1. Kiki ekirukugumya ngu Yahwe mugabi?

HAROHO obwire Yahwe obw’akaba ali wenka. Baitu hanyuma akacwamu kuha ebihangwa ebirukwetegereza eby’omu iguru n’omu nsi ekisembo eky’obwomeezi. Yahwe, “Ruhanga ow’asemeriirwe,” agonza kugaba ebisembo ebirungi. (1 Timoseo 1:11, NW; Yakobo 1:17) Kandi habwokuba Yahwe nagonza naitwe tube n’okusemererwa, atwegesa kuba bantu abarukugaba.​—Abarumi 1:20.

2, 3. (a) Habwaki tutunga okusemererwa obutugaba? (b) Kiki ekiturabazaaho omu kicweka kinu?

² Ruhanga akahanga abantu omu kisisani kye. (Okubanza 1:27) Kinu nikimanyisa ngu Yahwe akatuhanga twine emiringo nk’eye. Baitu obuturaaba nitugonza kuba n’okusemererwa kwonyine kandi tukatunga emigisa ya Yahwe, nikitwetagisa kuhondera ekyokurorraho kye. Tusemeriire kufaaho abantu abandi kandi tube bagabi. (Abafiripi 2:3, 4; Yakobo 1:5)  Habwaki? Habwokuba Yahwe akatuhanga n’omulingo gunu. N’obuturaaba tutahikiriire, nitusobora kwegera hali Yahwe naitwe tukaba bagabi.

³ Nitugenda kubazaaho ebimu ha bintu Baibuli etwegesa ha kugaba. Nitwija kwega habwaki kisemeza Yahwe obutugaba. Nitwija n’okurora omulingo okugaba kutukonyera kukora omulimo Yahwe ogwatuhaire kandi habwaki tuba n’okusemererwa obutugaba. Kandi nitwija kubazaaho ensonga habwaki tusemeriire kwikara tuli bagabi.

4, 5. Yahwe na Yesu bolekere bata ngu bagabi, kandi habwaki tusemeriire kubegeraho?

⁴ Yahwe nagonza tumwegereho, nahabweki asemererwa obutugaba. (Abefeso 5:1) Yahwe nagonza abantu ababe n’okusemererwa. Kinu nitukimanya habw’okuba akatuhanga omu mulingo ogurukuhuniriza, akahanga ensi yaitu eri nungi kandi yatamu ebintu ebisobora kutuletera kusemererwa. (Zabuli 104:24; 139:13-16) Nahabweki obutulengaho kuletera abantu abandi kusemererwa tuba nituha Yahwe ekitiinisa.

⁵ Twegera na hali Yesu, ayataireho ekyokurorraho ekirungi ekirukwoleka nk’oku omuntu asobora kuba omugabi. Akagamba: “Nkomwana womuntu okwataraizire okuherezebwa, baitu okuhereza, nokuhayo obwomezibwe okucungura baingi.” (Matayo 20:28) Omukwenda Paulo akekambisa Abakristaayo ati: “Inywe muikale nokutekereza kunu okukaba kuli nomu Kristo Yesu . . . Baitu akeyihaho ekitinisa, natwara omulingo gwomuiru.” (Abafiripi 2:5, 7) Nitusobora kwekaguza, ‘Ninsobora kweyongera kuhondera ekyokurorraho kya Yesu?’​—Soma 1 Petero 2:21.

6. Oruganikyo Yesu yabalizeeho orw’Omusamaliya nirutwegesa ki? (Rora ekisisani ekiri ha rupapura 15.)

⁶ Yahwe asemererwa obutuhondera ekyokurorraho uwe na Yesu ekibatuteriireho. Kinu tukikora obutufaaho abantu kandi tukaserra omulingo ogw’okubakonyera. Yesu akoleka obukuru bw’ekintu kinu obuyabalizeeho oruganikyo orw’Omusamaliya. (Soma Luka 10:29-37.) Akegesa abahondezi be ngu bakaba basemeriire kukonyera abandi, batarukusoroora. Noijuka ensonga habwaki Yesu yabalizeeho oruganikyo runu? Habwokuba omusaija Omuyudaaya akamukaguza ati: “Omutahi wange [nuwe oha]?” Ekyokugarukamu kya Yesu nikitwegesa ngu obuturaaba nitugonza kusemeza Yahwe tusemeriire kuba bagabi nk’Omusamaliya onu.

