1. Itwena abanyabuzaale baitu tubagondeza ki?

MUNYAANYA itwe oubarukweta Pauline nagamba ati: “Kuruga nyega amananu nyikaire ningonza abanyabuzaale bange boona kugega nukwo tube hamu omu rugonjo orurungi. Kukira muno iba nyowe Wayne na mutabani waitu.” Naiwe oine abanyabuzaale abatamanyire Yahwe? Naiwe n’osobora kuba n’oyehurra nka Pauline. *

2. Bikaguzo ki ebiturukugenda kubazaaho omu kicweka kinu?

² Titusobora kuhambiriza abanyabuzaale baitu kwikiriza amakuru amarungi, baitu nitusobora kubakonyera kugonza kuhuliriza n’okutekerezaaho obutumwa obuli omu Baibuli. (2 Tim. 3:14, 15) Habwaki tusemeriire kutebeza abanyabuzaale baitu? Habwaki tusemeriire kuboleka embabazi? Nitusobora tuta kubakonyera kugonza Yahwe? Kandi ab’oruganda n’abanyaanya itwe omu kitebe nibasobora bata kutukonyera?

3. Kusigikirra ha 2 Petero 3:9, habwaki tusemeriire kutebeza abanyabuzaale baitu?

³ Omu kasumi akatali ka hara, Yahwe naija kuhwerekereza obusinge bunu. Abantu abaine “entekereza enungi ey’esobora kubaletera kutunga obwomeezi obutahwaho” nubo bonka balikiraho. (Eng. 13:48) Tutamu amaani n’obwire kutebeza abantu abatutamanyire, nahabweki tusemeriire n’okutebeza abanyabuzaale baitu habwokuba nitugonza nabo bafooke baheereza ba Yahwe. Yahwe, ‘tarukugonza omuntu wena [kuhwerekerra] baitu boona bahike omu kwegarukamu.’​—Soma 2 Petero 3:9.

4. Nsobi ki eitusobora kukora obuturukuba nitutebeza abanyabuzaale baitu?

⁴ Tusemeriire kukiijuka ngu haroho emiringo ebiri ei tusobora  kutebezaamu amakuru amarungi, omulingo oguhikire n’ogutahikire. Ekyokurorraho obutuba nitutebeza abantu abatutamanyire nitusobora kuba tubaza nabo omulingo ogw’embabazi baitu kandi obutuba nitutebeza abanyabuzaale baitu nitusobora kuba tubaza nabo omulingo ogutali gw’embabazi.

5. Kiki ekitusemeriire kwijuka tutakatebiize abanyabuzaale baitu?

⁵ Baingi omuliitwe twehurra kubi obutwijuka omulingo twatebizeemu abanyabuzaale baitu omurundi ogw’okubanza kandi tutekereza ngu hakire kakuba twabalize nabo omu mulingo gw’embabazi. Omukwenda Paulo akatererra Abakristaayo ati: ‘Ebigambo byanyu biikalege by’embabazi ebiro byona nibirungibwamu ekisura, nukwo mumanye okukibahikiriire okwanukura abantu omu omu.’ (Bak. 4:5, 6) Kikuru muno kwijuka obuhabuzi bunu obuturukuba nitutebeza abanyabuzaale baitu. Kakuba tutakikora nitusobora kubabiihiza omu kiikaro ky’okubaletera kutuhuliiriza.

6-7. Bazaaho ekyokurorraho ekirukwoleka ngu kikuru Omukristaayo kufaaho owali nawe omu buswere n’obwaraaba atali muheereza wa Yahwe.

⁶ Booleke ngu n’obafaaho. Pauline, outusangirwe tubaluzeeho nagamba ati: “Hakubanza nagonzaga kwikara ningambira iba nyowe Wayne ebintu eby’omwoyo byonka. Titwabazaahoga ‘kintu kindi’ kyona.” Habwokuba iba Pauline, akaba atamanyire bingi ebirukukwata ha Baibuli, tiyayetegerezaaga mukazi we ebiyabaga n’abaza. Kinu kikamuleetera kutekereza ngu muzaki we akaba natekerezaho ediini ye yonka. Akeraliikirra muno habwokuba akatekereza ngu mukazi we akaba atahire akadiini diini akakaba nikasobora kumuletera ebizibu kandi akaali nikamuhabisa.

