1. Habwaki Yahwe yahangire obwomeezi?

HAROHO akasumi Yahwe obw’akaba ali wenka. Akaba ataine amasu, habwokuba tarukwetaaga muntu ondi wena kusobora kutunga okusemererwa. Baitu Ruhanga akaba n’agonza n’abandi batunge obwomeezi kandi basemererwe. Okugonza kunu nukwo kwamuletiire kutandika kuhanga.​—Zab. 36:9; 1 Yoh. 4:19.

2. Yesu hamu na bamalaika bakakwatwaho bata Yahwe obuyahangire ebintu?

² Yahwe akabanza kuhanga Omwana we Yesu. Kandi kuraba omu Mwana onu ow’okubanza, “ebintu byona numwo byahangiirwe,” otwaliremu obukaikuru n’obukaikuru bwa bamalaika. (Bak. 1:16) Yesu akasemererwa muno habw’okukorra hamu na Ise. (Nfu. 8:30) Kandi na bamalaika nabo bakasemererwa muno obubarozere Yahwe hamu n’Omukozi We Omukuru Yesu nibahanga iguru n’ensi. Kinu kikabaletera kukora ki? Bakatandika ‘okutoka habw’okusemererwa’ ensi obuyahangirwe, kandi bakagumizaamu nibakugiza Yahwe obuyahangire ebintu ebindi kukira muno, abantu. (Yob. 38:7; Nfu. 8:31.) Ebintu byona Yahwe yahangire bikooleka okugonza kwe hamu n’amagezi.​—Zab. 104:24; Bar. 1:20.

3. Nk’oku kyolekerwe omu 1 Abakolinso 15:21, 22, ekicunguro kya Yesu kisobozesa ki?

³ Yahwe akaba n’agonza abantu batunge obwomeezi obutahwaho omu nsi enungi ey’akaba ahangire. Baitu Adamu na Hawa obubajemiire Isebo ow’okugonza, ubo n’abaijukuru  baabo bakafeerwa obwomeezi obutahwaho. (Bar. 5:12) Yahwe akakora ki? Aho naaho, akooleka nk’oku akaba n’agenda kucungura abantu. (Kub. 3:15) Yahwe akakora entekaniza ey’okuhayo Omwana we Yesu nk’ekicunguro ekyakusobozeseze abaijukuru ba Adamu na Hawa kuruga omu kibi n’okufa. Omu mulingo gunu, akaha buli muntu wena omugisa ogw’okucwamu kumuheereza nukwo asobole kutunga obwomeezi obutahwaho.​—Yoh. 3:16; Bar. 6:23; Soma 1 Abakolinso 15:21, 22.

4. Bikaguzo ki ebiturukwija kugarukamu omu kicweka kinu?

⁴ Omurago gwa Ruhanga ogw’okuhumbuura abafu gutuletera kwekaguza ebikaguzo bingi. Ekyokurorraho, kuhumbuuka nikusobora kubaho kuta? Turamanyirra abantu baitu obu barahumbuuka? Miringo ki okuhumbuuka kuratuletera okusemererwa? Kandi habwaki kwecumitirizaaho okuhumbuuka nikisobora kutuletera kwongera kusiima Yahwe habw’okugonza kwe, amagezi, hamu n’okugumiisiriza? Hati leka tugarukemu ebikaguzo ebi.

