1. Bikaguzo ki ebitusobora kwekaguza obututekerezaaho ebintu byona Yahwe ebiyahangire?

OBUTUTEKEREZAAHO ebintu byona Yahwe ebiyahangire, nitusobora kwehurra nk’omuhandiiki wa zabuli Daudi ayasabire Yahwe ati: “Obuntekereza iguru lyawe, emirimo eyenkumu zawe, nokwezi nenyunyuzi, ebiwataireho; Omuntu kiki, iwe okumuijuka? Kandi omwana womuntu, iwe [okumufaaho]?” (Zab. 8:3, 4) Nka Daudi, nitusobora kutekerezaaho omulingo tuli bataito obworukutulengesaniza n’ebintu ebindi Yahwe ebiyahangire, kandi nikisobora kutuhuniriza ngu Yahwe n’atufaaho. Baitu nitwija kurora nk’oku Yahwe akaba nafaaho abantu ab’okubanza Adamu na Hawa, kandi yabafoora kicweka ky’eka ye.

2. Kigendererwa ki Yahwe eky’akaba ainiire Adamu na Hawa?

² Adamu na Hawa bakaba bali baana ba Yahwe ab’okubanza omu nsi, kandi akaba ali Isebo ow’omu iguru ow’okugonza. Akabaha omulimo ogw’okukora. Ruhanga akabagambira ati: “Muzalege, mukanye, muijuze ensi, mugirye.” (Kub. 1:28) Akaba n’agonza bazaale abaana kandi barolerre ensi ey’ekaba eri ka yabo. Kakuba bayorobiire Ruhanga kandi bakora ekyaba abaragiire, Adamu, Hawa, hamu n’abaana baabo bakwikaire bali kicweka ky’eka ya Yahwe ebiro n’ebiro.

3. Habwaki nitusobora kugamba ngu Adamu na Hawa bakaba baine ekiikaro eky’ekitiinisa omu ka Yahwe?

³ Adamu na Hawa bakaba baine ekiikaro eky’ekitiinisa omu ka ya Yahwe. Nk’oku kyolekerwe omu Abaheburaniya 2:7 Baibuli n’ebazaaho okuhangwa kw’omuntu eti: “Okamukora okuburaho kake okuba nka bamaraika: okamutaho ekondo eyekitinisa  nokutinwa.” (Baheb. 2:7) Ky’amananu ngu, Yahwe atahe abantu amaani, amagezi, hamu n’obusobozi nk’obwa bamalaika. (Zab. 103:20) Baitu abantu ‘nibaburaho kataito’ kuba nka bamalaika ab’amaani. Mali kinu nikihuniriza! Yahwe obuyahangire abazaire baitu ab’okubanza akabaha obwomeezi oburungi!

4. Kiki ekyahikire hali Adamu na Hawa habw’okujeemera Yahwe, kandi kiki ekiturukwija kubazaaho omu kicweka kinu?

 ⁴ Eky’obusaasi, Adamu na Hawa bakafeerwa ekiikaro kyabo eky’okuba omu ka Yahwe. Kinu kikarugamu ebizibu eby’amaani hali abaijukuru baabo, nk’oku turukwija kurora omu kicweka kinu. Baitu ekigendererwa kya Yahwe tikikahindukaga. N’agonza abantu abarukumworobera kuba baana be ebiro n’ebiro. Leka tubanze tubazeeho omulingo Yahwe atutairemu ekitiinisa. Hanyuma nitwija kubazaaho ebitusobora kukora hati kwoleka ngu nitugonza kuba kicweka ky’eka ya Ruhanga. Ha kumalirra, nitwija kubazaaho emigisa abaana ba Ruhanga ab’omu nsi balyegondezaamu ebiro n’ebiro.