⁷ Pauline n’agamba ngu obwire bwe bwona obwa rwebagyo na wiikendi ezirukukira obwingi yazimaraga n’ab’oruganda n’abanyaanya itwe, omu nsorrokano, omu kutebeza, n’okugenda  omu ntekaniza ezindi ez’okwesemezaamu ezabaga zitekanizibwe ab’oruganda. Pauline nagamba ati: “Iba nyowe Wayne obuyataahaga omu ka, tiyatusangayoga eky’amuleteraga kukwatwa amasu.” Kinu kikaletera Wayne kwehurra kubi habwokuba yabaga nagonza kuba na mukazi hamu na mutabani we. Abantu ababaga baali na mukazi we akaba atabamanyire kandi yatekerezaaga ngu Pauline akaba natwara banywani be abahyaka kuba b’omugaso kumukira. Wayne akabiihirwa muno yahika n’okugambira Pauline ngu nibaija kugaitururwa. Oyetegeriize emiringo Pauline yayolekeremu ngu akaba atarukufaaho iba?

8. Kusigikirra ha 1 Petero 3:1, 2, kiki ekikira kukwataho abanyabuzaale baitu?

⁸ Leka ngeso zaawe nizo zibatebeze. Emirundi erukukira obwingi, ebikorwa byaitu bikwataho abanyabuzaale baitu n’okukira ebigambo byaitu. (Soma 1 Petero 3:1, 2.) Hanyuma y’akasumi, Pauline aketegereza ensonga enu. Nagamba ati: “Nkaba nkimanyire ngu Wayne natugonza muno kandi akaba atarukugonza kugaitururwa na nyowe. Baitu obuyabalizeeho kugaitururwa, kikandetera kukyetegereza ngu nsemeriire kutandika kuhondera obuhabuzi bwa Yahwe oburukukwata ha buswere. Kandi nkakyetegereza ngu omu kiikaro ky’okwikara nimutebeza, nkaba nsemeriire kwikara ninyetwaza kurungi.” Pauline akaleka kuhambiriza iba kubazaaho Baibuli kandi yatandika kubazaaho ebintu ebindi ebya buli kiro. Wayne akakyetegereza nk’oku mukazi we akaba afookere muntu w’obusinge, kandi na mutabani akaba ayeyongire kuba n’engeso enungi. (Nfu. 31:18, 27, 28) Wayne obuyarozere omulingo Baibuli yakonyiremu ab’omu ka ye kikamuletera kugonza kugyega.​—1 Kol. 7:12-14, 16.

9. Habwaki tutasemeriire kujwaha obuturukuba nitukonyera abanyabuzaale baitu?

⁹ Otahwamu amaani obworaaba n’okonyera  abanyabuzaale baawe. Yahwe atuterireho ekyokurorraho ekirungi. Na hati hoona Yahwe aikaire naha abantu omugisa ogw’okumanya amakuru amarungi nukwo batunge obwomeezi. (Yer. 44:4) Kandi n’omukwenda Paulo akagambira Timoseo kwikara nakonyera abantu. Habwaki? Habwokuba akaba nasobora kwejuna n’okujuna abakumuhuliirize. (1 Tim. 4:16) Naitwe habwokuba nitugonza abanyabuzaale baitu, nitugonza nabo bamanye amananu agali omu Baibuli. Hanyuma y’akasumi, ebigambo n’ebikorwa bya Pauline bikakwataho iba. Kandi hati aine okusemererwa habwokuba iba akahika yafooka muheereza wa Yahwe. Hati boona nibaheereza nka bapayoniya, kandi Wayne naheereza nk’omugurusi w’ekitebe.

