Omu Bulemu obw’Ensi Yoona obwa II, bazaire bange bakaruga Estonia baagenda Germany, nambere nazaliirwe. Hanyuma, bakafurukira Canada. Omu Canada tukabanza kwikara haihi n’ekiikaro ekirukwetwa Ottawa, omu nju ey’ekaba niikarwamu enkoko. Tukaba tuli banaku muno baitu ekirungi kiri ngu ekyanyenkya twalyaga amahuli.

Kiro kimu Abakaiso ba Yahwe bakasomera nyina nyowe Okusuku’rwa 21:3, 4. Ebiyayegere kiro eki bikamukwataho muno kandi yarra. Bazaire bange bakagumizaamu nibeega Baibuli kandi hanyuma y’akasumi kake bakabatizibwa.

N’obukiraaba ngu baali batamanyire kurungi Orungereeza, baaheerezaga Yahwe n’obwekambi. Haihi buli Kyamukaaga hanyuma ya ise itwe kukora n’amaani omu bwire bw’ekiro omu kyoma ekikaba kiri omu Sudbury, Ontario ekirukwagisa eky’obuguuda ekirukwetwa nickel, yantwaraga na munyaanya nyowe, Sylvia, omu buheereza. Kandi buli wiiki twatekanizaga Omunaara gw’Omulinzi nk’eka. Bazaire bange bakanyegesa kugonza Ruhanga. Eki kikanyekambisa kuhayo obwomeezi bwange hali Yahwe kandi nabatizibwa omu 1956 nyine emyaka ikumi. Obuntekerezaaho okugonza okubaali bainiire Yahwe, kinyekambisa kugumizaamu nimuheereza.

Obunamazire kusoma, nkabanza nahugukamu kake. Nkatekereza ngu obundafooka payoniya tindisobora kuhikiiriza ekirooto kyange eky’okugenda omu mahanga agandi. Nkatunga omulimo ha rediyo ogw’okuteera ebizina kandi nkagugonza muno. Habwokuba nakoraga rwebagyo, nakiraga kufeerwa ensorrokano kandi nkanywana abantu abatarukugonza Ruhanga. Baitu omuntu wange ow’omunda ow’akaba atendekerwe Baibuli akansindikiriza kukora empindahinduka.

Hanyuma nkafurukira omu Oshawa, Ontario. Oku nuho natangatanganiire Ray Norman, munyaanya Lesli, na bapayoniya abandi. Boona bakanyoleka okugonza. Obunarozere okusemererwa okubaine kikandetera kuhinduramu ebigendererwa byange. Bakanyekambisa kuheereza nka payoniya, kandi nkatandika omu Sebutemba 1966. Nkasemererwa muno kandi nkaba ninyegonza. Baitu haroho ebintu ebyampuniriize ebyabaireho byahindura obwomeezi bwange.

Obunkaba nkyali omu siniya, nkasaba kuheereza ha Bbeseeri omu Toronto, Canada. Hanyuma obunkaba  nimpereza nka payoniya nkaraalizibwa kuheereza ha Bbeseeri habw’emyaka ena. Baitu nkaba ningonza Lesli kandi nkeralikirra ngu obundaikiriza kugenda tindasobole kwongera kumurora. Hanyuma y’okusaba muno, nkacwamu kugenda ha Bbeseeri kandi nkaraga Lesli ntasemeriirwe.

Ha Bbeseeri, nkakora omu kwogya engoye kandi hanyuma nakora nk’omuhandiiki. Kasumi ako, Lesli akatandika kuheereza nka payoniya ow’embaganiza omu Gatineau, Quebec. Nakiraga kwekaguza eky’asobora kuba nakora kandi obundaaba nakozere encwamu enungi. Hanyuma, hakabaho kimu ha bintu ebikyakizireyo kunsemeza n’okumpuniiriza omu bwomeezi bwange. Ray, ow’akaba ali mugenzi wa Lesli, nauwe bakamuraaliza ha Bbeseeri. Kandi twaraaraga omu kisiika kimu! Eki kikansobozesa kwongera kubaza na Lesli. Tukataaha obuswere ha kiro ky’okumalirra eky’obuheereza bwange obw’emyaka ena ha Bbeseeri, omu—Febwali 27, 1971.