5. Nitusobora tuta kwoleka ngu nitusiima Yahwe habw’okutuhanga omu kisisani kye?

⁵ Yahwe akatutamu ekitiinisa obuyatuhangire omu kisisani kye. (Kub. 1:26, 27) Habwokuba tukahangwa omu kisisani kya Ruhanga, nitusobora kukurakuraniza hamu n’okwoleka emiringo ye emiringi nk’okugonza, embabazi, obwesigwa, hamu n’okuhikirra. (Zab. 86:15; 145:17) Obutukurakuraniza emiringo nk’egi, tuhaisa Yahwe ekitiinisa kandi twoleka ngu nitumusiima. (1 Pet. 1:14-16) Obutwetwaza omu mulingo ogurukusemeza Isiitwe ow’omu iguru, tutunga okusemererwa hamu n’okumarwa. Kandi habw’okutuhanga omu kisisani kye, Yahwe akatuha obusobozi obw’okukurakuraniza emiringo enungi ey’abantu abasemeriire kwikara omu ka ye.

6. Yahwe akooleka ata ngu n’ateekamu abantu ekitiinisa obw’akaba n’ateekaniza ensi?

⁶ Yahwe akatutekaniriza eka ey’embaganiza. Yahwe obw’akaba atakahangire omuntu ow’okubanza, akabanza kutekaniriza abantu ensi. (Yob. 38:4-6; Yer. 10:12) Yahwe habwokuba aine embabazi kandi mugabi, akahanga ebintu bingi ebirungi ebitusobora kwegondezaamu. (Zab. 104:14, 15, 24) Obwire obumu yatwaraga obwire kutekerezaaho ebiyahangire kandi ‘yaroraga bisemiire.’ (Kub. 1:10, 12, 31) Yahwe akooleka ngu nateeka abantu ekitiinisa obuyabahaire obusobozi obw’okulema ebintu ebirungi ebiri omu nsi. (Zab. 8:6) Ruhanga n’agonza abantu abahikiriire kwegondeza omu kurolerra ebintu ebirungi ebiyahangire habw’ebiro n’ebiro. Osiima Yahwe butoosa habw’omurago ogu omurungi?

7. Yosuha 24:15 n’eyoleka eta ngu abantu baine obugabe obw’okwecweramu?

⁷ Yahwe akatuha ekisembo eky’okwekorra encwamu. Nitusobora kwecweramu eky’okukora omu bwomeezi. (Soma Yosuha 24:15.) Ruhanga waitu ow’okugonza asemererwa muno obutucwamu kumuheereza. (Zab. 84:11; Nfu. 27:11) Nitusobora kukozesa obugabe bwaitu obw’okwecweramu kukora encwamu ezindi enungi. Tekerezaaho ekyokurorraho Yesu ekiyatuteriireho.

8. Bazaaho ekyokurorraho ekirukwoleka omulingo Yesu y’akozeseze obusobozi bwe obw’okwecweramu?

⁸ Nitusobora kwegera ha kyokurorraho kya Yesu kurabira omu kwebembeza ebyetaago eby’abandi omu kiikaro eky’ebyaitu. Kiro kimu Yesu hamu n’abakwenda be obukaba bajwahire muno, bakagenda omu kiikaro ekiculiire muno kusobora kuhuumuraho. Baitu eki kitasoboke. Ekitebe ky’abantu kikaija nambere bali kandi bakaba baine ekihika ky’okwegesebwa Yesu. Baitu Yesu atabiihirwe.  Oihireho, akabakwatirwa embabazi. Kiki Yesu ekiyakozere? Akatandika “okubegesa ebigambo bingi.” (Mar. 6:30-34) Obutwegera ha kyokurorraho kya Yesu tukefeereza obwire n’amaani gaitu kukonyera abantu abandi, tuhaisa Isiitwe ow’omu iguru ekitiinisa. (Mat. 5:14-16) Kandi twoleka Yahwe ngu nitugonza kuba kicweka ky’eka ye.