5. Habwaki ky’amagezi kwikiriza ngu abantu tibarukwija kuhumbuuka ha murundi gumu?

⁵ Yahwe obwarakozesa Omwana we kuhumbuura obukaikuru n’obukaikuru bw’abantu, nikizooka ngu boona tarukwija kubahumbuura ha murundi gumu. Habwaki nitugamba tuti? Habwokuba kakuba abantu bakanya omu nsi ha murundi gumu nikisobora kuletaho akavuyo. Kandi Yahwe takora ekintu kyona omu omulingo gwa kavuyo. Akimanyire ngu abantu kusobora kwikara omu businge, ebintu byona bisemeriire kukorwa omu mulingo ogutekaniziibwe kurungi. (1 Kol. 14:33) Yahwe Ruhanga akooleka amagezi n’okugumiisiriza obwakaba nakorra hamu na Yesu kuteekaniza ensi mpora mpora atakahangire abantu. Yesu na  uwe naija kwoleka emiringo niyo emu omu kasumi ak’Obulemi bwe obw’Emyaka Rukumi, obwaraaba nakorra hamu n’abantu abaraaba bakizire Haramagedoni kutekaniza ensi kuhumbuuka kutakabaireho.

6. Kusigikirra ha Engeso Ezabakwenda 24:15, nibaha abaraaba bamu hali abo Yahwe abarahumbuura?

⁶ Ekirukukira obukuru, abo abaraaba bakizire Haramagedoni nibaija kwegesa abantu abaraaba bahumbuukire ha Bukama bwa Ruhanga hamu n’ebya Yahwe agonza. Habwaki? Habwokuba abantu abarukukira obwingi abarahumbuuka nibaija kuba bamu ‘h’abatahikiriire.’ (Soma Engeso Ezabakwenda 24:15.) Abantu banu nikiija kubetaagisa kukora empindahinduka nyingi kusobora kugasirwa omu kicunguro kya Yesu. Tekerezaaho omulimo ogw’amaani ogulyetaagwa kukorwa kusobora kwegesa obukaikuru n’obukaikuru bw’abantu abakaba batamanyire Yahwe. Buli muntu baramwegesa wenka nk’oku twegesa abantu Baibuli omu kasumi kanu? Abahyaka banu barateekwa omu bitebe kandi batendekwe omulingo basobora kwegesa abo abarahumbuuka hanyuma yabo? Katulinde turole ekiraabaho. Baitu ekitumanyire kiri ngu, nambere Obulemi bwa Kristo obw’Emyaka Rukumi burahwera, “ensi niija kuba ijwire okumanya Yahwe.” (Is. 11:9, NW) Akasumi kanu ak’emyaka rukumi nikaija kubamu ebintu bingi eby’okukora kandi ebirukusemeza!

7. Habwaki abantu ba Yahwe nibaija kukwatirwa embabazi abahumbuukire obubaraaba nibabegesa?

⁷ Omu kasumi k’Obulemi bwa Kristo obw’Emyaka Rukumi, abantu ba Yahwe abaraikara omu nsi, nikiija kubetaagisa kukora empindahinduka nukwo bamusemeze. Nahabweki nibaija kwoleka embabazi obubaraaba nibakonyera abo abahumbuukire kuleka entekereza embi hamu n’okworobera emisingi ya Yahwe. (1 Pet. 3:8) Hataroho okugurukyagurukya, abarahumbuuka nibaija kufooka banywani ba bantu ba Yahwe abebundaazi abarukwija kuba nabo nibakolerra “okujunwa [kwabo].”​—Baf. 2:12.

8. Habwaki kihikire kutekereza ngu abo abarukwija kutangirra abantu baabo abahumbukire nibaija kusobora kubamanyirra?

⁸ Haroho ensonga nyingi habwaki nitusobora kugamba ngu abaliba nibatangirra abantu baabo abahumbuukire, balisobora kubamanyirra. Ekyokurorraho, kusigikirra ha kuhumbuuka okw’abaireho kara, nikizooka ngu Yahwe naija kuhumbuura abantu nibazooka, nibabaza, kandi nibatekereza nk’oku bakaba bali batakafiire. Ijuka ngu Yesu akalengesaniza okufa n’okukwijagira kandi okuhumbuuka n’okusisimuka omuturo. (Mat. 9:18, 24; Yoh. 11:11-13) Abantu obu basisimuka, baba nibakyazooka kandi nibabaza nk’oku baikaire batakakwijagiire kandi baikara nibaijuka ebintu ebi bamanyire. Tekerezaaho ekyokurorraho kya Lazaro. Akaba amazire ebiro bbina afiire nahabweki omubiri gwe gukaba gutandikire kujunda. Baitu Yesu obuyamuhumbwire, bagenzi be aho naaho bakamumanyirra.​—Yoh. 11:38-44; 12:1, 2.

