1. Bintu ki ebirungi abato baingi ebibakozere?

 BULI mwaka, enkumi n’enkumi z’Abakristaayo abato babatizibwa. Wakahikire ha idaara linu? Obworaaba olihikireho, kimanye ngu kisemiize ab’oruganda na banyaanya itwe boona omu kitebe, hamu na Yahwe! (Nfu. 27:11) Tekerezaaho ebintu ebirungi eby’omazire ira kukora. Ekyokurorraho, oyegesiibwe Baibuli n’obwegendereza, obundi kumara emyaka nyingi. Eby’oyegere bikugumiize kimu ngu Baibuli Kigambo kya Ruhanga. Kandi ekirukukira obukuru, omanyire kandi n’ogonza Ayahandiikisize ekitabu eki ekirukwera. Okugonza kwawe hali Yahwe kufookere kw’amaani ekikuletiire kwehayo kandi okabatizibwa. Okozere encwamu enungi muno!

2. Nitugenda kubazaaho ki omu kicweka kinu?

 ² Hataroho kugurukyagurukya, okwikiriza kwawe kukalengwa omu miringo nyingi obwokaba n’okurakurana kuhika ha idaara ery’okubatizibwa, baitu obw’orayeyongera kukura, noija kutangatangana ebirengo ebihyaka. Sitaani naija kulengaho kukuletera kulekeraaho kugonza Yahwe hamu n’okumuheereza. (Bef. 4:14) Tosemeriire kwikiriza ekintu nk’eki kukuhikaho. Kiki ekisobora kukukonyera kwikara oli mwesigwa hali Yahwe n’okuhikiiriza omurago gwawe ogw’okumuheereza? Osemeriire kugumizaamu n’okurakurana nukwo ofooke Omukristaayo ow’akuzire omu by’omwoyo. (Baheb. 6:1) Baitu eki, n’osobora kukikora ota? Eki nikyo turukugenda kubazaaho omu kicweka kinu.

3. Kiki Abakristaayo boona ekibasemeriire kukora hanyuma y’okubatizibwa?

³ Hanyuma y’okubatizibwa, itwena nitwetaaga kuteeka omu nkora obuhabuzi omukwenda Paulo yahaire Abakristaayo bagenzi be omu Efeso. Akabatererra kufooka Abakristaayo abakuzire omu by’omwoyo. (Bef. 4:13) Kinu nikimanyisa ngu bakaba basemeriire ‘kugumizaamu nibakurakurana omu by’omwoyo.’ Paulo akalengesaniza okukurakurana kwaitu nk’Abakristaayo n’omulingo omwana akuramu. Abazaire ab’omwana ayakazaarwa bamugonza muno kandi bamwenyumirizaamu. Baitu tasobora kwikara ali nkerembe ebiro n’ebiro. Obwire buhika, aleka “ebyobuto.” (1 Kol. 13:11) Nikyo kimu n’Abakristaayo. Hanyuma y’okubatizibwa, tusemeriire kugumizaamu nitukurakurana omu by’omwoyo. Leka tubazeeho amagezi agasobora kutukonyera kukikora.

4. Mulingo ki ogusobora kukukonyera kukurakurana omu by’omwoyo? Soborra. (Abafiripi 1:9)

⁴ Weyongere okugonza Yahwe. Yahwe n’omugonza muno. Baitu okugonza kwawe haluwe nikusobora kweyongerra kimu. Omu mulingo ki? Omukwenda Paulo, akabazaaho omulingo ogumu ogurukusangwa omu Abafiripi 1:9. (Soma.) Paulo akasaba ngu okugonza okw’Abakristaayo ab’omu Firipi “kweyongereyongerege okusaga.” Nahabweki okugonza kwaitu hali Yahwe nikusobora kweyongerra kimu. Eki nitusobora kukikora kuraba omu kutunga ‘okumanya nokwetegereza kwona.’ Obutweyongera kumanya Yahwe, tweyongera kumugonza, kusiima emiringo ye, n’omulingo akoramu ebintu bye. Tweyongera n’okwehurra nitugonza kumusemeza, kandi titugonza kukora ekintu kyona ekiramusaaliza. Tukora kyona ekiturukusobora kwetegereza ebyarukugonza tukole kandi n’omulingo tusobora kubikoramu.