Nyowe na Lesli tukasabwa kuheereza omu kitebe eky’orulimi Orufaransa eky’omu Quebec. Hanyuma y’emyaka nke kikampuniiriza muno obunayeserwe kuheereza nk’omuroleerezi w’ekicweka nyine emyaka 28. Nkehurra nk’ow’akyali muto muno kandi nkatarukwija kusobora, baitu ebigambo ebiri omu Yeremiya 1:7, 8 bikangarramu amaani. Ekindi, Lesli akaba atungireho butandwa za motoka kandi kyamugumiraga kutunga oturo. Nahabweki tukekaguza obuturaaba nitwija kusobora kubungira ebitebe. Baitu akagamba ati: “Yahwe obwaraaba atusabire kugira ekitwakora, tusemeriire kulengaho kukikora.” Tukaikiriza obujunanizibwa bunu kandi twabwegondezamu kumara emyaka 17.

Nk’omuroleerezi, nabaga na bingi eby’okukora kandi tinatungaga obwire oburukumara kuba hamu na Lesli. Eki kikanyegesa isomo erindi. Nyenkyakara emu kiro kya Bbalaza, omuntu akateera kodi. Obunagenzere kukinguraho hakaba hataroho muntu wena oihireho omukeeka, n’akagega akarumu eby’okulya ebirukwahukana, viini, amagilaasi n’akapapura akataroho ibara karoho ebigambo binu, “Tunga obwire ogende wegonze na mukazi waawe.” Kiro eki obwire bukaba burungi kandi akasana nikajwa. Baitu nkagambira Lesli ngu nkaba nyine embazo ez’okuteekaniza nahabweki nkaba ntarukwija kusobora kugenda. Akakyetegereza baitu kikamusaasa. Obunaikaliire kutandika kutekaniza, omuntu wange ow’omunda akatandika kundumiiriza. Nkatekerezaaho Abefeso 5:25, 28. Nkatekereza ngu Yahwe akaba n’akozesa ebigambo binu kunyijukya ngu nsemeriire kufaaho enyehurra za mukazi wange. Hanyuma y’okusaba nkagambira Lesli nti, “Tugende,” kandi kikamusemeza muno. Tukavuga motoka twagenda ha kaikaro akarungi ha rubaju rw’ekisaaru, twayara omukeeka hansi twaikarra kandi kinu kiri kimu ha biro ebitwayegondeze mali. Hanyuma nkasobora kutekaniza embazo zange.

 Twabungiraga ebiikaro bingi, kuruga British Columbia kuhika Newfoundland kandi twasemererwaga. Ekirooto kyange eky’okugenda omu biikaro ebirukwahukana kyali nikihikirra. Nkaba ntekeriize kusaba kugenda omu Isomero lya Gilead baitu nkaba ntarukugonza kuheereza omu ihanga erindi. Natekerezaaga ngu obumiisani tibunsemeriire. Ekindi nkaba nintiina ngu nibasobora kutusindika omu Afrika omu ihanga erirumu oburwaire n’obulemu. Nkaba nsemeriirwe kuheereza omu Canada.

Omu 1992 Abakaiso ba Yahwe obubaikiriziibwe omu mahanga agakaba gali kicweka kya Soviet Union, ab’oruganda bakatusaba kugenda Estonia kuheereza nk’abamiisani. Eki kikatuhuniiriza muno, baitu tukasaba Yahwe. Nabwo tukatekereza tuti, ‘Yahwe obwaraaba atusabire kugira ekitwakora, tusemeriire kulengaho kukikora.’ Tukaikiriza baitu natekereza ngu, ‘Ekirungi titurukugenda omu Afrika.’

Ahonaaho tukatandika kwega orulimi rwa Estonia. Hanyuma y’okumara emyaka nke omu ihanga eri tukasabwa kubungira ebitebe. Tukaba twine kubungira ebitebe nka 46 na guruupu isatu eziri omu Estonia, Latvia, na Lithuania otwaliremu na Kaliningrad, Russia. Eki nikimanyisa ngu tukaba twine kwega endimi isatu ezikozesebwa omu mahanga ganu (Latvian, Lithuanian, na Russian.) Kinu kyali kitanguhire. Baitu nabwo, ab’oruganda bakasemererwa habw’amaani twatamuga kandi baatukonyeraga muno. Omu 1999, ofiisi y’itaagi ekatandikwaho omu Estonia kandi nkakomwa kuheereza h’akatebe k’itaagi na Toomas Edur, Lembit Reile, na Tommi Kauko.