9. Habwaki abantu batarukwija kuhumbuuka bafookere abahikiriire?

⁹ Yahwe n’araganiza ngu busaho muntu ow’aliba n’aikara hansi y’obulemi bwa Kristo aligamba ati: “Ndi murwaire.” (Is. 33:24; Bar. 6:7) Nahabweki abo abarahumbuuka nibaija kuba baine emibiri etaine burwaire. Baitu tibarukwija kufookeraho abahikiriire. Habwokuba kakuba bafookeraho abahikiriire nikisobora kugumira abantu baabo kubamanyirra. Nikizooka ngu abantu boona nibaija kufooka abahikiriire mpora mpora omu kasumi ak’Obulemi bwa Kristo obw’Emyaka Rukumi. Yesu naija  kugarurra Ise Obukama ha kumalirra okw’emyaka Rukumi. Obu nubwo Obukama buraaba buhikiriize emirimo yabwo yoona otwaliiremu n’okukonyera abantu kufooka abahikiriire.​—1 Kol. 15:24-28; Kus. 20:1-3.

10. Okuhumbuuka nikwija kukuletera kwehurra ota?

¹⁰ Tekerezaaho omulingo olyehurra obw’oliba n’otangirra abantu baawe abahumbuukire. Okusemererwa okw’olitunga kulikuletera kuseka rundi kurra? Olizina kandi okugize Yahwe? Baitu ekiturukugumya kiri ngu noija kugonza muno Isiitwe ow’omu iguru hamu n’Omwana we habw’ekisembo ekirungi eky’okuhumbuuka.

11. Kusigikirra ha bigambo bya Yesu ebiri omu Yohana 5:28, 29, kiki ekirihika hali abo abalyorobera Ruhanga?

¹¹ Tekerezaaho okusemererwa abahumbuukire okubalitunga obubaliba nibakora empindahinduka omu bwomeezi bwabo kusobora kworobera Ruhanga. Abo abalizikora nibaija kwomeera ebiro n’ebiro omu rugonjo orurungi. Baitu abo abalijeemera Ruhanga, talibaikiriza kumaraho abandi obusinge omu rugonjo rwe orurungi.​—Is. 65:20; soma Yohana 5:28, 29.

12. Yahwe naija kuha ata omugisa abo boona abaliba omu nsi?

¹² Hansi y’Obukama bwa Ruhanga, abantu ba Ruhanga boona nibaija kwerorra amananu agali omu Enfumo 10:22 orukugamba ruti: “Omugisa gwa Mukama gutungisa itungo, kunu tayongeraho obujune.” Omwoyo gwa Yahwe nigwija kukonyera abantu be kufooka baguuda omu by’omwoyo, ekirukumanyisa ngu nibaija kweyongera kutunga emiringo nk’eya Yesu kandi mpora mpora bafooke abahikiriire. (Yoh. 13:15-17; Bef. 4:23, 24) Buli kiro emibiri yaabo niija kweyongera amaani, kandi beyongere kufooka abantu abarungi. Mali obwomeezi kanibwija kuba burungi! (Yob. 33:25) Kwecumitiriza ha kuhumbuuka nikisobora kita kutukonyera omu kasumi kanu?

