Habwaki omuntu wena atarukwikirizibwa kusindika ekintu kyona eky’Abakaiso ba Yahwe ha mikura endi ya intaneeti rundi ha mikura yoona ey’okubalizaaho?

Habwokuba ebitabu byaitu tubigabira busa abantu abamu batekereza ngu, nibasobora kubisindika ha mikura yoona ya ha intaneeti rundi ha mikura ey’okubalizaaho. Baitu ekintu kinu nikisobora kuletaho ebizibu by’amaani kandi nikicwa ebiragiro n’emikorre ey’omukura gwaitu * (Rora obugambo obuli hansi). Ebiragiro binu nibyolekera kimu kurungi ngu busaho muntu arukwikirizibwa kusindika “ebisisani, ebitabu, emanyikirizo, ebizina, vidiyo, rundi ebicweka ebyokusoma kuruga ha mukura gwaitu akabiteeka ha mikura endi (emikura yabuli mulingo, emikura ry’okubalizaaho, n’emikura ey’okubaganiraho ebintu ebindi nka vidiyo, ebihandiiko hamu n’amaraka).” Habwaki ebiragiro binu nibyetagisa?

Ebiri ha mukura gwaitu byoona birinzirwe ebiragiro. Ekintu kinu kikuru habwokuba nikitanga kukozesa kubi ebintu ebiri ha mukura gwaitu. Abantu ab’ecwireho ekitebe n’abantu abandi abarukugonza kusiisa omulimo gwaitu haroho obubateeka ebitabu byaitu ha mikura yabo nukwo basikirize Abakaiso ba Yahwe hamu n’abantu abandi kugenda ha mikura yabo. Baitu ha mikura yabo bataho n’ebintu ebirukuleta okugurukyagurukya omu bitekerezo by’abantu. (Zabuli 26:4; Enfumo 22:5) Abandi bakozeseze ebintu byaitu rundi emanyikirizo yaitu (logo) eya jw.org kurangirra eby’amaguzi byabo, puroguramu ezirukukorra ha masimu, hamu n’okutunda ebintu byabo. Baitu habwokuba ebintu byaitu hamu n’emanyikirizo yaitu birinzirwe ebiragiro, nitusobora kugenda omu mbuga z’ebiragiro nitubatanga kubikozesa. (Enfumo 27:12) Baitu kooti nesobora kutatusagika kakuba tuba nitwikiriza abantu abamu n’obu barukuba bali b’oruganda, kusindika ebitabu byaitu ha mikura endi rundi kukozesa emanyikirizo yaitu eya jw.org kutunda ebintu byabo.

Kakuba tuhanura ebitabu byaitu kuruga ha mukura gundi gutali ogwa jw.org, nikisobora kuturugiramu ebizibu. Yahwe nakozesa “omwiru omwesigwa kandi ow’amagezi” wenka kutuha eby’okulya eby’omwoyo. (Matayo 24:45, NW) Omwiru omwesigwa akozesa emikura emitogole nambere arabya ebyokulya eby’omwoyo kandi enu niyo​—www.pr418.com, tv.pr418.com, hamu na wol.pr418.com. Kandi twine purogurramu isatu zonka ezikorra ha masimu rundi tabuleti kandi zinu nizo​—JW Language^®, JW Library^®, hamu na JW Library Sign Language^®. Ha mikura enu hamu na purogurramu ezikorra ha masimu rundi ha tabuleti titusangaho oburango bw’amaguzi rundi ekintu kyona kuruga omu nsi ya Setani. Baitu kakuba tuba nitutunga ebitabu byaitu kuruga ha mikura endi rundi ha purogurramu ezindi ezikorra ha masimu rundi ha tabuleti, nikisobora kuba ngu eby’oratunga nibiija kuba bihindwirwemu omu mulingo gumu rundi ogundi.​—Zabuli 18:26; 19:8.

Kwongererezaaho, kakuba tusindika ebintu ebiri ha mukura gwaitu ha mikura endi nambere abantu barukwikirizibwa kuhayo entekereza zaabo, kinu kiha abantu abecwireho ekitebe akagisa k’okujuma ekitebe kya Yahwe. Ab’oruganda abamu bamalirra batandikire kuteera empaka, kandi kinu kyongiire kujumisa Yahwe. Kubaliza ha intaneeti tiguli mulingo oguhikire ogw’okuterekerezaamu entekereza y’omuntu n’okumukonyera kwetegereza amananu. (1 Timoseo 6:3-5; 2 Timoseo 2:23-25) Abantu abamu bekorra emikura hamu n’emikura ey’okubalizaaho ey’erukwesisaniriza nk’eyetairweho ekitebe rundi ab’oruganda abali h’Akatebe Akalemi. Baitu emikura egi yoona y’ebikwangara. Busaho ow’oruganda weena anyakuli ha Katebe Akalemi anyakwine omukura ogwe wenka rundi anyakuli ha mukura ogw’okubalizaaho.

Obu twoleka abantu omukura gwaitu ogwa jw.org, tuba nitusagika omulimo gwaitu ogw’okutebeza “amakuru amarungi.” (Matayo 24:14, NW) Omukura gwaitu hamu na purogurramu zaitu ezirukukorra ha masimu hamu na ha tabuleeti nibyeyongera kusemezebwa. Nitugonza buli omu bimugasire. Nahabweki nitwikirizibwa kusindikira abantu abandi ebitabu byaitu nitukozesa obutumwa (e-mail) rundi kusindikira abantu abandi endagirro erabahikya ha mukura gwaitu. Obutukora eki, tuba nituragirra abantu ha “omwiru omwesigwa kandi ow’amagezi,” kandi nuwe wenka Yahwe ow’arukukozesa kugaba eby’okulya eby’omwoyo.