10. Habwaki nitwetaaga kugumisiriza?

¹⁰ Bamugumisiriza. Obutwacwiremu kworobera Yahwe tukakora empindahinduka omu bwomeezi bwaitu n’omu bintu ebitwali nitwikiriza. Baitu abanyabuzaale baitu kibagumira kwetegereza habwaki twakozere empindahinduka ezi. Ekintu ekibakira kubanza kwetegereza nikyo ngu tuleka kujaguza hamu nabo emikoro ey’ediini kandi tuleka kwejumbira omu by’obulemi. Kinu nikisobora kuletera abanyabuzaale baitu abamu kutukwatirwa ekiniga. (Mat. 10:35, 36) Baitu titusemeriire kutekereza ngu tibalihinduka. Kakuba tuleka kubakonyera kwetegereza ebintu ebiturukwikiriza, nitwija kusisana nk’abamazire kubacwera ira omusango ngu tibasemeriire kutunga obwomeezi obutahwaho. Kandi twijuke ngu obujunanizibwa obw’okucwera abantu omusango Yahwe atabutuhe baitu akabuha Yesu. (Yoh. 5:22) Kakuba tugumisiriza, hanyuma ya kasumi nibasobora kuhuliiriza amakuru amarungi.​—Rora akasanduko “ Kozesa Omukura Gwaitu Kwegesa.”

11-13. Omulingo Alice yatwaizemu bazaire be nigutwegesa ki?

¹¹ Boleke embabazi, baitu otabaikiriza kukuleetera kuhindura encwamu zaawe. (Nfu. 15:2) Tekerezaaho ekyokurorraho ekya Alice. Akeega amananu obw’akaba n’aikara omu ihanga erindi. Bazaire be baali nibaikiriza ngu Ruhanga taroho kandi baali nibejumbira muno omu by’obulemi. Akakyetegereza ngu akaba aine kubagambira omu bwangu ebintu ebirungi eby’akaba nayega kuruga omu Baibuli. Alice nagamba ati: “Kakuba olinda akasumi akaraihira kurabaho otakabagambire enyikiriza zaawe n’eby’orukukora, nikiija kubabiihiza muno obubalikimanya.” Yabahandikiraga ebbaruha n’abakaguza entekereza yabo ha nyegesa za Baibuli ez’akaba amanyire ngu niziija kubasemeza ekyokurorraho nk’okugonza. (1 Kol. 13:1-13) Akasiima bazaire be habwokumukuza n’okumurolerra kurungi kandi yabasindikiraga ebisembo. Obuyabaga agenzere kubarora, yayekambaga kukonyera nyina omu mirimo ey’omu ka. Ha kubanza bazaire be bakabiihirwa obuyabagambire enyikiriza ze empyaka.

¹² Alice obuyabaga ali omu ka y’abazaire be, yasomaga Baibuli buli kiro nk’oku yakoraga obuyabaga ali wenka. Alice nagamba ati: “Kinu kikakonyera nyina nyowe kwetegereza nk’oku Baibuli kyali kintu kikuru omu bwomeezi bwange.” Ise Alice we akacwamu kwega Baibuli n’ekigendererwa ky’okwetegereza ebintu eby’aletiire muhara we kuhindura entekereza ye kandi n’okuserramu ensobi ez’arakozesa kumuhakaniza. Alice nagamba ati: “Nkamuha Baibuli n’amuteramu n’akabbaruha.” Kiki ekyarugiremu? Omu kiikaro ky’okutunga ensobi ez’akaba naserra, ise Alice ebiyasomere bikamukwataho muno.

¹³ Naitwe tusemeriire kuba nka Alice, tuboleke embabazi, baitu tutabaikiriza kutuletera kuhindura encwamu zaitu. (1 Kol. 4:12b) Ekyokurorraho, Alice akagumisiriza muno habwokuba nyina akamuhakaniza muno. Nagamba ati: “Obunabatiziibwe, nyina nyowe akanyeta mwana mubi muno.” Baitu Alice akakora ki? Nagamba ngu: “Omu kiikaro ky’okuleka kubazaaho enyikiriza zange, omu mulingo ogw’embabazi nk’amusobororra nk’oku nkaba mazire kucwamu kufooka omu ha Bakaiso ba Yahwe kandi ngu nkaba ntarukwija kuhindura encwamu yange. Nkalengaho  kumwoleka ngu nimugonza muno. Itwena tukarra kandi hanyuma namucumbira ekiihuro ekirungi. Kuruga obu, akatandika kukirora ngu mali ebinkaba ninyega kuruga omu Baibuli byali nibinkonyera kufooka muntu murungi.”

