1. Kiki ekitusemeriire kukora kukiraho ha kiro kya Yahwe?

 BAIBULI obwebazaaho “ekiro kya Yahwe” eba n’emanyisa akasumi Yahwe obw’alicwera abanyanzigwa be omusango kandi ajune abantu be. Omu busumi obwakara Yahwe akacwera abantu omusango. (Is. 13:1, 6; Ez. 13:5; Zef. 1:8) Omu kasumi kanu, “ekiro kya Yahwe” kiritandika n’okutahirra Baburoni Orukuru kandi kimalirre n’obulemu bwa Haramagedoni. Kusobora kukiraho ha kiro eki, tusemeriire kwetekaniza hati. Yesu atagarukire ha kugamba ngu tusemeriire kwetekaniriza “omuhito omwingi” baitu akagamba ngu ‘twikale twetekaniize.’—Mat. 24:21; Luk. 12:40.

2. Habwaki 1 Abasesalonika n’etugasira?

² Omu bbaruha ye ey’okubanza hali Abasesalonika, omukwenda Paulo akakozesa ebyokurorraho ebyakukonyiire Abakristaayo kwikara betekaniriize ekiro kya Yahwe ekikuru eky’omusango. Paulo akaba akimanyire ngu ekiro eki kikaba kitali ky’okwija omu kasumi ako. (2 Bas. 2:1-3) Baitu nabwo akatererra Abakristaayo kwikara bakyetekaniriize nk’ekiraija nyenkya. Kandi naitwe nikyo tusemeriire kukora. Leka turole nk’oku yabalizeeho ebintu binu: (1) ekiro kya Yahwe kiriija kita, (2) nibaha abatalikiraho ha kiro eki, (3) n’omulingo tusobora kwetekaniza nukwo tukireho.

3. Ekiro kya Yahwe kiriija kita nk’omusuma omu bwire bw’ekiro? (Rora ekisisani.)

³ ‘Nk’omusuma ekiro.’ (1 Bas. 5:2) Kinu nikyo kyokurorraho eky’okubanza omu byokurorraho bisatu Paulo ebiyakozeseze kubazaaho ekiro kya Yahwe. Abasuma bakira kukora omu bwangu  bwangu kandi baija omu kasumi nambere abantu batarukubanihira. Omulingo nugwo gumu, ekiro kya Yahwe kiriija bwangu bwangu kandi abantu baingi baliba batarukukinihira. Abakristaayo ab’amananu nabo balihunirra habw’omulingo ebintu biribaho bwangu bwangu. Baitu kwahukanaho n’ababi, abaheereza ba Ruhanga tibalihwerekerra.

4. Ekiro kya Yahwe nikisisana kita n’okurumwa okwizira anyakwine enda?

⁴ ‘Nk’okurumwa okukwizira anyakwine enda.’ (1 Bas. 5:3) Omukazi anyakwine enda tasobora kumanya ekiro kyonyini ekyarazarramu. Baitu aba nakigumiza kimu ngu nikiija kuhika. Obukihika, ebisa biija ahonaaho, asaasa kandi biba bitakyagaruka nyuma. Omulingo nugwo gumu titumanyire ekiro n’esaaha ekiro kya Yahwe obukiritandika. Baitu nitukigumiza kimu ngu nikiija, kandi ababi boona balicwerwa omusango.

5. Mulingo ki omuhito omwingi gurukusisana nka nyenkyakara omurukyakya?

⁵ Nka nyenkyakara omurukyakya. Omu kyokurorraho ekyakasatu, Paulo abazaaho abasuma abaiba ekiro. Baitu hati asisana nkarukulengesaniza ekiro kya Yahwe nka nyenkyara omurukyakya. (1 Bas. 5:4) Abasuma abaiba ekiro, nibasobora kutateeka omutima ha bwire nibalemwa n’okukirora ngu buliyo nibukya. Ekyererezi nikisobora kwija batakimanyire kandi nibarorwa. Omulingo nugwo gumu, omuhito omwingi gulyolekera kimu abo boona abaikara omu mwirima, nibakora ebintu ebitarukusemeza Ruhanga. Kwahukanaho nabo, nitusobora kwetekaniza kuraba omu kwetantara engeso ezitarukusemeza Ruhanga kandi turubatire “omu burungi nokuhikirra namazima.” (Bef. 5:8-12) Hanyuma, Paulo akozesa ebyokurorraho ebindi bibiri kubazaaho abo abatarukwija kukiraho.

