonyezi. Tony, outubalizeehoga n’agamba ati: “Habw’omulingo nakuziibwemu, nkira kwikiriza obujunanizibwa oburukukira habundukusobora. Nahabweki nkacwamu ngu tubazeeho obuculeezi omu kuramya kwaitu okw’eka, kandi nkakaguza mukazi wange entekereza ye. Ekindi, nkarora vidiyo ha jw.org eine omutwe Tendeka, Wesige, Kandi Ohe Abandi Obujunanizibwa nka Yesu Okwakora.” Tony akatandika kusaba abandi kumukonyera. Kiki ekyarugiremu? N’agamba ati: “Emirimo omu kitebe n’ekorwa kurungi kandi nyine obwire obw’okugumya enkoragana yange na Yahwe.”

7. Abagurusi nibasobora bata kwegera ha Gideoni omuntu obw’ababaliza kubi? (Yakobo 3:13)

⁷ Otabiihirwa kakuba omuntu akubaliza kubi. Omutalibaine ogundi abagurusi basobora kutunga nukwo omuntu kubabaliza kubi. Ekyokurorraho kya Gideoni nikisobora kubakonyera. Akaba akimanyire ngu tahikiriire, nahabweki atagarukemu Abeferaimu n’ekiniga n’obukiraaba ngu bakamubaliza kubi. (Bac. 8:1-3) Akooleka ngu akaba ali mwebundaazi, yahuliiriza ekibaali nibamugambira, yabagarukamu kurungi, ekyabaletiire kuteekana. Abagurusi abebundaazi beegera ha kyokurorraho kya Gideoni, obubahuliiriza kurungi, kandi bakagarukamu omu mulingo gw’embabazi omuntu obw’ababaliza kubi. (Soma Yakobo 3:13.) Obubakora eki, bakurakuraniza obusinge omu kitebe.

8. Abagurusi basemeriire kwetwaza bata kakuba bahaisanizibwa? Bazaaho ekyokurorraho.

⁸ Ekitiinsa okigarurre Yahwe. Abantu obubaahaisaniize Gideoni habw’okusingura Abamidiani, omutima akaguteeka hali Yahwe. (Bac. 8:22, 23) Kiki abagurusi ekibasobora kwegera ha Gideoni? Basemeriire kwoleka ngu Yahwe nuwe abakonyiire kuhikiiriza obujunanizibwa bwabo. (1 Kol. 4:6, 7) Ekyokurorraho, kakuba abantu basiima omugurusi habw’okwegesa kurungi, n’asobora kugamba ngu ebyayegeseze birugire omu kigambo kya Yahwe kandi ngu itwena tutendekwa ekitebe kye. Obwire obumu abagurusi basemeriire kwekaguza obubaraaba nibaleetera abantu kubateekaho omutima. Tekerezaaho ekyokurorraho eky’omugurusi arukwetwa Timothy. Obwakaba akyakomerwe kuba mugurusi, yagonzaaga kuha embazo. N’agamba ati: “Natekanizaaga enyanjura eziraihire n’ebyokurorraho eby’amaani. Kandi byaleeteraga abantu kumpaisaniza. Omu kiikaro ky’okuteeka omutima ha Baibuli na Yahwe, baaguteekaga hali nyowe.” Nahabweki, Timothy akahinduramu omulingo akaba nayegesa nukwo aleke kuleetera abantu kumuteekaho omutima. (Nfu. 27:21) Kiki ekyarugiremu? N’agamba ati: “Hati, abantu baingi bangambira omulingo orubazo rwange rubakonyiiremu kugumira ebizibu n’okwirra haihi na Yahwe. Ebigambo ebi binsemeza kukira okuhaisanizibwa okunatungaga omu myaka ey’enyuma.”

9. Habwaki kyali kitanguhire Gideoni kwoleka obuhulizi n’obumanzi? (Rora ekisisani ekya ha kyesweko.)

⁹ Hanyuma ya Gideoni kukomwa nk’omucwi w’emisango omu Isaleri, kikamwetaagisa kwoleka obuhulizi n’obumanzi. Akaheebwa obujunanizibwa obwakutaire obwomeezi bwe omu kabi obwokuhwerekereza ekyoto kya ise ekiyaramizaahoga Bbaali. (Bac. 6:25, 26) Hanyuma ya Gideoni kusorooza ihe, emirundi ebiri Yahwe akamugambira kulikehya. (Bac. 7:2-7) Kandi akagambirwa kutahirra enkambi y’abanyanzigwa ekiro omu itumbi.—Bac. 7:9-11.