13. Omu Zabuli 139:1-4 nihooleka ki ha mulingo Yahwe atumanyiremu, kandi okuhumbuuka nikwija kugumya kuta ensonga egi?

¹³ Nk’oku tusangirwe turozere, Yahwe obwalihumbuura abantu naija kubasobozesa kwijuka ebibakaba bamanyire kandi abagarurre emiringo yabo. Eki nikyoleka ki? Nikyoleka ngu Yahwe na kugonza muno, amanyire, kandi naijuka byona eby’otekereza, omulingo oyehurra, eby’obaza kandi n’eby’okora. Nukwo, kakuba kyetaagisa kukuhumbuura, naija kukusobozesa kwijuka eby’okaba omanyire, akugarurre entekereza yaawe, hamu n’emiringo okaba oine. Omukama Daudi akaba akimanyire ngu Yahwe amanyire buli omu wena kurungi. (Soma Zabuli 139:1-4.) Tukwatwaho tuta obutukimanya ngu Yahwe atumanyire kurungi?

14. Kwecumitirizaaho omulingo Yahwe atumanyire kurungi kisemeriire kutukwataho kita?

¹⁴ Obutwecumitirizaaho omulingo Yahwe atumanyire kurungi, titusemeriire kweralikirra. Habwaki? Ijuka ngu Yahwe natufaaho muno. Arora buli omu wena nk’ow’omuhendo hali we. Ateekaho omutima ebintu ebitwarabiremu ebituletera kwetwaza nk’oku twetwaza. Eki nikituhumuuza muno! Nahabweki busaho kaire koona akatusemeriire kwehurra ngu tuli itwenka. Buli kaire koona Yahwe ali naitwe kandi n’agonza kutukonyera.​—2 Byom. 16:9.

15. Kuhumbuuka nikwoleka kuta ngu Yahwe aine amagezi maingi?

¹⁵ Abantu abarukutiina kufa nibasobora kukora ekintu kyona kakuba babatinisiriza  kubaita. Abantu abarukulemwa Sitaani batinisiriza abantu ngu nibaija kubaita nukwo babahambirize kugobeza banywani baabo rundi kwehakana enyikiriza zaabo. Baitu itwe tibasobora kutuhambiriza kukora ebibarukwenda. Habwokuba tukimanyire ngu abanyanzigwa baitu n’obubakutwita, Yahwe naija kutuhumbuura. (Kus. 2:10) Nitukigumiza kimu ngu busaho kintu kyona ekibasobora kukora ekisobora kusiisa enkoragana yaitu na Yahwe. (Bar. 8:35-39) Yahwe ayolekere ngu aine amagezi maingi kuraba omu kutuha okunihira okw’okuhumbuuka! Okunihira kunu kutukonyera kutatinisirizibwa abasagiki ba Sitaani, kandi kutukonyera kutunga obumanzi obw’amaani obutusobozesa kwikara tuli besigwa hali Yahwe

16. Bikaguzo ki eby’osemeriire kwekaguza, kandi ebigarukwamu nibisobora bita kukukonyera kumanya obworaaba noyesiga Yahwe ekirukumara?

¹⁶ Kakuba abanyanzigwa ba Yahwe bakutinisiriza kukwita, orayesiga Yahwe ngu naija kukuhumbuura? Eki nosobora kukimanya ota? Omulingo ogumu nugwo ogw’okwekaguza oti, ‘Encwamu entaito ezinkora buli kiro nizooleka ngu ninyesiga Yahwe?’ (Luk. 16:10) Nosobora n’okwekaguza oti, ‘Omulingo ntwazaamu obwomeezi bwange nigwoleka ngu ninyesiga omurago gwa Yahwe ogw’okundolerra kakuba nyebembeza Obukama?’ (Mat. 6:31-33) Kakuba ogarukamu ebikaguzo binu oti ego, eki nikyoleka ngu noyesiga Yahwe kandi oyetekaniize kuraba omu kulengesebwa kwona okw’oratangatangana.​—Nfu. 3:5, 6.

17. (a) Okuhumbuuka nikwoleka kuta ngu Yahwe nagumiisiriza? (b) Nitusbora kwoleka tuta ngu nitusiima habw’okugumiisiriza kwa Yahwe?