6. Abantu abarukukira obwingi bagwijagiire omu mulingo ki? (1 Abasesalonika 5:6, 7)

⁶ ‘Abagwijagiire.’ (Soma 1 Abasesalonika 5:6, 7.) Paulo akalengesaniza abo abatarukwija kukiraho ha kiro kya Yahwe n’abantu abagwijagiire. Tibamanyire ebirukugenda omu maiso kandi nk’oku obwire burukuhwayo. Nahabweki tibasobora kumanya ebintu ebikuru ebirukubaho rundi kugira ekibakoraho. Kasumi kanu abantu baingi bagwijagiire omu by’omwoyo. (Bar. 11:8) Nibahakaniza obwakaiso oburukugumya ngu tuli omu biro ebya ha mpero kandi nk’oku omuhito omwingi guli haihi kwija. Obuhabaho empindahinduka ez’amaani omu nsi, nibasobora kusisimuka kake omu by’omwoyo nibatandika kugonza kuhuliiriza obutumwa bw’Obukama. Baitu baingi begarukirayo nibabyama omu kiikaro ky’okwikara nibarora. Kandi abamu abaikiriza ngu ekiro kya Yahwe nikiija, batekereza ngu tikikabaire. (2 Pet. 3:3, 4) Baitu itwe tukimanyire ngu obuhabuzi oburukututererra kwikara niturora nibweyongera kuba bukuru muno buli kiro ekirukurabaho.

7. Abo Yahwe abaarahwerekereza nibasisana bata nk’abatamiizi?

⁷ ‘Abarukutamiira.’ Paulo akalengesaniza abo Ruhanga abaarahwerekereza n’abarukutamiira. Abantu abatamiire tibakira kuhondera oburagirizi kandi bakora encwamu ezitahikire. Omu mulingo nugwo gumu, ababi tiborobera okuhabura kwa Ruhanga. Bacwamu kukora ebintu ebirabahikya omu kuhwerekerra. Baitu Abakristaayo nibaterererwa kwikara bali bulindaara. (1 Bas. 5:6) Omu h’abarukuseruliiriza ha Baibuli akagamba ngu kuba bulindaara nikimanyisa “omuntu kwikara atekaine, amanyire habwaki ebintu nibibaho kandi n’asobora kukora encwamu ezihikire.” Habwaki tusemeriire kwikara tuli bulindaara? Nukwo kitukonyere kuteetahya omu by’obulemi n’omunsonga ezindi ez’ensi. Kusindikirizibwa kwejumbira omu bintu nka binu nikwija kweyongera nk’oku ekiro kya Yahwe kyeyongiire kwirra haihi. Baitu titusemeriire kweralikirra ha mulingo turayetwazaamu. Omwoyo gwa Ruhanga nigusobora kutukonyera kukora encwamu enungi n’okwikara tutekaine kandi tugumire.—Luk. 12:11, 12.

8. Kyokurorraho ki ekikozesiibwe omu 1 Abasesalonika 5:8 kwoleka emiringo eitusemeriire kuba nayo kusobora kwikara tuli bulindaara? (Rora ekisisani.)

⁸ ‘Tujwale ekya ha kifuba . . . n’enkofiira.’ Paulo akatulengesaniza n’abaserikale abajwaire ebyokujwara byabo betekaniize kurwana. (Soma 1 Abasesalonika 5:8.) Omuserikale aikara ayetekaniize kurwana kakuba habaho obulemu. Nikyo kimu naitwe. Twikara twetekaniriize ekiro kya Yahwe obutujwara ekya ha kifuba eky’okwikiriza n’okugonza hamu n’enkofiira ey’okunihira. Emiringo enu n’esobora kutukonyera muno.

9. Okwikiriza kwaitu kutulinda kuta?

⁹ Ekya ha kifuba, kyalindaga omutima gw’omuserikale. Okwikiriza n’okugonza birinda omutima gwaitu. Bitukonyera kwikara nituheereza Yahwe n’okuhondera Yesu. Okwikiriza kutukonyera kukigumiza kimu ngu Yahwe naija kutuha empeera obuturaikara nitumuheereza n’omutima gwaitu gwona. (Baheb. 11:6) Nikwija kutwekambisa kwikara tuli besigwa hali Omwebembezi waitu Yesu, n’obuturatunga ebizibu. Nitusobora kugumya okwikiriza kwaitu kuraba omu kwekebiija ebyokurorraho eby’abaheereza ba Yahwe ab’omu kasumi kanu abaikaire bali besigwa n’obukiraaba ngu nibahiiganizibwa rundi baine ebizibu omu byentahya.  Kandi nitusobora kwetantara kugwa omu mutego gw’okugonza itungo kuraba omu kuhondera ekyokurorraho kyabo aboorobyamu obwomeezi bwabo nukwo bebembeze Obukama. b