Tukamanya Abakaiso ba Yahwe baingi abaali batwairwe Siberia omu myaka ey’enyuma. N’obukiraaba ngu obubaali bali omu nkomo bakababonabonesa muno kandi bayahukanizibwa ha b’omu maka gaabo, bateyijukye. Bakaikara basemeriirwe kandi nibekamba omu buheereza. Kinu kikatukonyera kukimanya ngu nitusobora kugumiisiriza kandi twikale tusemeriirwe n’obutuba tuli omu nyikara ezigumire.

Twakoraga muno tutarukutunga obwire oburukumara obw’okuhuumura, nahabweki Lesli akatandika kuhurra obujwahi bw’amaani. Hakubanza tutakyetegereze ngu aine oburwaire oburukwetwa fibromyalgia, obuleetera omuntu kujwaha muno. Tukatandika kutekerezaaho kugaruka Canada. Obutwayeserwe kugenda Patterson, New York, omu U.S.A. kweyongera kutendekwa, nkatekereza ngu titurukwija kusobora kugenda. Baitu, hanyuma y’okusaba muno, tukaikiriza. Yahwe akaha omugisa encwamu enu. Obutukaba tuli omu isomero linu, Lesli akatunga obujanjabi. Kandi tukongera twatandika kukora emirimo yaitu nk’oku twagikoraga kara.

Hanyuma y’okugaruka Estonia, omu 2008 rwebagyo rumu tukatunga esimu kuruga ha kitebe kyaitu ekikuru nitusabwa kugenda kuheereza Congo. Nkateerwa ibumba kanwa habwokuba nkaba nsemeriire kugarukamu ab’oruganda ekiro ekirahonderaho. Nkalindaho kugambira Lesli habwokuba nkaba nkimanyire  ngu akaba naija kulemwa kugwijagira. Nkaraara nindora ninsaba Yahwe nimugambira byona ebirukunyeraliikiriza ha kugenda omu Afrika.

Obubwakiire nkagambira Lesli, kandi tukagamba ngu: “Yahwe natusaba kugenda omu Afrika. Titusobora kugamba ngu titurukwija kwegondeza omu buheereza bunu kandi kunu tutakalengereho.” Hanyuma y’okumara emyaka 16 nituheereza omu Estonia, tukagenda Kinshasa, Congo. Ofiisi y’itaagi ekaba eri nungi kandi haculiire. Kimu ha bintu Lesli yahanikire omu kisiika kyaitu ekaba kaadi eitwahairwe obutukaba tukyali Canada. Kaadi egi ekaba eroho ebigambo binu: “Ikara osemeriirwe hoona nambere oli.” Hanyuma y’okurora ab’oruganda, kutunga abeegi ba Baibuli, n’okurora omulingo turukwegondeza omu kuheereza nk’abamiisani, okusemererwa kwaitu kukeyongera. Hanyuma tukatunga omugisa gw’okubungira ofiisi z’amataagi omu mahanga 13 ag’omu Afrika. Eki kikatusobozesa kumanya abantu abarukwahukana kandi abarungi. Nkaleka kweralikirra kandi tukasiima muno Yahwe habw’okutusindika omu Afrika.

Omu Congo, baatuhaga ebyokulya bingi ebitutakalyahoga, nk’ebihuka, ebitwatekerezaga ngu titusobora kulya. Baitu obutwaroraga ab’oruganda nibabigonza, naitwe tukalengaho kubirya kandi tukabigonza.

Twagendaga burugaizooba bw’ihanga kugarramu ab’oruganda amaani n’okubatwarra ebintu ebibarukwetaaga. Omu biikaro ebi abaheekera baatahirraga ebyaro nibakora kubi abakazi n’abaana. Ab’oruganda abarukukira obwingi baali banaku. Baitu okunihira kwabo okugumire omu murago gw’okuhumbuuka, okugonza okubainiire Yahwe, n’obwesigwa bwabo hali ekitebe kye bikatugarramu muno amaani. Ekyokurorraho kyabo kikatuleetera kutekerezaaho ensonga habwaki nituheereza Yahwe n’okugumya okwikiriza kwaitu omuluwe. Ab’oruganda abamu bakafeerwa amaka gaabo n’emisiri yabo. Eki kikanyijukya ngu ebintu nibisobora kuhwaho ahonaaho baitu enkoragana yaitu na Yahwe nikyo kintu ekirukukirayo obukuru. N’obukiraaba ngu ab’oruganda baali baine ebizibu bingi, tibaakiraga kuhyema. Entekereza yabo ekatukonyera kwikara tuli bamanzi n’obutwakuhikwaho oburwaire rundi ebizibu.