5-6. Nitusobora tuta kukurakuraniza okugonza okutwiniire Yahwe? Soborra.

⁵ Nitusobora kukurakuraniza okugonza kwaitu hali Yahwe kuraba omu kumanya kurungi Omwana we, ayayegiire ha miringo ya Ise kikumi ha kikumi. (Baheb. 1:3) Omulingo ogurukukirayo oburungi ogw’okumanya Yesu, nugwo ogw’okwega ebitabu bbina eby’Enjiri. Obworaaba otaine entekaniza ey’okusoma Baibuli buli kiro, n’osobora kutandika hati n’osoma ebitabu by’Enjiri ebirukukwata hali Yesu. Obworaaba n’osoma, teeka omutima ha miringo ye. Abantu bagonzaaga kuba na uwe hamu n’okubaza na uwe; omu mulingo gw’okugonza, akakiikira abaana abato. (Mar. 10:13-16) Yesu, akaba aine embabazi, ali munywani mali, kandi abegeswa be tibatiinaga kumugambira omulingo barukwehurra. (Mat. 16:22) Omu mulingo gunu, Yesu akeegera hali Ise ow’omu iguru. Yahwe na uwe kyanguhire kumuhikirra. Nitusobora kumuhikirra omu kusaba. Obutumusaba, nitusobora kumugambire buli kimu kyona ekiri ha mutima gwaitu. Nitukigumya ngu tarukwija kutucwera omusango. N’atugonza kandi natufaaho.​—1 Pet. 5:7.

⁶ Yesu yasalirirwaga abantu. Omukwenda Matayo akagamba ati: “Obuyaboine ebitebe, yabakwatirwa embabazi, baitu bakaba bajwahire nibararanga nkentama ezitanyina mulisa.” (Mat. 9:36) Kandi uwe Yahwe ayehurra ata? Yesu akagamba ati: “Isenyowe ali omu iguru, tarukwenda omu hali banu abato okuhwerekerra.” (Mat. 18:14) Ebigambo binu nibituletera okusemererwa habwokuba nibyoleka ngu Yahwe natugonza muno! Obutweyongera kumanya Yesu kurungi, okugonza okutwiniire Yahwe kweyongera.

7. Kumara hamu obwire n’Abakristaayo abakuzire omu by’omwoyo, nikisobora kita kukukonyera?

⁷ N’osobora kweyongera kugonza Yahwe n’okurakurana omu by’omwoyo kuraba omu  kumara obwire n’ab’oruganda na banyaanya itwe omu kitebe kyawe. Wetegereze omulingo baine okusemererwa. Tibarukweyijukya habw’encwamu yabo ey’okuheereza Yahwe. Bakaguze bakugambire ebimu ha bintu ebibarabiremu omu buheereza bwabo hali Yahwe. Obw’orukuba oine encwamu enkuru ey’okukora, behanuzeeho. Ijuka ngu, “omu bahanuzi abaingi harumu [obusinguzi].”​—Nfu. 11:14.