10. Okugonza okutwiniire Ruhanga n’abataahi baitu kutukonyera kuta kugumiisiriza?

¹⁰ Okugonza nakwo nikusobora kutukonyera muno kwikara tuli bulindaara. (Mat. 22:37-39) Okugonza okutwiniire Ruhanga kutwekambisa kwikara nitutebeza n’obukiraaba ngu nikisobora kuturugirramu ebizibu. (2 Tim. 1:7, 8) Habwokuba nitugonza naabo abatarukuheereza Yahwe, twikara nitutebeza omu biikaro byaitu, tutebeza nitukozesa amasimu, n’okuhandiika amabbaruha. Twikara nitunihira ngu abantu abo balihika bahinduke nabo batandike kukora ebihikire.—Ez. 18:27, 28.

11. Kugonza ab’oruganda na banyaanya itwe kitukonyera kita? (1 Abasesalonika 5:11)

¹¹ Tusemeriire n’okugonza ab’oruganda na banyaanya itwe. Tuboleka okugonza obutubahuumuza kandi tukabombeka. (Soma 1 Abasesalonika 5:11.) Nk’abaserikale abali hamu omu bulemu, naitwe tugarramungana amaani. Omu bulemu, nikisobora kubaho omuserikale n’ahutaaza mutaahi we, baitu tasobora kukikora akigenderiire. Nikyo kimu naitwe, titusemeriire kukigenderra kusaaliza ab’oruganda na banyaanya itwe rundi kuhoora enzigu. (1 Bas. 5:13, 15) Ekindi, twoleka okugonza obututeekamu ekitiinisa ab’oruganda abarukwebembera omu kitebe. (1 Bas. 5:12) Paulo obuyahandiikire ebbaruha enu, ekitebe ekya Sesalonika kikaba kitakahikize omwaka kitandikire. Nikisobora kuba ngu abaali baine obujunanizibwa baali bataine bukugu kandi obundi baakoraga ensobi. Baitu nabwo, Abakristaayo bakaba baine kuborobera. Omu kasumi ak’omuhito omwingi nikiija kutwetaagisa kworobera oburagirizi bw’abagurusi n’okukira nk’oku turukukora hati. Enyikara n’esobora kuba etakyatusobozesa kutunga oburagirizi kuruga ha kitebe ekikuru rundi ha ofiisi y’itaagi, nahabweki kasumi kanu kikuru muno  kwekamba kugonza abagurusi n’okubateekamu ekitiinisa. N’obuharaabaho ki, leka twikale tuli bulindaara, tutarukuteeka omutima ha butahikirra bwabo baitu twijuke ngu Yahwe, nuwe arukwebembera abasaija banu abesigwa kuraba omu Kristo.

12. Okunihira kulinda kuta ebitekerezo byaitu?

¹² Nk’oku enkofiira erinda omutwe gw’omuserikale, okunihira kwaitu kulinda ebitekerezo byaitu. Okunihira okugumire kutukonyera kukirora ngu ebintu by’ensi tibiine mugaso. (Baf. 3:8) Ekindi, kutukonyera kwikara tutekaine kandi tuli bulindaara. Kinu nikyo kyahikire ha Wallace na Laurinda abarukuheereza ha Bbeseeri omu Afrika. Omu wiiki isatu zonka Wallace akafeerwa ise kandi Laurinda yafeerwa nyina. Habw’oburwaire bwa Korona, bakaba batasobora kugaruka owabu kuba hamu n’abomu maka gaabo. Wallace n’agamba ati: “Okunihira okw’okuhuumbuka kunkonyera kwikara nimbatekerezaaho hatali omu mulingo bakaba nibasisanamu batakafiire baitu omulingo baliba nibasisana omu nsi empyaka. Omurago gunu gundetera kuhurra natekaana obumbaijuka.”