Hakabaho ekintu ekindi ekyatuhuniriize. Tukasabwa kugenda kuheereza ha ofiisi y’itaagi erya Hong Kong. Tukaba tutarukunihira ngu tuliikara omu Asia! Baitu hanyuma y’okurora omulingo Yahwe atukonyiire hoona nambere tugiire, tukaikiriza obujunanizibwa bunu. Omu 2013, n’obusaasi bwingi tukalekaho banywani baitu n’ebirungi eby’omu Afrika, twagenda tutarukumanya ekiraabaho hanyuma.

Ekaba mpindahinduka y’amaani kwikara omu rubuga orukooto orwa Hong Kong. Kikatugumira muno kwega orulimi rwa Cantonese. Ab’oruganda bakatwoleka okugonza kandi tukagonza ebyokulya eby’omu kiikaro eki. Hanyuma omu 2015, tukasindikwa South Korea nambere turukuheereza hati. Kikatwetaagisa kwega Orukoreya orulimi orugumire muno, baitu ab’oruganda batugarramu amaani obubatugambira ngu tuliyo nitwega mporampora.

Tikyanguhire kutunga abanywani abahyaka, baitu tukyetegeriize ngu kuraaliza abandi omu ka yaitu kitukonyera kubamanya. Tukirozere ngu ab’oruganda na banyaanya itwe boona bakira kwetwaza omu mulingo nugwo gumu kandi ngu Yahwe akatuhanga n’obusobozi obw’okugalihya omutima gwaitu tukagonza abantu baingi.—2 Kol. 6:11.

Tukyetegeriize ngu tusemeriire kugonza abantu nka Yahwe okw’abagonza kandi tuserre ebirukwoleka ngu Yahwe n’atugonza kandi n’atwebembera. Obutwayehurraga tuhoirwemu amaani rundi tukekaguza abandi obubaraaba nibatugonza, twayongeraga nitusoma kaadi rundi amabbaruha banywani baitu baatusindikiire. Turozere omulingo Yahwe agarukiremu esaara zaitu, atwolekere ngu n’atugonza kandi atuhaire amaani.

Omu myaka enu yoona, nyowe na Lesli twegere ngu kikuru kutunga obwire obw’okuba hamu n’obutuba twine eby’okukora bingi. Ekindi tukirozere ngu obutuba nitwega orulimi oruhyaka kikuru muno kuseka obutukora ensobi. Kandi tutakabyamire, tubanza kutekerezaaho ekintu ekitwegondizeemu nukwo tukisiimire Yahwe.

Amananu gali ngu, nkaba ntarukunihira ngu ninsobora kuba mumiisani rundi kwikara omu mahanga agandi. Baitu ndozere ngu buli kimu nikisoboka habw’obukonyezi bwa Yahwe. Nkira kwijuka ebigambo bya nabbi Yeremiya ayagambire ati: “Ai [Yahwe] okambiha.” (Yer. 20:7) Mali, Yahwe atuhuniriize n’emigisa eitwali tutasobora kutekerezaaho, yahikiiriza n’ekyetaago kyange eky’okugendera omu nyonyi. Kuraba omu kubungira ofiisi z’amataagi, tusoboire kugenda ha bizinga bitaano kandi twahika omu biikaro bingi kukira ebinatekerezaahoga nkyali muto. Ninsiima muno Lesli habw’okunsagika hoona nambere tusindikirwe kuheereza.

Twikara nitwijuka ngu binu byona tubikora habwokuba nituheereza Yahwe. Emigisa eiturukwegondezaamu kasumi kanu eri ndozo y’ebirungi ebitulitunga omu bwomeezi obutuhwaho Yahwe ‘obwalisasanura engaro ze, akaigusa ekintu kyona ekyomiire ekikigonza.’—Zab. 145:16.