8. Kiki eky’osobora kukora kakuba okyetegereza ngu otandikire kugurukyagurukya Baibuli ebyeyegesa?

⁸ Singura okugurukyagurukya. Nk’oku tusangirwege tukibalizeho omu  kacweka 2, Sitaani naija kulengaho kukulemesa kugumizaamu n’okurakurana omu by’omwoyo. Omulingo gumu ogw’asobora kukikora nugwo ogw’okukuletera kugurukyagurukya ebintu eby’oyegere kuruga Baibuli. Ekyokurorraho, omu kasumi katali kahara noija kuhurraho enyegesa ey’erukugamba ngu ebintu bitahangwe. N’osobora kuba otarakitekeriizeeho obwokaba okyali muto, baitu hati obw’okuzire nibasobora kuba nibakikwegesa ha isomero. Obundi abasomesa baawe ebibarukukugambira nibisobora kuzooka nk’ebirumu amakuru. Baitu nibasobora kuba batakatekerezaahoga obwakaiso oburukwoleka ngu haroho Omuhangi. Ijuka omusingi ogurukusangwa omu Enfumo 18:17, NWT ogurukugamba ngu: “Abanza okutongana asisana anyina obulyo; okuhikya omuntu ondi obwamukaguza ebikaguzo ahe obwakaiso.” Omu kiikaro ky’okwikiriza buli kimu kyona ekyorukwega ha isomero, wesomese n’obwegendereza Ekigambo kya Ruhanga, Baibuli. Kora okuseruliiriza omu bitabu byaitu. Wekaguzeeho ab’oruganda na banyaanya itwe abaikirizaaga kara ngu ebintu bitahangwe. Bakaguze kiki ekyabagumize ngu haroho Omuhangi ow’arukutugonza. Kubaza nabo, nikiija kukukonyera kumanya obwakaiso oburukwoleka ngu haroho Omuhangi.

9. Kiki ekiturukwega kuruga omu kyokurorraho kya Melissa?

⁹ Munyaanya itwe Melissa akagasirwa muno omu kuseruliiriza okuyakozere ha isomo erirukukwata ha buhangwa. * Nagamba ati: “Ha isomero abeegesa basoborra enyegesa erukugamba ngu ebintu bitahangwe omu mulingo ogurukwoleka ngu ehikire. Ha kubanza, nkaba ntarukugonza kukora okuseruliiriza. Habwokuba nkaba ntiinire ngu ninsobora kukizoora ngu enyegesa enu ehikire. Baitu nkatekereza  ngu Yahwe nagonza tube n’ensonga enungi habwaki nitwikiririza omu nyegesa ze. Nahabweki nkatandika kukora okuseruliiriza. Nkasoma akatabu akaine omutwe Is There a Creator Who Cares About You? na burocuwa Was Life Created? hamu na burocuwa The Origin of Life​—Five Questions Worth Asking. Kinu nikyo kyonyini ekinkaba ninyetaaga. Nkeyijukya ngu kakuba nkaba nkikozere kara.”

10-11. Kiki ekisobora kukukonyera kwikara oli mwecumi omu ngeso? (1 Abasesalonika 4:3, 4)

¹⁰ Yanga ebikorwa ebibi. Obworukuba okyali muto, otunga enyehurra z’amaani ez’okuteerana, kandi obwire obumu abantu abandi nibasobora kukusonasona kwejumbira omu busihani. Sitaani nagonza okorre ha kwegomba kwawe. Kiki ekisobora kukukonyera kwerinda kugwa omu kwohebwa oku? (Soma 1 Abasesalonika 4:3, 4.) Obw’osaba hali Yahwe, mugambire omulingo gwonyini ogw’orukwehurramu. Kandi musabe akugumye. (Mat. 6:13) Ijuka ngu Yahwe nagonza kukukonyera, hatali kukujunaana. (Zab. 103:13, 14) Baibuli nayo n’esobora kukukonyera. Melissa, outusangirwege tubalizeeho, akarwana muno kweyihamu ebitekerezo eby’obusihani. Nagamba ati: “Kusoma Baibuli buli kiro kikankonyera kwikara nindwanisa okwegomba kwange okubi. Kinu kikanyijukya ngu ndi wa Yahwe kandi ningonza kumuheereza.”​—Zab. 119:9.

¹¹ Otalengaho kwemarra ebizibu. Gambira abazaire baawe eby’orukurabamu. Ky’amananu ngu tikyanguhire kubazaaho ensonga nk’ezi, baitu kirungi okikole. Melissa nagamba ati: “Nkasaba Yahwe kumpa obumanzi kandi hanyuma nkagambira ise nyowe ekizibu kyange. Hanyuma y’eki, nkahurra ntungire okuhuumuzibwa kw’amaani. Nkakimanya ngu kinu kisemiize Yahwe.”