10. Obuhulizi bw’omugurusi nibusobora kulengwa buta?

 ¹⁰ Abagurusi basemeriire kwikara betekaniize ‘kuba bahulizi.’ (Yak. 3:17, NWT) Omugurusi omuhulizi aikara ayetekaniize kworobera Ebyahandiikirwe n’oburagirizi oburuga omu kitebe kya Yahwe. Omu mulingo ogu ateraho abandi ekyokurorraho ekirungi. Baitu obwire obumu nikisobora kumugumira kuhondera oburagirizi obuhairwe. Kandi n’asobora kwekaguza oburagirizi obu obuburaaba nibukora rundi bw’amagezi. Rundi n’asobora kusabwa kuhikiiriza obujunanizibwa obusobora kuteeka obugabe bwe omu kabi. Abagurusi nibasobora bata kwegera ha kyokurorraho kya Giedoni eky’obuhulizi omu nyikara nk’ezi?

11. Kiki ekisobora kukonyera abagurusi kuba bahulizi?

¹¹ Huliiriza kurungi obuhabuzi kandi obuteeke omu nkora. Ruhanga akagambira Gideoni omulingo yakuhwerekeriize ekyoto kya ise, nambere yakwombekiire Yahwe ekyoto, n’ekisoro ekiyakuhongere. Gideoni atalengeho kwekaguza obuhabuzi obu obuburaaba buli bw’amagezi, oihireho akakora byona Yahwe ebiyamuragiire. Kasumi kanu abagurusi batunga oburagirizi kuruga omu kitebe kya Yahwe kuraba omu mabbaruha, ebirango hamu n’oburagirizi obundi obutukonyera kwerinda n’okwikara tuli haihi na Yahwe. Tugonza abagurusi baitu habwokuba bahondera oburagirizi bwona obubatunga kandi ekitebe kyona kigasirwa.—Zab. 119:112.

12. Abagurusi nibasobora bata kuteeka omu nkora Abaheburaniya 13:17, obuhabaho empindahinduka omu kitebe kya Yahwe?

¹² Ikara oyetekaniize kuhinduramu. Ijuka ngu Yahwe nuwe yagambiire Gideoni kukehya ihe ery’akaba aine. (Bac. 7:8) N’asobora kuba yayekagwize ati: ‘Empindahinduka enu neyetaagisa? Ky’amagezi?’ Baitu nabwo, Gideoni akoorobera Yahwe. Abagurusi kasumi kanu beegera ha kyokurorraho kya Gideoni obubateeka omu nkora obuhabuzi obubatungire kuruga omu kitebe kya Yahwe. (Soma Abaheburaniya 13:17.) Ekyokurorraho, omu 2014 Akatebe Akalemi kakahinduramu omulingo ebitebe byakuhaireyo sente ezikozesebwa kwombeka Ebyombeko by’Obukama n’eby’ensorrokano enkooto. (2 Kol. 8:12-14) Ira, ekitebe kyahaga ebitebe sente z’okwombeka kandi hanyuma ebitebe ebi byasasuraga sente ezi. Baitu hati, ekitebe kikozesa sente ezihairweyo ebitebe byona omu nsi kwombeka Ebyombeko by’Obukama n’eby’ensorrokano enkooto hoona nambere birukwetaagwa n’obukiraaba ngu ebitebe ebimu bihayo sente ntaito. José obuyahuliire empindahinduka egi, akagurukyagurukya obweraaba niija kukora, akatekereza ati: ‘Busaho kyombeko na kimu eky’Obukama ekirayombekwa. Kunu ebintu tinukwo babikora bati.’ Kiki ekyakonyiire José kusagika oburagirizi obu? N’agamba ati: “Ebigambo ebiri omu Enfumo 3:5, 6 bikanyijukya ngu nsemeriire kwesiga Yahwe. Kandi mali harugiremu ebirungi bingi! Titugarukiire ha kwombeka ebyombeko by’Obukama bingi baitu twegere n’emiringo endi ey’okuhayo kandi kinu kiresereho kwinganaingana.”

13. (a) Kiki Gideoni ekyaba nagumya? (b) Abagurusi nibasobora kumwegeraho ki? (Rora ekisisani.)

