OMWAKA oguhoire, enkumi n’enkumi ez’ab’oruganda bakakomwa kuba abagurusi hamu n’abaheereza omu kitebe. Obworaaba oli omu halubo, nosobora kuba oine okusemererwa habw’okuheereza Yahwe hamu n’aboruganda omu mulingo gunu.

Kyabuli kiro, obworaaba nohurra oyeralikiriiremu kataito. Omugurusi omuto arukwetwa Jason nagamba ngu: “Obunakomerwe, nkahurra obujunanizibwa obuhyaka bumpinguraineho.” Musa hamu na Yeremiya bakehurra ngu bakaba batahikire obubatungire obujunanizibwa obuhyaka kuruga hali Yahwe. (Okuruga 4:10; Yeremiya 1:6) Obworaaba n’oyehurra oti, n’osobora ota kuguma kandi okeyongera kukurakurana? N’osobora kwega bingi ha kyokurorraho kya Timoseo.​—Engeso Ezabakwenda 16:1-3.

Timoseo nasobora kuba akaba aine emyaka nka 20 nambere yatandikiire kugenda n’Omukwenda Paulo. Timoseo obuyayeserwe kuheereza, nasobora kuba yayehuliire nk’owataine obukugu bw’okwegesa n’okuha abandi abuhabuzi habwokuba akaba akyali muto. (1 Timoseo 4:11, 12; 2 Timoseo 1:1, 2, 7) Baitu akeyongera kukurakurana, kandi hanyuma y’emyaka ikumi Paulo akagambira Abafiripi ati: “Ninihira omu Mukama waitu Yesu okutuma Timoseo [bwangu] namberemuli.” Habwaki Paulo yayehuliire ati hali Timoseo? Akagamba ngu: “Tinyina ondi nomu anyina omutima ogukuingana [n’ogwe].”​—Abafiripi 2:19, 20.

Habwaki Timoseo ali kyokurorraho kirungi hali abagurusi? Wetegereze ensonga zinu mukaaga.

1. Yafahoga muno abantu. Paulo akagambira ab’oruganda ab’omu Firipi ngu Timoseo akaba nagenda kubafaaho muno. (Abafiripi 2:20) Timoseo akabanagonza ab’oruganda kwikara haihi na Yahwe kandi akaba ayetegekere kwefereza obwire bwe hamu n’amaani kubakonyera.

William, anyakumazire emyaka erukuhingura omu 20 naheereza nk’omugurusi omu kitebe, agambira abagurusi abahyaka ati: “Mugonze ab’oruganda. Mute omutima ha byetaago byabo mukikaro kyokuguta ha mulingo gw’okubebemberamu.” Otaba nk’omuvugi w’abaasi ow’afaaho muno obwire obwasemeriire kuhika nambere arukugenda kukira kuleka abasabazi bakataaha omu baasi.

2. Akateka okuheereza Yahwe omu kiikaro ky’okubanza. Paulo akakagamba ngu Timoseo akaba atali nk’abandi abakaba “nibaserra ebyabu bonka, tibiri bya Yesu Kristo.” (Abafiripi 2:21) Paulo akakyetegereza ngu ab’oruganda abamu bakaba nibefaaho bonka. Obwire obumu bayebembezaaga ebyetaago byabo omu kiikaro kyokwebembeza Yahwe. Baitu Timoseo akaba nayahukanaho! Obuyatungire omugisa gw’okwongera ha buheereza bwe, aketwaza nka Isaya, ayagambire ngu: “Nyowe ndi hanu; tuma nyowe.”​—Isaya 6:8.

N’osobora ota kurora ngu tiwagwera rubaju obukirukuhika ha kufaaho ebyetaago byawe nk’omuntu hamu n’ebyetaago eby’ekitebe? Ekyokubanza, hondera obuhabuzi bwa Paulo: “Mumanye ebintu ebirukukirayo obukuru.” (Abafiripi 1:10, NW) Leka kuheereza Yahwe kube omu kiikaro ky’okubanza. Ekyakabiri, wetantale ebintu ebirukwetagisa obwire bwingi hamu n’amaani maingi. Paulo akagambira Timoseo ati: “Baitu okwegomba okwomu busigazi okuirukege, baitu ohonderege okuhikirra, nokuikiriza, nokugonza, nobusinge.”​—2 Timoseo 2:22.