12. Nosobora ota kukora encwamu enungi?

¹² Webemberwe emisingi ya Baibuli. Obw’oragenda n’okura, abazaire baawe nibaija kukwikiriza kwekorra encwamu. Baitu hati, hakyaroho ebintu bingi eby’otakamanyire. N’osobora ota kwerinda kukora ensobi ey’erasiisa enkoragana yaawe na Yahwe? (Nfu. 22:3) Munyaanya itwe Kari nasoborra kiki ekyamukonyire kukora encwamu enungi. Akakyetegereza ngu Abakristaayo abakuzire omu by’omwoyo tibarukwetaaga ebiragiro omu buli nyikara ey’obwomeezi bwabo. Nagamba ati: “Nkaba ninyetaaga kwetegereza emisingi ya Baibuli hatali ebiragiro byonka.” Obworukuba n’osoma Baibuli, wekaguze: ‘Kiki enkaara zinu ekizirukunyegesa ha ntekereza ya Yahwe? Harumu emisingi ey’esobora kunkonyera kukora ekihikire? Obukiraaba nukwo kiri, ndagasirwa nta kakuba ngiteeka omu nkora?’ (Zab. 19:7; Is. 48:17, 18) Obworasoma Baibuli kandi okecumitirizaaho emisingi ey’erumu, nikiija kukwanguhira kukora encwamu ezirukusemeza Yahwe. Obworagumizaamu n’okurakurana noija kukyetegereza ngu torukwetaaga ebiragiro omu buli nyikara yoona habwokuba noija kuba noyetegereza entekereza ya Yahwe ha nsonga.

13. Abanywani abarungi nibasobora bata kukukonyera? (Enfumo 13:20)

¹³ Serra abanywani abarukugonza Yahwe. Abanywani aborakomamu, nibasobora kukukonyera kufooka Omukristaayo ow’akuzire omu by’omwoyo. (Soma Enfumo 13:20.) Munyaanya itwe Sara akaba atakyaine okusemererwa. Hanyuma, haroho ekintu ekyamukonyire kwongera kutunga okusemererwa kwe. Sara nagamba ati: “Nkatunga abanywani abarungi omu bwire obunkaba nimbetaagiramu. Nyowe hamu na munyaanya itwe ondi omuto twayesorozaaga hamu buli wiiki okwega Omunaara. Munywani wange ondi akankonyera kutandika kuha eby’okugarukamu omu nsorrokano. Habw’obukonyezi bwa banywani bange, nkatandika kutwara okwesomesa hamu  n’okusaba nk’ebintu ebikuru. Nkatandika kugumya enkoragana yange na Yahwe, kandi nayongera natunga okusemererwa.”

14. Julien akatunga ata abanywani abarungi?

¹⁴ N’osobora ota kutunga abanywani abarakukonyera omu by’omwoyo? Julien, ow’arukuheereza hati nk’omugurusi, nagamba ati: “Obunkaba nkyali muto, nkatunga abanywani abarungi abanakoraga nabo omu buheereza. Abanywani banu baali bekambi muno, kandi bakankonyera kurora omulingo obuheereza buleetamu okusemererwa. Nketeraho ekigendererwa eky’okuheereza nka payoniya. Ekindi, nkakyetegereza ngu ensonga habwaki nkaba ntaine abanywani baingi abarungi, eri ngu naserraga abanywani ab’emyaka yange bonka. Hanyuma, nkatunga abanywani bandi abarungi obunatandikire kuheereza ha Beseeri. Ekyokurorraho kyabo kikankonyera kuhinduramu omu by’okwesemeza byange, kandi kinu kikandetera kwirra haihi na Yahwe.”

15. Kutererra ki Paulo yahaire Timoseo okurukukwata h’abanywani? (2 Timoseo 2:20-22)

¹⁵ Kiki eky’osobora kukora kakuba okyetegereza ngu omuntu omu kitebe tali munywani murungi? Paulo akaba akimanyire ngu abantu abamu omu kitebe bakaba batarukwetwaza nk’Abakristaayo, nahabweki akatererra Timoseo kubetantara. (Soma 2 Timoseo 2:20-22.) Enkoragana yaitu na Yahwe y’omuhendo muno. Tuteiremu amaani maingi kugumya enkoragana yaitu na Yahwe, nahabweki titusemeriire kwikiriza omuntu weena kugicekya.​—Zab. 26:4.