9. Kiki abazaire ekibasemeriire kwikara nibaijuka?

⁹ Yahwe ahaire abantu obusobozi obw’okuzaara abaana hamu n’obujunanizibwa obw’okubegesa kumugonza n’okumuheereza. Obworaaba oli muzaire, osiima habw’ekisembo kinu eky’embaganiza? N’obukiraaba ngu Yahwe ahaire bamalaika emigisa nyingi, atabahe omugisa gunu ogw’okuzaara abaana. Nahabweki obworaaba oli muzaire, omugisa ogw’okukuza abaana gutwale nk’ekintu eky’omuhendo. Abazaire bahairwe obujunanizibwa obukuru muno obw’okukuliza abaana “omu kuhanwa nomukugambirirwa kwa [Yahwe].” (Bef. 6:4; Bir. 6:5-7; Zab. 127:3) Kusobora kukonyera abazaire, ekitebe kya Ruhanga kiturukize ebikwato ebirukusigikirra ha Baibuli nk’ebitabu, vidiyo, ebizina, hamu n’ebicweka ebiri ha mukura. Kinu nikyolekera kimu ngu Isiitwe ow’omu iguru hamu n’Omwana we bagonza muno abato. (Luk. 18:15-17) Abazaire obu besiga Yahwe kandi bakakora kyona ekirukusoboka kurolerra abaana baabo ab’omuhendo, Yahwe asemererwa. Kandi abazaire nk’abo bakonyera abaana baabo kutunga okunihira okw’okuba kicweka ky’eka ya Yahwe ebiro n’ebiro!

10-11. Kiki Yahwe eky’atusobozeseze kutunga habw’ekicunguro?

¹⁰ Yahwe akahayo Omwana we arukukirayo omuhendo nukwo tusobole kwongera kuba kicweka ky’eka Ye. Nk’oku turozerege omu  kacweka ka 4, Adamu na Hawa bakafeerwa ekiikaro kyabo omu ka ya Yahwe kandi bakifeereza n’abaana baabo. (Bar. 5:12) Adamu na Hawa bakajeemera Ruhanga bakigenderiire nahabweki kikaba kihikire kubabinga muka ye. Baitu kiki ekyakuhikire h’abaana baabo? Yahwe n’agonza abantu nahabweki akasobozesa abaana baabo abarukumworobera kutunga omugisa ogw’okuba kicweka ky’eka ye. Kinu akakikora kurabira omu kuhayo Omwana we omugonzebwa Yesu Kristo nk’ekihongwa. (Yoh. 3:16; Bar. 5:19) Ekihongwa kya Yesu kikasobozesa abantu 144,000 abesigwa kufooka baana ba Ruhanga.​—Bar. 8:15-17; Kus. 14:1.

¹¹ Ekindi, obukaikuru n’obukaikuru obw’abantu abandi abesigwa nibakora Yahwe eby’agonza. Nabo baine omugisa ogw’okufooka kicweka ky’eka ya Ruhanga hanyuma y’okulengesebwa okw’okumalirra okulibaho ha mpero y’Emyaka Rukumi. (Zab. 25:14; Bar. 8:20, 21) Habwokuba baine okunihira oku, n’omu kasumi kanu Yahwe Omuhangi wabo, bamweta ‘Isebo.’ (Mat. 6:9) Abarahumbuuka nabo nibaija kuheebwa omugisa ogw’okwegesebwa Yahwe ebyarukugonza bakole. Abo abaracwamu kuhondera oburagirizi bwe, nabo nibaija kufooka kicweka ky’eka ye.

12. Kikaguzo ki ekiturukugenda kugarukamu?

¹² Nk’oku turozere, Yahwe akozere ebintu bingi kwoleka ngu n’atwaza abantu omu mulingo ogw’ekitiinisa. Aikiriize abaseserweho amagita kuba baana be, kandi ahaire ‘ab’ekitebe kingi’ okunihira okw’okufooka baana be omu nsi empyaka. (Kus. 7:9) Kiki ekitusobora kukora hati, kwoleka Yahwe ngu nitugonza kufooka kicweka ky’eka ye ebiro n’ebiro?