 ¹³ Ba mumanzi okole Yahwe eby’agonza. Gideoni akaikara nayorobera Yahwe n’obukiraaba ngu akaba natiina kandi obujunanizibwa obuyahairwe bwali nibusobora kumurugirramu akabi. (Bac. 9:17) Hanyuma ya Yahwe kugumya Gideoni, akakigumiza kimu ngu yakumukonyiire kulinda abantu be. Abagurusi abarukwikara omu biikaro nambere omulimo gwaitu gutangirwe, nibasobora kwegera ha kyokurorraho kya Gideoni. N’obumanzi, nibebembera ensorrokano kandi nibekamba omu buheereza n’obukiraaba ngu nibatiinisirizibwa kuteekwa omu nkomo, ab’obusobozi kubakaguliiriza, kufeerwa emirimo yabo rundi kuteerwa. c Omu kasumi ak’omuhito omwingi abagurusi nibaija kwetaaga obumanzi kworobera oburagirizi obubaratunga n’obukiraaba nikiteeka obwomeezi bwabo omu kabi. Oburagirizi bunu nibusobora kutwarramu kutebeza obutumwa oburukusisana nk’orubaale n’ekitusemeriire kukora kukiraho omu kutahirra kwa Gogi wa Magogi.—Ez. 38:18; Kus. 16:21.

14. Okugumiisiriza kwa Gideoni kukalengwa kuta?

¹⁴ Obujunanizibwa bwa Gideoni obw’okukora nk’omucwi w’emisango bwali nibumwetaagisa kuteekamu amaani maingi. Abamidiani obubairukire omu bulemu obw’omu itumbi, Gideoni akabahambya kuruga omu kihanga kya Yezereri kuhikira kimu ha kyambu Yorudani ekisobora kuba kyali kyetoroirwe ekibira eky’amaani. (Bac. 7:22) Gideoni akagarukira ha kyambu Yorudani? Nangwa! N’obukiraaba ngu uwe n’abaserikale be 300 baali bajwahire, bakambuka baagumizaamu nibahambya. Kandi hanyuma bakahika h’Abamidiani baabasingura.—Bac. 8:4-12.

15. Nidi okugumiisiriza kw’omugurusi obukusobora kulengwa?

¹⁵ Obwire obumu omugurusi n’asobora kwehurra ajwahire muno habw’okurolerra ekitebe  hamu n’eka ye. Omu nyikara nk’egi abagurusi nibasobora bata kwegera ha Gideoni?

16-17. Kiki ekyakonyiire Gideoni kugumiisiriza? (b) Kiki abagurusi ekibasobora kugumya? (Isaya 40:28-31) (Rora ekisisani.)

¹⁶ Kigumye ngu Yahwe naija kukuha amaani. Gideoni akaba nakigumya ngu Yahwe yakumuhaire amaani, kandi mali akagamuha. (Bac. 6:14, 34) Gideoni n’ihe rye bakairukira ha bigere nibahambya abakama babiri aba Midiani, kandi nikizooka ngu abakama banu baali nibagendera ha ngamiya. (Bac. 8:12, 21) Baitu Ruhanga akakonyera Abasaleri kubakwata. Omu mulingo nugwo gumu, abagurusi nibasobora kwesiga ngu Yahwe naija kubaha amaani habwokuba “taruha kunu tajwaha.” Naija kubaha amaani omu kasumi barukugetaagiramu.—Soma Isaya 40:28-31.

¹⁷ Tekerezaaho ekyokurorraho eky’ow’oruganda Matthew ow’ali h’akatebe aka Hospital Liaison Committee. Kiki ekimukonyera kugumiisiriza? N’agamba ati: “Ndozere ebigambo ebiri omu Abafiripi 4:13 nibihikirra. Emirundi nyingi obumba njwahire muno, nsaba Yahwe kandi mwesengereza kumpa amaani agandukwetaaga kusagika ab’oruganda. Omu bwire nk’obu, nyehurra ngu Yahwe nampa amaani agankonyera kugumiisiriza.” Nka Gideoni, abagurusi bekamba kurolerra abantu ba Yahwe n’obukiraaba ngu batunga emitalibaine nyingi. Baitu nabwo, basemeriire kumanya obugarukiro bwabo kandi bakole ekibarukusobora. Nibasobora kukigumya ngu Yahwe naija kuhurra esaara zaabo kandi abahe amaani agabarukwetaaga kugumiisiriza.—Zab. 116:1; Baf. 2:13.

18. Bazaaho omulingo abagurusi basobora kwegera ha kyokurorraho kya Gideoni.

¹⁸ Haroho bingi abagurusi ebibasobora kwegera ha kyokurorraho kya Gideoni. Basemeriire kwoleka obuculeezi n’obwebundaazi obukirukuhika ha bwingi bw’emirimo eibarukwikiriza kukora n’omulingo betwaza abandi obubabahaisaniza rundi omuntu obw’ababaliza kubi. Basemeriire kwoleka obuhulizi n’obumanzi kukira muno nk’oku empero y’obusinge bunu iriire haihi. Kandi basemeriire kukigumya ngu n’obubaraatunga emitalibaine ya mulingo ki, Ruhanga naija kubaha amaani. Mali nitusiima muno habw’abaliisa banu abekambi kandi tubatwale nk’ab’omuhendo.—Baf. 2:29.