3. Yakoraga n’amaani kuheereza Yahwe. Paulo akabazaaho Timoseo ati: “Akaheereza  hamu na nyowe habwenjiri nkomwana hali ise.” (Abafiripi 2:22) Timoseo akaba atali mugara. Uwe na Paulo bakakora n’amaani kandi kinu kikabaletera kuba banywani.

Omu kasumi kanu, ekitebe kya Yahwe kiine ebyokukora bingi. Omulimo gunu niguleta okumarwa kandi nigwija kukukonyera kwirra haihi ab’oruganda na banyaanya itwe. Nahabweki rora ngu waikara oine bingi eby’okukora “omu mirimo ya Mukama.”​—1 Abakolinso 15:58.

4. Akata omu nkora ebiyayegere. Paulo akahandikira Timoseo ngu: “Baitu iwe okakuratira okwegesa kwange, nengeso zange, nokuhanura kwange, nokuikiriza kwange, nokugumisiriza kwange, nokugonza kwange, nokuguma kwange.” (2 Timoseo 3:10) Habwokuba Timoseo akateka omu nkora ebi yayegere, akamalirra ayeyongiire kutunga obujunanizibwa.​—1 Abakolinso 4:17.

Habwaki otatunga ow’oruganda ow’amazire obwire naheereza nk’omugurusi kandi okamwegeraho? Tom, ow’amazire akasumi naheereza nk’omugurusi, naijuka omugurusi omu obuyamufiireho kandi yamutendeka kurungi muno. Nagamba ngu: “Naikaraga nimwehanuzaho kandi ninteeka omu nkora amagezi agayampaga. Kinu kikandetera kweyongera kuba mumanzi.”

5. Akakaikara nayetendeka. Paulo akatererra Timoseo ati: “Wemanyizege okutiina Ruhanga.” (1 Timoseo 4:7) N’obukiraaba ngu omwiruki n’asobora kuba aine omutendeki, nauwe asemerra kwetendeka wenka. Paulo akatererra Timoseo: “Oyekambege omu kusoma n’okugambirra, nokwegesa. . . . Ebi obitekerezege kurungi; oikalege omubyo; okuhingurana kwawe kwolekwege hali bona.”​—1 Timoseo 4:13-15.

Naiwe n’oyetagisa kwikara noyongera ha bukugu bwawe. Ba musomi murungi owa Baibuli, kandi oikale omanyire oburagirizi obuhyaka obutuhebwa ekitebe. Oteyesiga ekihinguraine. Tikihikire kutekereza ngu habwokuba oine bingi eby’omanyire nahabweki nosobora kukora ha nsonga yoona otabandize kuseruliza kurungi. Nka Timoseo, “Werindege wenka nokwegesa kwawe.”​—1 Timoseo 4:16.

6. Akesiga omwoyo gwa Yahwe. Paulo obwakaba nabazaho obuheereza bwa Timoseo, akamwijukya ati: “Ekintu ekirungi ekiwayahuziibwe okirinde omu mwoyo ogurukwera [ogurukwikara] omulitwe.” (2 Timoseo 1:14) Timoseo kikamwetagisa kwesiga omwoyo gwa Ruhanga.

Donald, anyakumazire emyaka nyingi naheereza nk’omugurusi, nagamba ngu: “Ab’oruganda abakomerwe kutwara obwebembezi basemeriire kutwara enkoragana yabo na Yahwe nk’ekintu ekikuru. Obubarakora kinu nibaija ‘kuruga omu maani bahike omu maani.’ Kakuba basaba Ruhanga kubaha omwoyo gwe kandi bakakurakuraniza emiringo eyeretwa omwoyo ogurukwera, nibaija kukonyera ab’oruganda.”​—Zabuli 84:7; 1 Petero 4:11.

Nikagarramu amaani kurora abaheereza hamu n’abagurusi abahyaka nkaiwe, nabo nibeyongera kukurakurana omu kuheereza Yahwe. Jason, outusangirwe tubalizeho, nagamba ati: “Obwire obumazire nimpereza nk’omugurusi, nyegere ebintu bingi kandi nyeyongiire kuba mumanzi. Hati ninyegondeza omu mulimo gunu kandi ngutwara nk’omugisa gw’amaani!”

Oraikara n’oyeyongera kukurakurana? Obw’orahondera ekyokurorraho kya Timoseo, naiwe noija kusobora kukonyera ab’oruganda na banyaanya itwe.