14. Habwaki tutasemeriire kwikiriza abanyabuzaale baitu kutuletera kuhindura encwamu yaitu ey’okuheereza Yahwe?

¹⁴ Nikisobora kutwarra abanyabuzaale baitu obwire kwetegereza ensonga habwaki kuheereza Yahwe kikuru muno haliitwe. Ekyokurorraho Alice obuyacwiremu kuheereza nka payoniya omu kiikaro ky’okukora omulimo ogu baali nibamugondeza, nyina akongera yarra. Baitu Alice akagumira ha ncwamu ye. Kandi nagamba ati: “Kakuba oikiriza abanyabuzaale baawe kukuhambiriza kuhindura emu ha ncwamu zaawe, nibaija n’okulengaho kukuhambiriza kuhindura encwamu zaawe ezindi. Baitu kuba oboleka embabazi kandi okagumira ha ncwamu yaawe nikisobora kubaleetera kukuhuliiriza obw’orabatebeza.” Kinu nikyo kyonyini ekyakonyire Alice. Bazaire be hati bapayoniya kandi ise n’aheereza nk’omugurusi w’ekitebe.

15. Kusigikirra ha Matayo 5:14-16 na 1 Petero 2:12, “engeso ezisemiire” ez’ab’oruganda nizisobora zita kuleetera abanyabuzaale baitu kwega amananu?

¹⁵ Yahwe akozesa “engeso ezisemiire” ez’abaheereza be kucunda abantu kwija hali we. (Soma Matayo 5:14-16; 1 Petero 2:12.) Ow’oli nauwe omu buswera obwaraaba atali omu h’Abakaiso ba Yahwe, y’akatangatangaine ab’oruganda n’abanyaanya itwe ab’omu kitebe kyanyu? Pauline, outusangirwe tubalizeeho, akaraliza ab’oruganda n’abanyaanya itwe kwija omu ka ye nukwo iba asobole kubamanya. Wayne naijuka omulingo ow’oruganda omu y’amukonyire kwetegereza kurungi Abakaiso ba Yahwe. Nagamba ati: “Ow’oruganda  omu akasaba ekiro kyona kuruga ha mulimo, nukwo turole hamu omupiira ha tivi. Kinu kikankonyera kukyetegereza ngu haroho n’ebintu ebindi ow’oruganda onu akaba n’agonza hatali ediini ye yonka.”

16. Habwaki tusemeriire kuraliza abanyabuzaale baitu kwija omu nsorrokano?

¹⁶ Ekintu ekindi ekikuru muno, omu kukonyera abanyabuzaale baitu nukwo kubaraliza kwija omu nsorrokano. (1 Kol. 14:24, 25) Orusorrokano orw’okubanza Wayne oruyaiziremu kyali Kiijukyo habwokuba kyali kiroho omu bwire obw’arukuba arugire ha mulimo kandi kyali nikigenda kumara akaire kake. Nagamba ati: “Ebibayegeseze omu rubazo ntabyetegereze kurungi baitu ninyijuka omulingo abantu bantwaizeemu. Bakaija bantangirra kurungi kandi bankwata omungaro. Nkarora ngu baali bantu barungi.” Haroho ow’oruganda na mukazi we abakonyeraga Pauline, nibamukwatiraho omwana obubabaga bali omu nsorrokano rundi omu buheereza. Nahabweki Wayne obuyacwiremu kwega ebirukukiraho ha nyikiriza za mukazi we empyaka, akasaba ow’oruganda onu nuwe amwegesa Baibuli.

17. Habwaki tutasemeriire kwejunaana abanyabuzaale baitu kakuba banga amananu, kandi habwaki tusemeriire kwikara nitubakonyera?

¹⁷ Nitunihira ngu akasumi kalihika abanyabuzaale baitu boona bafooke baheereza ba Yahwe. Nitusobora kulengaho nk’oku turukusobora kubakonyera kufooka baheereza ba Yahwe baitu nibanga. Obubacwamu kwanga titusemeriire kwejunaana habwokuba titusobora kuhambiriza muntu wena kwega amananu. Baitu twikale tukimanyire ngu kakuba abanyabuzaale baitu barora kusemererwa okutwine habw’okuheereza Yahwe nikisobora kubakwataho muno. Nahabweki basabire, baza nabo omu mulingo ogw’amagezi kandi otajwaha kwikara nolengaho kubakonyera. (Eng. 20:20) Oikale okimanyire ngu Yahwe naija kukuha omugisa habw’amaani goona ag’orukutamu kubakonyera. Kandi kuba abanyabuzaale baawe baikiriza kukuhuliriza nibaija kujunwa.