13. Nitusobora kukora ki kutunga omwoyo ogurukwera?

¹³ ‘Mutaraaza omwoyo.’ (1 Bas. 5:19) Paulo akalengesaniza omwoyo ogurukwera n’omurro ogurukwaka omuli itwe. Obutuba twine omwoyo gwa Ruhanga tuba n’ekihika eky’okukora ebihikire kandi twekamba kuheereza Yahwe. (Bar. 12:11) Nitusobora kukora ki kutunga omwoyo ogurukwera? Tusemeriire kusaba Yahwe kugutuha, twesomese ekigambo kye Baibuli, kandi twikale omu kitebe kye ekirukwebemberwa omwoyo gwe. Obutukora eki kitukonyera kukurakuraniza emiringo ey’eretwa omwoyo ogurukwera.—Bag. 5:22, 23.

14. Bintu ki ebitusemeriire kwetantara kusobora kugumizaamu nitutunga omwoyo gwa Ruhanga? (Rora ekisisani.)

¹⁴ Ruhanga obwaratuha omwoyo gwe ogurukwera tusemeriire kukora kyona ekirukusoboka kurora ngu titwaguraaza. Ruhanga aha omwoyo gwe ogurukwera abo bonka abaikara baine ebitekerezo ebisemiire n’engeso enungi. Tarukwija kugumizaamu natuha omwoyo  ogurukwera obuturaikara nitutekerezaaho ebintu ebibi n’okubikora. (1 Bas. 4:7, 8) Kusobora kutunga omwoyo ogurukwera, tusemeriire kwetantara kugaya ebyabanabbi. (1 Bas. 5:20) Ebyabanabbi nibimanyisa obutumwa Yahwe obw’atuha nakozesa omwoyo ogurukwera, otwaliiremu n’ebirukukwata ha kiro kye, n’akasumi akaturumu. Titutekereza ngu ekiro eki tikikabaire kuhika, rundi ngu Haramagedoni terukwija kutusanga tuli bomeezi. Twoleka ngu ekiro eki kiri haihi obutwikara nitukitekerezaaho n’okurora ngu buli kiro twaikara omu ngeso zoona ezirukwera n’okutiina Ruhanga.—2 Pet. 3:11, 12.

15. Nitusobora tuta kwetantara kubiihwabiihwa ebisuba bya badaimoni? (1 Abasesalonika 5:21)

¹⁵ Omu kasumi akatali ka hara, abanyanzigwa ba Ruhanga nibaija kurangirra ngu: “Mirembe busaho kabi.” (1 Bas. 5:3) Ebisuba bya badaimoni nibiija kuraranga omu nsi yoona, kandi bihabise baingi. (Kus. 16:13, 14) Kandi itwe? Titurukwija kubiihwabiihwa kakuba “tulenga [rundi tukekebiija] ebintu byona.” (Soma 1 Abasesalonika 5:21.) Ekigambo eky’Oruyonaani ekyahindwirwe nk’okulengwa kyakozesebwaga kubazaaho omulingo abantu bayekebiijaga ebintu nk’efeeza n’ezaabu kumanya obubiraaba bitali bikwangara. Nahabweki, twine kwekebiija kurungi ebitusomere rundi ebituhuliire kumanya obugaraaba gali mananu. Kyali kikuru Abasesalonika kukora ekintu kinu kandi naitwe kikuru muno tukikole nk’oku omuhito omwingi gwiriire haihi. Omu kiikaro ky’okumara gaikiriza abantu abandi ebibarukugamba, ky’amagezi kulengesaniza ebituhuliire rundi ebitusomere n’ebi Baibuli n’ekitebe kya Yahwe kirukugamba. Obuturakora eki titurukwija kuhabisibwa ebisuba n’obugobya bwa badaimoni.—Nfu. 14:15; 1 Tim. 4:1.

16. Kunihira ki okutwine kandi tucwiremu kukora ki?

¹⁶ Abantu ba Yahwe nk’ekitebe nibaija kukiraho omu muhito omwingi. Baitu busaho n’omu haliitwe amanyire ekiramuhikaho nyenkya. (Yak. 4:14) Baitu n’obuturafa omuhito omwingi gutakahikire, rundi gukatusanga tukyali bomeezi itwena nitwija kutunga ekisembo eky’obwomeezi obutahwaho kakuba twikara tuli besigwa. Abaseserweho amagita nibaija kuba hamu na Yesu omu iguru. Ab’entaama ezindi nibaija kwikara omu rugonjo orurungi omu nsi. Itwena leka twikale tutaire omutima ha kunihira kwaitu okurungi kandi twikale twetekaniriize ekiro kya Yahwe!