13. Kiki ekitusemeriire kukora kufooka kicweka ky’eka ya Ruhanga? (Marako 12:30)

¹³ Yoleka ngu nogonza Yahwe kuraba omu kumuheereza n’omutima gwawe gwona. (Soma Marako 12:30.) Yahwe habw’embabazi ze atuhaire ebisembo bingi, kandi kimu ha bisembo  binu ekikyakizireyo nikyo eky’okutuha obusobozi obw’okumuramya. Twoleka ngu nitumugonza obutworobera “ebiragirobye.” (1 Yoh. 5:3) Kimu ha biragiro Yahwe ebyarukugonza tworobere nikyo ekiragiro Yesu ekiyahaire abegeswa be eky’okufoora abantu abegeswa kandi n’okubabatiza. (Mat. 28:19) Ekindi akaturagira kugonzangana. (Yoh. 13:35) Yahwe naija kufoora abantu abamworobera kicweka ky’eka ye ey’abantu abarukumuramya omu nsi yoona.​—Zab. 15:1, 2.

14. Nitusobora tuta kwoleka abandi okugonza? (Matayo 9:36-38; Abarumi 12:10)

¹⁴ Twolekengana okugonza. Okugonza nugwo mulingo gwa Yahwe ogurukukirayo obukuru. (1 Yoh. 4:8) Yahwe akatwoleka okugonza tutakamumanyire. (1 Yoh. 4:9, 10) Twegera ha kyokurorraho kye obutwoleka abandi okugonza. (Bef. 5:1) Gumu ha mulingo ogurukukirayo ogutusobora kwoleka ngu nitugonza abantu, nugwo ogw’okubakonyera kwega ebirukukwata hali Yahwe obwire butakahwoireyo. (Soma Matayo 9:36-38.) Obuturabakonyera, nibaija kumanya ekibasemeriire kukora kusobora kufooka kicweka ky’eka ya Ruhanga. Hanyuma y’omuntu kubatizibwa, tusemeriire kugumizaamu nitumugonza kandi nitumuteekamu ekitiinisa. (1 Yoh. 4:20, 21) Kinu nikitwarramu ki? Kimu halibyo, nukwo kumwoleka ngu nitumwesiga. Ekyokurorraho, titurukugonza kutekereza ngu aine ebigendererwa ebitahikire rundi ngu n’ayegondeza wenka. Oihireho nitusobora kwoleka ngu nitutekamu ow’oruganda ekitiinisa, obutumurora nk’ow’arukutukira.​—Soma Abarumi 12:10; Baf. 2:3.

15. Nibaha abatusemeriire kwoleka embabazi?

¹⁵ Yoleka abantu boona embabazi. Obuturaaba nitugonza kufooka kicweka ky’eka ya Yahwe habw’ebiro n’ebiro, tusemeriire kuteeka omu nkora ebintu ebiri omu Kigambo kye. Ekyokurorraho, Yesu akeegesa ngu tusemeriire kwoleka abantu boona embabazi otwaliiremu n’abanyanzigwa baitu. (Luk. 6:32-36) Baitu obwire obumu kinu nikisobora kutugumira kukikora. Nahabweki, tusemeriire kwega kutekereza kandi n’okwetwaza nka Yesu. Obutukora kyona ekirukusoboka kworobera Yahwe hamu n’okwegera hali Yesu, twoleka Isiitwe ow’omu iguru ngu nitugonza kuba kicweka ky’eka ye ebiro n’ebiro.

16. Nitusobora tuta kulinda ekitiinisa ky’eka ya Yahwe?

¹⁶ Linda ekitiinisa eky’eka ya Yahwe. Omu maka ga buli kiro, omwojo omuto akira kukopa ebya mugenzi we omwojo omukuru eby’akora. Omukuru obw’ateeka omu nkora emisingi ya Baibuli omu bwomeezi bwe, ateeraho omuto ekyokurorraho ekirungi. Baitu omwojo omukuru obw’akora ebibi, na muto we n’asobora kuhondera ekyokurorraho kye ekibi. Nikyo kimu n’omu ka ya Yahwe. Omukristaayo omwesigwa obw’afooka muhakaniza, rundi omusihani, rundi akakora ebintu ebindi ebibi, abandi nibasobora kuhondera ekyokurorraho kye nibatandika kukora ebibi. Abo abakora eki, basiisa ibara ery’eka ya Yahwe. (1 Bas. 4:3-8) Titusemeriire kwikiriza ekyokurorraho kyabo ekibi kutuleetera kuruga hali Isiitwe ow’omu iguru ow’okugonza.