¹⁷ Yahwe amazire kutekaho ekiro n’esaaha nambere alihwerekerereza ensi enu embi. (Mat. 24:36) Tarukwija kukikora obwire obu butakahikire. Aine ekihika kingi eky’okuhumbuura abafu, baitu akyagumisiriize. (Yob. 14:14, 15) Alinzire akasumi akahikire kahike nukwo ahumbuule abafu. (Yoh. 5:28) Haroho ensonga nyingi habwaki tusemeriire kusiima Yahwe habw’okugumiisiriza kwe. Kitekerezeeho: Habwokuba Yahwe n’agumiisiriza, abantu baingi, otwaliremu naitwe, batungire omugisa “kwegarukamu.” (2 Pet. 3:9) Yahwe n’agonza abantu baingi batunge omugisa ogw’okutunga obwomeezi obutahwaho. Nahabweki leka naitwe tugumiisirize nka uwe. Omu mulingo ki? Kuraba omu kwekamba kuserra abo abaine “entekereza enungi ey’esobora kubaleetera kutunga obwomeezi obutahwaho” kandi n’okubakonyera  kugonza Yahwe hamu n’okumuheereza. (Eng. 13:48, NW) Nukwo nabo basobole kugasirwa omugumiisiriza kwa Yahwe nk’oku naitwe tugasiirwe.

18. Habwaki tusemeriire kugumiisiriza abandi?

¹⁸ Yahwe naija kugumiisiriza kuhika obutulifooka abahikiriire ha kumalirra kw’emyaka rukumi. Akasumi ako obukaliba katakahikire, Yahwe alikara n’atuganyira ebibi byaitu. Nahabweki naitwe tuhondere ekyokurorraho kye, tugumizeemu nituteeka omutima ha miringo enungi ey’abandi baine kandi nitubagumiisiriza. Tekerezaaho ekyokurorraho ekya munyaanya itwe omu. Musaija we akatunga oburwaire obw’okweralirra kihinguraine kandi yaleka kugenda omu nsorrokano. Nagamba ati:“Kinu kikansaaliza muno, kandi n’ebintu ebitwali tutekaniize kukora hamu byali bitakyasoboka.” Baitu omu bizibu binu byona, nyina bwenge onu ow’okugonza akagumiisiriza musaija we. Akesiga Yahwe kandi atahwemu amaani. Nka Yahwe, omutima akaguteeka ha miringo ya iba enungi. Nagamba ati: “Musaija wange aine emiringo nyingi enungi, kandi nakora kyona ekyarukusobora kurwanisa oburwaire bunu.” Mali kikuru muno tugumisirize ab’omu maka gaitu hamu na b’omu kitebe abarukuraba omu bizibu!

19. Kiki ekitusemeriire kucweramu kimu kukora?

¹⁹ Yesu hamu na bamalaika bakasemererwa ensi obuyahangirwe. Baitu tekerezaaho okusemererwa okubalitunga ensi obwerijurwamu abantu abahikiriire, abarukugonza Yahwe, kandi abarukumuheereza. Tekerezaaho okusemererwa abo abaligenda omu iguru kulema hamu na Kristo balitunga obubalirora omulingo omulimo ogubaliba nibakora nigugasira abantu. (Kus. 4:4, 9-11; 20:4, 6) Kandi teramu akasisani haroho okusemererwa kwonka hataroho kurra habw’obusaasi, oburwaire, okuganya, hamu n’okufa. (Kus. 21:4) Baitu akasumi ako katakahikire cweramu kimu kuhondera ekyokurorraho kya Isiitwe ow’okugonza, ow’amagezi, kandi ow’agumiisiriza. Obworakora eki noija kwikara oine okusemererwa n’obw’oralengwa. (Yak. 1:2-4) Nitusiima muno Yahwe ha bw’okuturaganiza ngu “halibaho okuhumbuka”!​—Eng. 24:15.