7. Twoleka tuta ngu Yahwe ekyarukutusaba kukora nikyo ekirukukirayo oburungi? Soborra.

⁷ Ensonga endi habwaki tusemeriire kuba bagabi eine akakwate n’ekyabaire omu rugonjo Adeni. Setani akagamba ngu Adamu na Hawa bakaba nibasobora kusemererwa kakuba bajemera Yahwe kandi bakatandika kwetekerezaaho bonka. Hawa akegonza wenka kandi akagonza asisane nka Ruhanga. Adamu nauwe akegondeza wenka kandi akagonza kusemeza mukazi we Hawa, kukira kusemeza Ruhanga. (Okubanza 3:4-6) Ebyarugiremu bikaba bibi muno. Eki nikyeyolekera kimu ngu, busaho n’omu asobora kuba n’okusemererwa kakuba ayegondeza wenka. Baitu obutuba bagabi kandi abatarukwegondeza, tuba nitwoleka ngu Yahwe ekyarukutusaba kukora nikyo ekirukukirayo oburungi.

8. Habwaki Adamu na Hawa bakaba basemeriire kutekerezaaho abandi?

⁸ N’obukiraaba ngu Adamu na Hawa bakaba bali bonka omu rugonjo Adeni, bakaba basemeriire kutekerezaaho abandi. Habwaki? Yahwe akaba abahaire omulimo gw’okukora. Akabagambira kuzaara kwijuza ensi kandi bakigofoora orugonjo. (Okubanza 1:28) Adamu na Hawa bakaba basemeriire kugondeza abaana babo abarazarwa okusemererwa, nk’oku Yahwe akaba nagonza boona kuba n’okusemererwa. Adamu, Hawa hamu n’abaana babo bakaba nibaija kukorra hamu nukwo bafoole ensi yoona orugonjo orurungi. Ogu gukaba mulimo gw’amaani.

9. Habwaki omulimo gw’okufoora ensi yoona orugonjo gwakuletiire abantu kusemererwa?

⁹ Abantu abahikiriire nabo bakukoliire hamu na Yahwe kusobora kuhikiriza ekigendererwa kye n’okufoora ensi orugonjo. Obu nubwo bakutahire omu kuhumura kwa Ruhanga. (Abaheburaniya 4:11) Teramu akasisani orole nk’oku omulimo gunu gwakubaletiire okumarwa n’okusemererwa! Yahwe yakubaire abahaire omugisa habw’okuba bantu abatarukwegondeza kandi abarukufaaho abandi.

10, 11. Kiki ekiratukonyera kutebeza n’okufoora abantu abegeswa?

¹⁰ Omu kasumi kanu, Yahwe atuhaire omulimo ogw’embaganiza. Nagonza tutebeze kandi tufoole abantu abegeswa. Kukora omulimo gunu, tusemeriire kufaaho abantu.  Amananu gali, nitusobora kwikara nitukora omulimo gunu kakuba tuba n’ebigendererwa ebihikire. Kugonza Ruhanga n’okugonza abantu.

¹¹ Paulo akagamba ngu uwe n’Abakristaayo abandi ab’omu kyasa eky’okubaza bakaba “bakozi hamu na Ruhanga” habwokuba bakatebeza kandi bayegesa abantu abandi amananu. (1 Abakolinso 3:6, 9) Omu kasumi kanu, naitwe nitusobora kuba “bakozi hamu na Ruhanga” kakuba tuhayo obwire, amaani, hamu na sente kusagika omulimo gw’okutebeza ogw’atuhaire. Kinu kitiinisa ky’amaani!

12, 13. Birungi ki ebiruga omu kufoora abantu abegeswa, iwe eby’omanyire?