16. Bigendererwa bya mulingo ki eby’osobora kweteraho?

¹⁶ Wetereho ebigendererwa ebirakugasira. Wetereho ebigendererwa ebiragumya okwikiriza kwawe kandi ebirakukonyera kufooka Omukristaayo ow’akuzire omu by’omwoyo. (Bef. 3:16) Ekyokurorraho, nosobora kucwamu kusemezaamu entekaniza yaawe ey’okusoma hamu n’okwesomesa Baibuli. (Zab. 1:2, 3) Rundi n’osobora kwongera ha mirundi ey’osaba buli kiro, kandi osabe kuruga ha mutima. Obundi noyetaaga kwegendereza obworukuba n’okomamu eby’okwesemeza n’omulingo okozesaamu obwire bwawe. (Bef. 5:15, 16) Yahwe obw’ararora noyekamba kukurakurana, naija kusemererwa.

17. Noija kugasirwa ota kakuba okonyera abantu abandi?

 ¹⁷ Noija kufooka Omukristaayo ow’akuzire omu by’omwoyo obworakonyera abantu abandi. Yesu akagamba ati: “Okugaba [kuleeta okusemererwa] okukira okuhebwa.” (Eng. 20:35) Noija kugasirwa kakuba okozesa obwire bwawe n’amaani gaawe ag’obusigazi kukonyera abantu abandi. Ekyokurorraho, nosobora kweteraho ekigendererwa ky’okukonyera abakuzire omu myaka hamu n’abaceke omu kitebe kyanyu. Nosobora kubakonyera kubagendera omu katale kubagurra ebintu rundi kubakonyera kukozesa ebyoma byabo ebyakalimagezi. Obworaaba oli w’oruganda wetereho ekigendererwa eky’okufooka omuheereza omu kitebe, habw’okugonza kukonyera Abakristaayo bagenzi baawe. (Baf. 2:4) Ekindi, yoleka okugonza abantu abatamanyire Yahwe kuraba omu kubatebeza amakuru marungi ag’Obukama. (Mat. 9:36, 37) Obukiraaba kisobokere wetereho ekigendererwa eky’okuheereza omu bumu ha buheereza obw’akasumi koona.

18. Kuheereza omu buheereza obw’akasumi koona nikisobora kita kukukonyera kukurakurana?

¹⁸ Obuheereza obw’akasumi koona nibusobora kukukonyera kugumizaamu n’okurakurana omu by’omwoyo. Kuheereza nka payoniya nikiija kukusobozesa kugenda omu Isomero ly’Abatebezi b’Obukama, kuheereza ha Beseeri, rundi omu kwombeka ebyombeko by’Obukama. Munyaanya itwe omuto Kaitlyn arukuheereza nka payoniya nagamba ati: “Kumara obwire omu buheereza n’Abakristaayo abakuzire omu by’omwoyo kikankonyera kwirra haihi na Yahwe hanyuma y’okubatizibwa. Ekyokurorraho kyabo kikanyekambisa kweyongera kwesomesa Baibuli n’okusemezaamu omulingo nyegesa.”

19. Migisa ki ey’orayegondezaamu obworagumizaamu n’okurakurana omu by’omwoyo?

¹⁹ Obworagumizaamu n’okurakurana omu by’omwoyo, noija kwegondeza omu migisa nyingi. Torukwija kukozesa amaani gaawe ag’obusigazi kukora ebintu ebitaine mugaso. (1 Yoh. 2:17) Torukwija kutunga obusaasi oburuga omu kukora encwamu embi. Oihireho noija kutunga obusinguzi, hamu n’okusemererwa kwonyini. (Nfu. 16:3) Ekyokurorraho kyawe ekirungi nikiija kwekambisa Abakristaayo bagenzi baawe abakuru n’abato. (1 Tim. 4:12) Kandi ekirukukirayo obukuru noija kwegondeza omu businge hamu n’okumarwa, okuruga omu kusemeza Yahwe hamu n’okuba n’enkoragana enungi na uwe.​—Nfu. 23:15, 16.