17. Ntekereza ki eitusemeriire kwetantara, kandi habwaki?

¹⁷ Wesige Yahwe omu kiikaro ky’itungo. Yahwe n’aturaganiza ngu naija kutuha ebyokulya, eby’okujwara, hamu n’oburaaro kakuba tubanza kuserra Obukama bwe kandi tukahondera endengo ze ez’okuhikirra. (Zab. 55:22; Mat. 6:33) Obuturayesiga omurago ogu, titurukwija kutekereza ngu ebintu eby’ensi nibiija kutuha obulinzi rundi kutuleetera okusemererwa. Tukimanyire ngu kukora Yahwe eby’agonza nikyo kyonka ekisobora kutuleetera obusinge bwonyini omu mutima. (Baf. 4:6, 7) N’obutuba twine obusobozi obw’okugura buli kimu kyona  ekiturukugonza, tusemeriire kubanza kwekaguza obuturaaba twine obwire, rundi amaani ag’okubikozesa n’ag’okurolerra ebintu ebi. Nitusobora kutandika kugonza ebintu byaitu ekihinguraine. Tusemeriire kukiijuka ngu Yahwe atuhaire emirimo y’okukora omu ka ye. Eki nikimanyisa ngu, titusemeriire kwikiriza ekintu kyona kutuhugura. Titurukugonza kuba nk’omusigazi ayayangire omugisa ogw’okuheereza Yahwe n’ogwokuba omu h’abaana ba Ruhanga habw’okugonza muno itungo lye ery’omu nsi!​—Mar. 10:17-22.

18. Kitiinisa ki eky’amaani hamu n’emigisa abantu abahulizi eyibalyegondezaamu ebiro n’ebiro?

¹⁸ Abantu abahulizi, nibaija kwegondeza omu mugisa ogurukukirrayo kimu​—ogw’okugonza n’okuramya Yahwe ebiro n’ebiro! Abo abaine okunihira okw’okwikara omu nsi nibaija kuba n’okusemererwa habw’okurolerra ensi, Yahwe eiyahangire kuba eka yabo. Omu kasumi akatali kahara, Obukama bwa Ruhanga nibwija kusemeza ensi hamu n’ebintu byona ebirumu. Yesu naija kumaraho ebizibu byona eby’azireho habw’encwamu ya Adamu na Hawa ey’okwecwaho eka ya Ruhanga. Yahwe naija kuhumbuura obukaikuru n’obukaikuru bw’abantu kandi abahe omugisa ogw’okutunga obwomeezi obutahwaho kandi obuhikiriire omu nsi ey’eriba efookere Orugonjo Orurungi. (Luk. 23:42, 43) Abantu abarukuheereza Yahwe boona obubalifooka bahikiriire nibaija kuba ‘n’ekitinisa n’okutinwa’ Baibuli ebiyabalizeeho.​—Baheb. 2:7.

19. Kiki ekitusemeriire kwikara nitwijuka?

¹⁹ Obworaaba oli omu ‘h’ab’ekitebe ekingi,’ oine okunihira okurungi muno. Ruhanga n’akugonza; kandi n’agonza obe omu h’ab’omu ka ye. Nahabweki, kora kyona ekirukusoboka kumusemeza. Buli kiro ikara notekerezaaho emirago ye. Omugisa ogw’okuramya Isiitwe ow’omu iguru hati hamu n’ogw’okumukugiza ebiro n’ebiro gutwale nk’ogw’omuhendo!