¹² Obutuhayo obwiire baitu n’amaani kusobora kukora omulimo gw’okutebeza hamu n’okwegesa kituletera okusemererwa kwingi. Eki nikyo ab’oruganda na banyaanya itwe abaatungire omugisa gw’okwegesa abantu Baibuli barukugamba. Tusemererwa obuturora abaturukwegesa Baibuli nibatunga omuhimbo obubetegereza Baibuli eky’erukutwegesa, bakatunga okwikiriza kwonyini, bakakora empindukahinduka omu bwomeezi bwabo, kandi bakatandika kugambiraho abandi ebibarukwega. Yesu nauwe akasemererwa abatebezi 70 abayatumire obubagarukire “nokusemerewa” habw’ebintu ebibarozere.​—Luka 10:17-21.

¹³ Ab’oruganda na banyaanya itwe kuruga omu nsi yoona basemererwa muno obubarora omulingo obutumwa kuruga omu Baibuli bukonyera abantu kuba n’obwomeezi oburungi. Ekyokurorraho, munyaanya itwe arukwetwa Anna ow’akyali nsinganto akaba nagonza kwongera ha buheereza bwe hali Yahwe. * (Rora obugambo obuli hansi.) Nahabweki akacwamu kugenda omu Masirimuka ga Bulaaya nambere hali obwetaago bwabatebezi. Akahandika nagamba ngu: “Kyanguhire kutunga abantu b’okwegesa Baibuli omu kiikaro kinu, kandi ekintu kinu ninkigonza muno. Obuheereza bwange bundetera okusemererwa kwingi. Obuntaaha omu ka, tintunga obwire bwokutekerezaaho ebizibu byange. Ntekerezaaho abo abandukwegasa Baibuli​—ntekerezaaho ebizibu byabu hamu n’ebirukubatuntuza. Nserra emiringo y’okubagarramu amaani n’omulingo nsobora kubakonyera. Hati nkigumize ngu ‘okugaba kuleta okumererwa kukira okuheebwa.’”​—Engeso Ezabakwenda 20:35.

14. Nosobora ota kwegondeza omu kutebeza abantu n’obubarayanga kuhuliiriza?

¹⁴ N’obukiraaba ngu abantu tibatuhuliiriza obutuba nitutebeza, nitusobora kutunga okusemererwa habw’okuba tubaha omugisa gw’okuhurra amakuru amarungi. Yahwe natunihirramu naitwe kukora ekintu ekiyagambiire Ezekyeri kukora: “Olibagambira ebigambo byange, obubalihurra rundi obubatalihurra.” (Ezekyeri 2:7; Isaya 43:10) Nahabweki, omulingo gwona abantu ogubatugarukamu, Yahwe asiima habw’amaani agatukemu kutebeza. (Soma Abaheburaniya  6:10.) Ow’oruganda omu akabazaaho obuheereza bwe ati: “Itwe tusigire embibo, twaitirra, kandi twasaba nitunihira ngu Yahwe naija kuletera okugonza kukura.”​—1 Abakolinso 3:6.

15. Abantu kutusiima nikyo ekisemeriire kutuletera kuba bagabi? Soborra.

¹⁵ Yesu nagonza tube bagabi habw’okuba kutuletera kusemererwa. Obuturaaba bagabi, abantu abandi baingi nabo nibaija kuba bagabi. Nahabweki natwekambisa ati: “Mugabege nainywe muligabirwa; endengo enungi, igatirwe, ecikinyiziibwe, erukuseseka, niyo balibaha omu kifuba. Baitu endengo eyimulengeramu, nainywe muligirengerwamu.” (Luka 6:38) Kyamananu ngu abantu abamu nibasobora kutasiima obw’obagabira. Baitu n’obu kirazooka ngu abantu tibarukusiima, iwe ikara n’ogaba. Tomanya ekikorwa kimu eky’okugaba kisobora kurugamu ebirungi bingi.

16. Nibaha abatusemeriire kugabira kandi habwaki?

¹⁶ Abantu abanyakuli abagabi bonyini tibagaba ngu habwokuba nibanihira kuheebwa. Yesu akangamba ati: “Baitu obworacumbaga obugenyi oyetege abasege, nabaramaire, nabacumbagira, nabafu bamaiso: kandi olihebwa omugisa; baitu tibanyina kyokukugarurra.” (Luka 14:13, 14) Baibuli ey’ongera engamba ngu: “Omuntu omugabi aliba n’okusemererwa.” Kandi: “Ahebwa omugisa anyakutekereza[ho] awamasege.” (Enfumo 22:9, NW; Zabuli 41:1) Tusemeriire kuba bagabi habw’okuba nitugonza kukonyera abantu abandi.

17. Miringo ki eyitusobora kugabiramu abandi kandi tukatunga okusemererwa?

¹⁷ Paulo obuyabalize ebigambo bya Yesu ebirukugamba ngu “okugaba kwomugisa  okukira okuhebwa,” akaba atarukubazaho kugabira abandi ebyetaago by’omubire byonka. Nitusobora kugarramu abandi amaani, kubagambiraho amagezi Baibuli agetuha hamu n’okubakonyera nambere kyetagisize. (Engeso Ezabakwenda 20:31-35) Ebintu Paulo yabalize kandi yakora nibitwegesa obukuru bwokuhayo obwire, amaani, okufaayo, hamu n’okugonza.

18. Kiki eky’abaseruliza abarukukira obwingi bazoire obukirukuhika ha kuba bagabi?

¹⁸ Abaseruliza ha ngeso z’abantu basangire ngu kugaba kuletera abantu kusemererwa. Kusigikirra ha kihandiiko kimu, abantu baingi bagamba ngu bahurra basemeriirwe hanyuma y’okukorra abantu abandi ebirungi. Abaseruliza bangamba ngu obutukonyera abantu abandi, tuhurra obwomeezi bwaitu butungire ekigendererwa. Nahabweki abakugu abamu bagamba ngu abantu kuba n’obwomeezi oburungi hamu n’okusemererwa basemeriire kwehayo kukonyera abantu abandi. Amananu gali, ebibazoire tibirukutuhuniriza habwokuba Omuhanga waitu Yahwe aikaire natungambira ngu okugaba kutuletera okusemererwa.​—2 Timoseo 3:16, 17.

19, 20. Habwaki n’ogonza kuba muntu omugabi?

¹⁹ Nikiguma muno kwikara tuli bagabi kakuba tuba twetoroirwe abantu abarukwefaaho bonka. Yesu akagamba ngu ebiragiro bibiri ebirukukirayo obukuru nibyo kugonza Ruhanga n’omutima gwaitu gwona, n’obwomeezi bwaitu bwona, n’ebitekerezo byaitu byona hamu n’amaani gaitu goona n’okugonza bataahi baitu nk’oku turukwegonza itwenka. (Marako 12:28-31) Omu kicweka kinu turozere ngu abo abarukugonza Yahwe bamwegeraho. Yahwe na Yesu bagabi. Batwekambisa kuhondera eky’okurorraho kyabo habwokuba nibamanya ngu nikiija kutuletera kusemererwa kwonyini. Kakuba tuba bagabi omu bintu ebitukorra Yahwe hamu n’abataahi baitu, nitwija kuhaisa Yahwe ekitiinisa, twegasire, kandi tugasire n’abandi.

²⁰ Hataroho kugurukyagurukya oliyo n’okora kyona ekirukusoboka kugaba n’okukonyera abandi kukira muno ab’oruganda nabanyaanya itwe. (Abagaratiya 6:10) Obworaikara n’okora ekintu kinu, abantu nibaija kukusiima, bakugonze kandi noija kusemererwa. Baibuli egamba: “Omuntu omwenda aligomoka: kandi anyakuitirra nuwe aliiti’rwa.” (Enfumo 11:25) Omu bwomeezi bwaitu n’omu buheereza, haroho emiringo nyingi eyitusobora kukozesa kugabira abandi n’okwoleka embabazi. Leka tubazeeho emu ha miringo enu omu kicweka ekirayongeraho.